கால சர்ப்ப தோஷம்

தோஷங்களில் மிக மிக மோசமான தோஷமாக கருதப்படுவது கால சர்ப்ப தோஷம். ராகு, கேது ஆகிய கிரகங்களுக்கு இடையே மற்ற 7 கிரகங்களும் சிக்கிக்கொள்ளும் அமைப்பைதான் ஜாதக ரீதியாக கால சர்ப்ப தோஷம் என்று சொல்கிறார்கள்.

ராகு-கேது பிடிக்குள் சிக்கிக் கொள்ளும் மற்ற 7 கிரகங்களும் தங்களது பலத்தை இழந்து விடுவது இந்த தோஷத்தின் முக்கிய அம்சமாக கருதப்படுகிறது. அதாவது யார் ஒருவருக்கு கால சர்ப்ப தோஷம் இருக்கிறது என்று சொல்கிறார்களோ அவருக்கு ராகு-கேது தவிர மற்ற 7 கிரகங்களால் எந்த நல்ல பலனும் கிடைக்கவே கிடைக்காது என்கிறார்கள்.

பொதுவாக ஒருவருக்கு தேவையான முக்கிய யோகங்கள் அனைத்தையும் கால சர்ப்ப தோஷத்துக்குரிய கிரக அமைப்புகள் கை கூட செய்யாமல் தடுத்து நிறுத்தி விடுவதாக ஜோதிட சாஸ்தி ரத்தில் குறிப்பிடப்பட்டுள்ளது.

இந்த தோஷம் ஏன் ஏற்படுகிறது? என்று ஆய்வு செய்தால் அதன் பின்னணியில் பல காரணங்கள் சொல்லப்படுகிறது. பெற்றவர்கள் செய்யும் பாவங்கள் பிள்ளைகள் மீது தான் விழும் என்று சொல்வார்கள். இதுதான் கால சர்ப்ப தோஷமாக ஒருவருக்கு மாறுவதாக கூறப்படுகிறது.

அதாவது ஒருவர் மிகப்பெரிய பாவங்கள் செய்தால் அதற்கான தண்டனை அவர்களது வாரிசுகளுக்கு கால சர்ப்ப தோஷமாக மாறி துன்புறுத்தும் என்கிறார்கள். இதனால்தான் வாழ்க்கையில் மிகவும் கஷ்டப்படுபவர்களை வம்ச ரீதியாக வகைப்படுத்தி சொல்வார்கள். இது தவிர கடந்த பிறவியில் செய்த பாவங்களும் பாவமூட்டையாக மாறி கால சர்ப்ப தோஷ வடிவத்தில் வாட்டி வதைக்கும் என்றும் சொல்வது உண்டு.

கால சர்ப்ப தோஷத்தால் ஒருவர் பாதிக்கப்பட்டால் அவர் படும் துன்பங்கள், துயரங்கள், வேதனைகள் பல வகைகளாக இருக்கும். முக்கியமாக உரிய வயது வந்த பிறகும் திருமணம் தள்ளிக்கொண்டே போகும். கால சர்ப்ப தோஷம் மிக மிக கடுமையாக இருந்தால் சிலருக்கு 37 வயது ஆன பிறகுதான் திருமணம் கைகூடும் என்கிறார்கள்.

கால சர்ப்ப தோஷத்தால் சிலருக்கு கல்வியில் தடை ஏற்படலாம். திருமணம் ஆனாலும் குழந்தை பாக்கியத்தில் சிக்கல்கள் ஏற்படலாம். சில வகையான கால சர்ப்ப தோஷங்கள் திருமண வாழ்வில் பிரச்சினைகளை கொடுத்து கொண்டே இருக்கும். சில இளைஞர்களுக்கு திருமணம், குழந்தை பாக்கியம் எல்லாம் இருக்கும். ஆனால் திறமைக்கு ஏற்ற நல்ல வேலை கிடைப்பது தள்ளிக் கொண்டே போகும்.

இவை மட்டு மல்ல... சில கால சர்ப்ப தோஷங்கள் உறவுகளிடம் வெறுப்பை ஏற்படுத்த செய்து விடும். உடநலத்திலும் பாதிப்பை ஏற்படுத்தி நோய்களை கொடுத்து கொண்டே இருக்கும். இப்படி வகை வகையாக துன்புறுத்த செய்யும் ஆற்றல் கால சர்ப்ப தோஷத்துக்கு உண்டு.

ராகு-கேதுவின் அமைப்பை அடிப்படையாக கொண்டு கால சர்ப்ப தோஷத்தை 12 வகையாக பிரித்துள்ளனர். ராகு 1-வது வீட்டிலும், கேது 7-ம் வீட்டிலும் இருந்தால் அது அனந்த கால சர்ப்ப தோஷம் ஆகும். ராகு 2-ம் வீட்டிலும், கேது 8-ம் வீட்டிலும் இருந்தால் அது குளிக கால சர்ப்ப தோஷம் ஆகும்.

