டெல்லி

நாடு முழுவதும் நாளை (ஞாயிற்றுக்கிழமை) 76-வது குடியரசு தின விழா கொண்டாடப்படுகிறது.

குடியரசு தினத்திற்காக நாளை அதிகாலை 3 மணிக்கு சேவைகள் தொடங்கப்படும் என்று டெல்லி மெட்ரோ நிர்வாகம் தெரிவித்துள்ளது.

இதுதொடர்பாக டெல்லி மெட்ரோ ரெயில் நிர்வாகம் வெளியிட்டுள்ள அறிவிப்பில்,

குடியரசு தினத்தின் பெருமையையும் உணர்வையும் தேசம் கொண்டாடும் நிலையில், குடியரசு தின விழாவைக் காண கர்தவ்யா பாதைக்கு சுமூகமாக பயணிக்கவும் மக்களுக்கு உதவும் வகையில் டெல்லி மெட்ரோ நாளை அதிகாலை 3 மணிக்கு தனது சேவைகளைத் தொடங்கும்.

பயணிகளுக்கு சுமூகமான பயணத்தை உறுதி செய்வதற்காக அதிகாலை 3 மணி முதல் காலை 6 மணி வரை 30 நிமிட இடைவெளியில் ரெயில்கள் இயக்கப்படும். அதன் பிறகு நாள் முழுவதும் வழக்கமான கால அட்டவணை பின்பற்றப்படும்.

பயணிகள் அதற்கேற்ப தங்கள் பயணத்தைத் திட்டமிடவும், கடைசி நிமிட சிரமத்தைத் தவிர்க்கவும் மெட்ரோ சேவைகளை பயன்படுத்துமாறு அறிவுறுத்தப்பட்டுள்ளது.

இவ்வாறு அதில் தெரிவிக்கப்பட்டுள்ளது.

புதுடெல்லி:

76-வது குடியரசு தினவிழா நாளை நாடு முழுவதும் கொண்டாடப்படுகிறது. இதையொட்டி டெல்லியில் அணிவகுப்பு நிகழ்ச்சி நடைபெறும்.

ஒவ்வொரு குடியரசு தின அணிவகுப்பிலும் வெளிநாட்டைச் சேர்ந்த அதிபர் சிறப்பு அழைப்பாளராக கலந்துகொள்வார்.

இதற்கிடையே, குடியரசு தினவிழாவில் கலந்து கொள்வதற்காக இந்தோனேசிய அதிபர் பிரபோவா சுபியாண்டோ டெல்லி வந்துள்ளார். அவரை வெளியுறவுத்துறை இணை மந்திரி பபித்ரா மார்கிரெட்டாவரவேற்றார். அவரது முதல் இந்திய பயணம் இதுவாகும்.

இந்நிலையில், தலைநகர் டெல்லியில் நேற்று இந்தோனேசிய அதிபர் பிரபோவோ சுபியாண்டோவை வெளியுறவு மந்திரி ஜெய்சங்கர் சந்தித்துப் பேசினார்.

அதன்பின், குடியரசு தினவிழாவில் சிறப்பு விருந்தினராக இந்தோனேசிய அதிபர் பிரபோவோ சுபியாண்டோ பங்கேற்பது இரு நாடுகளுக்கு இடையிலான நட்பின் பொருத்தமான கொண்டாட்டமாக இருக்கும் என தெரிவித்தார்.

இருதரப்பு உறவுகள் குறித்து பிரதமர் மோடியுடன் இந்தோனேசிய அதிபர் இன்று பேச்சு நடத்த உள்ளார். அப்போது பாதுகாப்பு, வர்த்தகம், முதலீடு, சுகாதாரம், எரிசக்தி, சுற்றுலா உள்ளிட்ட விவகாரங்களில் இரு நாடுகளிடையே புரிந்துணர்வு ஒப்பந்தங்கள் கையெழுத்தாகும் என கூறப்படுகிறது.

