செய்திகள்

மதுரை:

பெருந்தலைவர் காமராஜரின் 116-வது பிறந்த நாளையொட்டி மதுரை விளக்குத்தூண் அருகில் உள்ள அவரது சிலைக்கு பா.ஜ.க. மாநில தலைவர் தமிழிசை சவுந்தரராஜன் மாலை அணிவித்தார். பின்னர் அவர் நிருபர்களிடம் கூறியதாவது:-

தமிழகத்தில் ஓட்டுக்கு பணம் கொடுக்கும் அளவுக்கு நிர்வாகத்தில் ஊழல் நடந்துள்ளது என்றுதான் அமித்ஷா பேசினார். அது இப்போது வேறு மாதிரி உலா வருகிறது.

பெருந்தலைவர் காமராஜருக்கு பெருமை சேர்ப்பதில் பா.ஜ.க. பெருமிதம் கொள்கிறது.

தமிழகத்தில் ஊழலற்ற ஆட்சி, வளர்ச்சிப் பாதைக்கு செல்வது அகிய வி‌ஷயங்களுக்கு எடுத்துக் காட்டாக திகழ்வது காமராஜர் ஆட்சிதான். எந்த ஆட்சியாக இருந்தாலும் சரி, எந்த கட்சியாக இருந்தாலும் சரி, ஊழல் இருக்கக்கூடாது என்பதுதான் பா.ஜ.க.வின் கொள்கை ஆகும்.

தமிழகத்துக்கு மத்திய அரசு சார்பில் பல்வேறு திட்டங்களை கொண்டு வந்துள்ளோம். மத்தியில் எந்த கட்சி ஆளுகிறதோ, அந்த கட்சியின் சின்னமான தாமரைதான் இங்கு மலரும். தமிழகத்தில் பா.ஜ.க. ஆட்சி அமைக்கும். பொருத்திருந்து பாருங்கள்.

தமிழ்நாட்டில் பா.ஜ.க. வளர்ச்சிப்பாதையில் செல்கிறது என்பதை அமித்ஷாவின் வருகை உறுதிப்படுத்தி உள்ளது.

இவ்வாறு அவர் கூறினார். #tamilisai #amitshah

ஈரோடு:

ஈரோடு, சூரம்பட்டி வலசில் உள்ள இந்திய கம்யூனிஸ்ட் கட்சியின் அலுவலகம் புதுப்பிக்கப்பட்டுள்ளது. இதன் திறப்பு விழா இன்று நடந்தது.

நிகழ்ச்சிக்கு சிறப்பு அழைப்பாளராக இந்திய கம்யூனிஸ்ட் கட்சியின் தேசிய குழு உறுப்பினர் தா.பாண்டியன் கலந்து கொண்டார்.பின்னர் நிரூபர்களுக்கு தா.பாண்டியன் பேட்டி அளித்தார்.

அப்போது அவர் கூறியதாவது.-

தமிழகத்தில் எங்கோ பெய்த மழையால் அணைகள் நிரம்பி வருகின்றன. ஆனால் இன்னும் பல நகரங்கள், கிராமங்களில் குடிநீர் பிரச்சனை உள்ளது. அதனை தீர்ப்பதற்கு தமிழக அரசு முன் வர வேண்டும்.

பல ஏழை விவசாயிகளை மிரட்டி அவர்களிடம் இருந்து நிலங்களை எடுத்து எட்டு வழி சாலை அமைக்கும் பணி நடக்கிறது. இந்த திட்டம் தேவைதானா?. அரசு இந்த திட்டம் குறித்து மறுபரிசீலனை செய்ய வேண்டும்.

பா.ஜனதா.தலைவர் அமித்ஷா தமிழகத்தை ஊழல் நிறைந்த மாநிலம் என்று சொல்லுவது அவர் கண்ணாடி முன்பு அவரே சொல்லி கொள்வது போல் உள்ளது. அவர் மகன் இரண்டு வருடத்தில் 16 ஆயிரம் கோடி வருமானம் ஈட்டி உள்ளார்.

செலவு சிக்கனம் என்ற பெயரில் நாடு முழுவதும் ஒரே நேரத்தில் பாராளுமன்றத்துக்கும், சட்டமன்றத்துக்கும் ஒரே நேரத்தில் தேர்தல் என்பது சாத்தியமற்றது. மோடி உலகம் சுற்றும் செலவை குறைந்தாலே செலவை குறைக்கலாம்.

இவ்வாறு அவர் கூறினார்.

