நீங்கள் தேடியது "government schools"

அரசுப் பள்ளிகளில் மட்டுமே பிள்ளைகளை சேர்க்கும் கர்நாடக கிராம மக்களின் முடிவு தற்போது பேசுபொருளாகியுள்ளது.

கர்நாடக மாநிலம் மாண்டியா மாவட்டத்தில் உள்ள மாதகவுடனகோப்பலு கிராமத்தில் உள்ள மக்கள் தங்கள் பிள்ளைகளை அரசுப் பள்ளிகளில் மட்டும் தான் சேர்க்கின்றனர்.

அரசுப் பள்ளிகளை ஊக்குவிக்கவும் கன்னட மொழியை பாதுகாக்கவும் தனியார் பள்ளிகளை இக்கிராம மக்கள் புறக்கணித்து வருகின்றனர்.

கடந்த 20 ஆண்டுகளாக இக்கிராமத்தில் இருந்து ஒருவர் கூட தனியார்ப் பள்ளியில் படிக்கவில்லை. இதுவரை தனியார்ப் பள்ளி வாகனங்கள் எதுவும் இக்கிராமத்திற்கு வந்ததில்லை.

தங்கள் குழந்தைகளுக்கு தரமான கல்வி மற்றும் அடிப்படை வசதிகளை அரசு செய்து கொடுத்துள்ளதாக கிராம மக்கள் தெரிவிக்கின்றனர். தற்போது, இக்கிராமத்தில் 20க்கும் மேற்பட்ட குழந்தைகள் படிக்கின்றனர். இக்கிராமத்தில் இருந்து அரசுப் பள்ளியில் படித்த முன்னாள் மாணவர்கள் பெங்களூரு, மைசூர் போன்ற இடங்களில் பணிபுரிகின்றனர்.

திருச்சி:

மகாவிஷ்ணுவை பள்ளியில் பேசுவதற்கு அழைத்து வந்தவர்கள் மீது கடும் நடவடிக்கை எடுக்க வேண்டும் என துரை வைகோ தெரிவித்துள்ளார். இது தொடர்பாக செய்தியாளர்களிடம் அவர் கூறியதாவது;-

"மகாவிஷ்ணு பேசியது ஆன்மிக சொற்பொழிவு அல்ல, அது சனாதன சொற்பொழிவு. ஆன்மிகம் என்பது வேறு, சனாதனம் என்பது வேறு. மகாவிஷ்ணு உண்மையான இந்து கிடையாது. இந்து மதத்தை பயன்படுத்தி வியாபாரம் செய்பவர். அவரை பள்ளியில் பேசுவதற்கு அழைத்து வந்தவர்கள் மீது கடும் நடவடிக்கை எடுக்க வேண்டும்."

இவ்வாறு அவர் தெரிவித்தார்.

சென்னையில் சைதாப்பேட்டை மற்றும் அசோக்நகரில் உள்ள அரசு பள்ளிகளில் நடைபெற்ற நிகழ்ச்சியில் பரம்பொருள் பவுண்டேஷன் என்கிற அமைப்பைச் சேர்ந்த மகா விஷ்ணு என்கிற சொற்பொழிவாளர் மாணவ-மாணவிகளை ஊக்கப்படுத்தும் வகையில் நிகழ்ச்சி நடத்துவதாகக் கூறி உரையாற்றினார்.

கடந்த காலங்களில் செய்த பாவங்களுக்கு ஏற்ப இந்த ஜென்மம் கடவுளால் படைக்கப்பட்டிருக்கிறது என்று மாணவர்கள் மத்தியில் அவர் பேசினார். மாணவிகள் அழகாக இல்லாததற்கும், மாற்றுத் திறனாளிகள், ஏழைகள் ஆகியோரது நிலைக்கும் முன் ஜென்ம பாவம் தான் காரணம் என்று மகாவிஷ்ணு பேசியிருந்த நிலையில் இதுதொடர்பான வீடியோக்கள் வெளியாகி அனைத்து தரப்பில் இருந்தும் கடும் எதிர்ப்பு கிளம்பி உள்ளது.

சைதாப்பேட்டை மற்றும் திருவொற்றியூர் போலீஸ் நிலையங்களிலும் சென்னை போலீஸ் கமிஷனர் அலுவலகத்திலும் அவர் மீது புகார் அளிக்கப்பட்டுள்ளது. இந்நிலையில் மகாவிஷ்ணு ஆஸ்திரேலியாவின் சிட்னி நகரில் உள்ளதாகவும் சர்ச்சை குறித்து விரைவில் விளக்கம் அளிப்பார் என்றும் அவரது அறக்கட்டளை சார்பில் கூறப்பட்டது. தான் எங்கும் ஓடி விடவில்லை என்று அவர் வீடியோ வெளியிட்டு தெரிவித்துள்ளார்.

