இந்தியா

76 வது குடியரசு தின கொண்டாட்டத்தில் பங்கேற்ற ராணுவத்தின் பல்வேறு பிரிவுகள் பாசறை திரும்பும் மெல்லிசை நிகழ்வு இன்று டெல்லி விஜய் சதுக்கத்தில் நடைபெற உள்ளதாக மத்திய பாதுகாப்பு அமைச்சகம் தெரிவித்திருந்தது. இதுதொடர்பாக வெளியிட்டுள்ள அறிக்கையில் "ரைசினா மலைகள் மீது சூரியன் மறையும் கம்பீரமான பின்னணியில் அமைந்துள்ள வரலாற்றுச் சிறப்புமிக்க விஜய் சதுக்கத்தில் 2025 ஜனவரி 29 அன்று 76 வது குடியரசு தின கொண்டாட்டங்களின் நிறைவைக் குறிக்கும் படைகள் பாசறை திரும்பும் மெல்லிசை நிகழ்வு நடைபெற உள்ளது.

ஜனாதிபதி திரவுபதி முர்மு, துணை ஜனாதிபதி ஜக்தீப் தன்கர், பிரதமர் நரேந்திர மோடி, பாதுகாப்புத்துறை மந்திரி ராஜ்நாத் சிங், மத்திய மந்திரிகள், மூத்த அதிகாரிகள் மற்றும் பொதுமக்கள் உள்ளிட்ட சிறப்பு பார்வையாளர்கள் முன்னிலையில் இந்திய ராணுவம், இந்தியக் கடற்படை, இந்திய விமானப்படை, மத்திய ஆயுதக் காவல் படைகள் ஆகியவற்றின் இசைக்குழுக்கள் ரசிக்கத்தக்க 30 இந்திய பாடல்களை இசைக்கவுள்ளன. மெல்லிசை நிகழ்வில் கதம் கதம் பதாயே ஜா என்ற பாடலிசையுடன் தொடங்கி 'சாரே ஜஹான் சே அச்சா' என்ற பிரபலமான பாடலுடன் இந்த நிகழ்வு நிறைவடையும்.

இவ்வாறு அதில் தெரிவிக்கப்பட்டிருந்தது.

அதன்படி இன்று மாலை ராணுவத்தின் பல்வேறு பிரிவுகள் பாசறை திரும்பும் மெல்லிசை நிகழ்வின்போது இந்திய ஜனாதிபதி தேசியக் கொடி ஏற்றி மரியாதை செலுத்தினார்.

லக்னோ:

உத்தர பிரதேசம் மாநிலத்தில் நடைபெறும் மகா கும்பமேளா நிகழ்ச்சி கடந்த 13-ம் தேதி கோலாகலமாகத் தொடங்கியது. பிப்ரவரி 26-ம் தேதி வரை என மொத்தம் 45 நாட்கள் மகா கும்பமேளா நிகழ்ச்சி நடைபெற உள்ளது. இதற்காக 10 ஆயிரம் ஏக்கர் பரப்பளவில் வசதி ஏற்படுத்தப்பட்டுள்ளது.

இதற்காக 1,800 ஹெக்டேர் பரப்பளவில் வாகன நிறுத்த வசதிகள், 2,750 கண்காணிப்பு கேமராக்கள், 15 ஆயிரம் துப்புரவு பணியாளர்கள், 25 ஆயிரம் தொழிலாளர்கள், 24 மணி நேரமும் செயல்படும் கட்டுப்பாட்டு மையம் உள்ளிட்டவற்றை அரசு அமைத்துள்ளது.

இந்தியாவின் பழமையான கலாசாரம் மற்றும் மத பாரம்பரியங்களை உலகளவில் முக்கியத்துவம் வாய்ந்த ஒன்றாக மாற்றும் பெருமை மிக்க மகா கும்பமேளாவுக்கு இந்த வருடம் 40 கோடி பக்தர்கள் வருகை தருவார்கள் என எதிர்பார்க்கப்படுகிறது.

கும்பமேளா நிகழ்ச்சியில் இதுவரை 19 கோடிக்கும் அதிகமானோர் வருகை தந்து திரிவேணி சங்கமத்தில் புனித நீராடியுள்ளனர். கடந்த 14-ம் தேதி மகர சங்கராந்தி தினத்தில் சுமார் 3.50 கோடி பேர் புனித நீராடியுள்ளனர்.

இதற்கிடையே, மவுனி அமாவாசையான இன்று கும்பமேளாவில் திடீர் கூட்ட நெரிசல் ஏற்பட்டது. இதில் 10-க்கும் மேற்பட்டோர் பலியாகி இருக்கலாம் என கூறப்படுகிறது.

இந்நிலையில், மவுனி அமாவாசையான இன்று மட்டும் மகா கும்பமேளாவில் 5.7 கோடி பக்தர்கள் புனித நீராடினர் என உத்தர பிரதேச

அரசு அறிக்கை வெளியிட்டுள்ளது.

