நீங்கள் தேடியது "Video viral"

கிரிக்கெட் ஜாம்பவானும் முன்னாள் இந்திய கிரிக்கெட் அணி கேப்டனுமான டோனி, கிரிக்கெட் ஆடுகளத்தில் தனது விளையாட்டு நுணுக்கங்களுக்காவும், கனநேரத்தில் முடிவு எடுக்கும் திறனுக்காகவும் பெரிதும் போற்றப்படுபவர். கடந்த 2020-ம் ஆண்டு சர்வதேச கிரிக்கெட்டில் இருந்து ஓய்வு பெற்றநிலையில் சி.எஸ்.கே அணிக்காக ஐ.பி.எல்-லில் மட்டும் விளையாடி வருகிறார்.

ஓய்வுக்கு பின்னர் தனது குடும்பத்துடன் அதிக நேரம் செலவிட்டு வருகிறார். குறிப்பாக தனது மகள் ஜிவாவுடன் பொழுதுபோக்குவதை வாடிக்கையாக கொண்டுள்ள டோனி, மகளுடன் இணைந்து செல்லப்பிராணி பராமரிப்பில் ஈடுபட்டார்.

தனது வீட்டில் வளர்க்கப்பட்டு வரும் செல்லப்பிராணி நாய்க்கு, டோனி 'சீப்பு'வை கொண்டு வாரி விட்டார். அருகில் உட்கார்ந்திருந்த ஜிவா, தந்தையின் நடவடிக்கையை பார்த்து சிரித்தப்படி நாயுடன் விளையாடும் வீடியோ சமூக வலைத்தளத்தில் வெளியாகி வைரலாகி வருகிறது.

காதல் என்பது மனிதர்களுக்கு மட்டுமல்ல, எல்லா உயிர்களிடமும் இருக்கிறது என்பது பல சம்பவங்களில் நிரூபிக்கப்பட்டு வருகிறது. அந்த வகையில் ரஷியாவை சேர்ந்த ஒரு புலி தனது துணையை தேடி 200 கிலோ மீட்டர் தூரம் பயணம் செய்த சம்பவம் சமூக வலைதளங்களில் பேசு பொருளாகி இருக்கிறது.

ரஷியாவில் சிஹோடா மலைப்பகுதியில் 2 புலிக்குட்டிகள் கடந்த 2012-ம் ஆண்டு வனத்துறையால் மீட்கப்பட்டது. அதில் ஆண் புலிக்கு போரீஸ் என்றும், பெண் புலிக்கு ஸ்வேத்லயா என்றும் பெயரிட்டு வளர்த்தனர். இந்த 2 புலிகளும் தனித்தனியாக தங்களது எல்லைகளை பகிர்ந்து வாழ வேண்டும் என்பதற்காக அவற்றை பிரித்து 200 கிலோ மீட்டர் தூரத்தில் சைதிரியா வனப்பகுதியில் போரீஸ் புலியை விட்டனர்.

ஆனால் அந்த புலி தனது இருப்பிடத்தை நோக்கி தொடர்ந்து பயணம் செய்து கொண்டே இருந்தது. அதே நேரம் துணையை பிரிந்த ஸ்வேத்லயா வேறு எங்கும் பயணம் செய்யாமல் விட்ட இடத்திலேயே தொடர்ந்து சுற்றியது. இந்த புலிகளின் நடமாட்டத்தை வனத்துறையினர் கண்காணித்து வந்தனர். இந்நிலையில் போரீஸ் புலி 3 ஆண்டுகள் பயணம் செய்து ஸ்வேத்லயா இருக்கும் வனப்பகுதிக்கு வந்து சேர்ந்தது. கடந்த 6 மாதங்களாக 2 புலிகளும் மகிழ்ச்சியாக சேர்ந்து வாழ்கின்றன. இவற்றின் வீடியோ தற்போது இணையத்தில் பரவி வருகிறது. 

