பேரூராட்சி செயல் அலுவலர் வீட்டில் நகை - பணம் திருட்டு

கபிஸ்தலம்:

கபிஸ்தலம் அருகே உள்ள சோமேஸ்வரபுரம் மேலத் தெருவில் வசிப்பவர் சந்திரகுமார் (வயது 49). இவர் திருச்சி சமயபுரத்தில் பேரூராட்சி செயல் அலுவலராக பணியாற்றி வருகிறார். இவர் தனது குழந்தைகளின் படிப்புக்காக தஞ்சாவூரில் குடியிருந்து வருகிறார். 

தனது சொந்த ஊரான சோமேஸ்வரபுரத்திற்கு வாரத்தில் ஞாயிற்றுக்கிழமை வந்து உறவினர்களையும் வீட்டையும் பார்த்துவிட்டு செல்வது வழக்கமாக வைத்துள்ளார்.இந்த நிலையில் இவரது வீட்டின் முன்புற கதவை உடைத்து உள்ளே புகுந்த மர்ம நபர்ககள் வீட்டின் பீரோவில் இருந்த 5 பவுன் நகைகள், ரூ.20000 ரொக்க பணத்தையும் திருடிச் சென்று விட்டனர்.

இது குறித்து சந்திரகுமார் கபிஸ்தலம் போலீஸ் நிலையத்தில் புகார் செய்தார். அதன் பேரில் துணை போலீஸ் சூப்பிரண்டு பூரணி, இன்ஸ்பெக்டர் அனிதா கிரேசி, சப்-இன்ஸ்பெக்டர் ராஜ் கமல் மற்றும் போலீசார் வழக்கு பதிவு செய்து சம்பவ இடத்தை பார்வையிட்டு விசாரணை நடத்தி மர்ம நபர்களை தேடி வருகின்றனர்.