புதுடெல்லி:

இந்திய கிரிக்கெட் அணியின் முன்னாள் வீரர் மனோஜ் திவாரி லல்லண்டாப் நிகழ்ச்சியில் பங்கேற்றார். அப்போது அவர் கூறியதாவது:

அப்போது இந்திய அணியின் கேப்டனாக எம்.எஸ்.டோனி இருந்தார். கேப்டனின் திட்டப்படியே இந்திய அணி இயங்குகிறது.

கபில்தேவ் காலத்தில் அவர் நிகழ்ச்சியை நடத்தினார். சுனில் கவாஸ்கர் காலத்தில் அது அவரது அழைப்பு. முகமது அசாருதீன் பதவி காலத்திலும் அதுதான். அதன்பிறகு தாதா மற்றும் பலர். கண்டிப்பான நிர்வாகி வந்து ஒரு விதியை உருவாக்காத வரை இது தொடரும்.

சதம் அடித்த பிறகு 14 போட்டிகளில் நான் நீக்கப்பட்டேன். ஒரு சதம் அடித்த பிறகு ஒரு வீரர் கைவிடப்பட்டால் வெளிப்படையான பதிலைத் தெரிந்து கொள்ள விரும்புகிறேன். ஆனால் எனக்கு எந்தக் குறிப்பும் இல்லை.

அப்போது அணியில் இருந்த வீரர்கள் விராட் கோலி, சுரேஷ் ரெய்னா, ரோகித் சர்மா ஆகியோர் பங்கேற்ற டூரில் அவர்கள் ரன் எடுக்கவில்லை. இங்கு நான் சதமடித்து ஆட்ட நாயகன் விருதை வென்ற பிறகும், பிளேயிங் லெவன் அணியில் இடம் பிடிக்க முடியவில்லை. அப்போது கைவிடப்பட்ட வீரருக்கு போதிய பயிற்சி கிடைக்கவில்லை என தெரிவித்தார்.

புதுடெல்லி:

பாராளுமன்ற பட்ஜெட் கூட்டத் தொடர் ஜனவரி 31-ம் தேதி தொடங்குகிறது. அன்று மக்களவை மற்றும் மாநிலங்களவை கூட்டுக் கூட்டத்தில் ஜனாதிபதி திரவுபதி முர்மு உரை நிகழ்த்துகிறார்.

இதைத் தொடர்ந்து 2025-26 ம் நிதி ஆண்டுக்கான மத்திய பட்ஜெட்டை பிப்ரவரி 1-ம் தேதி மத்திய நிதி மந்திரி நிர்மலா சீதாராமன் தாக்கல் செய்யவுள்ளார்.

ஒவ்வொரு ஆண்டும் பட்ஜெட் தயாரிப்பு பணிகள் இறுதியானதும் அல்வா கொடுக்கும் நிகழ்ச்சி நடைபெறுவது வழக்கம். நிதிநிலை அறிக்கை தயாரிக்கும் அதிகாரிகளும் ஊழியா்களும் அறைக்குள் பூட்டப்படும் 'லாக்-இன்' நடைமுறை தொடங்குவதற்கு முன் அல்வா நிகழ்வு நடத்தப்படுகிறது.

இந்நிலையில், அல்வா கிண்டும் நிகழ்ச்சி நேற்று நடந்தது. இதில் மத்திய நிதி மந்திரி நிர்மலா சீதாராமன் பங்கேற்று, பட்ஜெட் தயாரிப்பு பணியில் ஈடுபட்டு வரும் அதிகாரிகள் அனைவருக்கும் அல்வா விநியோகம் செய்தார்.

இந்த நிகழ்ச்சியில் பட்ஜெட் தயாரித்தல் மற்றும் தொகுத்தல் பணிகளில் ஈடுபட்டுள்ள அனைத்து அலுவலர்களும் பங்கேற்றனர்.

டெல்லி மாநில சட்டசபை தேர்தல் அடுத்த மாதம் 5-ந்தேதி நடைபெற இருக்கிறது. ஆம் ஆத்மி, பாஜக, காங்கிரஸ் இடையே மும்முனை போட்டி நிலவுகிறது. இருந்தாலும் ஆம் ஆத்மி- பாஜக இடையில்தான் கடும் போட்டி நிலவுகிறது.