நீங்கள் ஒரு பழமையான, பாரம்பரிய வீட்டை விலைக்கு வாங்கினால் அதன் எல்லா ரகசியங்களையும் அறிந்து வைத்திருப்பீர்களா என்ன? அப்படி ஒரு வீட்டில் வசித்த இளம்பெண், திடீரென அங்கு ஒரு ரகசிய அறை இருப்பதை கண்டுபிடித்து உள்ளார்.

அதை வீடியோவாக படம் பிடித்து சமூக வலைத்தளத்தில் வெளியிட அது வைரலாகி உள்ளது. நைகோல் கிளேர் எனப்படும் அந்த பெண்மணி, "இந்த வீட்டில் 120 ஆண்டுகளாக திறக்கப்படாத ரகசிய அறை இருக்கிறது. அதை உங்களுக்காக திறக்கிறேன்" என்று வீடியோவில் காட்டுகிறார். உள்ளே பாழடைந்த ரகசிய அறையின் படிக்கட்டுகள் தெரிகிறது. அதன்பின்னர் அங்கே குறுகிய அறைக்குள் ஏராளமான புத்தகங்கள் அலமாரிகளில் அடுக்கி வைக்கப்பட்டு இருப்பதையும், பழமையான ஷோபாக்கள் கிடப்பதாகவும் காட்சி காட்டப்படுகிறது.

ரகசிய அறை திறக்கப்படுவது உண்மை என்றும், புத்தக அறையாக காட்டப்படுவது எனது கற்பனை. இருந்தாலும் அப்படியொரு நூலகம் இருக்க வேண்டும் என்பது என் கனவு என்று அந்த பெண்மணி பதிவு வெளியிட்டு உள்ளார். ரகசிய அறைகளில் பொக்கிஷங்கள் இருக்கும். புத்தகங்களை பொக்கிஷங்களாக கருதுவது வெகுசிலரே! புத்தக அறை பற்றிய அவரது கனவை பலரும் பாராட்டினார்கள். அவரது பதிவு 97 லட்சம் பார்வைகளைப் பெற்று வைரலாகி உள்ளது.

உத்தரபிரதேசத்தில் நடைபெற்ற ஒரு கண்காட்சியில் 13 வயது சிறுமி 60 அடி உயர ராட்சத ராட்டினத்தில் தொங்குவது தொடர்பான வீடியோ சமூக வலைத்தளங்களில் வைரலாகி வருகிறது. இந்த வீடியோவை பார்ப்போரின் இதயங்கள் சில நிமிடங்கள் நின்று விடுவது போல் உணர முடிகிறது.

இந்த சம்பவம் கடந்த புதன்கிழமை நடைபெற்றது. லக்னோவில் இருந்து கிட்டத்தட்ட 130 கிமீ தொலைவில் உள்ள லக்கிம்பூர் கெரியின் நிகாசன் பகுதியில் உள்ள ராகேத்தி கிராமத்தில் நடைபெற்ற கண்காட்சியில் 60 அடி உயர ராட்சத ராட்டினத்தில் அமர்ந்திருந்த 13 வயது சிறுமி சக்கரம் நகர தொடங்கியதும் அவள் சமநிலையை இழந்து ராட்டினத்தின் இரும்பு கம்பியில் தொங்கியபடி கூச்சலிட்டாள். இதையடுத்து அங்கிருந்தவர்கள் கூக்குரலிட ஆபரேட்டர்கள் ராட்டினத்தை நிறுத்தினர். ஒரு நிமிடம் வரை அச்சிறுமி 60 அடி அந்தரத்தில் தொங்கியுள்ளார்.

இச்சம்பவம் தொடர்பான வீடியோ வைரலான நிலையில், அடையாளம் காணப்படாத சிறுமி பாதுகாப்பாக இருப்பதாக மாவட்ட நிர்வாகம் தெரிவித்தது. மேலும் ராட்சத ராட்டினத்தை இயக்க அனுமதி இல்லாத போது எப்படி இயக்கப்பட்டது என்பது தொடர்பாக விசாரணை நடைபெறுவதாக அதிகாரிகள் தெரிவித்தனர். 