இந்நிலையில் ஆஸ்திரேலியாவிலிருந்து அவர் சென்னை விமான நிலையத்துக்கு வந்தடைந்துள்ளார். அவரை விமான நிலையத்திலிருந்து தமிழக போலீசார் அழைத்துச்சென்றுள்ளனர். மேலும் ரகசிய இடத்துக்கு அவரை அழைத்துச் சென்று போலீசார் விசாரணை நடத்த உள்ளதாகத் தகவல் வெளியாகியுள்ளது. அவர் மீது அளிக்கப்பட்ட புகார்களின் அடிப்படையில் மகாவிஷ்ணு கைது செய்யப்பட்டுள்ளார். 

அரசு பள்ளிகளில் சர்ச்சையை ஏற்படுத்தும் வகையில் பேசியுள்ள சொற்பொழிவாளர் மகாவிஷ்ணு மீது சைதாப்பேட்டை போலீஸ் நிலையத்தில் ஏற்கனவே புகார் அளிக்கப்பட்டுள்ள நிலையில் திருவொற்றியூர் போலீஸ் நிலையம் மற்றும் சென்னை போலீஸ் கமிஷனர் அலுவலகம் ஆகிய 2 இடங்களில் புகார் அளிக்கப்பட்டுள்ளது.

இந்த நிலையில் திருவொற்றியூர் போலீஸ் நிலையத்தில் மாற்றுத்திறனாளிகள் சமூக நீதி இயக்கத்தின் மாநில தலைவர் சரவணன், மகாவிஷ்ணு மீது புகார் அளித்துள்ளார். சென்னை போலீஸ் கமிஷனர் அலுவலகத்தில் டிசம்பர்-3 இயக்கத்தின் தலைவர் தீபக் புகார் அளித்துள்ளார்.

இந்த புகார் மனுக்களில், மாற்றுத்திறனாளிகள் பாதுகாப்பு சட்டப்படி மகாவிஷ்ணு மீது நடவடிக்கை எடுக்கப்படும் என்று குறிப்பிடப்பட்டுள்ளது.

சென்னை:

சைதாப்பேட்டை மற்றும் அசோக்நகரில் உள்ள அரசு பள்ளிகளில் நடைபெற்ற நிகழ்ச்சியில் பரம்பொருள் பவுண்டேஷன் என்கிற அமைப்பை சேர்ந்த மகா விஷ்ணு என்கிற சொற்பொழிவாளர் மாணவ-மாணவிகளை ஊக்கப்படுத்தும் வகையில் நிகழ்ச்சி நடத்துவதாக கூறி உரையாற்றினார்.

அவரது பேச்சில் சர்ச்சைக்குரிய வகையில் கருத்துக்கள் இடம்பெற்றிருந்தது. கடந்த பிறவியில் பாவம் செய்தவர்களே மாற்றுத்திறனாளிகளாக பிறக்கிறார்கள் என்கிற மகாவிஷ்ணுவின் பேச்சுக்கு கடும் எதிர்ப்பு கிளம்பி உள்ளது.

இதை தொடர்ந்து அரசியல் கட்சி தலைவர்கள் வெளியிட்டுள்ள அறிக்கையில் சொற்பொழிவாளர் மகாவிஷ்ணு மீது கடும் நடவடிக்கை எடுக்க வேண்டும் என்று கோரிக்கை விடுக்கப்பட்டுள்ளது.

மகாவிஷ்ணுவின் பேச்சுக்கு சைதாப்பேட்டை பள்ளியில் வைத்து மாற்றுத்திறனாளியான பார்வையற்ற ஆசிரியர் சங்கர் கடும் எதிர்ப்பு தெரிவித்தார். இதைத் தொடர்ந்து மகா விஷ்ணுவுக்கும், ஆசிரியர் சங்கருக்கும் இடையே கடும் வாக்குவாதம் ஏற்பட்டது.

இது தொடர்பான வீடியோக்கள் வெளியான நிலையில் அமைச்சர் அன்பில் மகேஷ் பொய்யாமொழி அளித்த பேட்டியில் சர்ச்சைக்குரிய சொற்பொழிவு தொடர்பாக மகா விஷ்ணு மீது கடும் நடவடிக்கை எடுக்கப்படும் என்று எச்சரிக்கை விடுத்திருந்தார்.

இந்த விவகாரம் தொடர்பாக தமிழ்நாடு அனைத்து வகை மாற்றுத்திறனாளிகள் சங்கம் மற்றும் பாதுகாப்போர் உரிமைகளுக்கான சங்க தலைவர் வில்சன் சைதாப்பேட்டை போலீசில் புகார் அளித்தார். அதில் மகாவிஷ்ணு மீது மாற்றுத்திறனாளிகள் வன்கொடுமை சட்டப்படியும், ஊனமுற்றோர் உரிமைகள் சட்டப்பிரிவு 72(அ)-வின் படியும் நடவடிக்கை எடுத்து கைது செய்ய வேண்டும் என்று கேட்டுக்கொள்ளப்பட்டு உள்ளது. இது தொடர்பாக போலீசார் விசாரணை நடத்தி வருகிறார்கள்.

