நீங்கள் தேடியது "ஒருங்கிணைப்பு குழு கூட்டம்"

வேங்கிக்கால்:

தமிழ்நாட்டில் உள்ள கடை கோடி மக்களுக்கும் அனைத்து திட்டங்களும் சென்று சேர வேண்டும் என்பதே முதலமைச்சர் மு.க.ஸ்டாலினின் நோக்கம் என மாவட்ட ஒருங்கிணைப்பு குழு கூட்டத்தில் சி.என்.அண்ணாதுரை எம்.பி. பேசினார்.

திருவண்ணாமலை கலெக்டர் அலுவலகத்தில் மாவட்ட ஊரக வளர்ச்சி முகமை சார்பில் மாவட்ட வளர்ச்சிக்கான ஒருங்கிணைப்பு மற்றும் கண்காணிப்புக் குழு கூட்டம் நடைபெற்றது. கூட்டத்திற்கு குழு இணைத் தலைவர் டாக்டர் எம். கே.விஷ்ணுபிரசாத் எம்.பி. முன்னிலை வகித்தார். மாவட்ட ஆட்சியர் பா.முருகேஷ் வரவேற்றார். குழுத் தலைவர் சி.என். அண்ணாதுரை எம்.பி. தலைமை தாங்கி பேசினார்.

வங்கிகளில் தொழில் முனைவோருக்கு கடன் உதவிகள் வழங்க வேண்டும். பள்ளிகளுக்கு தேவையான கட்டிடங்கள், கழிவறைகள் மற்றும் சுற்றுசுவர்கள் அமைத்து தர வேண்டும்.

அரசு மருத்துவமனை களில் அதிக அளவில் பெண் டாக்டர்களை நியமிக்க வேண்டும் என்பன உள்ளிட்ட பல்வேறு ஆலோசனைகளை வழங்கினர்.

கூட்டத்தில் கூடுதல் ஆட்சியர் ரிஷப், எம்.எல்.ஏ.க்கள் மு.பெ.கிரி, பெ.சு.தி.சரவணன், ஒ.ஜோதி, மாவட்ட வன அலுவலர் அருண்லால், மாவட்ட ஊராட்சிக்குழு தலைவர் பார்வதி சீனிவாசன், மாவட்ட பழங்குடியினர் நல அலுவலர் செந்தில்குமார், மகளிர் திட்ட இயக்குனர் சையித் சுலைமான், ஊரக வளர்ச்சி செயற்பொ றியாளர் ராமகிருஷ்ணன், வருவாய் கோட்டாட்சியர்கள் மந்தாகினி, தனலட்சுமி முன்னோடி வங்கி மேலாளர் கவுரி உள்ளிட்ட பலர் கலந்து கொண்டனர்.

கிருஷ்ணகிரி,

கிருஷ்ணகிரி மாவட்ட கலெக்டர் அலுவலக கூட்டரங்கில் சமூக நலன் மற்றும் மகளிர் உரிமைத்துறை சார்பாக ஒருங்கிணைந்த சேவை மையம், பெண்குழந்தைகளை காப்போம், பெண் குழந்தைகளுக்கு கற்பிப்போம் குறித்து மாவட்ட அளவிலான ஒருங்கிணைப்பு குழுக் கூட்டம் கலெக்டர் கே.எம்.சரயு தலைமையில் நேற்று நடந்தது.

கூட்டத்தில் அவர் பேசியதாவது:-

பெண் குழந்தைகளின் முக்கியத்துவம், அவர்களின் பாதுகாப்பு மற்றும் பெண் கல்வியை மேம்படுத்துவதற்காக பெண் குழந்தைகளை காப்போம், பெண் குழந்தைகளுக்கு கற்பிப்போம் என்ற திட்டம் தமிழகத்தில் ஏற்கனவே 11 மாவட்டங்களில் செயல்படுத்தப்பட்டு வருகிறது. மேலும், மீதமுள்ள 27 புதிய மாவட்டங்களுக்கும் மத்திய அரசின் 100 சதவீத நிதி ஒதுக்கீட்டுடன் திட்டம் விரிவாக்கம் செய்து திட்டத்தை செயல்படுத்திட அறிவுறுத்தப்பட்டுள்ளது.

மேலும், இந்த திட்டம் தொடங்கி செயல்படுத்துவதற்கு ஏதுவாக மாவட்ட அளவிலான ஒருங்கிணைப்பு குழுக் கூட்டம் அமைக்க அறிவுறுத்தப்பட்டுள்ளதைத் தொடர்ந்து 17 உறுப்பினர்கள் கொண்ட குழு அமைக்கப்பட்டுள்ளது.

சமூகத்தில் வன்முறையால் பாதிக்கப்பட்ட பெண்களுக்கு உதவும் பொருட்டு மத்திய அரசால் உருவாக்கப்பட்ட சிறப்புத் திட்டம் ஒருங்கிணைந்த சேவை மையம் ஆகும். இந்த உதவி மையத்தில் வன்முறையால் பாதிக்கப்பட்ட பெண்களுக்கு மனநல ஆலோசனை, மருத்துவ உதவி, காவல் உதவி , சட்ட உதவி, தங்குமிட வசதி, உடனடி மீட்பு ஆகியவை வழங்கப்பட்டு வருகிறது. ஒருங்கிணைந்த சேவை மையத்தின் பணிகளை கண்காணிக்கும் பொருட்டு மாவட்ட அளவிலான ஒருங்கிணைப்பு குழுக் கூட்டம் அவ்வப்போது நடத்தப்பட்டு வருகிறது.

