நீங்கள் தேடியது "slug 98042"

திருமங்கலம்:

மதுரை மாவட்டம் திருமங்கலம் அருகே உள்ள மைக்குடி கிராமத்தைச் சேர்ந்தவர் ரமேஷ் (வயது29), மினி பஸ் டிரைவரான இவருக்கு திருமணமாகி ஒரு ஆண்டு ஆகிறது.

நேற்று காலை இவர் திருமங்கலம் செல்வதாக மனைவி ஹரிணியிடம் கூறி விட்டு வீட்டிலிருந்து புறப்பட்டு சென்றார். மதியம் 3 மணியளவில் மனைவி ஹரிணி ரமேஷ் செல்போனுக்கு தொடர்பு கொண்டபோது அவரது செல்போன் சுவிட்ச் ஆப் செய்யப்பட்டிருந்தது.

இதனால் ஹரிணி தனது உறவினர்களிடம் ரமேஷ் எங்கே இருக்கிறார் எனக்கு தெரியவில்லை. திருமங்கலத்தில் இருந்தாலும் அழைத்து வரும்படி கூறினார். உறவினர்களும் அவரை பல்வேறு இடங்களில் தேடி வந்தனர்.

இந்த நிலையில் இன்று காலை திருமங்கலம் வடகரை சாலையில் 25 வயது மதிக்கத்தக்க வாலிபர் ஒருவர் உடலில் காயத்துடன் பிணமாக கிடப்பதாக திருமங்கலம் தாலுகா போலீசாருக்கு தகவல் கிடைத்தது.

இதையடுத்து போலீசார் அந்த வாலிபரின் உடலை கைப்பற்றி விசாரித்தனர். விசாரணையில் அவர் மினி பஸ் டிரைவர் ரமேஷ் என்பது தெரியவந்தது.உடனே போலீசார் ரமேஷ் குடும்பத்தினருக்கு தகவல் கொடுத்தனர்.

ரமேஷ் உடலை கைப்பற்றி பிரேத பரிசோதனைக்காக திருமங்கலம் அரசு மருத்துவ மனைக்கு கொண்டு சென்றனர். ரமேசின் உடலை பார்த்து மனைவி கதறி அழுதார்.

போலீஸ் விசாரணையில் ரமேஷ் தனது நண்பர்களுடன் மது அருந்திவிட்டு இரவில் இருசக்கர வாகனத்தில் வந்தபோது நிலை தடுமாறி கீழே விழுந்திருக்கலாம் அப்போது ரமேஷ் தலையில் காயம் ஏற்பட்டு மயங்கி கிடந்ததால் உடன் வந்தவர் அப்படியே போட்டு விட்டு சென்றிருக்கலாம் இரவு நேரம் என்பதால் காப்பாற்ற யாரும் வராததால் ரமேஷ் உயிரிழந்திருக்கலாம் என போலீசார் தெரிவித்தனர். ஆனால் அவரது மனைவி ஹரிணி தனது கணவரை மர்ம நபர்கள் அடித்து கொலை செய்துள்ளதாக தெரிவித்துள்ளார்.

ரமேஷ் எப்படி இறந்தார் என்பது மர்மமாக உள்ளது. அவரை இருசக்கர வாகனத்தில் அழைத்து வந்தது யார்? எதற்காக அவரை அப்படியே விட்டுவிட்டுச் சென்றார்கள்? என்பது குறித்து போலீசார் விசாரணை நடத்தி வருகின்றனர்.

பிரேத பரிசோதனை முடிவில்தான் ரமேஷ் எப்படி இறந்தார்? என்பது தெரியவரும்.

செங்கம்:

செங்கம் அருகே உள்ள அல்லியேந்தல் கிராமத்தில் உள்ள தூய லூர்து மாதா கோவில் திருவிழா நடந்தது. நேற்று இரவு மின் அலங்காரம் செய்யப்பட்ட தேர் ஊர்வலம் நடந்தது. பொதுமக்கள் பக்தி பரவசத்துடன் தேரை இழுத்து வந்தனர். வழிநெடுகிலும் ஏராளமானோர் வழிபட்டனர்.

வண்ணாரப்பேட்டை தெருவில் வந்தபோது தேரின் உச்சி பகுதி மின் கம்பியில் உரசியது. இதனால் தேரில் மின்சாரம் பாய்ந்தது.

