மது போதையில் கிணற்றில் தவறி விழுந்து விவசாயி சாவு

செய்யாறு:

திருவண்ணாமலை மாவட்டம், வெம்பாக்கம் அடுத்த வெங்களத்தூரை சேர்ந்தவர் மகேந்திரன் (வயது 37). விவசாயி. இவரது மனைவி சரளா (36). செய்யாறு சிப்காட்டில் ஷூ கம்பெனியில் வேலை செய்து வருகிறார். இவர்களுக்கு ஒரு மகன் மகள் உள்ளனர்.

மகேந்திரனுக்கு மது அருந்தும் பழக்கம் இருந்ததாக கூறப்படுகிறது. கடந்த 15 -ந் தேதி மனைவியிடம் மது குடிப்பதற்காக பணம் கேட்டு தகராறு செய்தார். பணத்தை வாங்கி கொண்டு வீட்டை விட்டு வெளியே சென்றவர் மீண்டும் வீடு திரும்பவில்லை.

வெகு நேரமாகியும் கணவன் வீட்டுக்கு வராததால் சரளா பல்வேறு இடங்களில் தேடினார். அவர் கிடைக்கவில்லை.

இந்த நிலையில் அதே பகுதியில் உள்ள கிணற்றில் மகேந்திரன் இறந்து கிடப்பதாக அப்பகுதி மக்கள் பிரம்மதேசம் போலீசாருக்கும், செய்யாறு தீயணைப்பு த்துறையினருக்கும் தகவல் தெரிவித்தனர்.

சம்பவ இடத்திற்கு விரைந்து வந்த போலீசார் மகேந்திரன் உடலை மீட்டு பிரேத பரிசோதனைக்காக செய்யாறு அரசு ஆஸ்பத்திரிக்கு அனுப்பி வைத்தனர். மது போதையில் கிணற்றில் தவறி விழுந்து மகேந்திரன் இறந்து இருக்கலாம் என்று கூறப்படுகிறது.

மேலும் போலீசார் வழக்கு பதிவு செய்து விசாரணை நடத்தி வருகின்றனர்.