இதற்கிடையே மகா விஷ்ணு வீடியோ ஒன்றை சமூக வலைதளங்களில் வெளியிட்டுள்ளார். அதில் நான் தப்பி ஓடிவிட்டதாக தகவல் பரப்புகிறார்கள். எங்கேயும் நான் ஓடி ஒளியவில்லை. ஆஸ்திரேலியாவில் இருக்கும் நான் இன்று சென்னை வருகிறேன். போலீஸ் விசாரணைக்கு ஒத்துழைப்பு கொடுப்பேன் என்று கூறியுள்ளார்.

இதைத்தொடர்ந்து மகாவிஷ்ணுவின் வருகைக்காக காத்திருக்கும் போலீசார் அவர் சென்னை வந்து இறங்கியதும் விசாரணை நடத்த முடிவு செய்துள்ளனர். இதன்பிறகு அவர் மீது கைது நடவடிக்கை பாயுமா? என்கிற எதிர்பார்ப்பும் எழுந்துள்ளது.

இந்த விவகாரம் தொடர்பாக போலீஸ் அதிகாரி ஒருவரிடம் கேட்டபோது, மாற்றுத்திறனாளிகள் சங்கம் சார்பில் அளிக்கப்பட்ட புகார் மீது எந்த மாதிரியான நடவடிக்கை எடுக்க முடியும்? என்பது பற்றி சட்ட நிபுணர்களுடன் ஆலோசித்து வருகிறோம் என்று தெரிவித்தார்.

மகாவிஷ்ணு ஆஸ்திரேலியாவில் இருந்து இன்று சென்னை திரும்புவதாக வெளியான தகவலையடுத்து போலீசார் விமான நிலையத்துக்கு சென்று நேற்று இரவு விசாரித்தனர். அப்போது மகாவிஷ்ணு என்கிற பெயரில் வெளிநாடுகளில் இருந்து யாரும் வருவதற்கான எந்த விவரங்களும் கிடைக்கவில்லை என்கிற தகவலும் வெளியாகி உள்ளது.

ஒருவேளை மகாவிஷ்ணு இன்று சென்னை திரும்பாவிட்டால் அவரிடம் விசாரணை நடத்துவது எப்படி? என்பது பற்றியும் ஆலோசித்து வருகிறார்கள். மதுரையை சேர்ந்த இவரது இயற்பெயர் மகா. பரம்பொருள் பவுண்டேசன் என்கிற அமைப்பை தொடங்கியுள்ள இவர் தனது பெயருக்கு பின்னால் விஷ்ணு என்கிற பெயரை சேர்த்துக் கொண்டு சொற்பொழிவாற்றி வருவது குறிப்பிடத்தக்கது.

"ஊக்கமூட்டும் பேச்சு என்ற பெயரில் பிற்போக்கு கருத்துக்களையும், அறிவியலுக்கு ஒவ்வாத கருத்துக்களையும், மாற்றுத்திறனாளிகள் சமூகத்தை இழிவுபடுத்தும் வகையிலும் பேசிய திரு மகாவிஷ்ணுவை உடனடியாக கைது செய்ய வேண்டும்" என்று டாக்டர் ஷீபா லூர்தஸ் தெரிவித்துள்ளார்.

இது தொடர்பாக வீடியோ ஒன்றை அவரை வெளியிட்டுள்ளார். அதில், "மாணவர்களை அழ வைப்பது தான் ஊக்கமூட்டும் பேச்சா?. சமீப காலங்களில் இத்தகைய 'ஊக்கமூட்டும்' பேச்சுக்கள் அதிகரித்துள்ளன.

உண்மையான ஊக்கமூட்டும் பேச்சு என்பது மாணவர்கள் பள்ளி, கல்லூரிகளுக்கு கிளம்பும்போது சுறுசுறுப்பாகவும் தன்னம்பிக்கையாகவும் வாழ்வின் அடுத்த இலக்கு இதுதான் என்று தன்னை தயார் செய்யக்கூடிய பக்குவநிலைக்கு கொண்டு வருவதுதான்.

இன்று நான் ஒரு வீடியோவை பார்க்கிறேன். அதில், மாணவிகள் அழுது கொண்டிருக்கிறார்கள். ஆன்மீக சொற்பொழிவு அங்கு நடந்து கொண்டுள்ளது. இது என்ன தேவாலயமா? மசூதியா? இல்லை மடமா?. சிலர் கடவுளை நம்பலாம். சிலர் நம்பாமல் இருக்கலாம். அது அவர்களின் தனிப்பட்ட கருத்து. இத்தகைய கருத்துக்களை பொதுமேடைகளில் அரசியல் மேடைகளில் பேசலாம்.

