இந்தியா

மேற்கு வங்க மாநிலத்தில் கல்லூரி பேராசிரியை ஒருவர் முதலாம் ஆண்டு மாணவனை வகுப்பறையில் வைத்து திருமணம் செய்து கொண்ட சம்பவம் அரங்கேறியுள்ளது. இது தொடர்பான வீடியோக்கள் சமூக வலைதளங்களில் வெளியானது பேசு பொருளாகியுள்ளது.

மௌலானா அபுல் கலாம் ஆசாத் தொழில்நுட்ப பல்கலைக்கழகத்தில் தான் இந்த சம்பவம் அரங்கேறியது. இது தொடர்பான வீடியோவில் வகுப்பறைக்குள் பேசாரியை மற்றும் மாணவன் என இருவரும் மாலை மாற்றிக் கொண்டு சிந்தூர் பூசிக் கொள்ளும் காட்சிகள் இடம்பெற்றுள்ளன. இதோடு திருமணத்திற்கு சம்மதம் கூறி இருவரும் எழுத்துப்பூர்வமாக கையொப்பமிட்ட கடிதம் ஒன்றும் சமூக வலைதளங்களில் வைரல் ஆகி வவருகிறது.

இந்த சம்பவம் ஒரு திட்டத்தின் பகுதி என்று பேராசிரியை கூறினார். வீடியோ பரவியதை தொடர்ந்து, பல்கலைக்கழக அதிகாரிகள் விசாரணையைத் தொடங்கியுள்ளனர். மேலும், பேராசிரியை விடுப்பில் செல்லுமாறு கேட்டுக்கொண்டனர்.

"இது தவறாகப் புரிந்து கொள்ளப்பட்டது. இது ஒரு திட்டத்தின் ஒரு பகுதி. ஃபிரெஷர்ஸ் பார்ட்டிக்காக நாங்கள் திட்டமிட்டு நடத்திய நாடகம் இது. எனக்கு எதிரான சதித்திட்டத்தின் ஒரு பகுதியாக இந்த வீடியோ வேண்டுமென்றே வைரலாக்கப்பட்டது. என் மீது அவதூறு செய்ய முயன்றவர்கள் மீது நான் காவல் நிலையத்தில் புகார் அளிப்பேன்," என்று பேராசிரியை கூறியுள்ளார்.

துணைவேந்தர் தபஸ் சக்ரவர்த்தி, இந்த விவகாரம் தீவிரமாக எடுத்துக் கொள்ளப்பட்டு வருவதாகவும், அதை விசாரிக்க ஒரு குழு அமைக்கப்பட்டுள்ளதாகவும் கூறினார். இது தனது பாடத்தில் நடந்த திட்டத்தின் ஒரு பகுதி என்று பேராசிரியை விளக்கியதாக அவர் கூறினார்.

மகாராஷ்டிரா மாநிலம் மும்பை பாந்த்ராவில் உள்ள அடுக்குமாடி குடியிருப்பில் வசித்து வந்த பிரபல இந்தி நடிகர் சைஃப் அலி கான் வீட்டில் கடந்த 16-ந் தேதி நடந்த கொள்ளை முயற்சியில், அவர் 6 முறை கத்தியால் குத்தப்பட்டார். லீலாவதி மருத்துவமனையில் அனுமதிக்கப்பட்ட அவருக்கு அறுவை சிகிச்சை செய்யப்பட்டது. 5 நாள் சிகிச்சைக்கு பிறகு அவர் வீடு திரும்பினார்.

இந்த சம்பவம் தொடர்பாக போலீசார் வங்கதேச நாட்டை சேர்ந்த முகமது ஷரிபுல் இஸ்லாம் என்பவரை கைது செய்து விசாரித்து வருகின்றனர்.