ஆஸ்திரேலியாவை சேர்ந்தவர் ஜோஷி. இன்ஸ்டாகிராம் பிரபலமான இவர் வெளிநாடுகளுக்கு சுற்றுலா சென்று வீடியோ பதிவிடுவதை வாடிக்கையாக கொண்டுள்ளார். சீனாவுக்கு சுற்றுலா சென்ற இவர் அங்குள்ள ஓட்டலில் தங்கியிருந்தார். அப்போது தனக்கு வேண்டிய உணவை தொலைபேசி அழைப்பு மூலமாக நிர்வாகத்துக்கு தெரிவித்தார்.

இதனையடுத்து சிறிது நேரத்தில் அவருடைய அறைக்கு தொலைபேசிக்கு அழைப்பு வந்தது. அதில் 'உங்களுடைய அறைக்கு நீங்கள் ஆா்டர் செய்த உணவுப்பொருட்கள் வந்துள்ளன' என்று கூறப்பட்டது.

அறையின் கதவுக்கு பின்னால் அவருக்கு ஆச்சரியம் காத்திருந்துள்ளது. கதவை திறந்து பார்த்தால் அட்டைபெட்டி வடிவில் இடுப்பளவு உயரம் கொண்ட ரோபோ ஒன்று நின்று கொண்டு உணவு டெலிவரி செய்தது.

'சீனாவில் எப்படி உணவு டெலிவரி செய்யப்படுகிறது' என்ற தலைப்புடன் சமூக வலைத்தளத்தில் வெளியான இந்த வீடியோ 1½ லட்சம் லைக்குகளை பெற்று வைரலாகி வருகிறது.

வித்தியாசமான உணவு வகைகள் தயாரிப்பு குறித்த வீடியோக்கள் இணையத்தில் வெளியாகி அதிகளவில் பகிரப்படும். அவற்றில் சில உணவுகள் வரவேற்பும், சில உணவுகள் கடும் விமர்சனங்களுக்கு உள்ளாகும்.

அந்த வகையில் சமூக வலைத்தளத்தில் பரவி வரும் வீடியோவில் சீன உணவகம் ஒன்றில் வறுத்த தவளை கறியுடன் கூடிய பீட்சா குறித்த காட்சிகள் உள்ளன. அங்குள்ள ஒரு உணவகத்தில் புதிதாக அறிமுகம் செய்யப்பட்டுள்ள அந்த பீட்சாவின் நடுவே பொரித்த தவளை உள்ளது. அதில் அவித்து இரண்டு துண்டுகளாக வெட்டப்பட்ட முட்டை, தவளையின் கண்களாக அலங்கரிக்கப்பட்டுள்ளது.

'பீட்சாவுக்கு உரிய மரியாதையே போய்விட்டது' உள்ளிட்ட கருத்துகளுடன் இது தொடர்பான வீடியோ காட்சிகள் மற்றும் படங்கள் இணையத்தில் வைரலாகி வருகிறது.

திருமணம்...!

வீடுகளில் எளிமையாக நடைபெற்ற காலம் மாறி, தற்போது மண்டபங்களில்தான் பெரும்பாலும் நடக்கின்றன. சிலர், நடுக்கடலிலும், நடுவானிலும் கூட திருமணத்தை நடத்துகின்றனர்.

திருமண விழாக்களில் தங்களது வசதிக்கு ஏற்ப மண மேடை, உணவு அரங்கு உள்ளிட்டவற்றை அமைத்து கொள்கின்றனர். அப்படி ஓர் திருமண விழாதான், கோவை மாவட்டம் பொள்ளாச்சியில் நடைபெற்று உள்ளது.

அதாவது, பொள்ளாச்சியில் உள்ள ஒரு மண்டபத்தில் கடந்த சில நாட்களுக்கு முன்பு ஒரு திருமணம் நடைபெற்றது. அந்த திருமணத்திற்கு வந்தவர்களுக்கு சுவையான உணவு பரிமாறப்பட்டது. வழக்கமாக உணவு சாப்பிட 'டைனிங் டேபிள்'தான் போடப்பட்டு இருக்கும். ஆனால், பொள்ளாச்சி தென்னை நகரம் என்பதால், தேங்காய் வடிவில் 'டைனிங் டேபிள்' அமைத்து இருந்தனர். 100-க்கும் மேற்பட்ட தேங்காய் வடிவிலான 'டைனிங் டேபிள்' அமைக்கப்பட்டு இருந்தது.

