நீங்கள் தேடியது "காற்றாலை"

சென்னை:

இந்தியாவில் உள்ள மின் உற்பத்தியில் காற்றாலை மூலம் தயாரிக்கப்படும் மின்சாரம் முக்கிய பங்கு வகிக்கிறது. ஏனென்றால் காற்றாலைகள் மூலமே சுற்றுசூழலுக்கு எந்தவகையிலும் மாசு இல்லாமல் மின்சாரம் தயாரிக்கப்படுகிறது. அந்தவகையில் நாடு முழுவதும் சுமார் 34 ஆயிரத்துக்கும் மேற்பட்ட காற்றாலைகள் உள்ளன. இதில் 12 ஆயிரத்துக்கும் மேற்பட்ட காற்றலைகள் தமிழகத்தில் தான் செயல்படுகின்றன.

தமிழகத்தில் கன்னியாகுமரி, நெல்லை, தூத்துக்குடி, திண்டுக்கல், கோவை, திருப்பூர் மாவட்டங்களில் அதிக காற்றாலைகள் உள்ளன. இந்த காற்றாலைகள் மொத்தம் 8 ஆயிரத்து 200 மெகாவாட் மின்சாரத்தை உற்பத்தி செய்யும் திறன் கொண்டவை. காற்றின் வேகமும், தாக்கமும் அதிகரிக்கும் சமயங்களில் காற்றாலை மூலம் உற்பத்தி செய்யப்படும் மின்சார அளவும் அதிகரிக்கிறது. அந்த சமயங்களில் அனல், நீர், அணு மற்றும் சூரிய சக்தி மின்சார உற்பத்தி அளவு சற்று குறைக்கப்படுகின்றன.

இந்தநிலையில் கேரளாவில் கனமழை காரணமாக வெள்ளப்பெருக்கு ஏற்பட்டு இருக்கிறது. அதேசமயம் தமிழகத்தின் தென் மாவட்டங்களிலும் பரவலான மழை பெய்திருக்கிறது. முக்கியமாக நெல்லை, தேனி, திண்டுக்கல், கோவை, நீலகிரி உள்ளிட்ட மலையையொட்டிய மாவட்டங்களில் கனமழையும் பெய்திருக்கிறது. இதனால் காற்றின் வேகம் அதிகரித்து இருக்கிறது.

அந்தவகையில் கடந்த 3 நாட்களில் தமிழகத்தில் உள்ள காற்றாலைகள் மூலம் தினமும் 10 கோடி யூனிட்டுக்கு மேல் மின்சாரம் உற்பத்தி செய்யப்பட்டு இருக்கிறது. இது காற்றாலை மின் உற்பத்தியின் முக்கிய சாதனையாகவும் பதிவாகி இருக்கிறது.

இதுகுறித்து இந்திய காற்றாலைகள் சங்கத் தலைவர் கே.கஸ்தூரி ரங்கையன் ‘தினத்தந்தி’ நிருபரிடம் கூறியதாவது:-

எத்தனை வழிகளில் மின்சாரம் உற்பத்தி செய்யப்பட்டாலும், காற்றாலைகள் மூலம் கிடைக்கும் மின்சாரமே மாசு இல்லாத மின்சாரம் ஆகும். காற்றின் வேகம் அதிகரிக்கும்போது இதன் உற்பத்தி மடங்கும் அதிகரிக்கும். வழக்கமாக மே முதல் செப்டம்பர் வரையிலான மாதங்களில் காற்றின் வேகம் அதிகமாக இருப்பதால், அதிக அளவு காற்றாலை மின்சாரம் உற்பத்தியாகும்.

தற்போது மிக அதிக அளவில் காற்று வீசுவதால், அதிக மின்சாரம் உற்பத்தியாகி இருக்கிறது. அந்தவகையில் கடந்த 3 நாட்களாக தினமும் 100 மில்லியன் யூனிட் அதாவது 10 கோடி யூனிட் மின்சாரம் உற்பத்தி செய்யப்பட்டு இருக்கிறது. அந்தவகையில் ஒட்டுமொத்த மின் பயன்பாட்டில் 35 சதவீதத்தை காற்றலைகள் பூர்த்தி செய்திருக்கின்றன. கடந்த ஆண்டும் ஆகஸ்டு மாதம் இதேபோல 2 நாட்கள் மின் உற்பத்தி 10 கோடி யூனிட்டை தாண்டியது. தற்போது இந்த ஆண்டும் அச்சாதனை நடந்திருக்கிறது.