இந்நிலையில் சைஃப் அலி கான் மற்றும் கரீனா கபூர் கான் தங்கள் மகன்களான தைமூர் அலி கான் மற்றும் ஜஹாங்கிர் அலி கானை போட்டோ எடுப்பதை தவிர்க்குமாறு புகைப்படக்காரர்களை (paparazzi) வலியுறுத்தி உள்ளனர்.

மேலும், பாந்த்ரா வீட்டிற்கு வெளியே நிற்க வேண்டாம் என்றும், வெளியே செல்லும்போதும் (அ) வீட்டிற்கு திரும்பும்போதும் அவர்களை புகைப்படம் எடுக்க வேண்டாம் என்றும் கேட்டுக் கொண்டனர்.

தேர்தல் ஆணையத்திற்கு பதிலளித்த கெஜ்ரிவால், ஹரியானாவிலிருந்து பெறப்பட்ட தண்ணீர் மனித ஆரோக்கியத்திற்கு 'மிகவும் நச்சுத்தன்மை வாய்ந்தது' என்று கூறுகிறார்

அரியானா அரசு யமுனையில் "விஷத்தை கலப்பதாக" கூறியது தொடர்பாக தேர்தல் ஆணையம் அனுப்பிய நோட்டீசுக்கு ஆம் ஆத்மி தலைவர் அரவிந்த் கெஜ்ரிவால் பதில் அளித்தார். அதில், சமீப காலங்களில் பா.ஜ.க. ஆளும் மாநிலத்தில் இருந்து பெறப்பட்ட பச்சை நீர் மனித ஆரோக்கியத்திற்கு "மிகவும் மாசுபட்டதாகவும் மிகவும் நச்சுத்தன்மை வாய்ந்ததாகவும் உள்ளது," என்றார்.

இது தொடர்பாக அவர் தேர்தல் ஆணையத்திற்கு 14 பக்கங்கள் கொண்ட பதிலை அனுப்பியுள்ளார். அத்தகைய "விஷ நீர்" மக்களால் உட்கொள்ள அனுமதிக்கப்பட்டால் அது கடுமையான உடல்நலக் கேடு மற்றும் மரணத்திற்கு வழிவகுக்கும் என்று அவர் கூறியுள்ளார்.

நகரத்தில் குடிநீரின் தரம் காரணமாக "அவசர பொது சுகாதார நெருக்கடியை" மட்டுமே முன்னிலைப்படுத்த விரும்புவதாகவும், எந்த சட்டத்தையும் அல்லது மாதிரி நடத்தை விதிகளையும் அவர் மீறவில்லை என்றும், எனவே இந்த பிரச்சினையை முடித்துக் கொள்ள வேண்டும் என்றும் அரவிந்த் கெஜ்ரிவால் கூறினார்.

அரியானாவிலிருந்து பெறப்பட்ட நீரில் அம்மோனியா அளவு மிகவும் "மிக அதிகமாக" இருந்ததால், டெல்லியில் உள்ள நீர் சுத்திகரிப்பு நிலையங்களால் அதை பதப்படுத்தி மனித பயன்பாட்டுக்கு பாதுகாப்பான மற்றும் அனுமதிக்கப்பட்ட வரம்புகளுக்கு ஏற்ற வகையில் குறைக்க முடியவில்லை என்றும் அரவிந்த் கெஜ்ரிவால் கூறியுள்ளார்.

இந்த விவகாரம் தொடர்பாக பா.ஜ.க. தாக்கல் செய்த புகாரை தொடர்ந்து, இது குறித்து விளக்கம் அளிக்க தேர்தல் ஆணையம் செவ்வாய் கிழமை அரவிந்த் கெஜ்ரிவாலுக்கு நோட்டீஸ் அனுப்பி இருந்தது. இந்த நோட்டீசுக்கு அவர் நேற்று (புதன்கிழமை) இரவு 8 மணிக்குள் பதில் அளிக்க அவருக்கு அவகாசம் அளித்தது.

