முனிவர்கள் முக்தி பெற்ற இடம்

திருச்செந்தூர் முருகனிடம் உங்களை ஒப்படைத்து பாருங்கள். நீங்கள் நினைத்தது எல்லாம் நடக்கும். உங்களது நியாயமான கோரிக்கைகளை நிச்சயமாக திருச்செந்தூர் முருகன் நிறைவேற்றுவார்.

குடும்பம், தொழில், உத்தியோகம், கடன் பிரச்சினை, தோஷங்கள், எதிரிகள் தொல்லை, காரிய வெற்றி என்று எந்த விஷயமாக இருந்தாலும் ஒேர ஒரு தடவை திருச்செந்தூர் தலத்தில் முருகனிடம் சரணடைந்து விட்டால் எல்லா பிரச்சினைகளுக்கும் தீர்வு கிடைக்கும்.

புராண காலத்திலேயே இதை அறிந்து, உணர்ந்து இருந்ததால்தான் முனிவர்களும், சித்தர்களும் இந்த தலத்துக்கு படை எடுத்தனர். கணக்கிட முடியாத அளவுக்கு சித்தர்கள் இந்த தலத்துக்கு வந்து தியானித்து தவம் இருந்து முருகன் அருளால் பலம் பெற்றுள்ளனர்.

பொதுவாகவே திருச்செந்தூர் தலத்துக்கும் முனிவர்களுக்கும் தொடர்பு உண்டு. முருகப்பெருமானின் அவதாரத்தின் தொடக்கத்தில் இருந்தே இந்த தொடர்பு இருக்கிறது.

சூரபத்மனின் கொடுமைகள் பற்றி முனிவர்களும், தேவர்களும் சிவபெருமானிடம் சொன்னபோது புதிய அவதாரத்துக்கு வித்திடப்பட்டது. சிவபெருமான் உத்தரவுபடி முனிவர்கள் ஒரு ஐப்பசி மாத அமாவாசை தினத்தன்று வேள்வி வளர்த்து யாகம் தொடங்கினார்கள். 6 நாட்கள் நடந்த அந்த யாக குண்டத்தில் எழுந்த தீயில் இருந்து ஒவ்வொரு நாளும் ஒரு வித்து விதமாக 6 வித்துகள் சேகரிக்கப்பட்டன.

அந்த வித்துகள் 6-ம் நாளில் ஒன்றாக சேர்க்கப்பட்டபோது முருகப்பெருமான் அவதரித்தார். இவ்வாறு முனிவர்கள் யாகத்தால் ஐப்பசி மாதம் முருகப்பெருமான் அவதாரம் எடுத்ததாக மகாபாரதத்தில் குறிப்பிடப்பட்டுள்ளது. இப்படி முனிவர்களுக்கும், முருகப்பெருமானுக்கும் பிரிக்க முடியாத உறவு இருக்கிறது.

இதனால்தான் திருச்செந்தூர் தலத்தில் முனிவர்கள், சித்தர்கள் இப்போதும் அரூபமாக இருப்பதாக சொல்கிறார்கள். திருச்செந்தூர் தலத்துக்கு வந்த கணக்கில் அடங்காத முனிவர்கள் அந்த தலத்தின் பெருமையையும், சிறப்பையும் சொல்லி சென்றுள்ளனர்.

அத்தகைய முனிவர்களின் கருத்துக்களில் வியாகரபாதர் முனிவரின் கருத்து சிறப்பானதாக கருதப்படுகிறது. வியாகரபாதர் சிவன் மீது மிகுந்த பக்தி கொண்டவர். சிவனுக்கு எப்போதும் தூய மலர்களால் வழிபாடு செய்ய வேண்டும் என்பதில் தீவிரமாக இருந்தவர்.

மரத்தில் இருந்து கீழே விழும் மலர்கள் மற்றும் வண்டுகள், பூச்சிகள் கடித்த மலர்களை எடுத்து அவர் ஒருபோதும் சிவனுக்கு படைத்ததில்லை. ஆனால் அதிகாலையில் இருளில் மரம் ஏறி மலர்களை பறிப்பதற்கு அவர் சிரமப்பட்டு வந்தார்.

எனவே தனக்கு இருளில் பார்க்கும் சக்தியும், மரம் ஏறும் சக்தியும் வேண்டும் என்று சிவனை நோக்கி தவம் இருந்தார். சிவபெருமான் அவரது தவத்தை மெச்சி அவருக்கு மரம் ஏறுவதற்கு வசதியாக புலியினுடைய கால்களை போன்று உருவாகட்டும் என்று வரம் கொடுத்தார். மேலும் துல்லியமான பார்வையையும் வழங்கினார்.