பொதுவாகவே காற்றின் வேகம், காற்றின் தன்மை உள்ளிட்டவை குறித்து முன்கூட்டியே தேசிய காற்றாலை மின் உற்பத்தி ஆணையத்துக்கும், தமிழக மின் வாரியத்துக்கும் அறிக்கை தெரிவித்து வருகிறோம்.

காற்றாலைகளின் அதீத மின் உற்பத்தி காரணமாக தமிழகத்தின் மின்தேவை பூர்த்தி செய்யப்படுவதுடன், பிற மாநிலங்களுக்கும் நாம் விற்பனை செய்யும் நிலைக்கு இருக்கிறோம். இதனால் மின்வாரியத்துக்கும் நல்ல பெயர் கிடைப்பதுடன், வருவாயும் பெருகுகிறது.

ஆனால் இந்தமுறை நாங்கள் ஆய்வு செய்ததில் பெரும்பாலான காற்றாலைகள் 6 முதல் 8 மணி நேரம் வரை இயங்கவில்லை என்பதை அறிந்தோம். இதுகுறித்து மின்வாரியத்துக்கும் தகவல் தெரிவித்திருக்கிறோம். ஆனால் அதுதொடர்பாக எந்த நடவடிக்கையும் எடுக்கப்படவில்லை. அதிக மின்சாரம் கிடைத்தால் பிற மாநிலங்களுக்கு அதை விற்பனை செய்யலாம். மேலும் சில ஒப்பந்தங்கள் அடிப்படையில் கொடுக்கப்பட்ட மின்சாரத்தை, தேவைப்படும்போது நாம் பெற்றுக்கொள்ளவும் முடியும். குறிப்பாக தமிழகத்தின் மின் பற்றாக்குறை காலம் எனப்படும் மார்ச்-ஏப்ரல் மாதங்களில் இந்த ஒப்பந்தம் நமக்கு பெரிதும் கைகொடுக்கும்.

எனவே காற்றாலைகளை முறையாக இயங்க செய்தால், கிடைக்கும் உபரி மின்சாரம் நமக்கு நல்ல வருவாயை ஈட்டும். அதேநேரம் முக்கியமான நேரங்களில் மின்சாரத்துக்காக பிறமாநிலங்களின் உதவியை எதிர்பார்க்க வேண்டிய நிலையும் ஏற்படாது.

தற்போது தென்மாநிலங்களில் மழை பெய்துகொண்டிருப்பதால், மின் தேவை சற்று குறைவு தான். ஆனால் வடமாநிலங்களில் மின்சார தட்டுப்பாடு நிலவுகிறது. அதேவேளையில் இன்னும் ஒரு வார காலத்துக்கு காற்றின் வேகம் அதிகமாக இருக்கும் என்றும் வானிலை ஆய்வு மையம் கணித்திருக்கிறது. எனவே காற்றாலைகளை முழுமையாக பயன்படுத்தினால் தற்போது கிடைப்பதை விட 15 சதவீதம் கூடுதல் மின்சாரத்தைப் நாம் பெற முடியும். இதனால் நமக்கு மேலும் 2 கோடி யூனிட் மின்சாரம் தினமும் உபரியாகவே கிடைக்கும். எனவே காற்றாலைகளை முழுமையாக இயங்க செய்து, கூடுதல் மின்சாரம் உற்பத்தி செய்யும் வகையில் தேவையான நடவடிக்கைகளை மேற்கொள்ள வேண்டும்.

இவ்வாறு அவர் கூறினார். 

காங்கேயம்:

காங்கேயத்தை அடுத்த ஊதியூர் பகுதியில் நொச்சிபாளையம், ராசிபாளையம், கண்ணான்கோவில், சிறுகிணறு, ஒரம்பபுதூர் உள்ளிட்ட கிராமங்களில் ஏராளமான காற்றாலைகள் அமைக்கப்பட்டு மின் உற்பத்தி செய்யப்பட்டு வருகிறது. இந்த நிலையில் ஊதியூர் அருகே உள்ள ராசிபாளையத்தில் அமைக்கப்பட்டுள்ள ஒரு தனியாருக்கு சொந்தமான காற்றாலையின் மேல் பகுதியில் உள்ள எந்திரத்தில் நேற்று திடீரென்று புகை வந்தது.