மௌனி அமாவாசையை முன்னிட்டு புனித நீராடுவதற்காக லட்சக்கணக்கான யாத்ரீகர்கள் நேற்று (புதன்கிழமை) அதிகாலை மகா கும்பமேளாவின் சங்கம் பகுதியில் குவிந்தனர். ஒரே நேரத்தில் அதிக எண்ணிக்கையில் யாத்ரீகர்கள் வருகை தந்ததை அடுத்து ஏற்பட்ட கூட்ட நெரிசலில் குறைந்தது 30 பேர் உயிரிழந்தனர். மேலும் 60 பேர் படுகாயமடைந்தனர்.

நேற்று அதிகாலை இந்த சம்பவம் நடந்த நிலையில், பல மணி நேரம் கழித்து, மகா கும்பமேளாவின் டி.ஐ.ஜி. வைபவ் கிருஷ்ணா உயிரிழந்தவர்களின் விவரங்களை தெரிவித்தார்.

"ஒரே நேரத்தில் கூட்டம் அதிகரித்ததால் தான் இந்த சம்பவம் நடந்தது. மேலும், கூட்டத்தினர் தடுப்புகளை உடைத்துக் கொண்டு மறுபுறம் குதித்து, அங்கிருந்தவர்களையும் நசுக்கியது. கூட்ட நெரிசலில் படுகாயமடைந்த 90-க்கும் மேற்பட்டோர் மருத்துவமனைக்கு கொண்டு செல்லப்பட்டனர். அவர்களில் 30 பேர் உயிரிழந்தனர்," என்று அவர் கூறினார்.

உயிரிழந்தவர்களில் 25 பேர் அடையாளம் காணப்பட்டுள்ளதாக அதிகாரி கூறினார். அவர்களில் நான்கு பேர் கர்நாடகாவைச் சேர்ந்தவர்கள், தலா ஒருவர் அசாம் மற்றும் குஜராத்தைச் சேர்ந்தவர்கள். படுகாயமடைந்தவர்களில் 36 பேர் மருத்துவமனையில் சிகிச்சை பெற்று வருகின்றனர், மீதமுள்ளவர்கள் முதலுதவி சிகிச்சைக்கு பிறகு அவர்களது குடும்பத்தினருடன் அனுப்பி வைக்கப்பட்டுள்ளனர்.

கிட்டத்தட்ட ஏழரை கோடிக்கும் மேற்பட்ட பக்தர்கள் நேற்று (புதன்கிழமை) நீராடியதாக அதிகாரிகள் தெரிவித்தனர்.

நெரிசலில் தங்கள் குடும்ப உறவுகளை இழந்த பக்தர்களுக்கு பிரதமர் நரேந்திர மோடி இரங்கல் தெரிவித்து, இந்த சோகம் "மிகவும் வருத்தமளிக்கிறது" என்று விவரித்தார்.

உத்தரபிரதேச முதல்வர் யோகி ஆதித்யநாத், கூட்ட நெரிசலுக்கான காரணங்களை ஆராய நீதிபதி ஹர்ஷ் குமார், முன்னாள் டி.ஜி. வி.கே. குப்தா மற்றும் ஓய்வு பெற்ற ஐ.ஏ.எஸ். வி.கே. சிங் ஆகியோர் அடங்கிய மூன்று பேர் கொண்ட நீதித்துறை ஆணையத்தை நியமித்துள்ளார். உயிரிழந்தவர்களின் குடும்பத்தினருக்கு தலா ரூ.25 லட்சம் இழப்பீடு வழங்கப்படும் என்றும் அவர் அறிவித்தார்.

சண்டிகர்:

டெல்லி மக்களின் குடிநீ்ர் ஆதாரமாக விளங்கும் யமுனை நதி நீரில் விஷம் கலந்ததாக அரியானா அரசு மீது கெஜ்ரிவால் குற்றம் சாட்டினார். இது பெரும் சர்ச்சையை ஏற்படுத்தியது.