இதனை திருமணத்திற்கு வந்தவர்கள் ஆச்சரியத்துடன் பார்த்தனர். மேலும் தேங்காய் வடிவில் உள்ள 'டைனிங் டேபிளில்' மகிழ்ச்சியுடன் அமர்ந்து விருந்து சாப்பிட்டனர். அத்துடன் தங்களது செல்போனில் புகைப்படம், வீடியோ எடுத்து சமூக வலைத்தளங்களில் பதிவிட்டனர். இந்த வீடியோ தற்போது வைரலாக பரவி வருகிறது.

லக்னோ:

உத்தரபிரதேச மாநிலம் சஹாரன்பூர் மாவட்டத்தில் உள்ள பள்ளி என்ற கிராமத்தில் அரசு தொடக்க பள்ளி ஒன்று உள்ளது. இந்த பள்ளிக்கூடத்தில் ஆசிரியர்கள் அருகில் இருக்க மாணவர்கள் சிலர் காரை கழுவிய வீடியோ சமூக வலைத்தளத்தில் வெளியாகி பரபரப்பை ஏற்படுத்தி உள்ளது.

இது தொடர்பாக மாவட்ட கல்வி அதிகாரியிடம் புகார் அளிக்கப்பட்டுள்ளது. இது தொடர்பாக விசாரணை நடத்தி சம்பந்தப்பட்ட நபர்கள் மீது உரிய நடவடிக்கை எடுக்கப்படும் என மாவட்ட கல்வி அதிகாரி உறுதி அளித்துள்ளார்.

ஆதிகாலம் முதலே மனிதன் செல்லப்பிராணியாக நாய்களை வளர்த்து வந்துள்ளான். சில நேரங்களில் மற்ற மனிதர்களிடம் அவை கடுமையாக நடந்து கொண்டாலும் தனது உரிமையாளர்களிடம் பாசத்தை காட்ட தவறுவதில்லை. அவர்களை தனது குடும்பமாகவே கருதுகிறது.

அதேபோன்ற ஒரு வீடியோ சமூகவலைதளங்களில் வைரலாகி பலரது கவனத்தையும் ஈர்த்துள்ளது. அதாவது ஒரு நாய் தனது உரிமையாளரின் குழந்தை அருகே படுத்து தூங்குகிறது. அப்போது மூத்த சகோதரனை போல அந்த நாய் குழந்தையின் வயிற்றில் படுத்துக் கொண்டு கட்டி தழுவுகிறது.

லட்சக்கணக்கானோரின் பார்வையை பெற்றுள்ள இந்த வீடியோவை பார்த்த பலரும் பாசத்தில் நாய்களை மிஞ்ச ஆள் இல்லை என்பது போன்ற பல்வேறு கருத்துகளை தெரிவித்து வருகின்றனர்.

மங்களூரு:

இன்றைய இளம் தலைமுறையினர் மத்தியில் நாகரீக மோகம் அதிகமாக உள்ளது என்றால் மிகையல்ல. புள்ளிங்கோ ஸ்டைல் தலைமுடி வைத்துக்கொள்வது, வித,விதமான டாட்டூகளை உடலில் போட்டுக்கொள்வது, கிழிக்கப்பட்ட நிலையில் உள்ள ஜீன்ஸ் பேண்ட்டுகள் அணிவதை நவ நாகரீகமாக கருதும் மனநிலை உள்ளது.

இதற்கு ஒரு சாரார் எதிர்ப்பு தெரிவிக்கும் சம்பவங்களும் நடந்து வருகிறது.