சிறிது நேரத்தில் அந்த காற்றாலையில் தீப்பிடித்து எரியத்தொடங்கியது. 70 மீட்டர் உயரத்தில் உள்ள காற்றாலை எந்திரத்தில் தீ பிடித்து எரிந்ததை பார்த்த அந்தபகுதியினர் உடனடியாக இதுகுறித்து தாராபுரம் தீயணைப்பு நிலையத்துக்கு தகவல் தெரிவித்தனர். அதைத்தொடர்ந்து தாராபுரம் தீயணைப்பு வீரர்கள் சம்பவ இடத்திற்கு விரைந்து வந்தனர்.

ஆனால் காற்றாலை எந்திரத்தில் தீ பிடித்த பகுதி அதிக உயரத்தில் இருந்ததால் தீயை அணைக்க முடியவில்லை. இந்த தீ விபத்தில் காற்றாலையில் இருந்த எந்திரம் முற்றிலும் எரிந்து சேதம் அடைந்தது. இதன் மதிப்பு சுமார் ரூ.5 கோடி என்று கூறப்படுகிறது.

அந்த பகுதியில் காற்றின் வேகம் அதிகமாக இருந்தால் காற்றாலை எந்திரத்தில் ஏற்பட்ட தொழில்நுட்ப கோளாறு காரணமாக இந்த தீ விபத்து ஏற்பட்டதாக கூறப்படுகிறது.

இது குறித்து அப்பகுதி பொதுமக்கள் கூறுகையில், பல இடங்களில் குடியிருப்புகள் அருகில் காற்றாலைகள் அமைக்கப்பட்டுள்ளன. இது போன்ற விபத்து நேர்ந்தால் எந்திரத்தில் இருந்து கொதிக்கும் ஆயில் சிதறி அந்த பகுதியில் உள்ள மக்கள் மீது விழுந்து பாதிப்பை ஏற்படுத்தும் அபாயம் உள்ளது. எனவே காற்றாலை பாதுகாப்பு அம்சங்களை நன்கு உறுதி செய்த பின்னர் காற்றாலைகளை நிறுவ சம்பந்தப்பட்ட அதிகாரிகள் அனுமதி அளிக்க வேண்டும் என்றனர்.

நாகர்கோவில்:

தமிழகத்தில் கன்னியாகுமரி மாவட்டம் ஆரல்வாய்மொழி, முப்பந்தல், நெல்லை மாவட்டம் ராதாபுரம், தென்காசி, செங்கோட்டை மற்றும் தேனி, திண்டுக்கல், கோவை மாவட்டம் உடுமலைபேட்டை பகுதிகளில் ஏராளமான காற்றாலைகள் உள்ளன.

காற்றாலைகள் இயங்கத் தொடங்கினால் கணிசமான மின்உற்பத்தியாகும். குறிப்பாக தென்மேற்கு பருவ காற்று வீசும் காலங்களில் காற்றாலைகள் கூடுதல் மின் உற்பத்தியில் ஈடுபடும்.

ஆண்டுதோறும் ஜூன், ஜூலை, ஆகஸ்டு, செப்டம்பர் மாதங்கள் வரை தென்மேற்கு பருவ காற்று வீசும். இந்த காலங்களில் தமிழகத்தில் காற்றாலைகள் மூலம் கூடுதல் மின்சாரம் கிடைக்கும்.

அதன்படி இந்த ஆண்டு தென்மேற்கு பருவ காற்று முன்கூட்டியே வீசத் தொடங்கியதால் காற்றாலை மின் உற்பத்தியும் தொடங்கி விட்டது. கன்னியாகுமரி மாவட்டம் ஆரல்வாய்மொழி, முப்பந்தல் பகுதிகளில் காற்றாலைகள் முழுவீச்சில் செயல்பட தொடங்கி உள்ளன.

கடந்த சில மாதங்களாக 250 முதல் 350 மெகாவாட் மின்சாரம் உற்பத்தி செய்த காற்றாலைகள் இப்போது 3 முதல் 5 மடங்கு அதிகமாக மின்சார உற்பத்தியில் ஈடுபட்டுள்ளன.