இதன் காரணமாகவே அவர் வியாகரபாதர் என்று அழைக்கப்பட்டார். சமஸ்கிருதத்தில் வியாகரம் என்றால் புலி என்று அர்த்தமாகும். அதில் இருந்துதான் வியாகரபாதர் என்ற பெயர் அவருக்கு ஏற்பட்டது. தமிழில் புலிக்கால் முனிவர் என்று அழைத்தனர்.

சிதம்பரம் உள்பட பல தலங்களில் தங்கி இருந்து வழிபட்ட இவர் திருப்பட்டூரில் ஜீவசமாதி அடைந்ததாக குறிப்புகள் உள்ளன. சிதம்பரத்தில் இவரும், பதஞ்சலி முனிவரும் இருந்தபோது நடராஜரின் ஆனந்த தாண்டவத்தை கண்டுகளிக்கும் பாக்கியம் கிடைத்தது.

சிதம்பரத்தை போலவே மற்ற தலங்களிலும் இறைவனது அருளை பெற வேண்டும் என்று புலிக்கால் முனிவர் விரும்பினார். அதற்கு அருள் புரிய வேண்டும் என்று நடராஜ பெருமானை பிரார்த்தனை செய்தார்.

நடராஜரும் அவருக்கு அனுமதி வழங்கி ஆசி புரிந்தார். இதையடுத்து புலிக்கால் முனிவர் தமிழகம் முழுவதும் தல யாத்திரை மேற்கொண்டார். ஒவ்வொரு ஆலயமாக சென்று சிவபெருமானை வழிபட்டு வந்தார். ஒவ்வொரு ஆலயத்திலும் அவருக்கு ஒவ்வொரு விதமான அனுபவம் கிடைத்தது.

தமிழகத்தின் தென் பகுதிக்கு சென்றபோது தாமிரபரணி நதிக்கரையில் உள்ள சிவாலயங்களை வழிபட்டுக் கொண்டே வந்தார். தினமும் தாமிரபரணி நதியில் நீராடி சிவாலயத்துக்கு சென்று வழிபட்டார். தாமிரபரணி நதி நிறைவுபெறும் பகுதிக்கு வந்ததும் திருச்செந்தூருக்கு செல்ல முடிவு செய்தார்.

திருச்செந்தூரில் லிங்கப் பிரதிஷ்டை செய்து முருகப் பெருமான் வழிபட்டு சிறப்புப்பெற்றதை அறிந்திருந்த புலிக்கால் முனிவர் அந்த தலத்தில் தாமும் வழிபட வேண்டும் என்று ஆசைப்பட்டார். அதன்படி திருச்செந்தூர் ஆலயத்துக்கு சென்றார்.

அங்கு சிவன் அருளையும், முருகன் அருளையும் ஒருங்கே பெறும் வகையில் சண்முக கடவுளுக்கு யாகம் செய்தார். அப்போது அவரது உடல் சிலிர்த்தது. ஆலய வழிபாட்டை முடித்தபிறகு மீண்டும் சிதம்பரம் நோக்கி புலிக்கால் முனிவர் பயணத்தை மேற்கொண்டார். அப்போது புலிக்கால் முனிவர் திருச்செந்தூர் ஆலயத்தில் வழிபட்ட அனுபவத்தை மற்றவர்களுடன் பகிர்ந்து கொண்டார்.

அவர் கூறுகையில், 'இந்த உலகம் முழுவதிலும் உள்ள புண்ணிய தீர்த்தங்களில் நீராடி தல யாத்திரையை நிறைவு செய்து விட்டோம் என்ற திருப்தி, மன உணர்வு எனக்கு திருச்செந்தூர் தலத்தில் மட்டுமே கிடைத்தது' என்று கூறினார். இதன் மூலம் யாத்திரை செல்பவர்களுக்கு மன ஆறுதலும், திருப்தியும் தரும் தலமாக திருச்செந்தூர் தலம் திகழ்கிறது என்பது உறுதியாகிறது.