தேரை இழுத்து வந்த அதே ஊரை சேர்ந்த அன்பரசு (50), ஜெபராஜ் (40), ஆகியோர் மீது மின்சாரம் பாய்ந்தது. இதில் சம்பவ இடத்திலேயே 2 பேரும் துடிதுடித்து பரிதாபமாக இறந்தனர். பிலோமின் ராஜ் (45) என்பவர் தூக்கி வீசப்பட்டார். அவர் படுகாயம் அடைந்தார். தேரில் தீப்பொறிகள் பறந்தன.

இதனைக்கண்ட பொதுமக்கள் சிதறி ஓடினர். அங்கு கூச்சல், அலறல் சத்தம் ஏற்பட்டது. பின்னர் மின்சாரம் துண்டிக்கப்பட்டது. இறந்தவர்கள் உடலை பார்த்து அவரது குடும்பத்தினர், உறவினர்கள் கதறி அழுதனர்.

பாய்ச்சல் போலீசார் சம்பவ இடத்திற்கு சென்று காயமடைந்த பிலோமின் ராஜை மீட்டு திருவண்ணாமலை அரசு ஆஸ்பத்திரியில் சேர்த்தனர்.

பலியானவர்கள் உடல்கள் பிரேத பரிசோதனைக்கு அனுப்பி வைக்கப்பட்டன. இந்த சம்பவத்தால் அல்லியேந்தல் கிராமம் சோகத்தில் மூழ்கியது.

பாய்ச்சல் போலீசார் இதுகுறித்து விசாரணை நடத்தி வருகின்றனர்.

கோவை:

தி.மு.க. முன்னாள் எம்.பி. கோவை மு.ராமநாதன் (87) வயது முதிர்வு காரணமாக வீட்டில் தங்கி சிகிச்சை பெற்று வந்தார்.

நேற்று நள்ளிரவு 12.30 மணிக்கு திடீரென உடல்நல குறைவு ஏற்பட்டு ராமநாதன் உயிர் பிரிந்தது.

கோவை ராமநாதன் கோவை தென்றல் என்று அழைக்கப்பட்டவர். கருணாநிதிக்கு மிக நெருக்கமானவர் ஆவார்.

1971-76 வரை சட்டமன்ற மேலவை உறுப்பினராக பதவி வகித்தார். 1984-89 வரை கோவை மேற்கு தொகுதி எம்.எல்.ஏ.வாக பதவி வகித்தார். 1996 கோவை தொகுதி பாராளுமன்ற தேர்தலில் போட்டியிட்டு அதிக வாக்குகள் வித்தியாசத்தில் வெற்றி பெற்று சாதனை படைத்தார்.

மு.ராமநாதன் மாநகர செயலாளர், தணிக்கை குழு உறுப்பினர், அறக்கட்டளை அறங்காவலர், சொத்து பாதுகாப்பு குழு உறுப்பினர் போன்ற பல்வேறு பதவிகளை வகித்து இருந்தார்.

தற்போது உயர்நிலை செயல் திட்ட குழு உறுப்பினராக இருந்து வந்தார்.

கோவை ராமநாதனுக்கு ராமகாந்தம் என்கிற மனைவியும், பன்னீர் செல்வம், இளங்கோவன், மு.இரா. செல்வராஜ் ஆகிய 3 மகன்கள் உள்ளனர்.

ராமநாதன் உடலுக்கு முன்னாள் அமைச்சர் பொங்கலூர் பழனிசாமி, முன்னாள் திருச்செங்கோடு எம்.பி., கந்தசாமி உள்பட தி.மு.க.வினர் மலர் வளையம் வைத்து அஞ்சலி செலுத்தினர். #DMKexMP #DMK #Ramanathan

தருமபுரி:

தருமபுரி மாவட்டம், குழியனூர், நரசிங்க கோம்பை ஆகிய கிராமத்தை சேர்ந்த 30 க்கும் மேற்பட்ட கட்டிட கான்கிரீட் தொழிலாளர்கள் 2 வாகனங்களில் ஏரியூருக்கு வேலைக்கு சென்று கொண்டிருந்தனர்.

ஒரு பிக்கப் வேனில் பின்புறம் கான்கீரிட் கலவை எந்திரம் பொருத்தப்பட்டிருந்தது. இந்த பிக்கப் வேனின் 10 தொழிலாளர்கள் இருந்தனர்.

இன்று காலை தருமபுரி குமாரசாமி பேட்டை ரெயில்வே மேம்பாலம் அருகே வேன் வந்து கொண்டிருந்தது. அப்போது வேகத்தடை மீது ஏறிய போது பிக்கப் வேன் எதிர் பாராத விதமாக நிலை தடுமாறி தலைகுப்புற கவிழ்ந்தது.