இதுதொடர்பாக விளக்கம் அளிக்கக்கோரி தேர்தல் ஆணையம் கெஜ்ரிவாலுக்கு சம்மன் அனுப்பியது.

இந்நிலையில், யமுனை நதியில் விஷம் கலக்க முயற்சி எனக்கூறிய கருத்து தொடர்பாக, அரியானா அரசு கெஜ்ரிவால் மீது வழக்கு தொடர்ந்தது.

இந்நிலையில், பிப்ரவரி 17-ம் தேதி சோனிபேட் கோர்ட்டில் நேரில் ஆஜராக வேண்டும் என அரவிந்த் கெஜ்ரிவாலுக்கு இன்று சம்மன் அனுப்பியுள்ளது.

அவ்வாறு செய்யத் தவறினால் சட்ட விதிகளின்படி அவர்மீது நடவடிக்கை எடுக்கப்படும் என தெரிவிக்கப்பட்டுள்ளது.

தாய் உடன் தகாத உறவை வைத்திருந்த கொத்தனாரை, அந்த பெண்ணின் இரண்டு மகன்கள் கத்தியால் குத்தி, குடலை உருவி எடுத்து வானத்தை நோக்கி வீசியதுடன், துண்டுதுண்டாக வெட்டிய சம்பவம் குஜரா்த மாநிலத்தில் நடந்துள்ளது.

குஜராத் மாநிலம் காந்திநகரில் உள்ள கிராமம் ஒன்றில் தாய் மற்றும் சஞ்சய் தாகூர் (வயது 27), ஜெயேஷ் தாகூர் (23) ஆகிய அவரது இரண்டு மகன்கள் வசித்து வந்துள்ளனர். பெண்ணின் கணவர் இறந்துவிட்டார்.

இந்த பெண்ணிற்கு கொத்தனார் வேலை செய்து வந்த 53 வயதான ரடன்ஜி தாகூர் என்பவர் உடன் தகாத உறவு ஏற்பட்டுள்ளது. இந்த உறவு பல வருடங்களாக நீடித்துள்ளது. இருவருக்கும் இடையிலான உறவு, அந்த பெண்ணின் மகன்களுக்கு பிடிக்கவில்லை.

இது தொடர்பாக பலமுறை ரடன்ஜி தாகூரிடம், தாய் உடனான தகாத உறவை நிறுத்திக் கொள்ள வற்புறுத்தியுள்ளனர். ஆனால் ரடன்ஜி தாகூர் தொடர்ந்து அந்த பெண்ணுடன் தொடர்பு வைத்துள்ளார்.

தனது அம்மாவை இழிவுப்படுத்துவதாகவும், மறைந்த அப்பாவை கலங்கப்படுத்துவதாகவும் கருதினர். மேலும் உறவினர் இருவரையும் பார்த்து ஏளனமாக பேசியது மகன்களுக்கு கடுங்கோபத்தை ஏற்படுத்தியது.

இதனால் ரடன்ஜி தாகூரை தீர்த்துக்கட்ட முடிவு செய்தனர். இந்த வார தொடக்கத்தில் இவர்களின் வீட்டருகே ரடன்ஜி தாகூர் வந்தபோது, இரண்டு மகன்களும ரடன்ஜி தாகூரை இரும்பு கம்பியால் தாக்கியுள்ளனர். இதனால் ரடன்ஜி நிலைகுலைந்தார். உடனே இருவரும் மறைத்து வைத்திருந்த கத்தியால் வயிற்று பகுதியில் சரமாரியாக குத்தினர்.

இதில் ரடன்ஜி தாகூரின் குடல் கீழே சரிந்தது. இருந்தபோதிலும் அவர்களுடைய ஆத்திரம் அடங்கவில்லை. குடலை எடுத்து வானத்தை நோக்கி வீசி, துண்டு துண்டாக வெட்டி வீசியுள்ளனர்.