புலிக்கால் முனிவர் போன்றே திருச்செந்தூரின் மகிமையை வேறு பல முனிவர்களும் கூறியுள்ளனர். சில முனிவர்கள் கூறி இருக்கும் கருத்துக்கள் வருமாறு:-

வசிஷ்டர்: இந்த பூமியில் போக மோட்சங்களைத் தரும் பல தலங்கள் இருந்தாலும் அவை யாவும் சந்தேகமின்றி திருச்செந்தூர் தலத்திற்கு அடுத்தவையே.

வாமதேவர்: பிரம்மஹத்தி பாவம் செய்தவனும், வேதங்களை பழித்தவனும்கூட திருச்செந்தூரில் ஒருநாள் வசித்தால் பரிசுத்தம் ஆனவனாக மாறி விடுவான்.

ஜாபாலி: திருச்செந்தூர் தீர்த்தங்களின் மகிமைக்கு ஈடானது இந்த உலகில் வேறு எதுவுமில்லை.

விசுவாமித்திரர்: நூறு அஸ்வமேத யாகங்களின் பலனை திருச்செந்தூர் தலத்துக்கு சென்று ஒருநாள் தங்கி இருந்து வழிபடுவதன் மூலம் கோடி பங்கு அதிகமாக பெறலாம்.

காசியப்பர்: ஒருவன் பிரயாகையில் வாழ்நாள் முழுவதும் நீராடும் பலனை கார்த்திகை நட்சத்திரத்தன்று ஒருமுறை இந்த தலத்தில் நீராடினால் அடைந்து விடுகிறான்.

மார்க்கண்டேயர்: ரிஷிகள் காசியில் ஒரு வருடம் தவம்செய்து பெறும் புண்ணியத்தை திருச்செந்தூரில் ஒரே ஒரு நாளில் தவம் இருந்து அடைந்து விடலாம்.

மவுத்கல்யர்: பல நாட்கள் செய்துவரும் தவத்தை திருச்செந்தூர் தரிசனம் ஒன்றினாலேயே அடைந்துவிடலாம்.

குரு மகாதசை அல்லது குரு புக்தி குரூரமாக இருந்தால் அவர்கள் திருச்செந்தூர் ஆறுமுகனை தரிசித்து ஸ்ரீஆதிசங்கரரின், சுப்ரமணிய புஜங்கத்தையோ குமரகுருபரரின் கந்தர் கலிவெண்பாவையோ ஒருமுறை பாராயணம் செய்தால் அனைத்து துன்பங்களும் நீங்கிவிடும் என்றும் முனிவர்கள் குறிப்பிட்டுள்ளனர்.

திருச்செந்தூரில் கணக்கற்ற முனிவர்கள் வாழ்ந்தனர் என்பதற்கு இப்போதும் அடிக்கடி ஆதாரங்கள் கிடைத்தவண்ணம் இருக்கின்றன. சமீபத்தில் திருச்செந்தூர் கடற்கரையில் ஏற்பட்ட கடல் அரிப்பு காரணமாக சில கல்வெட்டுகள், சிலைகள் கிடைத்தன. இவை வரலாற்று பொக்கிஷங்களாக கருதப்படுகின்றன.

கடல் அரிப்பு மூலம் திருச்செந்தூர் கடற்கரை மண்ணில் புதைந்து கிடந்த ஒரு முனிவரது சிலை கிடைத்துள்ளது. அந்த சிலை சுமார் 300 ஆண்டுகளுக்கு முற்பட்டது என்று கருதப்படுகிறது. 2 கைகளிலும் ருத்ராட்சம் கட்டப்பட்டு அந்த சிலை காட்சி அளிக்கிறது.

அந்த சிலையுடன் ஒரு நாகர் சிலையும், பெண் உருவம் கொண்ட மற்றொரு சிலையும் கிடைத்தன. இந்த சிலைகள் மூலம் ஆதி காலத்தில் திருச்செந்தூர் தலத்தில் முனிவர்கள் செய்த நாகர் வழிபாடு மிகவும் மேன்மை பெற்று இருந்ததாக ஆய்வாளர்கள் கருதுகிறார்கள்.

குறிப்பாக முருகனை வழிபட முனிவர்கள் அலை அலையாக வந்தனர் என்பதும் உறுதியாகி இருக்கிறது. எனவே முனிவர்கள் சொன்னபடி திருச்செந்தூரில் நாமும் வழிபட்டால் அவர்கள் பெற்ற பலனை நம்மாளும் பெற முடியும்.

அடுத்த வாரம் திருச்செந்தூர் முருகனின் மற்றொரு அற்புதத்தை காணலாம்.