ஆனால் பள்ளி, கல்லூரிகளில் மாணவர்களிடம் இளைஞர்களிடம் நாம் பேசும்போது எவ்வளவு முன்னெச்சரிக்கையோடு பேச வேண்டும். இளைஞர்களுக்கு அறிவியல் மனப்பான்மையை ஊக்குவிக்க வேண்டும்.

நம் கருத்துக்களை மற்றவர்களிடம் திணிக்கும் வகையில் நம் பேச்சு இருக்க கூடாது. மாணவர்கள் அவர்களது பகுத்தறிவை பயன்படுத்தி சரியான முடிவுகள் எடுக்கும்படி பக்குவப்படுத்தும் வகையில் நம் பேச்சு இருக்க வேண்டும்.

இப்போது கல்லூரிகளில் சிறப்பு விருந்தினராக இன்ஸ்டாகிராம் ரீல்ஸ், யூடியூப் வீடியோ மூலம் பிரபலமானவர்களை அழைக்கிறார்கள். இதன்மூலம் இளம் தலைமுறையினருக்கு நாம் என்ன சொல்லி கொடுக்க போகிறோம்.

இன்ஸ்டா பிரபலங்களை சிறப்பு விருந்தினராக அழைக்க மாணவர்கள் விரும்புகிறார்கள் என்று இதற்கு கல்லூரி நிர்வாகம் விளக்கம் கொடுக்கிறது. அது ஒரு மாய உலகம். இறுதியில் நம்மை காப்பாற்றுவது கல்வி தான் என்று மாணவர்களுக்கு நாம் சொல்லி புரிய வைக்க வேண்டாமா?

இந்த விவகாரம் தொடர்பாக முதலமைச்சரும் அமைச்சரும் நடவடிக்கை எடுப்பதாக கூறியுள்ளார்கள். அதை நான் வரவேற்கிறேன்.

பள்ளியில் தலைமை ஆசிரியரை இடமாற்றம் செய்துள்ளார்கள். அந்த தலைமையாசிரியருக்கு போதிய பக்குவம் இல்லை. ஒரு சிறப்பு விருந்தினரை அழைத்து விட்டு அவர் என்ன பேச போகிறார் என்று கேட்கிறார். அவரின் பின்புலத்தை அவர் ஆய்வு செய்திருக்க வேண்டாமா?

அவர் குறிப்பிட்ட ஒரு சமயம் சார்ந்த கடவுள் பற்றி போதித்ததை விடவும், போன பிறவியில் பாவம் செய்தவர்கள் இந்த பிறவியில் மாற்றுத் திறனாளிகளாக பிறப்பார்கள் என்று பேசியது தான் என்னை கடுமையாக பாதித்தது. இந்நேரம் அவரை கைது செய்திருக்க வேண்டாமா?" என்று பேசியுள்ளார்.

சென்னை:

சென்னை அசோக் நகர் மற்றும் சைதாப்பேட்டையில் உள்ள அரசு பள்ளிகளில் மாணவர்களை ஊக்கப்படுத்தும் வகையில் கடந்த மாதம் 28-ந்தேதி சொற்பொழிவு நிகழ்ச்சி நடத்தப்பட்டது. காலையில் அசோக்நகர் பள்ளியிலும், மாலையில் சைதாப்பேட்டை பள்ளியிலும் இந்த சொற்பொழிவு நடத்தப்பட்டது.

பரம்பொருள் அறக்கட்டளை என்ற அமைப்பை நடத்தி வரும் மகாவிஷ்ணு என்பவர் இந்த இரு பள்ளிகளிலும் சொற்பொழிவு நிகழ்த்தினார். காலையில் அசோக்நகர் பள்ளியில் அவர் சொற்பொழிவு நடத்திய போது வேத மந்திரங்கள் பற்றி பேசியதாக தெரிய வந்துள்ளது.

அந்த வேத மந்திரங்களை அவர் மாணவிகளை திரும்ப சொல்ல சொல்லி பேசியதாகவும் கூறப்படுகிறது.

மாலையில் சைதாப்பேட்டை அரசு பள்ளியில் பேசும்போது, "பாவம், புண்ணியம், மறுபிறவி, குருகுல கல்வி" ஆகியவை பற்றி மகாவிஷ்ணு பேசினார். முன் ஜென்மங்களில் பாவங்கள் செய்தவர்கள் தான் மறுபிறவியில் மாற்றுத்திறனாளிகளாக பிறக்க நேரிடுகிறது என்று பேசினார்.