மேலும் பிப்ரவரி 3 (வசந்த பஞ்சமி), பிப்ரவரி 12 (மாகி பவுர்ணமி), பிப்ரவரி 26 (சிவராத்திரி) ஆகிய முக்கிய தினங்களிலும் புனித நீராடுவோர் எண்ணிக்கை கணிசமாக உயரும் என எதிர்பார்க்கப்படுகிறது.

உத்தர பிரதேச மாநிலம் பிரயாக்ராஜில் மகா கும்பமேளா ஜனவரி 13-ம் தேதி தொடங்கியது. இது பிப்ரவரி 26-ம் தேதி வரை நடைபெறும்.

கும்பமேளாவை முன்னிட்டு உலகம் முழுவதும் இருந்து திரிவேணி சங்கமத்தில் புனித நீராடுவதற்காக பக்தர்கள் வந்த வண்ணம் உள்ளனர்.

பல்வேறு அரசியல் தலைவர்களும் சினிமா பிரபலங்களும் திரிவேணி சங்கமத்தில் புனித நீராடி வருகின்றனர்.

இந்நிலையில், மகா கும்பமேளாவில் நடிகர் பிரகாஷ் ராஜ் நீராடியதாக ஒரு புகைப்படம் இணையத்தில் வைரலானது.

இதனையடுத்து, இணையத்தில் பரவும் இந்த புகைப்படம் போலியானது என்று பிரகாஷ் ராஜ் விளக்கம் அளித்துள்ளார்.

பாலிவுட் நடிகர் பிரசாந்த் சம்பர்கி, பிரகாஷ் ராஜின் இந்த போலியான புகைப்படத்தை பகிர்ந்து "அவருடைய பாவங்கள் அனைத்தும் மன்னிக்கப்பட்டு அகற்றப்படும் என்று நம்புகிறேன்" என்று பதிவிட்டிருந்தார்.

இந்த பதிவின் ஸ்க்ரீன்ஷாட்டை தனது எக்ஸ் பக்கத்தில் பாகிர்ந்துள்ள பிரகாஷ் ராஜ், " புனிதமான நிகழ்வில் கூட மதவெறியர்கள் கடைசியாக போலியான செய்திகளை பரப்புகிறார்கள். இதற்கு எதிராக புகார் அளிக்கப்பட்டுள்ளது. இதற்கான விளைவுகளை அவர்கள் அனுபவிப்பார்கள்" என்று பதிவிட்டுள்ளார்.

நாடு முழுவதும் Indian Standard Time (IST) நேரத்தை கட்டாயமாக்கி மத்திய அரசு புதிய வரைவு விதிகளை வெளியிட்டுள்ளது.

இந்த வரைவு விதிகள் குறித்து பிப்ரவரி 14-ம் தேதிக்குள் பொதுமக்கள் தங்கள் கருத்துக்களை தெரிவிக்கலாம் என்று தெரிவிக்கப்பட்டது

இந்த புதிய வரைவு விதிகள் அதிகாரப்பூர்வ, வர்த்தக, நிதி, நிர்வாகம், சட்ட ஒப்பந்தங்கள் என அனைத்து விதமான பயன்பாடுகளிலும் Indian Standard Time -யை மட்டுமே பின்பற்ற வலியுறுத்துகிறது.

Indian Standard Time -யை தவிர பிற நேர திட்டங்களைப் பின்பற்றுவதற்கு இந்த விதிகளின்கீழ் தடை விதிக்கப்பட்டுள்ளது. இந்த விதிகளை மீறினால் அபராதம் விதிக்கப்படும் என்றும் மத்திய அரசு எச்சரிக்கை விடுத்தது.

 நாடு முழுவதும் ஒரே நேரக் குறிப்புகளை வழங்குவதற்காக தேசிய இயற்பியல் ஆய்வகம் (NPL), இந்திய விண்மீன்கள் நேவிகேஷன் அமைப்புடன் [Navigation with Indian Constellation system] (NavIC) உடன் இணைக்கட உள்ளது.

அரியானா மாநிலம் பரிதாபாத்தில் அமைந்துள்ள இந்த தேசிய இயற்பியல் ஆய்வகம் (NPL) நாடு முழுவதும் ஒரே நேரத்தை கண்க்கிட NavIC ஐ பயன்படுத்தும்.

அதன்மூலம் பெறப்பட்ட நேர தரவுகளை அகமதாபாத், பெங்களூரு, புவனேஸ்வர் மற்றும் கௌஹாத்தியில் உள்ள நான்கு மையங்களுக்கு ஆப்டிகல் ஃபைபர் இணைப்புகள் வழியாக அனுப்பும். அனுப்பப்படும் தரவுகளின் துல்லியத்தை கணக்கிட இந்த மையங்களில் அணு கடிகாரங்கள் [ ATOMIC CLOCK ] நிறுவப்படும்.  