தற்போது பெண் குழந்தைகளை காப்போம், பெண் குழந்தைகளுக்கு கற்பிப்போம் திட்டத்தினை சிறப்பாக செயல்படுத்தும் பொருட்டும் மற்றும் ஒருங்கிணைந்த சேவை மையத்தின் பணிகள் தொடர்ந்து சிறப்பாக செயல்படும் பொருட்டும் மேற்கண்ட இரு திட்டங்களுக்கும் மாவட்ட அளவிலான ஒருங்கிணைப்பு குழுக் கூட்டம் நடத்தப்பட்டது.

தொடர்ந்து அனைத்து துறை அலுவலர்களுக்கான பயிற்சி 4 துறைகளுக்கு நடத்தப்பட்டு திட்டத்தின் சிறப்புகள் எடுத்துரைக்கப்பட்டு செயல்முறைப்படுத்த பயிற்சி வழங்கப்பட்டுள்ளது.

மேலும் மாவட்ட அளவிலான ஒருங்கிணைப்பு குழுக் கூட்டம் காலாண்டிற்கு ஒருமுறை நடத்தும் பொருட்டு இரண்டாம் காலாண்டிற்கு மாவட்ட அளவிலான ஒருங்கிணைப்பு குழுக் கூட்டம் இன்று செயற்குழு உறுப்பினர்களுடன் நடத்தப்பட்டுள்ளது. இவ்வாறு கலெக்டர் கூறினார்.

இந்த கூட்டத்தில் கூடுதல் போலீஸ் சூப்பிரண்டு சங்கு, மாவட்ட சமூக நல அலுவலர் விஜயலட்சுமி, ஒருங்கிணைந்த குழந்தைகள் வளர்ச்சி திட்ட அலுவலர் ஜெயந்தி மற்றும் துறை சார்ந்த அலுவலர்கள், தொண்டு நிறுவன பிரதிநிதிகள் கலந்து கொண்டனர்.

தருமபுரி,

தருமபுரி மாவட்ட கலெக்டர் அலுவலக கூடுதல் கூட்டரங்கில் தமிழ்நாடு மாநில ஊரக, நகர்ப்புற வாழ்வாதார இயக்கம் சார்பில் முதல்-அமைச்சரின் காலை உணவு திட்டத்தை திறம்பட செயல்படுத்துவது குறித்த மாவட்ட ஒருங்கிணைப்பு குழு கூட்டம் மாவட்ட கலெக்டர் சாந்தி தலைமையில் நடைபெற்றது.

தருமபுரி மாவட்டத்தில் அனைத்து கிராம ஊராட்சிகள் மற்றும் பேரூராட்சிகளில் செயல்பட்டு வரும் 48 அரசு தொடக்கப்பள்ளிகள், 9 அரசு நடுநிலைப்பள்ளிகள், 1 உயர்நிலை பள்ளி என மொத்தம் 58 அரசு பள்ளிகளில் 1 ஆம் வகுப்பு முதல் 5 ஆம் வகுப்பு வரை பயிலும் மாணவ, மாணவிகளுக்கு விரிவுபடுத்தப்பட்ட முதல்-அமைச்சரின் காலை உணவு திட்டமானது இரண்டு கட்டமாக செயல்படுத்தப்படவுள்ளது.

இத்திட்டம் அமல்படுத்துவது தொடர்பாக முதற்கட்டமாக மாவட்ட அளவிலான ஒருங்கிணைப்பு கூட்டமானது இன்று நடைபெற்றது. இக்கூட்டத்தில் காலை உணவு திட்டம் தொடர்பான வழிகாட்டி நெறிமுறைகள் எடுத்துரைக்கப்பட்டது.

தருமபுரி மாவட்டத்தில் முதற்கட்டமாக 1.6.2023 அன்று நல்லம்பள்ளி, காரிமங்கலம், அரூர், தருமபுரி மற்றும் பென்னாகரம் ஆகிய 5 வட்டாரங்களிலும், இரண்டாம் கட்டமாக 15.7.2023 அன்று மொரப்பூர், பாப்பிரெட்டிபட்டி, கடத்தூர், மற்றும் ஏரியூர் ஆகிய 4 வட்டாரங்களிலும் செயல்படுத்தப்படும்.

இத்திட்டத்திற்கென ஊராட்சி, பேரூராட்சி அளவில் முதன்மை குழு ஊராட்சி மன்ற தலைவர், பேரூராட்சி தலைவர், பள்ளி தலைமை ஆசிரியர், பள்ளி மேலாண்மை குழு தலைவர் மற்றும் ஒரு பிரதிநிதி, ஊராட்சி அளவிலான கூட்டமைப்பு, பகுதி அளவிலான கூட்டமைப்பின் அலுவலக நிர்வாகிகளில் ஒருவரை கொண்டு அமைக்கப்படும்.

மகளிர் சுயஉதவிக்குழு, ஊராட்சி, பகுதி அளவிலான கூட்டமைப்பு உறுப்பினர்களை தேர்வு செய்திடும் போது குறைந்தபட்சம் 3 ஆண்டுகள் அனுபவம் உள்ள உறுப்பினராகவும், அதே பகுதியை சேர்ந்தவராகவும், குறைந்தபட்ச கல்வி தகுதி 10ஆம் வகுப்பு வரை படித்தவராகவும் சமையல் திறன் கொண்டவராகவும், உறுப்பினராகவும் இருக்க வேண்டும்.

தேர்வு செய்யப்படும் உறுப்பினர்களுக்கு மண்டல ஊரக வளர்ச்சி பயிற்சி நிறுவனத்தில் பயிற்சி பெற்ற முதன்மை பயிற்றுநர்கள் மூலம் பயிற்சி அளிக்கப்படும். உணவு மற்றும் மளிகைப் பொருட்கள் நுகர்பொருட்கள் வாணிப கழகம் மற்றும் கூட்டுறவு துறை மூலம் கொள்முதல் செய்யப்படும்.