4-வது முறையாக ஆட்சியை பிடிக்க ஆம் ஆத்மி தீவிர பிரசாரம் மேற்கொண்டு வருகிறது. அதேவேளையில் ஆம் ஆத்மியிடம் இருந்து ஆட்சியை கைப்பற்ற பாஜக களம் இறங்கியுள்ளது.

எப்படியாவது ஆட்சியை பிடிக்க வேண்டும் என பாஜக வாக்காளர்களுக்கு தங்க செயின், சேலை, ஷூ, பணம் வழங்கி வருவதாக குற்றம் சாட்டப்பட்டு வருகிறது.

இந்த நிலையில் அரவிந்த் கெஜரிவால் டெல்லி மக்களுக்காக ஒரு வீடியோவை வெளியிட்டுள்ளார். அதில் அரவிந்த் கெஜ்ரிவால் கூறியிருப்பதாவது:-

அது உங்களுடைய பணம். பணத்தை பெற்றுக் கொள்ளுங்கள். ஆனால், உங்களுடைய வாக்கை 1,100 ரூபாய் அல்லது சேலைக்காக விற்க வேண்டாம். உங்களுடைய வாக்கு விலைமதிப்பற்றது.

நம்முடைய வாக்கை வாங்க முடியும் என்றால், அதன்பின் ஜனநாயகம் முடிவுக்கு வந்துவிடும். பணக்காரர்கள் மட்டுமே ஆட்சி நடத்த முடியும். யாருக்கும் வாக்களியுங்கள். ஆனால் பணம் வழங்குபவர்களுக்கு வாக்களிக்காதீர்கள்.

இவ்வாறு கெஜ்ரிவால் தெரிவித்துள்ளார்.

பாஜக தலைமையிலான மத்திய அரசு மற்றும் டெல்லி போலீஸ் அரவிந்த் கெஜ்ரிவாலை கொல்ல சதி செய்வதாக ஆம் ஆத்மி கட்சி பரபரப்பு குற்றச்சாட்டை முன்வைத்துள்ளது. மேலும், பஞ்சாப் மாநில அரசால் வழங்கப்பட்டு வந்த பாதுகாப்பை மீண்டும் வழங்க தேர்தல் ஆணையத்தை வலியுறுத்தியுள்ளது. இந்த குற்றச்சாட்டுக்கு பாஜக அல்லது டெல்லி போலீஸ் தரப்பில் இருந்து உடனடியாக பதில் அளிக்கப்படவில்லை.

டெல்லி மாநில முதல்வர் அதிஷி, பஞ்சாப் மாநில முதல்வர் பகவத் மான் சிங் ஆகியோர் இன்று செய்தியாளர்களை சந்தித்தனர். அப்போது "பிப்ரவரி 5-ந்தேதி நடைபெறும் டெல்லி சட்டமன்ற தேர்தலில் ஆம் ஆத்மிக்கு சமநிலையான களம் தேவை. மற்றும் பஞ்சாப் போலீசார் வழங்கப்பட்டு வந்த பாதுகாப்பை மீண்டும் வழங்க வேண்டும்.

கெஜ்ரிவாலை கொலை செய்ய இரண்டு வீரர்கள் ஈடுபட்டுள்ளனர். அவர்கள் பாஜக மற்றும் டெல்லி போலீஸ். இரண்டு பேரும் கெஜ்ரிவால் வாழ்வை முடிவுக்கு கொண்டுவர சதி செய்கின்றனர். அவர் மீது ஒன்றன் பின் ஒன்றாக தாக்குதல் நடத்தப்பட்டுள்ளது. கடந்த ஆண்டு அக்டோபர் மாதம் கெஜ்ரிவால் மீது தாக்குதல் நடத்தப்பட்டது. அவர் மீது தாக்குதல் நடத்தியது பாஜக தொண்டரக்ள் என எங்களுடைய விசாரணையில் தெரியவந்தது. ஆனால் போலீசார் எந்த நடவடிக்கையும் எடுக்கவில்லை.