அணு கடிகாரங்கள் என்பது அணுக்களின் அசைவுகளை[அலைவுகள் - Oscillation] பயன்படுத்தி நேரத்தைத் துல்லியமாகக் கணக்கிடும் கருவியாகும். உதாரணமாக சீசியம்-133 ன் அணுக்கள் நொடிக்கு பல கோடி முறை அசைகின்றன. இந்த எண்ணிக்கை ஒரே மாதிரி இருக்கின்றன. இதை கணக்கிடுவதன் மூலம் துல்லியமாக நேரம் கிடைக்கிறது.

எனவே துல்லியமான நேரம் காட்டும் அளவுகோலாக அணுக் கடிகாரம் உலகம் முழுவதும் பயன்படுத்தப்பட்டு வருகிறது. தற்போது ஒரே நாடு ஒரே நேர திட்டத்தை செயல்படுத்த இந்த அணு கடிகாரம் பயன்படுத்தப்பட உள்ளது. 

சாமீபத்திய வளர்ச்சியாக அணு கடிகாரத்தை விட துல்லியமான அணுக்கரு [Atomic nucleus] கடிகாரத்தை பயன்படுத்த சர்வதேச  விஞ்ஞானிகள் ஆய்வு செய்து வருகின்றனர்.

இதன்மூலம் பிரபஞ்சத்திலுள்ள கரும்பொருள் (Dark matter) போன்ற பல்வேறு மர்மங்கள் வெளிச்சத்துக்கு வரும். கோடிக்கணக்கான ஆண்டுகள் ஓடினாலும் ஒரு நொடியைக்கூட தவறவிடாத கைக்கடிகாரமாக அது இருக்கும்.

ஜெயலலிதா சொத்து குவிப்பு வழக்கில் பறிமுதல் செய்யபபட்ட நகை உள்ளிட்ட பொருட்களை தமிழக லஞ்ச ஒழிப்பு துறையிடம் ஒப்படைக்க வேண்டும் என கர்நாடகா சிறப்பு நீதிமன்றம் உத்தரவிட்டுள்ளது. பொருட்களை ஒப்படைக்கும் வரை பாதுகாப்பு ஏற்பாடுகளை தீவிரமாக செய்யுமாறு கர்நாடாக மாநில காவல்துறையை வலியுறுத்தியுள்ளது. பிப்ரவரி 14 மற்றும் 15-ந்தேதி தேதிகளில் பெற்றுக்கொள்ள உத்தரவிட்டுள்ளது.

சொத்து குவிப்பு வழக்கில் மறைந்த தமிழக முன்னாள் முதல்-அமைச்சர் ஜெயலலிதா, சசிகலா, சுதாகரன், இளவரசி ஆகியோருக்கு தலா 4 ஆண்டுகள் சிறை தண்டனை விதித்து பெங்களூரு தனிக்கோர்ட்டு கடந்த 2014-ம் ஆண்டு தீர்ப்பு கூறியது. இதை எதிர்த்து அவர்கள் கர்நாடக ஐகோர்ட்டில் மனு தாக்கல் செய்தனர். இதில் பெங்களூரு தனிக்கோர்ட்டின் தீர்ப்பு ரத்து செய்யப்பட்டது.

இதை எதிர்த்து கர்நாடக அரசு சார்பில் சுப்ரீம் கோர்ட்டில் மேல்முறையீடு செய்யப்பட்டது. இந்த மேல்முறையீட்டு வழக்கை விசாரித்த சுப்ரீம் கோர்ட்டு கடந்த 2017-ம் ஆண்டு தனிக்கோர்ட்டு வழங்கிய தீர்ப்பை உறுதி செய்து தீர்ப்பு கூறியது. இந்த தீர்ப்பு வந்தபோது ஜெயலலிதா ஏற்கனவே மரணம் அடைந்ததை அடுத்து தீர்ப்பில் இருந்து அவரது பெயர் நீக்கப்பட்டது.

சசிகலா உள்பட 3 பேரும் பெங்களூரு பரப்பன அக்ரஹாரா சிறையில் தண்டனையை அனுபவித்தனர். இந்த நிலையில் பெங்களூருவை சேர்ந்த சமூக ஆர்வலர் நரசிம்மமூர்த்தி பெங்களூரு சிறப்பு கோர்ட்டில் ஒரு மனு தாக்கல் செய்தார். அதில் சொத்து குவிப்பு வழக்கில் பறிமுதல் செய்யப்பட்ட ஜெயலலிதாவின் பொருட்களை ஏலம் விடுமாறு கோரினார். இதற்கிடையே ஜெயலலிதாவின் சொத்துகளுக்கு உரிமை கோரி அவரது அண்ணன் மகளான ஜெ.தீபா சார்பில் அதே கோர்ட்டில் மனு தாக்கல் செய்யப்பட்டது. தான் ஜெயலலிதாவின் வாரிசு என்பதால் அவரது சொத்துக்கள் தனக்கு சொந்தமானவை என்று அவர் குறிப்பிட்டார்.

