நீங்கள் தேடியது "பார்டர் கவாஸ்கர் டிராபி"

பெர்த்:

ஆஸ்திரேலியாவுக்கு சென்றுள்ள இந்திய கிரிக்கெட் அணி 5 போட்டிகள் கொண்ட டெஸ்ட் தொடரில் விளையாடுகிறது. இந்தியா-ஆஸ்திரேலியா இடையிலான முதலாவது டெஸ்ட் போட்டி வருகிற 22-ந்தேதி பெர்த்தில் தொடங்குகிறது.

இந்த போட்டிக்கு ஆஸ்திரேலிய முன்னணி சுழற்பந்து வீச்சாளர் நாதன் லயன் தீவிரமாக தயாராகி வருகிறார். 36 வயதான லயன் 129 டெஸ்டுகளில் விளையாடி 530 விக்கெட் வீழ்த்தி உள்ளார். வேகப்பந்து வீச்சுக்கு உகந்த ஆடுகளங்களிலும் கூட விக்கெட் எடுப்பதில் லயன் கில்லாடி. அவர் இந்திய மூத்த சுழற்பந்து வீச்சாளர் ஆர்.அஸ்வினை புகழ்ந்து அளித்த ஒரு பேட்டி வருமாறு:-

அஸ்வின் அற்புதமான பந்து வீச்சாளர். எனது கிரிக்கெட் வாழ்க்கையில் அவருக்கு எதிராக நான் பல முறை விளையாடி இருக்கிறேன். அவரிடம் இருந்து ஏராளமான விஷயங்களை கற்றுக் கொண்டுள்ளேன். அஸ்வின் ஒரு நம்பமுடியாத, புத்திசாலித்தனமான பவுலர். எந்த ஆடுகளமாக இருந்தாலும் அதன் தன்மையை உணர்ந்து, அதற்கு ஏற்ப தனது பந்து வீச்சை விரைவாக மாற்றிக்கொள்ளக் கூடியவர். உலகின் சிறந்த பந்து வீச்சாளர்களால் மட்டுமே இதை செய்ய முடியும். அணிக்கும், தனக்கும் பலன் பெறும் வகையில் திறமையை சரியாக பயன்படுத்திக் கொள்கிறார். அவரது சாதனைகளை பாராட்ட வேண்டும்.

அஸ்வின் எனக்கு நிறைய கற்றுக் கொடுத்தார். உங்களை எதிர்த்து விளையாடும் வீரர்கள் உங்களின் சிறந்த பயிற்சியாளர் என்பதில் எனக்கு நம்பிக்கை உண்டு.

இந்தியாவுக்கு சுற்றுப்பயணம் மேற்கொள்ளும் போது அவரது பல வீடியோ காட்சிகளை பார்த்து இருக்கிறேன். என்னால் எதுவும் முடியும் என அவர் பந்து வீசும் விதம் அபாரமானது. இந்த தொடரில் அவரது பந்து வீச்சை காண ஆவலுடன் உள்ளேன்.

இவ்வாறு லயன் கூறினார்.

38 வயதான அஸ்வின் இதுவரை 105 டெஸ்டுகளில் ஆடி 536 விக்கெட்டுகள் கைப்பற்றியுள்ளார். இதில் ஆஸ்திரேலியாவுக்கு எதிராக 22 டெஸ்டில் ஆடி 114 விக்கெட் வீழ்த்தியதும் அடங்கும்.

சிட்னி:

கடந்த முறை ஆஸ்திரேலியாவுக்கு பயணம் மேற்கொண்ட போது இந்திய அணியின் ரவிச்சந்திரன் அஸ்வினின் பவுலிங்கில் ஆஸ்திரேலியாவின் நட்சத்திர வீரர் ஸ்டீவ் ஸ்மித் தடுமாறி கொண்டே இருந்தார். அதேபோல் கடந்த ஆண்டு இந்தியாவுக்கு பயணம் மேற்கொண்ட போதும் அஸ்வினின் பவுலிங்கை எதிர்கொள்வதற்கு சிரமப்பட்டார்.