கெஜ்ரிவாலுக்கு மீண்டும் பாதுகாப்பு வழங்கப்பட வேண்டும் என தேர்தல் ஆணையத்திற்கு கடிதம் எழுதியுள்ளோம். எங்களுக்கு டெல்லி போலீசார் மீது நம்பிக்கை இல்லை. அது அமித் ஷாவின் கட்டுப்பாட்டுக்குள் உள்ளது. கெஜ்ரிவாலின் பாதுகாப்பை திரும்பப் பெற்றது மோசமான அரசியல்" என்றனர்.

மத்திய அரசு பாராளுமன்றத்தில் வக்பு வாரிய சட்ட திருத்த மசோதாவை தாக்கல் செய்தது. இந்த மசோதா பாராளுமன்ற கூட்டுக்குழுவிற்கு அனுப்ப தீர்மானிக்கப்பட்டது. சட்ட திருத்த மசோதாவில் உள்ள சாதகம் மற்றும் பாதகம் ஆகியவை ஆராய்ந்து அனைத்துக் கட்சி ஆதரவுடன் மசோதா நிறைவேற வேண்டும் என்பதற்காக பராளுமன்ற கூட்டுக்குழுவிற்கு அனுப்பப்பட்டது. பாராளுமன்ற குழு மதத் தலைவர்கள் உள்ளிட்ட பல்வேறு அமைப்புகளிடம் கருத்துகளை கேட்டறிந்து வருகிறது.

இந்த நிலையில் இன்று நடைபெற்ற கூட்டத்தில் எதிர்க்கட்சி எம்.பி.க்கள் தங்களது ஆட்சேபனைகளை தெரிவித்தினர். அப்போது எதிர்க்கட்சி எம்.பி.க்கள் அமள மற்றும் ரகளையில் ஈடுபட்டனர். இதனால் ஒவைசி உள்ளிட்ட 10 எதிர்க்கட்சி எம்.பி.க்கள் சஸ்பெண்ட் செய்யப்பட்டனர்.

வக்பு வாரிய சட்ட திருத்த மசோதாவில் முஸ்லிம் அல்லாத நபர் மற்றும் குறைந்த பட்சம் இரண்டு பெண் உறுப்பினர்கள் இடம்பெறும் வகையில் திருத்தம் செய்யப்பட்டுள்ளது. இதற்கு எதிர்க்கட்சி எம்.பி.க்கள் மற்றும் முஸ்லிம் மதத்தைச் சேர்ந்தவர்கள் கடும் எதிர்ப்பு தெரிவித்து வருகின்றனர்.

ஜம்மு-காஷ்மீர் மாநிலத்தை சேர்ந்த முஸ்லிம் மதத் தலைவர் மிர்வைஸிடம் இன்று குழு முன் தனது கருத்துகளை தெரிவித்தார். பின்னர் அவர் கூறுகையில் "வக்பு வாரியம் விவகாரம் மிகவும் தீவிரமான விசயம். குறிப்பாக ஜம்மு-காஷ்மீர் மக்களுக்கு முக்கியமான விசயம். ஏனென்றால், இது முஸ்லிம் அதிகமாக வாழும் மாநிலம் ஆகும். வக்பு விவகாரங்களில் அரசாங்கம் தலையிடுவதைத் தவிர்க்க வேண்டும் என்று நாங்கள் விரும்புகிறோம்" என கமிட்டியிடம் தெரிவித்துள்ளார்.

மேலும், "எங்கள் ஆலோசனைகள் கேட்கப்பட்டு செயல்படுத்தப்படும் என்றும், முஸ்லிம்கள் தாங்கள் அதிகாரம் இழந்தவர்கள் என்று உணர வைக்கும் எந்த நடவடிக்கையும் எடுக்கப்படாது என்றும் நாங்கள் நம்புகிறோம்" என்றார்.