அதுபோல் கர்நாடகத்தில் ஒரு சம்பவம் அரங்கேறி உள்ளது. அதன் விவரம் பின்வருமாறு:-

தட்சிண கன்னடா மாவட்டம் பெல்தங்கடி தாலுகா பனகஜே பகுதியைச் சேர்ந்தவர் முகமது ஷாகிப். இவரது மகன் சாகீல்(வயது 21). இவர் நேற்று முன்தினம் பெல்தங்கடி டவுனுக்கு வந்தார். அப்போது அவர் நவநாகரீக முறையில் ஆடைகள் அணிந்திருந்தார். வெள்ளை நிற 'டி-சர்ட்' மற்றும் நீல நிற ஜீன்ஸ் பேண்ட் அணிந்திருந்தார். இதில் வேடிக்கை என்னவென்றால் அவர் அணிந்திருந்த ஜீன்ஸ் பேண்ட் நவநாகரீக முறையில் ஆங்காங்கே கிழிந்த நிலையில் இருந்தது. மேலும் தொடை பகுதியில் சல்லடை வைத்தார்போல் கிழித்து வைக்கப்பட்டு இருந்தது. பெல்தங்கடி டவுனுக்கு வந்த சாகீல் சந்தேகட்டே மார்க்கெட்டுக்கு சென்றார். அவர் மார்க்கெட்டில் அங்கும், இங்குமாக சுற்றித்திரிந்து தனக்கு தேவையான பொருட்களை வாங்கிக் கொண்டிருந்தார்.

அப்போது அங்கு வந்த லாயிலா கிராமம் புத்ரபைலு பகுதியைச் சேர்ந்த சபீர், அனீஷ் பனகஜே, பாப் ஜான் சாகேப் ஆகிய 3 பேரும் சேர்ந்து சாகீலை வழிமறித்தனர்.

பின்னர் அவர் அணிந்திருந்த நவ நாகரீக ஜீன்ஸ் பேண்டை பார்த்து இதுபோன்று ஆடைகள் அணிந்து வரக்கூடாது என்று அவர்கள் அறிவுறுத்தினர்.

அப்போது சாகீலுக்கும், சபீர் உள்ளிட்ட 3 பேருக்கும் வாய்த்தகராறு ஏற்பட்டது. இதில் ஆத்திரம் அடைந்த சபீர் உள்ளிட்ட 3 பேரும் சாகீலை வசமாக பிடித்து வைத்துக் கொண்டனர். அதையடுத்து அவர்கள் அங்குள்ள ஒரு கடையில் கோணி ஊசி மற்றும் சணலை வாங்கினர்.

பின்னர் சாகீலை பின்னால் இருந்து கைகளை மடக்கிப்பிடித்தபடி ஒருவர் பிடித்துக் கொள்ள இன்னொருவர் கோணி ஊசி மற்றும் சணலை கோர்த்து அவரது ஜீன்ஸ் பேண்ட்டை தைத்தார்.

இந்த நிகழ்வை இன்னொருவர் தனது செல்போனில் வீடியோ எடுத்தார். பேண்ட் கிழிந்திருந்த பகுதிகளை தைத்த பின்னர் அவர்கள் சாகீலை விடுவித்தனர்.

பின்னர் அந்த வீடியோவை அவர்கள் சமூக வலைதளங்களில் பதிவிட்டனர். தற்போது அந்த வீடியோ சமூக வலைதளங்களில் வைரலாகி வருகிறது. தனது வீடியோ சமூக வலைதளங்களில் வைரலாகி வருவதால் மன வேதனை அடைந்த சாகீல், தனது வீட்டில் யாரும் இல்லாத நேரத்தில் விஷம் குடித்தார்.

இந்த நிலையில் வீட்டுக்கு வந்த அவரது வீட்டின் கார் டிரைவர், சாகீலை மீட்டார். பின்னர் இதுபற்றி அவர் சாகீலின் பெற்றோருக்கு தகவல் கொடுத்தார். தகவல் அறிந்த அவர்கள் விரைந்து வந்து சாகீலை மீட்டு சிகிச்சைக்காக பெல்தங்கடியில் உள்ள ஒரு தனியார் ஆஸ்பத்திரியில் சேர்த்தனர்.