இதற்காக அஸ்வினை போலவே பவுலிங் செய்யும் ஒருவரை வைத்து பயிற்சி மேற்கொண்டார். இதனால் அஸ்வின் - ஸ்டீவ் ஸ்மித் இடையிலான போட்டியை காண்பதற்கு ரசிகர்கள் அதிக எதிர்பார்ப்புடன் உள்ளனர்.

இந்நிலையில்

இதுகுறித்து ஸ்டீவ் ஸ்மித் கூறியதாவது:-

5 போட்டிகள் கொண்ட டெஸ்ட் தொடரில் விளையாடும் போது, ஒரு வீரர் மீது இன்னொரு வீரர் ஆதிக்கம் செலுத்த அதிக வாய்ப்புகள் உள்ளது. ஏனென்றால் 10 இன்னிங்ஸில் அந்த இரு வீரர்களும் நேரடியாக மோதுவார்கள். அப்படியான மோதல் ஏற்படும் போது மனதளவிலும் பல்வேறு சவால்களை நாம் சந்திக்க நேரிடும்.

சில நேரங்களில் அந்த பவுலரிடம் ஒரு பேட்ஸ்மேன் விரைவாக விக்கெட்டை பறிகொடுத்தால், அந்த பேட்ஸ்மேனுக்கு இயல்பாகவே அழுத்தம் அதிகரிக்கும். 2 போட்டிகள் கொண்ட டெஸ்ட் தொடரில் ஒழிந்து கொள்வதை போல், 5 போட்டிகள் கொண்ட டெஸ்ட் தொடரில் யாராலும் தப்பிக்க முடியாது.

கடந்த சில ஆண்டுகளாகவே எனக்கும் அஸ்வினுக்கும் இடையில் நல்ல மோதல் இருக்கிறது. அடிலெய்ட் மற்றும் எம்சிஜி மைதானத்தில் அஸ்வின் எனது விக்கெட்டை எடுத்தது இப்போதும் நினைவில் இருக்கிறது. அதில் எம்சிஜியில் லெக் ஸ்லிப் திசையில் விக்கெட்டை எடுத்திருந்தார். ஆஸ்திரேலியா மண்ணில் ஆஃப் ஸ்பின்னர்களிடம் ஆட்டமிழப்பதே எனக்கு பிடிக்காது. வலதுகை பேட்ஸ்மேன்களால் ஆஃப் ஸ்பின்னர்களை எளிதாக சமாளிக்க முடியும். ஆனால் அஸ்வின் மிகச்சிறந்த பவுலர். அவரும் நிச்சயம் சிறந்த திட்டங்களுடன் வருவார்.

கடந்த சீசனில் 2 போட்டிகளில் அஸ்வின் என்னை ஆதிக்கம் செலுத்தினார். அதேபோல் எஸ்சிஜி மைதானத்தில் கொஞ்சம் முன்னெச்சரிக்கையுடன் விளையாடி அஸ்வின் மீது என்னால் ஆதிக்கம் செலுத்த முடிந்தது. அதனால் இம்முறையும் முன்னெச்சரிக்கையாக இருப்பதே திட்டமாக உள்ளது. அவரை செட்டிலாகவிடாமல் ஒரே லெந்தில் வீச விடாமல் தடுக்க வேண்டும் என்று தெரிவித்துள்ளார்.

புதுடெல்லி:

ஆஸ்திரேலிய முன்னாள் வேகப்பந்து வீரர் கிளென் மெக்ராத் கூறியதாவது:-

இந்தியா - ஆஸ்திரேலியா இடையிலான டெஸ்ட் தொடர் இரு அணிகளுக்குமே சவால் நிறைந்ததாக இருக்கும். இந்தத் தொடரில் முன்னணி வீரர்கள் ரன் குவிப்பது கடும் சவாலாக இருக்கும்.

தற்போதுள்ள வீரர்களில் விராட் கோலி மிகச் சிறந்தவர் என்பது எல்லோருக்குமே தெரியும். ஆனால் எனக்கு தெரிந்தவரை அவர் மிகவும் அழுத்தத்தில் இருக்கிறார். கடந்த சில தொடர்களில் அவரால் போதுமான ரன்களை எடுக்க முடியவில்லை. அதிக ரன்கள் குவிக்காததால் கோலிக்கு இந்த தொடரில் நிச்சயமாக அழுத்தம் இருக்கும்.