இவை அனைத்தும் பட்டப்பகலில் பெரும்பாலானோரின் முன்னிலையில் நடந்துள்ளனர். சிலர் இதை தடுக்க முயற்சி செய்துள்ளனர். ஆனால் பலனில்லை. தங்கள் ஆத்திரம் தீர்ந்ததும் பைக்கில் தப்பி ஓடிவிட்டனர்.

இது தொடர்பாக ரடன்ஜி தாகூர் மகன் போலீசில் புகார் அளிக்க, போலீசார் செல்போன் நம்பரை வைத்து இருவரையும் கைது செய்துள்ளனர். 

புதுடெல்லி:

இந்திய விண்வெளி ஆராய்ச்சி நிறுவனமான இஸ்ரோ இன்று தனது 100வது ராக்கெட்டை வெற்றிகரமாக விண்ணில் செலுத்தியுள்ளது.

ஜி.எஸ்.எல்.வி.எப்-15 ராக்கெட்டை இஸ்ரோ விண்ணில் செலுத்தியுள்ளது. இந்த ராக்கெட் மூலம் என்.வி.எஸ்-02 என்ற செயற்கைக்கோள் ஏவப்பட்டுள்ளது.

இந்த செயற்கைக்கோள் இன்று காலை 6.23 மணிக்கு ஸ்ரீஹரிகோட்டாவில் உள்ள இஸ்ரோ மையத்தில் இருந்து ஏவப்பட்டது. என்.வி.எஸ்-02 செயற்கைக்கோள் தரை, கடல், வான்வெளி போக்குவரத்தைக் கண்காணித்து, பேரிடர் காலங்களில் துல்லியமான தகவலை தெரிவிக்கும் என இஸ்ரோ தெரிவித்துள்ளது.

இந்நிலையில், பிரதமர் மோடி இஸ்ரோவுக்கு வாழ்த்து தெரிவித்துள்ளார்.

இதுதொடர்பாக பிரதமர் மோடி எக்ஸ் வலைதளத்தில் வெளியிட்டுள்ள வாழ்த்து செய்தியில், வரலாற்று சிறப்புமிக்க 100வது ஏவுதலுக்காக இஸ்ரோ-க்கு வாழ்த்துகள்! இந்த நம்பமுடியாத மைல்கல் நமது விஞ்ஞானிகள் மற்றும் பொறியாளர்களின் தொலைநோக்கு, மற்றும் அர்ப்பணிப்பை விளக்குகிறது. தனியார் துறை கைகோர்ப்பதன் மூலம், இந்தியாவின் விண்வெளி பயணம் தொடர்ந்து புதிய உயரங்களை எட்டும் என பதிவிட்டுள்ளார்.

ஹரியானா மாநிலத்தில் இருந்து டெல்லி வழியாக பாயும் யமுனை நதியில் இருந்து டெல்லிக்கு குடிநீர் வழங்கப்படுகிறது. யமுனை நதி நீரை சுத்திகரித்து டெல்லி மக்களுக்கு குடிநீராக வழங்கப்படுகிறது.

டெல்லி மக்களின் குடிநீ்ர் ஆதாரமாக விளங்கும் யமுனை நதி நீரில் விஷம் கலந்ததாக ஹரியானா மாநில அரசு மீது கெஜ்ரிவால் குற்றம்சாட்டினார். இது பெரும் சர்ச்சையை ஏற்படுத்தியது. இது தொடர்பாக விளக்கம் அளிக்கக்கோரி தேர்தல் ஆணையம் கெஜ்ரிவாலுக்கு சம்மன் அனுப்பியது.