ஆனால் அவரது மனு தள்ளுபடி செய்யப்பட்டது. அதைத்தொடர்ந்து நரசிம்மமூர்த்தியின் மனுவை விசாரித்த நீதிபதி மோகன், ஜெயலலிதாவின் பொருட்களை தமிழக அரசிடம் ஒப்படைக்குமாறும், அதை ஏலம் விட்டு அபராதத்தை செலுத்த வேண்டும் என்றும், அதில் இருந்து இந்த வழக்கு செலவு தொகையை கர்நாடக அரசுக்கு தமிழக அரசு வழங்க வேண்டும் என்றும் உத்தரவிட்டார்.

அதாவது கடந்த ஆண்டு (2024) மார்ச் 6, 7-ந்தேதிகளில் ஜெயலலிதாவின் பொருட்களை தமிழக அரசிடம் ஒப்படைக்க வேண்டும் என்று நீதிபதி உத்தரவு பிறப்பித்தார்.

அதன்படி ஜெயலலிதாவின் பொருட்களை பெற தமிழக உள்துறை செயலாளர், லஞ்ச ஒழிப்புத்துறை உயர் அதிகாரி ஆகியோர் வர இருந்தனர். சிறப்பு கோர்ட்டின் உத்தரவை எதிர்த்து ஜெயலலிதாவின் உறவினர் ஜெ.தீபா, கர்நாடக ஐகோர்ட்டில் மனு ஒன்றை தாக்கல் செய்தார். பெங்களூரு சிறப்பு கோர்ட்டு பிறப்பித்துள்ள உத்தரவை ரத்து செய்யுமாறும், ஜெயலலிதாவின் பொருட்களை தன்னிடம் ஒப்படைக்குமாறும் கோரினார்.

இந்த மனு மீது கடந்த 10 மாதங்களாக விசாரணை நடைபெற்று வந்தது. இந்த வழக்கில் கடந்த 13-ந்தேதி தீர்ப்பு கூறப்பட்டது. இதில் ஜெ.தீபாவின் மனுவை தள்ளுபடி செய்து நீதிபதி ஸ்ரீசானந்தா உத்தரவிட்டார்.

சொத்து குவிப்பு வழக்கில் சுப்ரீம் கோர்ட்டு தனது தீர்ப்பில், ஜெயலலிதாவின் சொத்துக்களை பறிமுதல் செய்ய வேண்டும் என்று கூறியுள்ளதால், ஜெ.தீபாவின் மனுவை தள்ளுபடி செய்வதாக நீதிபதி ஸ்ரீசானந்தா குறிப்பிட்டுள்ளார். மனுதாரர் சுப்ரீம் கோர்ட்டை அணுகலாம் என்றும் அதில் கூறப்பட்டுள்ளது.

இந்த நிலையில்தான் இன்று கர்நாடகா சிறப்பு நீதிமன்றம் ஜெயலலிதா சொத்து குவிப்பு வழக்கில் பறிமுதல் செய்யப்பட்ட நகை உள்ளிட்ட பொருட்களை ஒப்படைக்க உத்தரவிட்டுள்ளது.

புதுடெல்லி:

தலைநகர் டெல்லியின் புராரி பகுதியில் உள்ள 4 மாடி கட்டிடம் ஒன்று நேற்று முன்தினம் மாலை இடிந்து விழுந்து விபத்தில் சிக்கியது. இந்த இடிபாடுகளுக்குள் பலர் சிக்கியிருப்பதாக போலீசார் மற்றும் தீயணைப்புத் துறையினருக்கு தகவல் கிடைத்தது.

அதன்பேரில் அங்கு விரைந்து சென்ற தீயணைப்புத் துறையினர் இடிபாட்டிற்குள் சிக்கியிருப்பவர்களை தேடும் பணியில் ஈடுபட்டுள்ளனர்.

இதற்கிடையே, இடிபாடுகளில் சிக்கிய 2 பேரின் உடல்கள் நேற்று மீட்கப்பட்டன. மேலும் இந்த இடிபாட்டில் இருந்து 12 பேர் மீட்கப்பட்டிருப்பதாகவும் அதிகாரிகள் தெரிவித்துள்ளனர்.

இதற்கிடையே, கட்டிட இடிபாடுகளில் சிக்கி பலியானோர் எண்ணிக்கை 5 ஆக அதிகரித்துள்ளது. மேலும் 10-க்கும் மேற்பட்டோர் மீட்கப்பட்டு மருத்துவமனையில் சிகிச்சை பெற்று வருகின்றனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர்.

இந்நிலையில், டெல்லி கட்டிட விபத்தில் இருந்து 30 மணி நேரத்துக்குப் பிறகு ஒரே குடும்பத்தைச் சேர்ந்த 4 பேர் மீட்கப்பட்டுள்ளனர்.