ஆஸ்திரேலியாவுடனான டெஸ்ட் தொடரின் முதல் 2 இன்னிங்ஸ்களில் அவர் குறைந்த ரன்னை எடுத்தால் சிக்கலை ஏற்படுத்தும். இதனால் தொடர் முழுவதுமே அவரால் சிறப்பாக ஆட முடியாமல் போக வாய்ப்பு உள்ளது.

இந்த பிரச்சினையை நிச்சயம் கோலியும் உணர்ந்து இருப்பார் என்று நினைக்கிறேன். அவரது மன உறுதியை உடைக்க ஆஸ்திரேலிய வீரர்கள் அதிக விமர்சனங்களை வைக்கலாம். களத்தில் அவருடன் வாக்குவாதத்திலோ அல்லது மோதலிலோ ஈடுபட்டால், அவரால் அதிக ரன் குவிக்க வாய்ப்புகள் இருக்கிறது. கோலி ஒரு உணர்ச்சிப்பூர்வமான கிரிக்கெட் வீரர். சிறப்பாக விளையாடும் போது மிகவும் உச்சத்தில் இருப்பார்.

நியூசிலாந்துடனான டெஸ்ட் தொடரை 0-3 என்ற கணக்கில் இழந்ததால் இந்தியாவுக்கு மிகப்பெரிய அழுத்தம் இருப்பது குறித்து எந்த சந்தேகமும் வேண்டாம். அதனால் தொடக்கம் முதலே திட்டங்களுடன் இந்திய அணியை பலவீனமடைய செய்தால், ஆஸ்திரேலியாவால் எளிதாக தொடரை கைப்பற்ற முடியும்.

எனவே இந்த தொடர் இந்தியாவுக்கு மிகவும் சவாலான தொடர்தான். அதே நேரத்தில் இந்திய அணியில் மிகச்சிறந்த வீரர்கள் இருப்பதால் ஆஸ்திரேலியாவும் பொறுப்புடன் விளையாட வேண்டும்.

இவ்வாறு அவர் கூறியுள்ளார்.

கடந்த 2020-ம் ஆண்டு முதல் விராட் கோலி 34 டெஸ்டில் 31.68 ரன் சராசரியுடன் 1,838 ரன்கள் எடுத்துள்ளார்.

அவர் மொத்தமாக 118 டெஸ்டில் 9,040 ரன்களை குவித்துள்ளார். சராசரி 47.83 ஆகும். ஆஸ்திரேலியாவுடன் 25 டெஸ்டில் ஆடி 2,042 ரன்களை எடுத்து உள்ளார். அந்த அணிக்கு எதிராக ஓர் இன்னிங்சில் அதிகபட்சமாக 186 ரன்களைக் குவித்துள்ளார் என்பது குறிப்பிடத்தக்கது.

பெர்த்:

ஆஸ்திரேலியாவுக்கு சென்றுள்ள இந்திய கிரிக்கெட் அணி 5 போட்டிகள் கொண்ட டெஸ்ட் தொடரில் விளையாடுகிறது. இவ்விரு அணிகள் இடையிலான முதலாவது டெஸ்ட் போட்டி பெர்த்தில் வருகிற 22-ந் தேதி தொடங்குகிறது. இந்த போட்டிக்கு தயாராகும் பொருட்டு இந்திய வீரர்கள் தங்களுக்குள் இரு அணியாக பிரிந்து பெர்த்தில் உள்ள வாகா மைதானத்தில் பயிற்சியில் ஈடுபட்டுள்ளனர்.

நேற்றைய பயிற்சியின் போது ஸ்லிப்பில் நின்று பீல்டிங் செய்த சுப்மல் கில்லுக்கு இடது கை பெருவிரலில் காயம் ஏற்பட்டு வெளியேறினார். அதன் பிறகு அவர் பயிற்சிக்கு திரும்பவில்லை. அவருக்கு ஸ்கேன் பரிசோதனை செய்ததில் எலும்பு முறிவு ஏற்பட்டு இருப்பது தெரியவந்துள்ளது.