இதற்கு அந்த பள்ளியில் தமிழ் ஆசிரியராக இருக்கும் மாற்றுத்திறனாளி ஆசிரியரான சங்கர் கடும் எதிர்ப்பு தெரிவித்தார். இதைத் தொடர்ந்து சொற்பொழிவாளர் மகாவிஷ்ணுவுக்கும், ஆசிரியர் சங்கருக்கும் இடையே கடும் சண்டை ஏற்பட்டது. மாணவிகளை நல்வழிப்படுத்துவது பற்றியே சொற்பொழிவாளர் பேச வேண்டும் என்று ஆசிரியர் சங்கர் வாக்குவாதத்தில் ஈடுபட்டார்.

28-ந்தேதி சைதாப்பேட்டை பள்ளியில் நடந்த இந்த சர்ச்சை முதலில் வெளியில் தெரியவில்லை. இந்த நிலையில் பரம்பொருள் அறக்கட்டளையை சேர்ந்த நிர்வாகிகள் அசோக் நகர், சைதாப்பேட்டை பள்ளிகளில் மகாவிஷ்ணு பேசியதை எடிட் செய்து கடந்த 4-ந்தேதி சமூக வலைதளங்களில் வெளியிட்டனர்.

அதன் பிறகுதான் மகா விஷ்ணுவின் பேச்சு சர்ச்சையாக வெடித்தது. நேற்று முன்தினம் இதுபற்றி சமூக வலைதளங்களில் பலரும் எதிர்ப்பு தெரிவித்து வந்த நிலையில் நேற்று அசோக் நகர் பள்ளியில் நடந்த ஒரு விழாவில் பங்கேற்க பள்ளி கல்வித்துறை அமைச்சர் அன்பில் மகேஷ் பொய்யா மொழி சென்றிருந்தார்.

அப்போது அவரிடம் இந்த சர்ச்சை குறித்து கேட்கப்பட்டது. இதையடுத்து நிருபர்களிடம் பேசிய அமைச்சர் அன்பில் மகேஷ் பொய்யாமொழி , "இந்த விவகாரம் தொடர்பாக பள்ளிக்கல்வித்துறை இயக்குனர் கண்ணப்பன் தலைமையில் விசாரணை குழு அமைக்கப்பட்டுள்ளது. அவர்கள் விசாரித்து தகவல் அளித்ததும் உரிய நடவடிக்கை எடுக்கப்படும்" என்று தெரிவித்தார்.

இதற்கிடையே மகா விஷ்ணுவை சர்ச்சைக்குரிய வகையில் பேச அனுமதித்ததற்காக அசோக்நகர் அரசு பள்ளி தலைமை ஆசிரியை தமிழரசி, சைதாப்பேட்டை அரசு பள்ளி தலைமை ஆசிரியர் சண்முகசுந்தரம் ஆகிய இருவரும் உடனடியாக இடமாற்றம் செய்யப்பட்டனர். அதோடு தமிழ்நாடு முழுக்க பள்ளிகளுக்கு சுற்றறிக்கை ஒன்று அனுப்பப்பட்டது.

கல்வி சாராத நிகழ்ச்சி எதையும் பள்ளிகளில் நடத்தக்கூடாது என்று அந்த அறிக்கையில் உத்தரவிடப்பட்டுள்ளது. இதன் காரணமாக இந்த விவகாரம் கடும் சர்ச்சையாக உருவெடுத்து இருக்கிறது.

இந்த நிலையில் தமிழ்நாடு அனைத்து வகை மாற்றுத்திறனாளிகள் பாதுகாப்போர் உரிமைகளுக்கான சங்கம் சார்பில் சென்னை சைதாப்பேட்டை போலீஸ் நிலையத்தில் சொற்பொழிவாளர் மகாவிஷ்ணு மீது புகார் அளிக்கப்பட்டது. அந்த புகார் மனு மீது போலீசார் விசாரணை நடத்தி வருகிறார்கள்.

இதற்கிடையே பள்ளி கல்வித்துறை செயலாளர் மதுமதி சென்னை பள்ளிகளில் நடந்த சர்ச்சைக்குரிய சொற்பொழிவு நிகழ்ச்சிகள் பற்றி விரிவான விசாரணை நடத்துமாறு பள்ளிக்கல்வித்துறை இயக்குனர் கண்ணப்பனுக்கு அறிவுறுத்தினார். மேலும் விசாரணை அறிக்கையை விரைவில் தாக்கல் செய்ய வேண்டும் என்றும் கூறியிருந்தார்.

இதையடுத்து பள்ளி கல்வித்துறை இயக்குனர் கண்ணப்பன் நேற்று உடனடியாக விசாரணையை தொடங்கினார். அசோக்நகர் அரசு பள்ளி தலைமை ஆசிரியை தமிழரசியிடம் முதலில் விசாரணை நடத்தினார். சுமார் ஒரு மணி நேரம் இந்த விசாரணை நீடித்தது.