இதுதொடர்பாக அவர்கள் கூறுகையில், எங்களை காப்பாற்றிய கடவுளுக்கு நன்றி என கண்ணீர் மல்க தெரிவித்தனர்.

நாடாளுமன்ற பட்ஜெட் கூட்டத்தொடர் ஜனாதிபதி உரையுடன் வருகிற 31-ந் தேதி தொடங்குகிறது. இதைத் தொடர்ந்து பிப்ரவரி 1-ந்தேதி 2025-26-ம் ஆண்டுக்கான மத்திய பட்ஜெட்டை நிர்மலா சீதாராமன் தாக்கல் செய்கிறார். இது நிர்மலா சீதாராமன் தாக்கல் செய்யும் 8-வது பட்ஜெட் ஆகும்.

மத்திய அரசு ஊழியர்களுக்கு 8-வது ஊதிய குழு ஊதிய உயர்வு உள்ளிட்டவை இந்த பட்ஜெட்டில் இடம் பெறுகிறது. புதிய நேரடி வரி சட்டத்திற்கான மசோதாவை அறிமுகப்படுத்த உள்ளார்.

இந்நிலையில் இந்த பட்ஜெட்டில் அமெரிக்க பொருட்களுக்கான இறக்குமதி சுங்க வரி குறைக்கப்பட அதிக வாய்ப்புள்ளதாக நிபுணர்கள் தெரிவிக்கின்றனர். கடந்த ஜனவரி 20 ஆம் தேதி அமெரிக்க அதிபராக டிரம்ப் பதவியேற்றத்து முதல் பல்வேறு அதிரடி நடவடிக்கைகளில் ஈடுபட்டு வருகிறார்.

குறிப்பாக இந்தியா, பிரேசில், சீனா உள்ளிட்ட நாடுகள் அமெரிக்க பொருட்களுக்கு அதிக வரி விதிப்பதாகவும், இந்த நிலை நீடித்தால் அவர்களின் பொருட்களுக்கும் வரியை அமெரிக்கா உயர்த்தும் என பதவியேற்கும் முன்னரே பேசியிருந்தார்.

இதனை முன்வைத்து விவாதங்கள் நடந்து வந்தன. இந்நிலையில் நேற்று புளோரிடாவில் தனது கட்சியினரிடையே உரையாற்றிய டிரம்ப், பிரிக்ஸ் நாடுகளான இந்தியா, பிரேசில், சீனா ஆகிய நாடுகள் அமெரிக்காவவிடம் அதிக வரி வசூலிப்பவை என தெரிவித்தார்.

அமெரிக்கப் பொருளாதாரத்திற்குத் தீங்கு விளைவிக்கும் இந்த நடைமுறைகளைத் தனது நிர்வாகம் இனி பொறுத்துக்கொள்ளாது என்று கூறினார்.

அமெரிக்கா தான் பிரதானம், அமெரிக்காவின் நலனுக்கு எதிராக செயல்படும் நாடுகள் மீது அதிக வரி விதிக்கப்போவதாக டிரம்ப் சூளுரைத்துள்ளார். முன்னதாக நேற்று முன் தினம் மோடியுடன் டிரம்ப் தொலைப்பேசியில் உரையாடிய நிலையில் நேற்று இந்த கருத்தை பேசியுள்ளதும் கவனிக்கத்தக்கது.

வரி விதிப்புகளில் டிரம்பின் நிலைப்பாடு அமெரிக்க-இந்தியா வர்த்தக உறவில் பெரும் தாக்கத்தை ஏற்படுத்தலாம் என்று நிபுணர்கள் கருதுகின்றனர்.

இந்த நிலையில்தான் பட்ஜெட்டில் அமெரிக்க பொருட்களுக்கான இறக்குமதி வரியை இந்த பட்ஜெட்டில் மத்திய அரசு குறைக்கும் என எதிர்பார்க்கப்படுகிறது.

பதிலாக தங்கத்தின் இறக்குமதியில் வரி உயரும் என்றும் கணிக்கப்பட்டுள்ளது. டாலர் வர்த்தகத்தில் இருந்து வெளியேற நினைத்தால், டாலர் வர்த்தகத்தை குறைத்தால் 100% வரி விதிப்பை மேற்கொள்ளுவோம் என டிரம்ப் எச்சரித்திருந்ததும் குறிப்பிடத்தக்கது. அடுத்த மாதம் மோடி அமெரிக்காவில் டிரம்பை சந்திக்க உள்ளதும் குறிப்பிடத்தக்கது.

டெல்லி சட்டமன்ற தேர்தல் அடுத்த மாதம் (பிப்ரவரி) 5-ந்தேதி நடைபெறுகிறது. 3 நாள் கழித்து பிப்ரவரி 8-ந்தேதி வாக்குகள் எண்ணப்பட்டு முடிவுகள் அறிவிக்கப்பட இருக்கின்றன.