இதனால் அவர் முதல் டெஸ்ட்டில் இருந்து விலகியுள்ளதாக அறிவிக்கப்பட்டுள்ளது. ஏற்கனவே முதல் நாள் பயிற்சியின் போது பிரசித் கிருஷ்ணா பந்து வீச்சை எதிர்கொள்கையில் லோகேஷ் ராகுலுக்கு வலது முழங்கையில் பந்து தாக்கியதில் காயம் ஏற்பட்டது குறிப்பிடத்தக்கது.

புதுடெல்லி:

இந்திய கிரிக்கெட் அணி சமீபத்தில் சொந்த மண்ணில் நியூசிலாந்துக்கு எதிரான டெஸ்ட் தொடரை முழுமையாக (0-3) இழந்த நிலையில், தற்போது ஆஸ்திரேலியாவுக்கு சென்றுள்ளது. அங்கு 'பார்டர்-கவாஸ்கர்' கோப்பைக்கான 5 ஆட்டங்கள் கொண்ட டெஸ்ட் தொடரில் விளையாடுகிறது. இந்தியா- ஆஸ்திரேலியா மோதும் முதலாவது டெஸ்ட் பெர்த்தில் வருகிற 22-ந் தேதி தொடங்குகிறது.

இந்த தொடருக்கு இந்திய அணிக்கு ஆலோசகராக இந்திய ஜாம்பவான் சச்சின் டெண்டுல்கரை நியமிக்க வேண்டும் என்று முன்னாள் வீரரான தமிழகத்தை சேர்ந்த டபிள்யூ.வி.ராமன் வலியுறுத்தியுள்ளார். அவர் தனது சமூக வலைதள பதிவில், 'ஆஸ்திரேலியாவில் நடக்கும் பார்டர்- கவாஸ்கர் கோப்பை போட்டிக்கு தயாராகி வரும் இந்திய அணிக்கு பேட்டிங் ஆலோசகராக சச்சின் டெண்டுல்கர் இருந்தால் அது அணிக்கு பெரிய அளவில் பலன் தரலாம். 2-வது டெஸ்டுக்கு முன்பாக நிறைய நாட்கள் உள்ளது. அத்துடன் இப்போது அணியில் ஆலோசகரை சேர்ப்பது வழக்கமான நடைமுறையாக இருந்து வருகிறது' என்று கூறியுள்ளார்.

பெர்த்:

ஆஸ்திரேலியாவுக்கு சென்றுள்ள இந்திய கிரிக்கெட் அணி 'பார்டர்-கவாஸ்கர்' கோப்பைக்கான 5 போட்டிகள் கொண்ட டெஸ்ட் தொடரில் ஆடுகிறது. இந்தியா- ஆஸ்திரேலியா அணிகள் இடையிலான முதலாவது டெஸ்ட் கிரிக்கெட் போட்டி பெர்த்தில் வருகிற 22-ந் தேதி தொடங்குகிறது. இந்த போட்டிக்கு தயாராக இந்திய அணியினர் 10 நாட்களுக்கு முன்பாகவே ஆஸ்திரேலியா சென்று பயிற்சியில் ஈடுபட்டு வருகின்றனர்.

இந்த நிலையில் இந்திய அணியின் முன்னணி சுழற்பந்து வீச்சாளர் ஆர்.அஸ்வின், ஆஸ்திரேலிய பேட்ஸ்மேன் ஸ்டீவன் சுமித் குறித்து பேசுகையில், 'சுழற்பந்து வீச்சுக்கு எதிராக சிறப்பாக விளையாட கூடிய வீரர்களில் ஸ்டீவன் சுமித்தும் ஒருவர். அதே நேரத்தில் வேகப்பந்து வீச்சை எதிர்கொள்வதிலும் கூட தனித்துவமான தொழில்நுட்பத்தை கடைபிடிக்கிறார். அதிகம் சிந்திக்கக்கூடிய ஒரு வீரர். இந்த முறை சுழற்பந்து வீச்சை எதிர்கொள்ள நிச்சயம் புதிய திட்டத்துடன் தயாராக களம் இறங்குவார் என்று நினைக்கிறேன். அதை ஆடுகளத்தில் செயல்படுத்தும் முனைப்புடன் இருப்பார். டெஸ்டில் அவரது திட்டத்தை உடைத்தெறியும் வழிமுறையை கண்டுபிடித்துள்ளேன்.