தற்போது சாகீல் மேல்சிகிச்சைக்காக மங்களூருவில் உள்ள ஒரு தனியார் ஆஸ்பத்திரியில் அனுமதிக்கப்பட்டுள்ளார். அங்கு அவருக்கு தீவிர சிகிச்சை அளிக்கப்பட்டு வருகிறது. இதுகுறித்து இதுவரை போலீசில் சாகீல் தரப்பில் புகார் அளிக்கவில்லை. இருப்பினும் போலீசார் விசாரணை நடத்தி வருகிறார்கள். இந்த சம்பவம் அப்பகுதியில் பரபரப்பை ஏற்படுத்தி உள்ளது.

புகைபிடிப்பது உடல்நலத்திற்கு கேடு என்பதால் புகைப்பழக்கத்திற்கு எதிராக பல்வேறு விழிப்புணர்வு பிரசாரங்கள் செய்யப்பட்டு வருகின்றன. இந்நிலையில் நொய்டாவை சேர்ந்த நபன்குப்தா என்பவர் சிகரெட் துண்டுகளை மறுசுழற்சி செய்து அதன் மூலம் பொம்மைகள் தயாரிக்கும் வீடியோ இணையத்தில் பகிரப்பட்டுள்ளது.

இன்ஸ்டாகிராமில் பகிரப்பட்ட அந்த வீடியோ 60 வினாடிகள் உள்ளது. அதில், ஏராளமான சிகரெட் துண்டுகளை ஒரு சாக்கு பையில் அடைக்கப்பட்டுள்ளது. அந்த துண்டுகளில் இருந்து பஞ்சுகளை மட்டும் தனியாக பிரித்தெடுக்கிறார்கள். பின்னர் அந்த பஞ்சுகளை மறுசுழற்சி செய்வது குறித்த விளக்கத்தை குப்தா விளக்குகிறார்.

தொடர்ந்து மறுசுழற்சி செய்யப்பட்ட பஞ்சுகளை பொம்மைகளுக்குள் அடைத்து விதவிதமான வண்ணங்களில் பொம்மைகள் தயாரிப்பது போன்ற காட்சிகள் உள்ளன. இந்த வீடியோ வைரலான நிலையில் பயனர்கள் சிலர், இந்த பொம்மைகள் குழந்தைகளுக்கு தீங்கு விளைவிக்கும் என பதிவிட்டனர். அதே நேரம் சில பயனர்கள், மறுசுழற்சி செய்யப்பட்டு தான் அவை பயன்படுத்தப்படுகின்றன. எனவே குப்தாவின் முயற்சியை கேலி செய்ய வேண்டாம் என பதிவிட்டு வருகின்றனர். 

வயது என்பது வெறும் நம்பர்தான் என்பார்கள். இதற்கு ஏற்றாற்போல ஆப்பிரிக்காவின் ஜாம்பியாவில் உள்ள கிராமத்தை சேர்ந்த 85 வயது மூதாட்டி ஒருவர் பேஷன் அழகியாக மாறி உள்ளார். மார்கரெட் சோலா என்ற அந்த மூதாட்டியின் பேத்தி நியூயார்க்கில் 'மேக்கப்' கலைஞராக உள்ளார்.

அவர் கடந்த சில நாட்களுக்கு முன்பு தன்னுடைய சொந்த நாடான ஜாம்பியாவுக்கு வந்திருந்து தனது பாட்டியை சந்தித்தார். அப்போது பாட்டிக்கு நவநாகரீக உடைகள் அணிவித்தும், விக் அணிவித்தும் விதவிதமாக புகைப்படம் எடுத்தார்.

இந்த புகைப்படங்கள் சமூக வலைத்தளத்தில் வெளியாகி தற்போது வைரலாகி வருகிறது. இதனைத்தொடர்ந்து அவருக்கு பிரபல ஹாலிவுட் இணைய தொடரிலும் நடிக்க வாய்ப்பு வந்துள்ளது.