டெல்லியில் மீண்டும் ஆட்சியை பிடிக்க ஆம் ஆத்மி தீவிர தேர்தல் பணியில் ஈடுபட்டுள்ளது. பாஜக மற்றும் காங்கிரஸ் கட்சிகளும் மும்முரமாக ஈடுபட்டு வருகின்றன.

இந்த மூன்று கட்சிகளும் தேர்தல் அறிவிக்கப்பட்டதில் இருந்து வாக்குறுதிகளை அளித்து வருகின்றன. அதன்பின் அந்த வாக்குறுதிகளுடன் கூடிய தேர்தல் அறிக்கையை வெளியிட்டு வருகின்றன. பாஜக மூன்று கட்டங்களாக தேர்தல் அறிக்கையை வெளியிட்டது. ஆம் ஆத்மி நேற்று தேர்தல் அறிக்கையை வெளியிட்டது.

இந்த நிலையில் காங்கிரஸ் கட்சி இன்று தேர்தல் அறிக்கையை வெளியிட்டுள்ளது. அதில் இடம் பிடித்துள்ள முக்கிய வாக்குறுதிகள்:-

* மாதந்தோறும் பெண்களுக்கு 2500 ரூபாய் வழங்கப்படும்.

* 300 யூனிட் வரை இலவச மின்சாரம் வழங்கப்படும்.

* 500 ரூபாய்க்கு சமையல் எரிவாயு சிலிண்டர் வழங்கப்படும்.

* ரூ. 25 லட்சம் வரை இலவச சுகாதார காப்பீடு.

* இலவச ரேசன் பொருட்கள் (5 கிலோ அரிசி, 2 கிலோ சர்க்கரை, ஒரு கிலோ சமையல் எண்ணெய், 6 கிலோ பருப்பு, 250 தேயிலை) வழங்கப்படும்.

* படித்த வேலையில்லாத இளைஞர்களுக்கு ஒரு வருடத்திற்கு மாதம் 8,500 ரூபாய் என்ற வகையில் நிதி உதவி வழங்கப்படும்.

* மாநிலம் முழுவதும் 100 இந்திரா கேன்டீன் தொடங்கப்பட்டு, 5 ரூபாய்க்கு சாப்பாடு வழங்கப்படும்.

* காங்கிரஸ் ஆட்சி அமைத்தால் டெல்லியில் சாதிவாரி கணக்கெடுப்பு நடத்தப்படும்.

* டெல்லியின் கிழக்குப் (Purvanchalis) பகுதிக்கு என தனி அமைச்சகம் தொடங்கப்படும்.

* அத்தியாவசிய சேவைகளை வழங்குவதில், 3-ம் பாலினத்தினருக்கு எதிரான பாகுபாட்டைத் தடுக்கவும், அவர்களை உள்ளடக்குவதை உறுதி செய்யவும், மாநில சட்டங்கள் மற்றும் விதிமுறைகளில் மறுபரிசீலனை செய்யப்படும்.

டெல்லியில் அடுத்த மாதம் சட்டசபை தேர்தல் நடைபெற உள்ளது. இதையொட்டி ஆம் ஆத்மி கட்சியின் ஒருங்கிணைப்பாளர் அரவிந்த் கெஜ்ரிவால் தீவிர பிரசாரம் செய்து வருகிறார்.

இந்நிலையில் அவர் யமுனை நதியில் அரியானா மாநில பாஜக அரசு நச்சு கலப்பதாக குற்றம் சாட்டி இருந்தார். இதுகுறித்து பாஜக நிர்வாகிகள் தேர்தல் ஆணையத்தில் புகார் அளித்தனர்.

அதன் பேரில் தேர்தல் ஆணையம் அரவிந்த் கெஜ்ரிவாலுக்கு நோட்டீஸ் அனுப்பி உள்ளது. அதில், இத்தகைய குற்றச்சாட்டுகள் இரு மாநிலங்களுக்கும் இடையேயான உறவை பாதிக்கக்கூடும். எனவே புகாருக்குரிய ஆதாரங்களுடன் இன்றிரவு 8 மணிக்குள் கெஜ்ரிவால் தனது பதிலை அளிக்க வேண்டும் என தெரிவித்துள்ளது.

இந்நிலையில், இன்று டெல்லியில் பிரதமர் மோடி தேர்தல் பிரசாரம் மேற்கொண்டார்.

அப்போது பேசிய அவர், "பிரதமர் குடிக்கும் தண்ணீரில் அரியானா பாஜக அரசு விஷம் கலக்குமா? கெஜ்ரிவாலின் இந்த குற்றசாட்டு அரியானாவை மட்டுமில்ல ஒட்டுமொத்த இந்தியாவையும் அவமானப்படுத்தியுள்ளது. தண்ணீர் கொடுப்பதை நம் நட்டு மக்கள் நல்ல காரியமாக கருதுகிறார்கள். தோல்வி பயத்தால் அவர்கள் இப்படி உளறுகிறார்கள். இப்படி பேசுபவர்களுக்கு டெல்லி மக்கள் தக்க பாடம் புகட்டுவார்கள் என்று நான் நம்புகிறேன்.