அசோக்நகர் பள்ளியில் இந்த நிகழ்ச்சியை நடத்த சொன்னது யார்? என்ன நோக்கத்துக்காக இந்த நிகழ்ச்சி நடத்தப்பட்டது? என்று 2 கேள்விகள் அடிப்படையில் விசாரணை நடந்தது. அப்போது தலைமை ஆசிரியை தமிழரசி, "வழக்கமாக வாரம் தோறும் மாணவிகளுக்கு நல்வழி சொற்பொழிவு நடத்தப்படுவது உண்டு. அந்த அடிப்படையில்தான் இந்த சொற்பொழிவு நடத்தப்பட்டது. ஆன்மிகம் சார்ந்து எதுவும் பேசவில்லை" என்று விளக்கம் அளித்தார்.

அதுபோல சைதாப்பேட்டை அரசு பள்ளி தலைமை ஆசிரியர் சண்முக சுந்தரம், மாவட்ட கல்வி அதிகாரி மற்றும் சைதாப்பேட்டை பள்ளி ஆசிரியர் சங்கர் ஆகியோரிடமும் விசாரணை நடத்தப்பட்டது. நிகழ்ச்சியின் போது என்ன நடந்தது என்பது பற்றி பள்ளி கல்வித்துறை இயக்குனர் கண்ணப்பன் முழுமையாக கேட்டறிந்தார்.

இதைத் தொடர்ந்து மேலும் 2 அல்லது 3 பேரிடம் அவர் விசாரணை நடத்த திட்டமிட்டுள்ளார். இன்றும் நாளையும் விடுமுறை என்பதால் அடுத்த வாரம் தொடக்கத்தில் அவர் விசாரணையை தொடர்வார் என்று எதிர்பார்க்கப்படுகிறது. அதன் அடிப்படையில் அவர் 2 அரசு பள்ளிகளில் நடந்த ஆன்மிக சொற்பொழிவுகள் பற்றி அறிக்கை தயார் செய்ய உள்ளார்.

தமிழக அரசிடம் அந்த அறிக்கை விரைவில் தாக்கல் செய்யப்பட வேண்டும் என்று கூறப்பட்டு இருப்பதால் 3 நாட்களில் அவர் அறிக்கையை சமர்ப்பிப்பார் என்று எதிர்பார்க்கப்படுகிறது. அந்த அறிக்கையின் அடிப்படையில் அடுத்த கட்ட நடவடிக்கை எடுக்க பள்ளி கல்வித்துறை அமைச்சர் அன்பில் மகேஷ் பொய்யாமொழி திட்டமிட்டு உள்ளார்.

எனவே இந்த சர்ச்சை விவகாரத்தில் அடுத்த வாரம் அதிரடி நடவடிக்கைகள் எடுக்கப்படும் என்று தெரிகிறது. பள்ளி கல்வித்துறை வட்டாரத்தில் இந்த விவகாரம் பரபரப்பை ஏற்படுத்தி இருக்கிறது.

பள்ளி கல்வித்துறை இயக்குனர் கண்ணப்பன் இதுவரை நடத்திய விசாரணை மற்றும் ஆய்வுகள் மூலம் பள்ளி கமிட்டியில் உள்ள ஒரு நபர் பரிந்துரை செய்ததன் மூலம் மகா விஷ்ணு சென்னையில் உள்ள 2 அரசு பள்ளிகளில் பேச வாய்ப்பு பெற்றது தெரியவந்துள்ளது. அது பற்றியும் தீவிர விசாரணை நடத்தப்பட்டு வருகிறது.

மேலும் பள்ளிகளில் பேசுவதற்கு சொற்பொழிவாளர் மகாவிஷ்ணு பணம் கொடுத்தது தெரிய வந்துள்ளது. யூடியூப் சேனலில் பிரபலம் ஆக வேண்டும் என்ற நோக்கத்தில் அவர் பணம் கொடுத்து சொற்பொழிவு செய்ததாக புதிய சர்ச்சை எழுந்துள்ளது.

இதுபற்றியும் பள்ளி கல்வித்துறை சார்பில் விசாரணை நடத்தப்பட்டு வருகிறது.

இந்த நிலையில் தமிழக பள்ளி கல்வித்துறை சார்பில் மாவட்ட முதன்மை கல்வி அதிகாரிகளுக்கு புதிய அறிவுறுத்தல் ஒன்று வெளியிடப்பட்டுள்ளது. அதில், "பள்ளிகளில் சொற்பொழிவாற்ற தகுதியானவர்களை மட்டுமே அழைக்க வேண்டும். கல்லூரிகளில் அறிவார்ந்த பேராசிரியர்கள் உள்ளனர். அவர்களை அழைத்து பேச வைக்கலாம்.

விஞ்ஞானிகளை அழைக்க வேண்டும் என்றால் இஸ்ரோவில் இருக்கும் விஞ்ஞானிகளை அழைத்து வந்து பேச வைக்கலாம். பேச வருபவர்கள் யார் என்பதில் கவனமாக இருக்க வேண்டும்" என்று அறிவுறுத்தப்பட்டு உள்ளது.