பிரதமர் மோடி மற்றும் ராகுல் காந்தி ஆகியோர் கெஜ்ரிவாலுக்கு பதில் அளித்திருந்தனர். இதற்கிடையே ஹரியானா மாநில முதல்வர் நயாப் சிங் சைனி யமுனை ஆற்றில் இறங்கி, ஓடிய இரண்டு கைகளால் நீரை எடுத்து குடித்தார். அப்போது நீர் பரிசோதனைக்கு அனுப்பப்பட்டது. அதில் விஷம் (நச்சு) கலக்கப்படவில்லை என முடிவு வந்துள்ளது எனத் தெரிவித்தார்.

நயாப் சிங் சைனி யமுனை நீரை குடிக்கும் வீடியோவை போஸ்ட் செய்த கெஜ்ரிவால் "தண்ணீரை குடிப்பதுபோல் நயாப் சிங் சைனி பாசாங்கு காட்டுகிறார். உண்மையிலேயே நீரை மீண்டும் ஆற்றில் துப்பினார். அவர்களால் குடிக்க முடியாத நச்சு கலந்த தண்ணீரை மக்கள் குடிக்க வேண்டும் என விரும்புகிறார்கள். இது நடக்க நான் விடமாட்டேன்" எனத் தெரிவித்துள்ளார்.

இதற்கு நயாப் சிங் சைனி "கெஜ்ரிவால் வாழ்நாள் முழுவதும் பொய் சொல்லி வருகிறார்" என காட்டமாக பதில் கொடுத்துள்ளார்.

யமுனை நிதியில் இருந்து டெல்லி மக்களின் குடிநீருக்கு எடுக்கப்படும் நீரில் அமோனியாக அளவுக்கு அதிகமாக கலந்து இருப்பதாக டெல்லி மாநில முதல்வர் அதிஷி குற்றம்சாட்டியிருந்தார்.

டெல்லி மாநில சட்டமன்ற தேர்தல் அடுத்த மாதம் 5-ந்தேதி நடைபெறுகிறது. இன்னும் ஒரு வாரம் மட்டுமே உள்ள நிலையில் கட்சித் தலைவர்கள் தீவிர தேர்தல் பிரசாரத்தில் ஈடுபட்டுள்ளனர். காங்கிரஸ் கட்சி எம்.பி.யும், மக்களவை எதிர்க்கட்சி தலைவருமான ராகுல் காந்தி இன்று பவானாவில் நடைபெற்ற தேர்தல் பேரணியில் கலந்து கொண்டு பேசினார்.

அப்போது ராகுல் காந்தி பேசியதாவது:-

சாதிவாரி கணக்கெடுப்பு நடத்துவது, இடஒதுக்கீட்டில் 50 சதவீதம் என்ற தடையை உடைப்பது குறித்து கெஜ்ரிவால் தெளிவாக சொல்ல வேண்டும். இதை அவர் செய்யவில்லை என்றால், கெஜ்ரிவால் தலித்கள், பிற்படுத்தப்பட்டோர், சிறுபான்மையினருக்கு எதிரானவர். கலவரங்கள் நடந்தபோது, கெஜ்ரிவால் எங்கே சென்றிருந்தார். அவர் உங்களுடன் (மக்களை பார்த்து) நின்றாரா?.

பிரதமர் மோடியும், கெஜ்ரிவாலும் இடஒதுக்கீடு, தலித்கள், சிறுபான்மையினர், பிற்படுத்தப்பட்டோர், ஏழைகளுக்கு எதிரானவர்கள்.

கெஜ்ரிவால் ஊழல் அரசாங்கத்தை நடத்தினார். மோடி ஜி அவரது பேச்சில் பொய் சொல்கிறார். அவர் பொய் சொல்வது போல் கெஜ்ரிவால் பொய் சொல்கிறார்.

ஐந்து வருடங்களுக்கு முன்பு, கெஜ்ரிவால் யமுனை நதியில் குளித்து அதன் தண்ணீரைக் குடிப்பதாகக் கூறியிருந்தார். ஐந்து ஆண்டுகள் கடந்துவிட்டன, ஆனால் அவர் அவ்வாறு செய்யவில்லை.