25 ஆண்டுகளாக காங்கிரஸ், ஆம் ஆத்மி கட்சிகளை பார்த்துவிட்டீர்கள். இப்போது உங்களுக்காக பணியாற்ற மோடிக்கு ஒரு வாய்ப்பு தாருங்கள். உங்களை குடும்பத்தைப்போல பார்த்துக்கொள்கிறேன். உங்களின் கனவு இனி எனதாக இருக்கும். கனவுகளை நிறைவேற்ற வலிமையை தாருங்கள்" என்று தெரிவித்தார்.

லக்னோ:

மௌனி அமாவாசை தினமான இன்று மகா கும்பமேளாவில் கூட்ட நெரிசல் ஏற்பட்டதை அடுத்து, பத்துக்கும் மேற்பட்டோர் உயிரிழந்திருக்கலாம் என அஞ்சப்படுகிறது.

கும்பமேளாவில் உயிரிழந்தவர்களின் குடும்பங்களுக்கு பிரதமர் மோடி இரங்கல் தெரிவித்துள்ளார்.

இந்நிலையில், சமாஜ்வாடி தலைவரும், முன்னாள் முதல் மந்திரியுமான அகிலேஷ் யாதவ், கும்பமேளாவில் உயிரிழந்த பக்தர்கள் குடும்பத்தினருக்கு இரங்கல் தெரிவித்தார்.

இதுதொடர்பாக அகிலேஷ் யாதவ் எக்ஸ் வலைதளத்தில் வெளியிட்டுள்ள செய்தியில் கூறியதாவது:

மகா கும்பமேளாவிற்கு வந்திருக்கும் துறவிகள் மற்றும் பக்தர்கள் மத்தியில் கும்பமேளா நிர்வாக அமைப்பின் மீது நம்பிக்கையை மீண்டும் நிலைநாட்ட, கும்பமேளா நிர்வாகத்தை உ.பி அரசிடம் ஒப்படைக்காமல் ராணுவத்திடம் ஒப்படைக்கப்பட வேண்டும்.

உலகத்தரம் வாய்ந்த ஏற்பாடுகளைச் செய்வதாகக் கூறப்படும் உண்மைகள் தற்போது அனைவர் முன்னிலையில் வெளிவந்துள்ளன. இதுபற்றி பொய்ப் பிரசாரம் செய்பவர்கள், இந்த விபத்தில் உயிரிழந்தவர்களுக்கு தார்மீகப் பொறுப்பேற்று பதவியை ராஜினாமா செய்ய வேண்டும்.

மகா கும்பாபிஷேகத்தின் தவறான நிர்வாகத்தால் ஏற்பட்ட விபத்தில் பக்தர்கள் உயிரிழந்த செய்தி மிகவும் வருத்தம் அளிக்கிறது. காயம் அடைந்தவர்களை ஆதரிப்பதற்கும், மேலும் குழப்பத்தைத் தடுக்கவும் உடனடியாக நடவடிக்கை எடுக்குமாறு உத்தரப் பிரதேச அரசை கேட்டுக் கொள்கிறேன்.

படுகாயம் அடைந்தவர்களைக் கொண்டு செல்வதற்கு ஏர் ஆம்புலன்ஸ்கள் அனுப்பப்பட வேண்டும். இறந்தவர்களை அடையாளம் கண்டு அவர்களின் உடல்களை அவர்களது குடும்பங்களுக்குத் திருப்பித் தருவதற்கு விரைவான ஏற்பாடுகள் செய்யவேண்டும்.

இந்த இக்கட்டான நேரத்தில் பக்தர்கள் பொறுமையாகவும் அமைதியாகவும் இருக்கவேண்டும். பக்தர்களின் எதிர்கால ஏற்பாடுகளை மேம்படுத்த இந்தச் சம்பவத்திலிருந்து பாடம் கற்றுக் கொள்ளும்படி மாநில அரசை கேட்டுக் கொண்டார்.

மகாராஷ்டிராவில் கர்ப்பிணி பெண்ணின் கருவிலுள்ள குழந்தைக்குள் கரு வளரும் அரிதினும் அரிதான நிலையை மருத்துவர்கள் கண்டறிந்துள்ளனர்.

மகாராஷ்டிராவில் புல்தானா மாவட்டத்தின் அரசு பெண்கள் மருத்துவமனையில் 35 வார [9 மாத] கர்ப்பிணியான 32 வயது பெண் ஒருவருக்கு சோனோகிராபி செய்தபோது அவரின் 'கருவில் கரு' [Foetus inside foetus] வளருவது கண்டறியப்பட்டது.