ஐ.பி.எல். கிரிக்கெட்டில் டெல்லி மற்றும் புனே அணிக்காக நாங்கள் இணைந்து விளையாடி இருக்கிறோம். சுமித்தின் வலை பயிற்சி எப்படி இருக்கும் என்பது எனக்கு தெரியும். இதனால் அவர் எந்த பந்தை நன்றாக விளையாடுவார், எது அவருக்கு குடைச்சல் கொடுக்கும் என்பது எனக்கு தெரியும்' என்றார்.

சிட்னி:

பார்டர் கவாஸ்கர் டிராபி தொடரில் பங்கேற்பதற்காக இந்திய அணி ஆஸ்திரேலியா சென்றுள்ளது.

இந்திய அணி ஆஸ்திரேலியாவில் சுற்றுப்பயணம் செய்து பார்டர் கவாஸ்கர் கோப்பைக்கான 5 போட்டிகள் கொண்ட டெஸ்ட் தொடரில் விளையாடுகிறது.

இந்தியா, ஆஸ்திரேலியா அணிகள் இடையிலான முதல் டெஸ்ட் போட்டி பெர்த்தில் வரும் 22-ம் தேதி தொடங்குகிறது.

இந்நிலையில், ஆஸ்திரேலியாவில் உள்ள செய்தித்தாள்களில் இந்தியாவில் பேசப்படும் ஹிந்தி மற்றும் பஞ்சாபி ஆகிய மொழிகளில் அச்சிட்டுள்ளன.

ஆஸ்திரேலியாவின் டெய்லி டெலிகிராப் நாளிதழில், வரவிருக்கும் தொடரின் ஈர்ப்பைப் படம்பிடித்து காட்டும் வகையில், யுகங்களுக்காக போராடுங்கள் (யுகோன் கி லடாய்) என்கிற இந்தி தலைப்புடன் கோலியின் பெரிய புகைப்படத்தை அச்சிட்டுள்ளது. இதேபோல், ஹெரால்ட் சன் என்கிற நாளேடு டெஸ்ட், ஒருநாள் மற்றும் டி20 போட்டிகளில் கோலியின் வாழ்க்கைப் புள்ளிவிவரங்களை கொண்டுள்ளது.

மேலும், இந்திய வீரர் யஷஸ்வி ஜெய்ஸ்வால் பின்பக்கங்களை அலங்கரிக்கிறார்.

தி ஹெரால்டு சன் முழு பக்கத்தையும் ஜெய்ஸ்வாலுக்கு ஆங்கிலத்திலும், பஞ்சாபியிலும் தி நியூ கிங் என தலைப்பு போட்டுள்ளது.

டெய்லி டெலிகிராப், வீரேந்திர சேவாக்கிற்குப் பிறகு இந்தியாவின் மிகவும் ஆக்ரோஷமான தொடக்க ஆட்டக்காரர் ஜெய்ஸ்வால் என்று குறிப்பிடுகிறது

இந்திய ஆண்கள் கிரிக்கெட் அணியின் தலைமை பயிற்சியாளராக கடந்த ஜூலை மாதம் முதல் முன்னாள் வீரர் கவுதம் கம்பீர் செயல்பட்டு வருகிறார். கடைசியாக உலகக்கோப்பை  வெற்றியோடு ராகுல் டிராவிட் அந்த பதவியில் இருந்து ஓய்வுபெற்றார். ஐபில் தொடரில் கொல்கத்தா அணியை திறமையாக டிரைன் செய்து வெற்றி பெற வைத்ததால் கவுதம் கம்பீர்தான் வேண்டும் என்று பிசிசிஐ அரும்பாடுபட்டு அவரை தலைமை கோச்சாக கொண்டுவந்தது.