நீங்கள் மாசு கலந்த நீரைக் குடிக்க வேண்டும், ஆனால் கெஜ்ரிவால் 'ஷீஷ் மஹாலில்' வசிக்கிறார். அது கோடிக்கணக்கான மதிப்புள்ளதாகும். அவர் உங்களிடம் பொய் சொல்கிறார்.

மோடியும் ஆர்.எஸ்.எஸ். அமைப்பும் வெறுப்பைப் பரப்பி பல்வேறு மதங்கள், சாதிகள் மற்றும் மொழிகளைச் சேர்ந்தவர்களை சண்டையிட வைத்து, உங்கள் பணத்தை அதானி மற்றும் அம்பானி போன்றவர்களிடம் கொடுக்கிறார்கள். மோடி அரசு கோடீஸ்வரர்களின் ரூ.16 லட்சம் கோடி கடன்களை தள்ளுபடி செய்துள்ளது.

நானும், காங்கிரசும் மோடியை பார்த்து பயப்படவில்லை. மாறாக அவர்தான் எங்களை பார்த்து பயப்படுகிறார்.

இவ்வாறு ராகுல் காந்தி பேசினார்.

லக்னோ:

உலகின் மிகப்பெரிய ஆன்மிக சங்கமமான மகா கும்பமேளா உத்தர பிரதேச மாநிலம் பிரயாக்ராஜில் நடைபெற்று வருகிறது. கடந்த 14-ம் தேதி தொடங்கிய கும்பமேளா அடுத்த மாதம் 26-ம் தேதி வரை 45 நாட்கள் நடைபெற உள்ளது.

கும்பமேளா நிகழ்ச்சியில் உலகம் முழுவதும் இருந்து கோடிக்கணக்கான மக்கள் கலந்துகொண்டு திரிவேணி சங்கமத்தில் புனித நீராடி வருகின்றனர்.

இந்நிலையில், கும்பமேளா நிகழ்ச்சியில் இன்று கூட்ட நெரிசல் ஏற்பட்டது. அமாவாசை தினமான இன்று அதிகாலை திரிவேணி சங்கமத்தில் புனித நீராட லட்சக்கணக்கான மக்கள் திரண்டனர். அதிகாலை 3 மணியளவில் மக்கள் அதிக அளவில் திரண்டபோது திடீரென கூட்ட நெரிசல் ஏற்பட்டது.

கூட்ட நெரிசலில் சிலருக்கு மூச்சுத்திணறல் ஏற்பட்டது. மேலும், சிலர் கீழே விழுந்தனர். கீழே விழுந்தவர்கள் மீது மற்றவர்களும் விழுந்துள்ளனர். இந்த சம்பவத்தில் பலர் மயங்கினர். கூட்ட நெரிசலில் சிக்கி 10-க்கும் அதிகமானோர் உயிரிழந்துள்ளதாக தகவல் வெளியானது.

தகவலறிந்து விரைந்து வந்த போலீசார் அனைவரையும் மீட்டு அருகில் உள்ள மருத்துவமனையில் அனுமதித்தனர்.

இந்நிலையில், கும்பமேளாவில் ஏற்பட்ட கூட்ட நெரிசலில் சிக்கி 30 பேர் பலியாகினர். அதில் 25 பேரின் உடல்கள் அடையாளம் காணப்பட்டுள்ளது. மற்றவர்களை அடையாளம் காணும் பணி நடந்து வருகிறது. 50-க்கும் மேற்பட்டோர் படுகாயமடைந்தனர் என அதிகாரிகள் தெரிவித்தனர்.

விபத்து குறித்து விசாரணை நடத்த முதல் மந்திரி யோகி ஆதித்யநாத் அதிகாரிகளுக்கு உத்தரவிட்டுள்ளார்.