பேட்டியின் போது இந்திய கம்யூனிஸ்ட் மாநில செயலாளர் முத்தரசன் உடன் இருந்தார்.  #SimultaneousElections #Pandian

சென்னை:

ம.தி.மு.க. பொதுச் செயலாளர் வைகோ வெளியிட்டுள்ள அறிக்கையில் கூறியிருப்பதாவது:-

சட்டமன்ற எதிர்க்கட்சி தலைவர் மு.க.ஸ்டாலின் குறித்தோ, நம் இயக்கத் தோழர்கள் முகநூலிலோ இணையதளத்திலோ, வாட்ஸ்- அப்பிலோ, சமூக வலை தளங்களிலோ எந்த விமர்சனமும் செய்யக் கூடாது.

அப்படிச் செய்பவர்கள் ம.தி.மு.க. நலனுக்கு பெருங்கேடு செய்பவர்கள் ஆவார்கள். இதனை மீறிச் செயல்படுகின்றவர்கள் ம.தி.மு.க.வினராவோ, ஆதரவாளர்களாகவோ, பற்றாளர்களாகவோ கருதப்பட மாட்டார்கள். ம.தி.மு.க.வுக்கும் அவர்களுக்கும் தொடர்பும் இல்லை.

இவ்வாறு அதில் கூறியுள்ளார். #MKStalin #Vaiko

திருவொற்றியூர்:

தி.மு.க. தலைவர் கருணாநிதி பிறந்தநாள் விழா திருவொற்றியூர் மேற்கு பகுதி தி.மு.க. சார்பில் கொண்டாடப்பட்டது. பகுதி செயலாளர் கே.பி.சங்கர் தலைமை தாங்கினார். எம்.எல்.ஏ.க்கள் கே.பி.பி. சாமி, மாதவரம் சுதர்சனம் முன்னிலை வகித்தனர்.

நிகழ்ச்சியில் முன்னாள் மத்திய மந்திரி ஆ.ராசா கலந்துகொண்டு நலிவுற்றோருக்கு நலத்திட்ட உதவிகளை வழங்கி பேசியதாவது:-

கலைஞர் முதல்வராக இருந்தபோது பல்வேறு திட்டங்களை செயல்படுத்தியுள்ளார். 20 ஆயிரம் கிராமங்களுக்கு மின்சாரம் வழங்கியவர் கலைஞர். விவசாயிகளுக்கு இலவச மின்சாரம் வழங்கி வரலாற்றில் இடம் பிடித்தவர். மக்கள் தி.மு.க.வை சேர்ந்தவர்களை தான் இன்னும் அமைச்சராக நினைத்து கொண்டு இருக்கின்றனர். அ.தி.மு.க அமைச்சர்களுக்கு மதிப்பில்லை.

மத்திய அரசு நீட் தேர்வை கொண்டு வந்து தாழ்த்தப்பட்ட சமுதாயத்தை சேர்ந்த மாணவர்களின் கனவை தகர்த்து உள்ளது கண்டிக்கத்தக்கது. நீட் தேர்வு முறையினால் தற்போது மருத்துவ படிப்பிற்கு காசோலை மூலம் லஞ்சம் பெறப்படுகிறது. காவிரி மேலாண்மை ஆணையத்துக்கு எவ்வித சக்தியும் அதிகாரமும் இல்லை மத்திய அரசை எதிர்பார்த்து இருக்கும் நிலை தான் உள்ளது ஆகவே தமிழகத்திற்கு தண்ணீர் கிடைக்காது.

தமிழகத்தில் டாஸ்மாக், பொதுப்பணித்துறை, சத்துணவு துறை என அனைத்திலும் ஊழல் என்று கமி‌ஷன் ஆட்சி நடைபெற்று வருகின்றது. அ.தி.மு.க எம்.எல்.ஏ.க்களுக்கு இது ஒரு பொற்காலம் டி.டி.வி தினகரனுடன் பேசி அவருடன் செல்ல நினைக்கும் எம்.எல்.ஏ.விற்கு மாத மாதம் ரூ.10 லட்சம் பணமும் தங்கக்கட்டிகளும் வழங்கப்படுகிறது.

தமிழகத்திற்கு வந்த பா.ஜனதா தலைவர் அமித்ஷா தமிழகம் தான் ஊழலில் உச்சக்கட்டம் என கூறியதற்கு தமிழக முதல்வர் எடப்பாடி பழனிச்சாமி எதிர்ப்பு தெரிவிக்காமல் வாய்மூடி மவுனம் காப்பது ஏன்?