இது தொடர்பாக பாஜக எம்.பி. அபரஜிதா சாரங்கி கூறுகையில் "இன்று நாங்கள் ஜம்மு-காஷஸ்மீர் அமைப்பு மற்றும் வழக்கறிஞர்கள் அமைப்பு ஆகிய இரண்டு அமைப்புகளிடம் ஆலோசனைகள் கேட்டறிய வந்தோம். இரு அமைப்பில் உள்ள உறுப்பினர்கள் காத்துக் கொண்டிருந்தனர்.

ஆனால் கல்யாண் பானர்ஜி (திரணாமுல் காங்கிரஸ் எம்.பி.) தலைமையிலான எதிர்க்கட்சி உறுப்பினர்கள் ரகளையில் ஈடுபட்டனர். பாராளுமன்ற கூட்டுக்குழு தலைவர் ஜெகதாம்பிகாவுக்கு எதிராக மோசமான வார்த்தைகளை பயன்படுத்தினர். இரண்டு முறை கூட்டம் ஒத்திவைக்கப்பட்டது" என்றார்.

திரிணாமுல் காங்கிரஸ் எம்.பி. கல்யாண் பானர்ஜி கூறுகையில் "21-ந்தேதி கடைசி செசனுக்குப் பிறகு, பாராளுமன்ற கூட்டுக்குழு தலைவர், கூட்டம் ஜனவரி 24 மற்றும் 25-ந்தேதி நடைபெறும் எனத் தெரிவித்தார். மற்ற உறுப்பினர்கள் இதற்கு எதிர்ப்பு தெரிவித்து, 30 அல்லது 31-ந்தேதி கூட்டத்தை கூட்ட வேண்டுகோள் விடுத்தனர். ஆனால், எங்கள் கோரிக்கையை தலைவர் கேட்கவில்லை. அதனால் நாங்கள் எங்கள் எல்லா நிகழ்ச்சிகளையும் ஒத்திவைத்து வந்தோம்.

நேற்று நள்ளிரவு நிகழ்ச்சி நிரலில் மாற்றம் இருப்பதாகவும், தொடர்ந்து விவாதம் இருக்காது என்றும் செய்தி கிடைத்தது. அதேவேளையில் கூட்டம் 24 மற்றும் 27-ந்தேதிகளில் நடைபெறும், ஆனால் 25-ம் தேதி (ஜனவரி) நடைபெறாது எனத் தெரிவித்தனர்.

உள்ளே அறிவிக்கப்படாத அவசரநிலை உள்ளது. கூட்டம் நடந்து கொண்டிருந்தபோது தலைவருக்கு அழைப்புகள் வந்தன. அதனடிப்படையில் அவர் செயல்பட்டார். அவர் வேறொருவரின் முடிவை செயல்படுத்துகிறார்.

நாங்கள் எதிர்ப்பு தெரிவித்தபோது தலைவர் 10 எம்.பி.க்களை இடைநீக்கம் செய்தார். எந்த எதிர்ப்பும் இல்லாமல் விவாதம் நடக்க வேண்டும் என்று அவர்கள் விரும்பினர்" என்றார்.

டெல்லி மாநில சட்டசபை தேர்தல் பிப்ரவரி 5-ந்தேதி நடைபெற இருக்கிறது. மனுத்தாக்கல் முடிவடைந்த நிலையில் தேர்தல் பிரசாரம் சூடுபிடித்துள்ளது. ஆம் ஆத்மி, பா.ஜ.க., காங்கிரஸ் இடையே மும்முனை போட்டி நிலவுகிறது. அரவிந்த் கெஜ்ரிவால் சூறாவளி பிரசாரம் மேற்கொண்டு வருகிறார்.