இதுபற்றி காற்றாலை என்ஜினீயர்கள் கூறியதாவது:-

பொதுவாக தென்மேற்கு பருவகாற்று காலங்களில் காற்றாலை மின் உற்பத்தி அதிகமாக இருக்கும். இந்த ஆண்டு கடந்த 26-ந்தேதி காற்றாலைகள் மூலம் சுமார் 100 மெகாவாட் மின்சாரமே கிடைத்தது. அதன்பிறகு காற்றின் வேகம் அதிகரித்ததால் கடந்த 27, 28-ந்தேதிகளில் 2050 மெகாவாட் முதல் 2100 மெகா வாட்டாக உயர்ந்தது.


ஆரல்வாய்மொழி பகுதியில் 600 மெகாவாட்டும், நெல்லை, தென்காசி, செங்கோட்டை பகுதிகளில் 1500 மெகாவாட்டும், கோவை மாவட்டத்தில் 1250 மெகாவாட்டும் என தமிழகம் முழுவதும் உள்ள காற்றாலைகள் மூலம் இந்த மின்சாரம் கிடைத்தது.

இது அடுத்தடுத்த நாட்களில் மேலும் அதிகரிக்கும் என எதிர்பார்க்கிறோம். செப்டம்பர் மாதம் வரை நமக்கு காற்றாலைகள் மூலம் மின்சாரம் கிடைக்கும்.

இவ்வாறு அவர்கள் தெரிவித்தனர்.

ஆண்டிப்பட்டி:

ஆண்டிப்பட்டி, ஜி.உசிலம்பட்டி, கண்டமனூர், ஆத்தங்கரைப்பட்டி, கோவிந்தநகரம், சீப்பாலக்கோட்டை உள்ளிட்ட பல்வேறு பகுதிகளில் 500-க்கும் மேற்பட்ட காற்றாலைகள் செயல்பட்டு வருகின்றன. பொதுவாக, கேரள மாநிலத்தில் தென்மேற்கு பருவமழை காலத்தில் தேனி மாவட்டத்தில் உள்ள காற்றாலைகளில் மின்சார உற்பத்தி உச்சக்கட்டத்தில் இருக்கும்.

ஒவ்வொரு ஆண்டும் ஜூன் மாதத்தில் கேரளாவில் தென்மேற்கு பருவமழை தொடங்கும். ஆனால் மே மாத இறுதியில் தென்மேற்கு திசையில் இருந்து காற்று வீசத்தொடங்கி விடும். அந்த நேரத்தில் தேனி மாவட்டத்தில் செயல்படும் காற்றாலைகளில் மின்சார உற்பத்தி அதிகரிக்கும்.

இந்தநிலையில் தேனி மாவட்டத்தில் நேற்று முன்தினம் இரவு முதல் தென்மேற்கு திசையில் இருந்து காற்று வீசத்தொடங்கி உள்ளது. இதனையடுத்து காற்றாலைகளில் மின்சார உற்பத்தியும் தொடங்கியது. தென்மேற்கு திசையில் இருந்து வீசும் காற்றின் வேகம் ஒரு வினாடிக்கு 8 மீட்டர் முதல் 9 மீட்டர் என்ற அளவில் உள்ளதாக காற்றாலை பணியாளர்கள் தெரிவித்தனர்.

கேரளாவில் தென்மேற்கு பருவமழை தீவிரமடையும் போது, தேனி மாவட்டத்தில் காற்றின் வேகம் மேலும் அதிகரிக்கும் என்றும் கூறினர்.நேற்று முன்தினம் இரவு முதல் தென்மேற்கு காற்று வீசத் தொடங்கியதால், காற்றாலைகளில் மின்சார உற்பத்தி அதிகரித்து வருகிறது.

நேற்று முன்தினம் இரவு முதல் நேற்று காலை வரையில் ஒரு காற்றாலையின் மின்சார உற்பத்தி 16 ஆயிரம் யூனிட் என்ற அளவில் காணப்பட்டது. இனிவரும் நாட்களில் தென்மேற்கு பருவக்காற்றின் வேகமும், காற்றாலை மின்சார உற்பத்தியும் கணிசமாக அதிகரிக்கும் என்பதால், காற்றாலை மின்சாரத்தை முழுமையாக பயன்படுத்தும் வகையில் மின்வாரியத்தில் உட்கட்டமைப்பு வசதிகளை மேம்படுத்த நடவடிக்கை மேற்கொள்ளப்பட்டு வருகிறது.