ஆனால் நியூசிலாந்துக்கு எதிரான 3 போட்டிகள் கொண்ட டெஸ்ட் தொடரை இந்திய அணி 0-3 என்ற கணக்கில் இழந்தது. 12 ஆண்டுகளுக்குப் பிறகு சொந்த மண்ணில் டெஸ்ட் தொடரை இழந்தது. 92 ஆண்டுகளில் முதல் முறையாக இந்திய அணி சொந்த மண்ணில் 0-3 என்ற கணக்கில் ஒயிட்வாஷ் ஆனது.

இந்த தோல்வி காரணமாக இந்திய அணி உலக டெஸ்ட் சாம்பியன்ஷிப் இறுதிப்போட்டிக்கு முன்னேறுவதிலும் சிக்கல் ஏற்பட்டுள்ளது. இதனால் கவுதம் கம்பீர் கடும் விமர்சனத்துக்கு உள்ளாகி உள்ளார்.

இந்த நிலையில் நியூசிலாந்து ஒயிட்வாஷ் குறித்து இந்திய கிரிக்கெட் கட்டுப்பாட்டு வாரியம் (பி.சி.சி.ஐ.) 6 மணி நேரம் ஆய்வு நடத்தியது. இந்த கூட்டத்தில் காணொலி வாயிலாக கலந்துகொண்ட கம்பீரிடம் இந்த கூட்டத்தில் ரோகித் சர்மா, கம்பீர் ஆகியோர் மீது கிரிக்கெட் வாரியம் அதிருப்தி அடைந்து கடுமையான கேள்விகளை எழுப்பியது. கம்பீரின் பறிச்சி முறை குறித்தும் விவாதிக்கப்பட்டது.

இந்நிலையில் கவுதம் கம்பீர் இந்திய அணியின் பயிற்சியாளர் பதவியிலிருந்து நீக்கப்படலாம் என்று பிசிசிஐ வட்டாரங்களில் பேச்சு அடிபடுகிறது.

வர இருக்கும் பார்டர் கவாஸ்கர் டிராபி [BGT] சீரிஸில் இந்தியா தோற்றால் நிச்சயம் கம்பீரின் பதவி பறிக்கப்படும் என்றே கூறப்படுகிறது. கம்பீருக்கு பதிலாக விவிஎஸ் லக்ஷ்மன் இந்திய அணி தலைமை பயிற்சியாளராக நியமிக்கப்படலாம் என்றும், ஓடிஐ மட்டும் டி 20 போட்டிகளில் மட்டும் கம்பீர் பயன்படுத்தப்படலாம் என்று தெரிவிக்கப்பட்டுள்ளது.

இந்திய அணி, ஆஸ்திரேலியாவுக்கு சென்று பார்டர்- கவாஸ்கர் கோப்பைக்கான 5 போட்டிகள் கொண்ட டெஸ்ட் தொடரில் பங்கேற்கிறது. இந்தியா- ஆஸ்திரேலியா இடையிலான முதல் டெஸ்ட் போட்டி பெர்த்-ல் வரும் 22-ந் தேதி தொடங்குகிறது. இந்த போட்டியில் இந்திய அணியின் கேப்டன் விளையாடுவது சந்தேகம் என தெரிய வந்துள்ளது.

இந்நிலையில் ரோகித் சர்மா விளையாடவில்லையெனில் அவருக்கு பதிலாக துணை கேப்டனும் வேகப்பந்து வீச்சாளருமான பும்ராவை கேப்டனாக நியமிக்க வேண்டும் என இந்திய அணியின் முன்னாள் வீரர் சுனில் கவாஸ்கர் தெரிவித்துள்ளார்.

அதில், முதல் டெஸ்ட் போட்டியில் கேப்டன் விளையாடுவது முக்கியம். காயம்பட்டால் அது வேறு, ஆனால் அவர் வரவே இல்லை என்றால், துணை கேப்டன் தலைமையில் அணி களமிறங்க வேண்டும்.