இந்நிலையில் டெல்லியில் செய்தியாளர்களுக்கு பேட்டி அளித்த குஜராத் மாநில ஆம் ஆத்மி தலைவர் இசுதன் காத்வி கூறுகையில்,

டெல்லி மக்களின் இதயங்களில் அரவிந்த் கெஜ்ரிவால் இருக்கிறார். இப்போது குஜராத் மக்களின் இதயங்களிலும் அரவிந்த் ஜி இருப்பதை நீங்கள் பார்த்திருப்பீர்கள். அவர் டெல்லியில் மக்களுக்காக ஏராளமான பணிகளை செய்துள்ளார். அரவிந்த் கெஜ்ரிவால் தனது உத்தரவாதத்தை நிறைவேற்றும் தலைவர். பா.ஜ.க. தனது உத்தரவாதத்தை ஒருபோதும் நிறைவேற்றாது என்று தெரிவித்துள்ளார்.

புதுடெல்லி:

டெல்லி சட்டசபை தேர்தல் பிப்ரவரி 5-ம் தேதி நடக்கிறது. இதற்கான தேர்தல் பிரசாரத்தில் ஆம் ஆத்மி கட்சியின் தேசிய ஒருங்கிணைப்பாளரும், டெல்லியின் முன்னாள் முதல் மந்திரியுமான அரவிந்த் கெஜ்ரிவால் ஈடுபட்டு வருகிறார்.

கெஜ்ரிவாலுக்கு பஞ்சாப் மாநில போலீசார் வழங்கும் பாதுகாப்பை திரும்பப் பெற உத்தரவிட வேண்டும் என தேர்தல் ஆணையத்திடம் டெல்லி போலீசார் புகார் அளித்திருந்தனர். இதையடுத்து, கெஜ்ரிவாலுக்கு வழங்கி வந்த பாதுகாப்பை பஞ்சாப் மாநில போலீஸ் திரும்பப் பெற்றது.

அரவிந்த் கெஜ்ரிவாலுக்கு இசட்-பிளஸ் பாதுகாப்பு வழங்கப்பட்டு வருகிறது. விமானி, பாதுகாப்பு அணிகள், நெருங்கிய பாதுகாப்பு ஸ்டாப் உள்பட 63 பேர் பாதுகாப்புப் பணியில் ஈடுபட்டு வருகின்றனர். இவர்களுடன் மத்திய ஆயுத போலீஸ் படையினர் 15 பேரும் பாதுகாப்பில் ஈடுபட்டு வருகின்றனர்.

இந்நிலையில், பஞ்சாப் போலீசார் அளித்த பாதுகாப்பை வாபஸ் பெற்றதற்கு முதல் மந்திரி அதிஷி கண்டனம் தெரிவித்துள்ளார்.

இதுதொடர்பாக அதிஷி கூறுகையில், பஞ்சாப் போலீசார் அளித்த பாதுகாப்பை வாபஸ் பெற்றதன் மூலம் அமித்ஷாவும் பிரதமர் மோடியும் கெஜ்ரிவால் வாழ்வில் விளையாடுகிறார்களா? என காட்டமாக கேள்வி எழுப்பியுள்ளார்.

புதுடெல்லி:

76-வது குடியரசு தினவிழா வரும் 26-ம் தேதி நாடு முழுவதும் கொண்டாடப்படுகிறது. இதையொட்டி டெல்லியில் அணிவகுப்பு நிகழ்ச்சி நடைபெறும்.

ஒவ்வொரு குடியரசு தின அணிவகுப்பிலும் வெளிநாட்டைச் சேர்ந்த அதிபர் சிறப்பு அழைப்பாளராக கலந்துகொள்வார்.

குடியரசு தின அணிவகுப்பில் இந்தோனேசிய அதிபர் பிரபோவா சுபியாண்டோ சிறப்பு விருந்தினராகக் கலந்து கொள்வார் என மத்திய அரசு அறிவித்திருந்தது.

73 வயதான அவர் முன்னாள் ராணுவ தளபதி ஆவார். கடந்த அக்டோபர் மாதம் அவர் அதிபராக பொறுப்பேற்றார்.

இந்நிலையில், குடியரசு தினவிழாவில் கலந்து கொள்வதற்காக இந்தோனேசிய அதிபர் பிரபோவா சுபியாண்டோ நேற்று இரவு டெல்லி வந்தடைந்தார். அவரை வெளியுறவுத்துறை இணை மந்திரி பபித்ரா மார்கிரெட்டா உற்சாகமாக வரவேற்றார்.