அதாவது பெண்ணின் வயிற்றுக்குள் உண்டாகியுள்ள குழந்தையின் உடலினுள் மற்றொரு முழு வளர்ச்சியடையாத கரு உருவாகி உள்ளது. இதுகுறித்து அந்த மருத்துவமனையின் மகப்பேறு மருத்துவர் பிரசாத் அகர்வால் கூறுகையில், ஆரம்பத்தில் நான் ஆச்சரியமடைந்தேன், பின்னர் கவனமாக ஸ்கேனை மறுபரிசீலனை செய்தேன்.

இது முந்தைய சோனோகிராஃபியில் தவறவிடப்பட்டது. ஏனெனில் இது மிகவும் அரிதான நிலை, இதுபோன்ற ஒரு நிலை இருக்கும் என்று யாரும் கற்பனை கூட செய்ய முடியாது. எனவே, நான் இரண்டு மருத்துவர்களிடம் விரிவான ஆலோசனைக்கு பின் அதை உறுதி செய்தேன் என்று தெரிவித்தார்.

மேலும், குழந்தை பிறந்த பின்னரே இந்த நிலை பெரும்பாலும் கண்டறியப்படும். ஆனால் இப்பெண்ணுக்கு பிரசவத்துக்கு முன்னரே கண்டறியப்பட்டுள்ளது.

இது 5 லட்சத்தில் ஒருவருக்கு மட்டும் நிகழக்கூடிய அரிய வகையான மருத்துவ நிலை. இதுவரை உலகில் வெறும் 200 பேருக்கு மட்டுமே இந்த நிலை உண்டாகியது. அதில் இந்தியாவில் 15-20 பேரில் மட்டுமே இந்த நிலை பதிவாகியது என்று தெரிவித்தார்.

இந்த நிலைக்கான சரியான காரணம் முழுமையாக புரிந்து கொள்ளப்படவில்லை, ஆனால் இது ஒரே மாதிரியான இரட்டையர்களின் வளர்ச்சியின் போது நிகழும் ஒழுங்கின்மையின் விளைவு என நம்பப்படுகிறது.

இதற்கிடையே அந்த பெண் பாதுகாப்பான பிரசவத்திற்காக சத்திரப்பதி சம்பாஜி நகர் பகுதியிலுள்ள மருத்துவமனையில் அனுமதிக்கப்பட்டுள்ளார்.  

கங்கை, யமுனை மற்றும் சரஸ்வதி என மூன்று நதிகள் சங்கமமாகும் இடம் திரிவேணி சங்கமம் - இந்துக்களால் மிகவும் புனிதமானதாக கருதப்படுகிறது. மகா கும்பமேளாவின் போது, குறிப்பாக மௌனி அமாவாசை போன்ற சிறப்பு நீராடும் நாட்களில் அதில் நீராடுவது மக்களின் பாவங்களை கழுவி, அவர்களுக்கு 'மோட்சம்' அல்லது முக்தியை அளிக்கும் என்று நம்பப்படுகிறது.

இந்த நிலையில், மௌனி அமாவாசை தினமான இன்று மகா கும்பமேளாவில் கூட்ட நெரிசல் ஏற்பட்டதை அடுத்து பத்துக்கும் மேற்பட்டோர் உயிரிழந்திருக்கலாம் என்று அஞ்சப்படுகிறது.

இந்நிலையில் கும்பமேளாவில் உயிரிழந்தவர்களின் குடும்பங்களுக்கு பிரதமர் மோடி இரங்கல் தெரிவித்துள்ளார்.

இது தொடர்பாக அவரது எக்ஸ் பதிவில், "உ.பி. பிரயாக்ராஜ் கும்பமேளாவில் நடந்த துயர சம்பவம் வருத்தமளிக்கிறது. கூட்ட நெரிசலில் சிக்கி உயிரிழந்தோரின் குடும்பத்திற்கு ஆழ்ந்த இரங்கல்கள் கும்பமேளாவில் கூட்ட நெரிசலில் சிக்கி காயமடைந்தோர் விரைவில் குணமடைய வேண்டுகிறேன். பாதிக்கப்பட்டோருக்கு தேவையான உதவிகளை அரசு செய்து வருகிறது" என்று பதிவிட்டுள்ளார்.

ஆனால் தற்போதுவரை மகா கும்பமேளா கூட்ட நெரிசலில் சிக்கி உயிரிழந்தது எத்தனை பேர் என்ற விவரம் வெளியாகவில்லை. ஏராளமானோர் காயமடைந்ததாக கூறப்படும் நிலையில், இறந்தவர்களின் எண்ணிக்கை குறித்து உபி. மாநில அரசு இதுவரை அதிகாரப்பூர்வ தகவலை அளிக்கவில்லை என்பது குறிப்பிடத்தக்கது.