குடியரசு தினத்தை முன்னிட்டு சென்னை விமான நிலையத்தில் 7 அடுக்கு பாதுகாப்பு
- மீனம்பாக்கம் உள்நாட்டு விமான நிலையம் முனையம் 4 பகுதியில் பாதுகாப்பு அணிவகுப்பு ஒத்திகை நடந்தது.
- 30-ந் தேதி நள்ளிரவு வரை 5 அடுக்கு பாதுகாப்பு முறை தொடர்ந்து அமலில் இருக்கும்.
மீனம்பாக்கம்:
குடியரசு தின விழா கொண்டாட்டத்தையொட்டி சென்னை மீனம்பாக்கம் விமான நிலையத்தில் கடந்த 20-ந் தேதி அதிகாலையில் இருந்து 5 அடுக்கு பாதுகாப்பு முறை அமல்படுத்தப்பட்டு வருகிறது. இந்த நிலையில் உச்சக்கட்ட பாதுகாப்பாக 7 அடுக்கு பாதுகாப்பு முறை அமலுக்கு வந்துள்ளது.
இதையடுத்து விமான நிலையத்தில் தமிழ்நாடு போலீஸ் அதிரடிப்படையினர், தேசிய பாதுகாப்பு படை, விமான பாதுகாப்பு படையினர், உளவுப் பிரிவு அதிகாரிகள் மற்றும் மத்திய தொழில் பாதுகாப்பு படையினர் ஆகியோர் தீவிர பாதுகாப்பு பணியில் ஈடுபட்டுள்ளனர்.
இதற்கிடையே நேற்று முன்தினம் நள்ளிரவில் இருந்து அதிகாலை வரை மீனம்பாக்கம் உள்நாட்டு விமான நிலையம் முனையம் 4 பகுதியில் பாதுகாப்பு அணிவகுப்பு ஒத்திகை நடந்தது. விமான நிலையத்துக்குள் நாச வேலையில் ஈடுபடுவதற்காக பயங்கரவாதி ஒருவன் உள்ளே புகுந்து விட்டதாகவும், அவனை தேசிய பாதுகாப்பு படை, மத்திய தொழில் பதுகாப்பு படை உள்ளிட்டோர் சுற்றி வளைத்து பிடிப்பது போலவும் ஒத்திகை நடத்தினர். விமான நிலையத்தில் அனைத்து வகை பாதுகாப்பு ஏற்பாடுகளும் திட்டமிட்டபடி செயல்பாட்டில் உள்ளதா? என்பது குறித்தும் ஆய்வு நடத்தினர்.
இந்த 7 அடுக்கு பாதுகாப்பு முறை நாளை (26-ந்தேதி) நள்ளிரவு வரை அமலில் இருக்கும். 30-ந் தேதி நள்ளிரவு வரை 5 அடுக்கு பாதுகாப்பு முறை தொடர்ந்து அமலில் இருக்கும் என்றும் விமான நிலைய அதிகாரிகள் தெரிவித்தனர்.