டெல்லி வந்துள்ள இந்தோனேசிய அதிபர் சுபியாண்டோ ஜனாதிபதி மற்றும் பிரதமர் மோடியைச் சந்தித்துப் பேசுவார் என எதிர்பார்க்கப்படுகிறது.

கடந்த ஆண்டு நடைபெற்ற குடியரசு தினவிழா நிகழ்ச்சியில் பிரான்ஸ் அதிபர் இம்மானுவேல் மேக்ரான் பங்கேற்றார்.

புதுடெல்லி:

டாக்சி ஒருங்கிணைப்பாளர்களாக இருக்கும் உபேர் மற்றும் ஓலா நிறுவனங்கள் வாடிக்கையாளர்களுக்கு போக்குவரத்து சேவை வழங்கி வருகிறது.

இந்தச் சேவையை பயன்படுத்தி வரும் வாடிக்கையாளர்கள் தங்களின் ஐபோன் அல்லது ஆண்ட்ராய்டு ஸ்மார்ட் போன்களுக்கு வெவ்வேறு கட்டணங்கள் வசூலிக்கப்படுவதாக புகார்கள் வெளியாகின.

இந்தப் புகார்கள் குறித்து மத்திய அரசின் கவனத்திற்கு வந்தது. இதனையடுத்து மத்திய நுகர்வோர் பாதுகாப்பு ஆணையம் நடவடிக்கை எடுத்தது.

இந்நிலையில், இது தொடர்பாக மத்திய நுகர்வோர் விவகாரத்துறை மந்திரி பிரகலாத் ஜோஷி சமூக வலைதளத்தில் வெளியிட்டுள்ள செய்தியில், வாடிக்கையாளர்களின் ஐபோன் அல்லது ஆண்ட்ராய்டு ஸ்மார்ட் போன்களில் பதிவுசெய்வதில் வெவ்வேறு கட்டணங்கள் வசூலிக்கப்படுவதாக எழுந்த புகாரின் அடிப்படையில் நடவடிக்கை எடுக்கப்படுகிறது.

அந்த நிறுவனங்களின் கட்டண அறிக்கைகள் தொடர்பாக உபேர், ஓலா நிறுவனங்களுக்கு விளக்கம் கேட்டு நோட்டீஸ் அனுப்பி உள்ளோம் என பதிவிட்டுள்ளார்.

புதுடெல்லி:

சத்தீஸ்கர் மாநிலம் கவர்தா பகுதியில் பைகா பழங்குடியின மக்கள் வசித்து வருகின்றனர். இந்தியா சுதந்திரம் அடைந்து 78 ஆண்டு கடந்துள்ள நிலையில், பைகா பழங்குடியின மக்கள் தங்களது கிராமங்களில் இன்றுவரை அடிப்படை வசதிகள் இல்லாமல் வாழ்ந்து வருகின்றனர்.

இந்நிலையில், குடியரசு தினத்தை முன்னிட்டு தலைநகர் டெல்லியில் நடைபெறும் விழாவில் பங்கேற்பதற்காக சத்தீஸ்கரில் உள்ள பைகா பழங்குடியினத்தைச் சேர்ந்த 3 குடும்பங்களுக்கு ஜனாதிபதி திரவுபதி முர்மு அழைப்பு விடுத்துள்ளார். இதனால் அவர்கள் மகிழ்ச்சி அடைந்துள்ளனர்.

குடியரசு தினவிழாவில் பங்கேற்கும் பைகா பழங்குடியின குடும்பத்தினர், ஜனாதிபதி திரவுபதி முர்முவுடன் உணவருந்த உள்ளனர். அதன்பின் டெல்லியில் உள்ள பிரதமர் இல்லம், பாராளுமன்றம் மற்றும் ஜனாதிபதி இல்லம் உள்ளிட்ட இடங்களை அவர்கள் பார்வையிட ஏற்பாடு செய்யப்பட்டுள்ளது.