வங்கதேசஅணிக்கு எதிரான டெஸ்ட் தொடர் வெற்றிக்கு பிறகு இந்திய அணி மோசமான சரிவை சந்தித்துள்ளது. இந்தியாவிற்கு சுற்றுப்பயணம் வந்த நியூசிலாந்து அணி 3-0 என்ற கணக்கில் இந்திய அணியை வொயிட்-வாஷ் செய்துள்ளது. 12 ஆண்டுகளுக்கு பிறகு இந்திய அணி டெஸ்ட் தொடரை சொந்த மண்ணில் இழந்துள்ளளது. மேலும் 3 அல்லது அதற்கு மேற்பட்ட டெஸ்ட் தொடரில் வொயிட்-வாஷ் ஆவதும் இதுவே முதல் முறை. இதனால் அணியில் உள்ள சில சீனியர் வீரர்களுக்கு பிசிசிஐ செக் வைத்துள்ளது.

நியூசிலாந்து தொடரில் இந்திய அணியின் பேட்டிங் மிகவும் மோசமாக இருந்தது. விராட் கோலி மற்றும் ரோகித் சர்மா போன்ற சீனியர் வீரர்கள் ரன்கள் அடிக்காதது பெரும் ஏமாற்றத்தை தந்தது.

தற்போது இந்திய அணி உலக டெஸ்ட் சாம்பியன்சிப் தரவரிசையில் 2-வது இடத்திற்கு தள்ளப்பட்டுள்ளது. ஒருவேளை இந்திய அணி WTC இறுதிப் போட்டிக்கு தகுதி பெறவில்லை என்றால், சீனியர் வீரர்கள் அணியிலிருந்து படிப்படியாக வெளியேற்றப்படுவார்கள் என்று கூறப்படுகிறது.

"நிச்சயம் அணியில் பெரிய மாற்றம் இருக்கும். பார்டர் கவாஸ்கர் தொடருக்காக இந்திய அணி நவம்பர் 10-ம் தேதி ஆஸ்திரேலியாவுக்கு செல்கிறது. இதற்கான அணி ஏற்கனவே அறிவிக்கப்பட்டுள்ளதால் அதில் மாற்றம் செய்ய முடியாது. ஆஸ்திரேலியா தொடர் சில வீரர்களுக்கு கடைசி போட்டியாக இருக்கலாம்" என்று பிசிசிஐ வட்டாரம் தெரிவிக்கின்றது.

உலக சாம்பியன்ஷிப் இறுதிப் போட்டிக்கு இந்தியா தகுதி பெறவில்லை என்றால் ரோகித், விராட், அஷ்வின் மற்றும் ரவீந்திர ஜடேஜா ஆகிய நான்கு சூப்பர் சீனியர்களும் இங்கிலாந்தில் நடைபெறும் ஐந்து போட்டிகள் கொண்ட டெஸ்ட் தொடரில் இருக்க மாட்டார்கள் என்று உறுதியாக நம்பலாம். பார்டர் கவாஸ்கர் தொடரின் முடிவு தான் அவர்களின் எதிர்காலம். ஒருவேளை மும்பை டெஸ்ட் தான் அந்த நான்கு பேரின் கடைசி சொந்த டெஸ்டில் ஒன்றாக இருக்கலாம்" என்று மேலும் கூறினார்.

சீனியர் வீரர்களால் வாய்ப்புக்காக காத்திருக்கும் சாய் சுதர்சன் மற்றும் தேவ்தத் படிக்கல் போன்ற வீரர்களுக்கு அடுத்த ஆண்டு இங்கிலாந்தில் நடைபெறும் டெஸ்ட் போட்டியில் நிச்சயம் வாய்ப்பு கிடைக்கும் என்று கூறப்படுகிறது. மேலும், அஷ்வினுக்கு பதில் வாஷிங்டன் சுந்தர் தனது இடத்தை டெஸ்ட் அணியில் தக்க வைத்துள்ளார். ஜடேஜாவிற்கு பதில் அக்சர் படேல் ரெடியாக உள்ளார். ரோஹித் சர்மாவிற்கு பதில் அபிமன்யு ஈஸ்வரனும், விராட் கோலிக்கு பதில் ருதுராஜ் கைகுவாட்வும் உள்ளனர்.