சென்னை அரசுப் பள்ளியில் நடைபெற்ற நிகழ்ச்சியில் பேசியது சர்ச்சையான நிலையில் மகாவிஷ்ணு வீடியோ வெளியிட்டு விளக்கம் அளித்துள்ளார்.

மகா விஷ்ணு தற்போது ஆஸ்திரேலியாவின் சிட்னி நகரில் இருப்பதாகவும், இப்பிரச்னை குறித்து விரைவில் அவர் விளக்கம் அளிப்பார் எனவும் திருப்பூரில் உள்ள பரம்பொருள் அறக்கட்டளை நிர்வாகிகள் தெரிவித்தனர்.

இந்நிலையில், நான் எங்கும் ஓடி ஒளியவில்லை, நாளை நேரில் வந்து விளக்கம் தருகிறேன் என மகாவிஷ்ணு வீடியோ மூலம் தெரிவித்துள்ளார்.

அந்த வீடியோவில், "சென்னை பள்ளிகளில் நிகழ்ச்சிகள் முடிந்த மறுநாளே ஆஸ்திரேலியா வந்து விட்டேன்.

எனக்கு இந்தியா உள்பட 6 இடங்களில் அலவலகம் உள்ளது. நாளை மதியம் 1.10 மணிக்கு சென்னை வருகிறேன். தன்னை குறித்து தவறான தகவல்கள் பரப்பப்படுகிறது.

வழக்கமாக நான் தொடர்ந்து இந்தியாவில் இருப்பதில்லை. திருப்பூரில் உள்ள அறக்கட்டளையில் போலீசார் விசாரணை நடத்தி உள்ளனர்.

போலீசார் அவர்களின் கடமையை செய்து கொண்டிருக்கின்றனர். ஆஸ்திரேலியாவில் 3 ஆண்டுகளுக்கு என்னால் தங்க முடியும். வரும் 8ம் தேதி சிங்கப்பூரிலும், அதன் பிறகு துபாய், மொரீசியசிலும் எனக்கு நிகழ்ச்சிகள் உள்ளன.

காவல்துறைக்கு எந்த கடினமும் இல்லாமல் செப்டம்பர் 7ம் தேதி பிற்பகல் 1.10 மணிக்கு சென்னையில் இருப்பேன். அமைச்சர் அன்பில் மகேஷின் கோபம், சீற்றத்தை என்னால் பார்க்க முடிகிறது.

என்னை பற்றிய குற்றச்சாட்டுகளுக்கு நேரில் வந்து விளக்கம் அளிக்கிறேன்" என்றார்.

சென்னை எம்.ஜி.ஆர் நகரில் உள்ள அரசு பள்ளியில் ஆன்மிக சொற்பொழிவு நடத்திய மகாவிஷ்ணு சர்ச்சையாக கருத்துகளை பேசியது பெரும் பரபரப்பை ஏற்படுத்தியுள்ளது.

இதற்கு, பள்ளிக்கல்வித் துறை அமைச்சர் அவன்பில் மகேஷ் கடும் கண்டனம் தெரிவித்ததோடு நடவடிக்கை எடுக்கப்படும் என தெரிவித்துள்ளார்.

மேலும், அரசு பள்ளிகளில் என்சிசி, சொற்பொழிவு உள்ளிட்ட எந்த வகையிலும் வெளியாட்கள் நிகழ்ச்சி நடத்துவதற்கு தடை விதித்தும் பள்ளிக் கல்வித்துறை உத்தரவிட்டது.

தொடர்ந்து, மகாவிஷ்ணு விவகாரத்தில், சென்னை எம்ஜிஆர் நகரில் உள்ள பள்ளியில் பள்ளி கல்வித்துறை இயக்குனர் கண்ணப்பன் விசாரணை நடத்தினார்.

இதற்கிடையே, இந்த சர்ச்சையை தொடர்ந்து மகா விஷ்ணு தலைமறைவானதாக தகவல் பரவியது.

இந்நிலையில், மகா விஷ்ணு தற்போது ஆஸ்திரேலியாவின் சிட்னி நகரில் இருப்பதாகவும், இப்பிரச்னை குறித்து விரைவில் அவர் விளக்கம் அளிப்பார் எனவும் திருப்பூரில் உள்ள பரம்பொருள் அறக்கட்டளை நிர்வாகிகள் தெரிவித்துள்ளனர்.

தமிழகத்தில் உள்ள அரசு பள்ளிகளில் என்ஜிஓக்கள், தனியார் நிகழ்ச்சிகள் நடத்த தடைவிதித்து பள்ளிக்கல்வித்துறை உத்தரவிட்டுள்ளது.

