தனுஷ் நடிக்க கூடாதா? - விளக்கம் கேட்ட கார்த்தி

தமிழ் சினிமாவில் இப்போது இருக்கக்கூடிய ஒரு மோசமான சூழ்நிலையை கருத்தில் கொண்டு அனைத்து கழகங்களும் சேர்ந்த கூட்டமானது இன்று சென்னையில் நடைபெற்றது. இந்த கூட்டத்தில் தயாரிப்பாளர் சங்கம், விநியோகஸ்தர்கள் சங்கம் உட்பட பல்வேறு சங்கங்கள் பங்கேற்றனர்.

இந்தக் கூட்டத்தில் 6 முக்கிய தீர்மானங்கள் நிறைவேற்றப்பட்டதாக தமிழ்த் திரைப்பட தயாரிப்பாளர்கள் சங்கம் அறிக்கை வெளியிட்டது. இதன்படி நடிகர், நடிகைகள், தொழில்நுட்ப கலைஞர்களின் சம்பளம் மற்றும் இதர செலவுகளை கட்டுப்படுத்த திரைத்துறையை மறுசீரமைப்பு செய்ய வேண்டிய தேவை உள்ளதாக தெரிவிக்கப்பட்டுள்ளது.

அதில் முக்கியமானவை தனுஷ் படங்களில் தயாரிப்பாளர்கள் ஆலோசனை நடத்த வேண்டும், நவம்பர் 1 ஆம் தேதி மேல் எந்த படப்பிடிப்பிற்கும் அனுமதி இல்லை எனவும், ஆகஸ்ட் 16 ஆம் தேதி முதல் புதிய படத்திற்கான பூஜை போடக்கூடாது என அறிக்கை வெளியிட்டனர்.

இந்நிலையில் தமிழ் திரைப்பட தயாரிப்பாளர்கள் சங்கத்திற்கு தென்னிந்திய நடிகர் சங்கம் கண்டனம் தெரிவித்துள்ளது. இதன்படி நடிகர் சங்கத்தை ஆலோசிக்காமல் நவ.1ந்தேதி முதல் படப்பிடிப்புகளை நிறுத்துவதாக அறிவித்ததற்கு கண்டனம் தெரிவிப்பதாகவும், திரைத் தொழிலாளர்களை பாதிக்கும் தன்னிச்சையான இந்த முடிவை உடனே திரும்பப் பெற வேண்டும் என்றும், நட்புறவு பாதிக்காமல் பிரச்சனைக்கு தீர்வு காண தயாரிப்பாளர்கள் சங்கம் முன்வர வேண்டும் என்றும் தென்னிந்திய நடிகர் சங்கம் தெரிவித்துள்ளதாக தகவல் வெளியாகி உள்ளது.

தயாரிப்பாளர் சங்கத்தின் தீர்மானம் பற்றி தென் இந்திய நடிகர் சங்கத்தின் பொருளாளர் நடிகர் கார்த்தி இன்று அளித்த பேட்டியில் கூறியதாவது:-

இது தன்னிச்சையாக எடுத்த முடிவு, வழக்கமாக அனைத்து சங்கங்களையும் கலந்து ஆலோசித்துதான் இது போன்ற முடிவுகளை எடுப்பார்கள். பல ஆயிரம் தொழிலாளர்கள் வாழ்க்கை இதில் அடங்கி இருக்கிறது.

தனுஷ் மீது நடவடிக்கை எடுப்பதாக கூறப்பட்டுள்ளது. இதுவரை அவர் மீது ஒரு புகார் கூட நடிகர் சங்கத்திற்கு வந்தது இல்லை. நடிகர்களின் தொழிலை முற்றிலும் தடை செய்வதாக அறிவிப்பதை ஏற்க முடியாது. மேலும் இதுபற்றி சங்கத்தின் சார்பில் பரிசீலித்து முடிவெடுக்கப்படும்.

தயாரிப்பாளர் சங்கம் எழுப்பிய கேள்விகளுக்கு அனைத்திற்கும் முறையான பதிலை அளித்து நாங்கள் ஒரு அறிக்கையை தயார் செய்துள்ளோம் அது விரைவில் வெளியிடப்படும் என தெரிவித்தார்.

உங்கள் அருகாமையில் உள்ள திரையரங்குகளில் ரிலீசான படங்களைப் பற்றிய தகவல்களை உடனுக்குடன் தெரிந்துக் கொள்ள இந்த லிங்க்-ஐ க்ளிக் செய்யவும்.