புதுடெல்லி:

தலைநகர் டெல்லியில் பவனா தொகுதியில் காங்கிரஸ் கட்சி சார்பில் ஏற்பாடு செய்யப்பட்ட தேர்தல் பிரசாரத்தில் ராகுல் காந்தி கலந்துகொண்டார். அப்போது அவர் பேசியதாவது:

அரவிந்த் கெஜ்ரிவால் தூய்மையான அரசியலை கொண்டு வருவேன் என்று கூறினார். ஆனால், டெல்லியில் நடந்த மிகப்பெரிய ஊழல், கோடிக்கணக்கான ரூபாய் மதுபான ஊழல் அவரது கட்சியினரால் செய்யப்பட்டது. அவர் கார்ப்பரேட் அரசை நடத்துகிறார்.

ஐந்து ஆண்டுக்கு முன் அரவிந்த் கெஜ்ரிவால் யமுனை நதியில் குளித்துவிட்டு யமுனை நதி நீரை குடிப்பேன் என்றார். 5 ஆண்டு ஆகிவிட்டது. இன்றுவரை கெஜ்ரிவால்ஜி யமுனை நீரைக் குடிக்கவில்லை. நீங்கள் அழுக்குத் தண்ணீரைக் குடிக்கவேண்டும்,

சுத்தமான தண்ணீரைக் குடித்துவிட்டு பொய்யான அறிக்கைகளை உங்களுக்குத் தருகிறார் என காட்டமாக விமர்சித்தார்.

76 வது குடியரசு தின கொண்டாட்டத்தில் பங்கேற்ற ராணுவத்தின் பல்வேறு பிரிவுகள் பாசறை திரும்பும் மெல்லிசை நிகழ்வு இன்று டெல்லி விஜய் சதுக்கத்தில் நடைபெற உள்ளதாக மத்திய பாதுகாப்பு அமைச்சகம் தெரிவித்திருந்தது. இதுதொடர்பாக வெளியிட்டுள்ள அறிக்கையில் "ரைசினா மலைகள் மீது சூரியன் மறையும் கம்பீரமான பின்னணியில் அமைந்துள்ள வரலாற்றுச் சிறப்புமிக்க விஜய் சதுக்கத்தில் 2025 ஜனவரி 29 அன்று 76 வது குடியரசு தின கொண்டாட்டங்களின் நிறைவைக் குறிக்கும் படைகள் பாசறை திரும்பும் மெல்லிசை நிகழ்வு நடைபெற உள்ளது.

ஜனாதிபதி திரவுபதி முர்மு, துணை ஜனாதிபதி ஜக்தீப் தன்கர், பிரதமர் நரேந்திர மோடி, பாதுகாப்புத்துறை மந்திரி ராஜ்நாத் சிங், மத்திய மந்திரிகள், மூத்த அதிகாரிகள் மற்றும் பொதுமக்கள் உள்ளிட்ட சிறப்பு பார்வையாளர்கள் முன்னிலையில் இந்திய ராணுவம், இந்தியக் கடற்படை, இந்திய விமானப்படை, மத்திய ஆயுதக் காவல் படைகள் ஆகியவற்றின் இசைக்குழுக்கள் ரசிக்கத்தக்க 30 இந்திய பாடல்களை இசைக்கவுள்ளன. மெல்லிசை நிகழ்வில் கதம் கதம் பதாயே ஜா என்ற பாடலிசையுடன் தொடங்கி 'சாரே ஜஹான் சே அச்சா' என்ற பிரபலமான பாடலுடன் இந்த நிகழ்வு நிறைவடையும்.

இவ்வாறு அதில் தெரிவிக்கப்பட்டிருந்தது.

அதன்படி இன்று மாலை ராணுவத்தின் பல்வேறு பிரிவுகள் பாசறை திரும்பும் மெல்லிசை நிகழ்வின்போது இந்திய ஜனாதிபதி தேசியக் கொடி ஏற்றி மரியாதை செலுத்தினார்.