மாவட்ட முதன்மை கல்வி அலுவலர்கள் பள்ளிகளில் தனியார் நிகழ்ச்சிகளை நடத்த அனுமதிக்க கூடாது. துறையின் அனுமதி இல்லாமல் யாருக்கும் அனுமதி வழங்கக் கூடாது என்றும் பள்ளிக்கல்வி இயக்குனர் கண்ணப்பன் எச்சரிக்கை விடுத்துள்ளார்.

மேலும், சுற்றறிக்கைகளை கூட சரியாக தயாரிக்க தெரியாத சிஇஓக்கள் இருப்பதால் பல்வேறு பிரச்சினைகள் ஏற்படுகின்றன என்றும் தெரிவிக்கப்பட்டுள்ளது.

சென்னை அரசு பள்ளிகளில் ஆன்மிக சொற்பொழிவு நடத்தியது சர்ச்சையை ஏற்படுத்திய நிலையில் பள்ளிக்கல்வித்துறை உத்தரவிட்டுள்ளது.

அரசு பள்ளிகளில் என்சிசி, சொற்பொழிவு உள்ளிட்ட எந்த வகையிலும் வெளியாட்கள் நிகழ்ச்சி நடத்துவதற்கு தடை விதிக்கப்பட்டுள்ளது.

அரசு பள்ளி ஆசிரியர்களே மாணவர்களை ஊக்கப்படுத்தலாம். இனி வெளி ஆட்களை அழைத்து வந்து நிகழ்ச்சி நடத்த தடை விதித்துள்ளது.

ஆசிரியர் தினத்தை முன்னிட்டு ஆளுநர் மாளிகையில் நடைபெற்ற 'எண்ணி துணிக' நிகழ்ச்சியில் ஆசிரியர்கள் மற்றும் கல்வியாளர்களுடன் ஆளுநர் ஆர்.என்.ரவி கலந்துரையாடல் நடத்தினார்.

பின்னர் பேசிய ஆளுநர் ஆர்.என். ரவி, தமிழகத்தில் அரசுப் பள்ளிகள் தரம் குறைந்துவிட்டதாக ஆளுநர் ஆர்.என்.ரவி மீண்டும் புகார் தெரிவித்துள்ளார்.

இதுகுறித்து அவர் மேலும் பேசுகையில், "தமிழகத்தில் மாணவர்கள் போதைக்கு அடிமையாகி உள்ளனர் என்றும் அவர் விமர்சித்துள்ளார்.

கஞ்சா மட்டுமின்றி, ஹெராயின், பெத்தபெட்டமைன் பயன்பாடு அரசுப் பள்ளிகளில் அதிகரித்துள்ளதாகவும் அவர் கூறினார்.

இதனால், தமிழகத்தில் மாணவர்களின் கல்வி கற்கும் திறனும் குறைந்து விட்டதாகவும், கற்கும் திறன் இல்லை என்றாலும் பட்டம் வழங்கப்படுவதாகவும் ஆளுநர் ஆர்.என்.ரவி குற்றம் சாட்டியுள்ளார்.

அரசு பள்ளிகளன் தரம் குறைந்து 70 சதவீத மாணவர்களால் எண்களையும், 40 சதவீத மாணவர்களால் எழுத்துகளையும் படிக்க முடியவில்லை" என்றார்.

சென்னை:

விநாயகர் சதுர்த்தி விழா நாளை மறுதினம் (சனிக்கிழமை) கோலாகலமாக கொண்டாடப்பட உள்ளது. இந்த விழாவை அரசு பள்ளிகளிலும் கொண்டாட வேண்டும் எனக்கூறி மாவட்ட முதன்மை கல்வி அலுவலர்கள் பள்ளிகளுக்கு சுற்றறிக்கை அனுப்பியுள்ளதாக சமூக ஊடகங்களில் தகவல் பரவி வருகிறது.

இதனை தமிழக அரசின் அதிகாரபூர்வ சமூக ஊடக கணக்கான தகவல் சரிபார்ப்பகம் மறுத்துள்ளது. இது பொய்யான செய்தி என்றும், தமிழ்நாடு மாசு கட்டுப்பாட்டு வாரியத்தின் அறிவுறுத்தலின் அடிப்படையில், விநாயகர் சதுர்த்தி விழாவினை சுற்றுச்சூழலுக்கு பாதுகாப்பான முறையில் கொண்டாடும் பொருட்டு மாணவர்களிடையே விழிப்புணர்வு ஏற்படுத்தும் வகையில் 10 உறுதிமொழிகளை எடுக்க வேண்டும் என்றே பெரம்பலூர், புதுக்கோட்டை மாவட்ட முதன்மை கல்வி அலுவலர்கள் சுற்றறிக்கை அனுப்பியிருந்தனர். இதை திரித்து அரசு பள்ளிகளில் விநாயகர் சதுர்த்தியை கொண்டாட வேண்டும் என்று சுற்றறிக்கை அனுப்பியதாக பரப்பி வருவதாக தமிழக அரசு தெரிவித்துள்ளது.