அமித்ஷா மட்டுமல்லாது இன்று முட்டையில் ஊழல் நடைபெற்று இருப்பதாகவும் தமிழகத்தில் சட்டம் ஒழுங்கு சரியில்லை எனவும் மத்திய மந்திரி பொன்.ராதாகிருஷ்ணன் கூறி இருப்பதற்கு அ.தி.மு.க என்ன பதில் சொல்லப்போகிறது

மத்தியில் மதவாத ஆட்சியும் மாநிலத்தில் ஊழல் ஆட்சியும் இணைந்து தமிழகத்தை வஞ்சித்து வருவதை தடுக்க தி.மு.க ஆட்சிக்கு வரவேண்டும்.

இவ்வாறு அவர் பேசினார்.

விழாவில் நிர்வாகிகள் வி. ராமநாதன், நாகலிங்கம் கருணாநிதி, ரமேஷ், துர்கா கோதண்டம், ஏ. வி. ஆறுமுகம், மணலி டி. நாகபாண்டியன், ஆதிகுருசாமி உட்பட பலர் கலந்து கொண்டனர். கே. பி. சொக்கலிங்கம் நன்றி கூறினார். #EdappadiPalaniswami #AmitShah

திருச்சி:

திண்டுக்கல்லில் நடைபெறும் நிகழ்ச்சியில் பங்கேற்பதற்காக அம்மா மக்கள் முன்னேற்ற கழக துணை பொதுச் செயலாளர் டி.டி.வி. தினகரன் சென்னையில் இருந்து விமானம் மூலம் திருச்சி வந்தார். அப்போது அவர் நிரூபர்களிடம் கூறிய தாவது:-

தமிழகத்தில் கடந்த ஒன்றரை ஆண்டுகளாக மக்கள் விரோத, ஊழல் ஆட்சி நடை பெற்று வருகிறது. இதை மத்தியில் ஆளும் பா.ஜ.க.வின் தலைவர் அமித்ஷா கூறினால் ஏற்றுக் கொள்கிறீர்கள். இந்தியாவிலேயே ஊழலில் முதலிடம் பெற்ற மாநிலமாகத்தான் தமிழகம் திகழ்கிறது. சாதாரண மக்களை கேட்டால் கூட இதனைத் தான் கூறுவார்கள்.

தமிழகத்தில் லோக்பால் கொண்டு வருவது என்பதெல்லாம் வெறும் கண்துடைப்பாகும். பாராளுமன்ற தேர்தலுடன் தமிழக சட்டப்பேர வைக்கும் தேர்தல் வரும். அப்போது மறைந்த முதல்வர் ஜெயலலிதாவின் உண்மையான ஆட்சி தமிழகத்தில் மலரும். அப்போது உண்மையான லோக்பால் சட்டம் பேரவையில் நிறைவேற்றப்படும். யாரால் ஓ.பி.எஸ்-இ.பி.எஸ். கைகோர்த்தார்களோ? அவர்களாலேயே அது பிரியும்.

இவ்வாறு அவர் கூறினார்.

பின்னர் அவர் திண்டுக்கல்லுக்கு காரில் புறப்பட்டு சென்றார். ஸ்ரீரங்கம் சட்டசபை தொகுதிக்குட்பட்ட வண்ணாங்கோவில் பகுதியில் செல்லும்போது அவருக்கு கட்சியினர் உற்சாக வரவேற்பு அளித்தனர்.

அப்போது டி.டி.வி.தினகரன் பேசும் போது, துரோகத்தை கருவறுக்க வேண்டும் என்பார்கள். அது போலத்தான் இப்போது தமிழகத்தில் நடக்கும் துரோக ஆட்சிக்கு கரு உள்ள முட்டையின் மூலம் ஆபத்து ஏற்பட்டுள்ளது. விரைவில் இந்த ஆட்சி வீட்டுக்கு அனுப்பப்படும்.

வரும் சட்டமன்ற தேர்தலில் ஸ்ரீரங்கம் தொகுதியில் சசிகலாவின் ஆசி பெற்ற வேட்பாளர் மனோகரன் போட்டியிடுவார். அரசு தலைமை கொறடாவாகவும், எம்.எல்.ஏ.வாகவும் இருந்து மக்கள் பணியாற்றிய அவரை பெருவாரியான வாக்குகள் வித்தியாசத்தில் வெற்றி பெற செய்ய வேண்டும் என்றார். இதையடுத்து அவர் திண்டுக்கல் புறப்பட்டு சென்றார்.