ரோகித், கோலி, ஜடேஜா ஆகியோர் டி20 போட்டிகளில் இருந்து ஓய்வை அறிவித்துள்ளனர். அஸ்வின் தற்சமயம் டெஸ்ட் போட்டிகளில் மட்டுமே விளையாடி வருகிறார். 

பார்டர் கவாஸ்கர் கோப்பை கிரிக்கெட் தொடர் ஆஸ்திரேலியாவில் இம்மாத இறுதியில் தொடங்க இருக்கிறது. ஐந்து போட்டிகள் கொண்ட இந்த தொடரில் விளையாடுவதற்கான இந்திய அணி ஏற்கனவே அறிவிக்கப்பட்டுள்ளது.

இந்த தொடருக்கு முன்னதாக இந்திய அணி, ருதுராஜ் தலைமையிலான இந்தியா ஏ அணியுடன் மோதுவதாக இருந்தது. இந்நிலையில் அந்த 3 நாள் கொண்ட டெஸ்ட் போட்டியை இந்திய அணி தற்போது ரத்து செய்துள்ளது. மேலும் இந்திய அணி கூடுதல் நேரம் வலை பயிற்சியில் ஈடுபட உள்ளதாக தெரிவிக்கப்பட்டுள்ளது.

மேலும் பயிற்சியாளரான கவுதம் கம்பீர் மற்றும் மூத்த வீரர்கள் வலை பயிற்சியை விரும்புவதாக தெரிவித்துள்ளனர்.

ருதுராஜ் தலைமையில் இந்திய ஏ அணி ஆஸ்திரேலியாவில் சுற்றுப்பயணம் செய்து விளையாடி வருகிறது குறிப்பிடத்தக்கது.

இந்தியாவுக்கு எதிராக ஆஸ்திரேலிய கிரிக்கெட் அணி தங்களுடைய சொந்த மண்ணில் விளையாடும் 2024 -25 பார்டர் -கவாஸ்கர் கோப்பை நவம்பர் மாதம் துவங்குகிறது. அத்தொடரில் இம்முறை எப்படியாவது இந்தியாவை தோற்கடிக்க வேண்டும் என்று ஆஸ்திரேலிய அணி தீவிரமாக செயல்பட்டு வருகிறது.

ஏனெனில் கடைசியாக ஆஸ்திரேலிய மண்ணில் நடைபெற்ற 2 தொடர்களில் இந்தியா வரலாற்றிலேயே முதல் முறையாக வெற்றிகளை பெற்று சாதனை படைத்தது. இந்நிலையில் இம்முறை என்ன தான் இந்தியா போராடினாலும் ஆஸ்திரேலியாதான் வெல்லும் என்று முன்னாள் வீரர் மேத்தியூ ஹைடன் கணித்துள்ளார்.

இது குறித்து அவர் கூறியதாவது:-

இம்முறை ஆஸ்திரேலியா வெல்லும் என்று நான் சொல்வேன். அதே சமயம் வெற்றிக்காக இந்திய அணி சவால் கொடுக்கும் என்றும் நான் சொல்வேன். தற்போது ஆஸ்திரேலியாவில் தற்காலிகமாக பதியப்பட்ட பிட்ச்கள் (ட்ராப் இன்) இருக்கின்றன. அது முந்தைய இயற்கையான பிட்ச்களை விட சவாலாக இருக்கும்.

ஆஸ்திரேலியாவில் பெர்த், அடிலெய்ட், மெல்போர்ன் ஆகிய மைதானங்களில் ட்ராப் இன் பிட்ச்கள் பொருத்தப்பட்டுள்ளன. எனவே பிரிஸ்பேன் மற்றும் சிட்னியில் மட்டுமே இயற்கையான ஆடுகளங்கள் இருக்கும். அங்கே 3, 5-வது போட்டிகள் நடைபெற உள்ளன. அங்கே வித்தியாசமான கலவையுடன் விளையாட நேரிடலாம். அப்படி மாறுபட்ட பிட்ச் சூழ்நிலைகள் காரணமாக ஆஸ்திரேலியாவுக்கு சொந்த மண்ணில் அதிக சாதகம் இருக்கும் என்று நான் கருதவில்லை.

என ஹைடன் கூறினார்.