கல்லூரி மாணவர் மீது நடத்தப்பட்ட கொடூரத் தாக்குதலை கண்டிக்கின்றேன்- செல்வப்பெருந்தகை

சென்னை:

தமிழ்நாடு காங்கிரஸ் கமிட்டி தலைவர் செல்வப்பெருந்தகை வெளியிட்டுள்ள அறிக்கையில்,

சிவகங்கை மாவட்டம், மானாமதுரை, மேலப்பிடவூரில் இருசக்கர வாகனத்தில் சென்ற விளிம்புநிலை சமூகத்தைச் சேர்ந்த கல்லூரி மாணவனை சாதிவெறி பிடித்த 3 நபர்கள் எங்கள் முன் எப்படி நீ வாகனத்தை ஓட்டி செல்லலாம் என்று கூறி, அவரது இரு கைகளையும் வெட்டியதோடு மட்டுமல்லாமல் அவரது வீட்டையும் அடித்து நொறுக்கியுள்ளார்கள். கல்லூரி மாணவர் மீது நடத்தப்பட்ட கொடூரத் தாக்குதலை வன்மையாகக் கண்டிக்கின்றேன்.

விஞ்ஞானத்தில் முன்னேறிய நாகரீக காலத்தில் கூட இதுபோன்ற சாதிய வன்கொடுமை தாக்குதல் நடைபெறுவது என்பது மனித குலத்திற்கு இழுக்கு. தாக்குதல் சம்பவத்தில் ஈடுபட்டவர்கள் மீது இந்திய தண்டனை சட்டப் பிரிவுகளின் கீழும், வன்கொடுமை தடுப்புச்சட்டத்தின் பிரிவுகளின் கீழும் காவல்துறையினர் வழக்குப்பதிவு செய்து, அவர்களுக்கு கடுமையான தண்டனை பெற்றுத் தரவேண்டும். காவல்துறையின் சமூகநீதி மற்றும் மனித உரிமைகள் பிரிவு இதுபோன்ற தீண்டாமை கிராமங்களை அடையாளம் கண்டு அங்கு தடுப்பு நடவடிக்கைகளை மேற்கொள்ள வேண்டும். இத்துறைக்கு ஒதுக்கப்பட்ட சிறப்புநிதியை முழுமையாகப் பயன்படுத்தவேண்டும்.

இவர்களை போன்ற சாதிய மனப்பான்மை கொண்டவர்களை இரும்புக்கரம் கொண்டு ஒடுக்க தமிழ்நாட்டு முதலமைச்சர் மு.க.ஸ்டாலின் உறுதி பூண்டுள்ளார்கள். மேலும் சமுதாய மாற்றம் வராமல் இதுபோன்ற சமூகநீதிக்கு வேட்டு வைக்கின்ற நிகழ்வுகள் தொடர்ந்து நடந்து கொண்டிருக்கிறது. இதுபோன்ற சாதிய ரீதியிலான குற்றச்செயல்கள் நடைபெறாமல் இருக்க, காவல்துறையின் சமூகநீதி மற்றும் மனித உரிமைகள் பிரிவு தமிழ்நாட்டில் உள்ள அனைத்து கிராமங்களிலும் விழிப்புணர்வு கூட்டங்களை நடத்த வேண்டும் என்றும் கேட்டுக் கொள்கிறேன்.