தமிழகத்தில் ஆளும் அ.தி.மு.க.வின் ஆட்சி முடிய இன்னும் 3 ஆண்டுகள் உள்ள நிலையில் தினகரன் ஸ்ரீரங்கம் தொகுதிக்கு வேட்பாளர் அறிவித்து பிரச்சாரத்தை தொடங்கியிருப்பது அரசியல் வட்டாரத்தில் பரபரப்பை ஏற்படுத்தியுள்ளது. #Dhinakaran #Assemblyelection

ஜெயங்கொண்டம் :

அரியலூர் மாவட்டம், ஜெயங்கொண்டத்தில் காவிரி நதிநீர் மீட்பு போராட்ட வெற்றி விளக்க பொதுக்கூட்டம் நடைபெற்றது. சிறப்பு அழைப்பாளராக கலந்து கொண்டு அமைச்சர் தங்கமணி பேசியதாவது:-

மறைந்த முதல்வர் ஜெயலலிதா, தமிழக மக்களுக்காக காவிரியிலிருந்து தண்ணீரை பெற்றுத்தர வேண்டும் என்பதற்காக பல போராட்டங்களை நடத்தினார். ஆனால் அப்போது மத்தியில் ஆண்ட காங்கிரசும், மாநிலத்தில் ஆட்சி நடத்திய தி.மு.க.வும் அதற்காக எந்த முயற்சியும் எடுக்கவில்லை. ஆனால் ஜெயலலிதா போராடி பெற்ற தீர்ப்பினை அரசிதழில் வெளியிட செய்தார்.

ஆனால் அப்போது ஆட்சி நடத்தியவர்கள் அதனை அரசிதழில் வெளியிடுவதற்கான நடவடிக்கை மேற்கொள்ளவில்லை. இன்றைக்கு காவிரி நீர் வருகிறது என்றால் அதற்கு ஜெயலலிதாதான் காரணம்.

தற்பொழுது ஆட்சி நடத்தி வரும் நமது முதல்வர் ஒரு சாதாரண குடும்பத்தைச் சேர்ந்தவர். அவர் முதல்வர் ஆனவுடன் அப்பதவியிலிருந்து நீக்கி ஆட்சியை கலைப்பதற்கு பல்வேறு வகையில் தி.மு.க. முயற்சி செய்து வருகிறது. ஆனால் தொண்டர்களின் ஆதரவோடு இன்று வரை சிறப்பாக ஆட்சி நடைபெற்று வருகிறது.

சொத்து சம்பந்தமான வழக்கு பெங்களூர் கோர்ட்டில் நடந்து கொண்டிருந்த போது, சசிகலா குடும்பம் ஆட்சியை பிடிப்பதற்காக பெங்களூரில் ஒரு ஓட்டலில் ரூம் போட்டு பேசியுள்ளனர். இதனை அங்கிருந்த ஒரு போலீஸ்காரர் பதிவு செய்து கொண்டு வந்து ஜெயலலிதாவிடம் கொடுத்ததால் அவர்களின் சுயரூபம் தெரிய வந்ததை அடுத்து சசிகலா உட்பட அனைவரையும் கட்சியிலிருந்து நீக்கினார்.

சில மாதங்கள் கழித்து சசிகலா, ஜெயலலிதாவிடம் எனது குடும்பம் இவ்வளவு பெரிய துரோகம் செய்யுமென்று நான் நினைக்கவில்லை. என்னை மன்னித்து மீண்டும் ஏற்றுக்கொள்ளுங்கள் என மன்னிப்பு கடிதம் கொடுத்து அனுப்பினார். மன்னிப்பு கொடுத்து மீண்டும் சசிகலாவை மட்டும் ஜெயலலிதா ஏற்றுக் கொண்டார்.

ஆனால் கடந்த 2008-ம் ஆண்டே தினகரனை கட்சியை விட்டே நீக்கினார். இனிமேல் போயஸ்கார்டன் பக்கமே வரக்கூடாது, பெரியகுளம் தொகுதி பக்கமே செல்லக்கூடாது. சென்னையிலேயே இருக்கக்கூடாது என கட்டளையிட்டார். அது முதல் ஜெயலலிதா உயிரோடு இருக்கும் வரை இருந்த இடம் தெரியாத அளவிற்கு இருந்து வந்தவர் இன்று ஜெயலலிதா இல்லை என்றதும் ஆட்சியை பிடிக்கலாம் என நினைக்கிறார்.