இதில் வேனில் இருந்த குழியனூர் பகுதியை சேர்ந்த குமணி மனைவி கலா (வயது40), நரசிங்ககோம்பை பகுதியை சேர்ந்த கிருஷ்ணன் (45) ஆகிய 2 பேரும் சம்பவ இடத்திலேயே பரிதாபமாக உயிரிழந்தனர்.

மேலும் சாலம்மாள் (43), நடுப்பிள்ளை (38), உன்னா மலை (30) உள்பட 7 பேருக்கு பலத்த காயம் ஏற்பட்டது.

இதையடுத்து அந்த வழியாக வந்த தருமபுரி தி.மு.க. மாவட்ட செயலாளர் தடங்கம் சுப்பிரமணி நடந்த விபத்தை பார்த்து 108 ஆம்புலன்சுக்கு தகவல் தெரிவித்தார்.

உடனே ஆம்புலன்ஸ் சம்பவ இடத்திற்கு வந்தது. அக்கம் பக்கத்தினர் படுகாயம் அடைந்தவர்களை மீட்டு சிகிச்சைக்காக ஆம்புலன்சில் தருமபுரி அரசு மருத்துவக்கல்லூரி மருத்துவ மனைக்கு கொண்டு சேர்த்தனர். இதையடுத்து மருத்துவமனைக்கு தடங்கம் சுப்பிரமணி சென்று படுகாயம் அடைந்தவர்களிடம் விசாரித்தார்.

இந்த விபத்து குறித்து தகவல் அறிந்த தருமபுரி டவுன் போலீசார் சம்பவ இடத்திற்கு விரைந்து வந்தனர். விபத்தில் பலியான கலா, கிருஷ்ணன் ஆகிய 2 பேர் உடலை கைப்பற்றி பிரேத பரிசோதனைக்காக தருமபுரி அரசு மருத்துவக்கல்லூரி மருத்துவமனைக்கு அனுப்பி வைத்தனர்.

இது தொடர்பாக தருமபுரி டவுன் போலீசார் விசாரணை நடத்தி வருகின்றனர்.

தாம்பரம்:

சென்னை பல்லாவரம் அடுத்த நாகல்கேணி கண்ணபிரான் தெருவில் தனியார் தோல் தொழிற்சாலை உள்ளது. இங்கு ஜார்க்கண்ட் மாநிலத்தைச் சேர்ந்த அன்சாரி (வயது22), முகமது அவரித் (23), அஜய் (23) ஆகிய தொழிலாளர்கள் தங்கி வேலை செய்து வந்தனர்.

இந்த நிலையில் தொழிற்சாலையில் இருந்த கழிவறையில் அடைப்பு ஏற்பட்டது. அன்சாரி, முகமது அவரித், அஜய் ஆகிய 3 பேரும் நேற்று இரவு 8 மணிக்கு அடைப்பை சரி செய்யும் பணியில் ஈடுபட்டனர்.

அவர்கள் 3 பேரும் கழிவுநீர் தொட்டியில் இறங்கி அடைப்பை சரி செய்து கொண்டிருந்தனர். அப்போது கழிவுநீர் தொட்டி சுவர்இடிந்து விழுந்தது. இடிபாடுகளுக்குள் 3 பேரும் சிக்கிக் கொண்டனர்.

இதில் அன்சாரி சம்பவ இடத்திலேயே உடல் நசுங்கி பலியானார். முகமது அவரித், அஜய் ஆகியோர் படுகாயம் அடைந்து உயிருக்கு போராடிக் கொண்டிருந்தனர்.

உடனடியாக அவர்கள் குரோம்பேட்டை அரசு மருத்துவமனையில் அனுமதிக்கப்பட்டனர். பின்னர் மேல் சிகிச்சைக்காக சென்னை அரசு பொது மருத்துவ மனைக்கு அழைத்துச் செல்லப்பட்டனர். ஆனால் வழியிலேயே முகமது அபரித் பலியானார்.

அஜய் சென்னை அரசு பொது மருத்துவமனையில் தீவிர சிகிச்சை பிரிவில் அனுமதிக்கப்பட்டார். அங்கு அவருக்கு சிகிச்சை அளிக்கப்பட்டு வருகிறது.

இதுகுறித்து சங்கர்நகர் போலீசார் விசாரணை நடத்தி வருகிறார்கள்.