ஏன் தினகரனை நீக்கினார் என்றால், ஜெயலலிதா மீது தி.மு.க. ஒரு வழக்கு தொடர்ந்தது. அந்த வழக்கில் தினகரனும் இருக்கிறார். அப்போது ஜெயலலிதாவிற்கு தெரியாமலேயே தினகரன் லண்டனில் ஒரு ஓட்டல் வாங்கியுள்ளார். அந்த ஓட்டலையும் சேர்த்து வழக்கு போடப்பட்டுள்ளது.

அதில் தினகரனும் ஒரு குற்றவாளியாக இருக்கிறார். தினகரன் அப்போதே முடிவு செய்து விட்டார். எப்படியாவது ஜெயலலிதாவை ஜெயிலுக்கு அனுப்ப வேண்டும். அதன் பின் நாம் ஆட்சியை பிடித்து விடலாம் என்று கருணாநிதியுடன் கைகோர்த்துக்கொண்டு செயல்பட்டுள்ளார்.

கடந்த 2007-ம் ஆண்டு தி.மு.க. ஆட்சி நடைபெற்றுக் கொண்டிருந்த போது கருணாநிதியுடன் பேசிய தினகரன், என்னையும் லண்டன் சொகுசு ஓட்டலையும் வழக்கிலிருந்து விடுவித்து விடுங்கள். மற்றவர்களையெல்லாம் வழக்கில் சேர்த்துக் கொள்ளுங்கள் என்று கூறியதும் லண்டனில் உள்ள விலைமதிக்க முடியாத அந்த ஓட்டலை வழக்கில் இருந்து தி.மு.க.வினர் நீக்கி விட்டனர். ஒப்பந்தம் இல்லை என்று சொன்னால் தினகரனையும், ஓட்டலையும் வழக்கில் இருந்து நீக்கியிருப்பார்களா?

ஜெயலலிதா இறந்த பிறகு தமிழ்வருடப் பிறப்பையொட்டி கொறடா மற்றும் எம்.எல்.ஏ.க்கள் உட்பட அனைவரும் தினகரன் வீட்டிற்கு சென்று அவரிடம், நீங்கள் இந்த இயக்கத்திற்கு வந்த பிறகு பிரச்சினைகள் அதிகம் வந்துவிட்டது. ஆகையால் நீங்கள் இந்த இயக்கத்தை விட்டு ஒதுங்கி இருங்கள். முதல்வர் எடப்பாடி பழனிச்சாமி -ஓ.பன்னீர்செல்வத்தை வைத்து நாங்கள் இந்த இயக்கத்தை நடத்திக்கொள்கிறோம் என்று சொன்னோம்.

அதற்கு தினகரன் உங்களுக்கு 60 நாட்கள் கெடு கொடுக்கின்றேன். அதன் பிறகு நான் மீண்டும் எனது விஸ்வரூபத்தை எடுப்பேன். அதற்குள் ஓ.பி.எஸ்.சிடம் பேசி முடிவு செய்து கொள்ளுங்கள் என்றார்.

அதற்கும் மேல் தாமதமானால் என்னுடைய ஒரு முகத்தை மட்டும்தான் நீங்கள் பார்த்திருக்கின்றீர்கள். எனது இன்னொரு முகத்தை நீங்கள் பார்த்தது கிடையாது என்று கூறி, என்னையும், வேலுமணியையும் பார்த்து உங்கள் வீடு தேடி வந்து சட்டை காலரை தூக்கி உதைப்பேன் என்று சொன்னார்.

மேலும் அங்கிருந்து எழுந்து எங்களை அடிப்பதை போல் வந்தார். இதற்கு மேலும் அங்கிருந்தால் அசிங்கமாகி விடும் என்று நானும், வேலுமணியும் வெளியே வந்து விட்டோம். எங்கள் பின்னே அனைத்து அமைச்சர்களும் வந்து விட்டார்கள்.

தினகரன் முதல்வராவதற்கு கனவு காண்கின்றார். அம்மாவின் ஆத்மா இருக்கும் வரை சசிகலா குடும்பத்தில் எவரும் முதல்வராக முடியாது. இந்த கட்சியில் உரிமைக் கொண்டாடுவதற்கு என்ன தகுதி இருக்கிறது. அம்மா ஒரு முறை சட்டமன்றத்தில் பேசிய போது, எனக்கென்று யாரும் கிடையாது, எனக்காக இருப்பவர்கள் ஒன்றரை கோடி தொண்டர்களும், 7½ கோடி தமிழக மக்களும்தான் எனது குடும்பம் என பேசினார். ஆனாலும் எனக்குப் பின்னால் 100 ஆண்டு காலம் இந்த ஆட்சி நடைபெற வேண்டும் என கூறினார்.

ஆர்.கே.நகர் தொகுதியில் நுழையும் போதெல்லாம் ஏமாந்த மக்கள் 20 ரூபாய் நோட்டை காண்பித்து 20 ரூபாய் இங்கே, 10 ஆயிரம் எங்கே என்று கேட்டுக்கொண்டிருக்கின்ற நிலைமை இருக்கின்ற காரணத்தினால் தேர்ந்தெடுக்கப்பட்ட தொகுதிக்கு கூட செல்லமுடியாத சட்டமன்ற உறுப்பினர்தான் தினகரன்.

இவ்வாறு அவர் பேசினார். #ADMK #MinisterThangamani

சென்னை:

பாராளுமன்ற தேர்தலுக்கு இன்னும் 8 மாதங்களே உள்ள நிலையில் ஒவ்வொரு கட்சியும் தேர்தலுக்கான முன்னேற்பாடுகள் செய்யப்பட்டு வருகின்றன.

தமிழகம் மற்றும் புதுச்சேரியில் உள்ள 40 தொகுதிகளிலும் உள்ள 65 ஆயிரம் வாக்குச் சாவடிகளுக்கும் பொறுப்பாளர்கள் பட்டியலை தி.மு.க. தயாரித்து வருகிறது.

இது மட்டுமின்றி பூத் கமிட்டிக்கு உறுப்பினர்களை நியமிக்கும் பணியும் தீவிரப்படுத்தப்பட்டுள்ளது. ஒவ்வொரு பூத் கமிட்டியிலும் 20 பேர்களை நியமித்து வருகின்றனர். அதாவது 60 பேருக்கு ஒரு பூத் கமிட்டி உறுப்பினர் என்ற அடிப்படையில் நியமிக்கப்பட்டு வருகின்றனர்.

ஒவ்வொரு பூத் கமிட்டியிலும் உள்ள 20 பேரில் 5 பேர் பெண்கள். 5 பேர் இளைஞரணியை சேர்ந்தவர்கள். ஒருவர் தகவல் தொழில் நுட்ப பிரிவை சேர்ந்தவர் என்ற வகையில் தேர்ந்தெடுத்துள்ளனர்.

40 பாராளுமன்ற தொகுதியின் கள நிலவரத்தை நேரில் அறிந்து தலைமைக்கு தெரிவிக்க ஏதுவாக 12 எம்.எல்.ஏ.க்கள் அடங்கிய சிறப்பு குழுவை செயல் தலைவர் மு.க.ஸ்டாலின் அமைத்துள்ளார்.

இந்த குழுவில் இடம் பெற்றுள்ள எம்.எல்.ஏ.க்கள் வருமாறு:-

1. அன்பில் மகேஷ் பொய்யாமொழி (திருவெறும்பூர்).

2. இ.கருணாநிதி (பல்லாவரம்)

3. டி.ஆர்.பி.ராஜா (மன்னார்குடி)

4. எஸ்.ஆஸ்டின் (கன்னியாகுமரி)

5. கார்த்திகேயன் (ரிஷிவந்தியம்)

6. கோவி செழியன் (திருவிடைமருதூர்)

7. எழிலரசன் (காஞ்சீபுரம்)

8. இன்பசேகரன் (பென்னாகரம்)

9. மு.பெ.கிரி (செங்கம்)

10. ஈஸ்வரப்பன் (ஆற்காடு)

11. தாயகம் கவி (திரு.வி.க.நகர்)

12. ரவிச்சந்திரன் (எழும்பூர்)

இக்குழுவின் பல்வேறு மாவட்டங்களுக்கு சென்று ஆய்வு பணியில் ஈடுபட்டு வருகின்றனர்.

தொகுதி குறித்த உண்மை நிலவரங்களை இந்த மாதத்திற்குள் தொகுத்து மு.க.ஸ்டாலினிடம் அறிக்கையாக வழங்க உள்ளனர்.

இதை அடிப்படையாக கொண்டு கட்சிப் பணிகளை வேகப்படுத்த தி.மு.க. தலைமை பல்வேறு நடவடிக்கைகளை எடுக்கும் என தெரிகிறது. #DMK #MKStalin