ராகு 3-ம் வீட்டிலும், கேது 9-ம் வீட்டில் இருந்தால் அது வாசுகி கால சர்ப்ப தோஷம் ஆகும். ராகு 4-ம் வீட்டிலும், கேது 10-ம் வீட்டிலும் இருந்தால் அது சங்குபால கால சர்ப்ப தோஷம் ஆகும். ராகு 5-ம் வீட்டிலும், கேது 11-ம் வீட்டிலும் இருந்தால் அது பத்மன கால சர்ப்ப தோஷம் ஆகும். ராகு 6-ம் வீட்டிலும், கேது 12-ம் வீட்டில் இருந்தால் அது மகாபத்மன் கால சர்ப்ப தோஷம் ஆகும்.

ராகு 6-ம் வீட்டிலும், கேது 1-ம் வீட்டிலும் இருந்தால் அது தட்சக கால சர்ப்ப தோஷமாகும். ராகு 8-ம் வீட்டிலும், கேது 2-ம் வீட்டிலும் இருந்தால் அது கார்கோடக கால சர்ப்ப தோஷமாகும். ராகு 9-ம் வீட்டிலும், கேது 3-ம் வீட்டிலும் இருந்தால் அது சஞ்சிசுட கால சர்ப்ப தோஷமாகும். ராகு 10-ம் வீட்டிலும், கேது 4-ம் வீட்டிலும் இருந்தால் அது கடக கால சர்ப்ப தோஷம் ஆகும்.

ராகு 11-ம் வீட்டிலும், கேது 5-ம் வீட்டிலும் இருந்தால் அது விசிதன கால சர்ப்ப தோஷம் ஆகும். ராகு 12-ம் வீட்டிலும், கேது 6-ம் வீட்டிலும் இருந்தால் அது சேஷநாக கால சர்ப்ப தோஷம் ஆகும். இந்த 12 வகையான கால சர்ப்ப தோஷங்களுக்கு ஏற்ப ஒருவருக்கு பாதிப்புகள் அதிகமாக இருக்கலாம் அல்லது சற்று குறைவாக இருக்கலாம்.

இந்த 12 வகையான கால சர்ப்ப தோஷங்களில் எந்த வகையான கால சர்ப்ப தோஷ பாதிப்பு இருக்கிறது என்பதை ஜோதிடரிடம் கேட்டு தெரிந்துக் கொண்டு அதற்கு ஏற்ப வழிபாடுகள் அல்லது பரிகார பூஜைகளில் ஈடுபட்டால் தோஷத்தில் இருந்து நிச்சயமாக விடுவித்துக் கொள்ள முடியும்.

பொதுவாக கால சர்ப்ப தோஷம் என்றதும் ராமேசுவரம், காளகஸ்தி, திருபாம்புரம் போன்ற கோவிலுக்கு சென்று வழிபாடு செய்து தோஷ நிவாரண பூஜைகளை செய்ய பரிந்துரைப்பார்கள். கால சர்ப்ப தோஷம் மிக சாதாரணமாக இருந்தால் சிவாலயங்களில் திங்கட்கிழமை தோறும் பாலாபிஷேகம் செய்து வழிபட்டாலே போதும். பிரச்சினை தீர்ந்து விடும்.

சங்கடகர சதுர்த்தி தினத்தன்று விநாயகருக்கு அருகம்புல் அர்ச்சனை செய்வது நல்ல பலன் தரும். தினமும் மகா மிருத்யுஞ்சய மகா மந்திரத்தை 108 தடவை உச்சரித்து வந்தாலும் தோஷ நிவர்த்தி பெறலாம். நாகர் வழிபாடு மிக மிக நல்லது.

கால சர்ப்ப தோஷம் மிக உக்கிரமாக இருந்தால் தென் காளகஸ்தி என்று அழைக்கப்படும் திருபாம்புரம் ஆலயத்துக்கு சென்று தோஷ நிவர்த்தி பூஜை செய்ய வேண்டும். தமிழகத்தில் உள்ள ராகு-கேது தலங்களில் மிக மிக சிறப்பான தலமாக இந்த தலம் கருதப்படுகிறது. 1,500 ஆண்டுகள் பழமையான இந்த ஆலயத்தில் கோவில், கருவறை பின்புறம் ராகு-கேது தோஷ நிவர்த்தி பூஜை செய்வார்கள். அதில் பங்கேற்றால் கால சர்ப்ப தோஷ நிவர்த்தி பெற முடியும்.

சென்னை குன்றத்தூரில் சேக்கிழாரால் ஏற்படுத்தப்பட்ட 1000 ஆண்டுகள் பழமையான தலம் உள்ளது. அதுவும் ராகு-கேது தோஷத்துக்கான மிக சிறந்த பரிகார தலம். இந்த தலத்துக்கு ராகு கால பூஜையில் கலந்து கொண்டு பரிகாரம் செய்தால் தோஷம் நிவர்த்தி அடைந்து நன்மைகளை பெற முடியும்.

காஞ்சிபுரத்தில் மகாகாளேஸ்வரர் என்ற ஆலயம் இருக்கிறது. காமாட்சியம்மன் கோவிலுக்கு அருகில் இந்த ஆலயம் அமைந்து உள்ளது. மாகாளன் என்ற நாகம் இந்த தலத்துக்கு வந்து லிங்கம் அமைத்து பூஜைகள் செய்து பலன் பெற்றதாக புராண குறிப்புகள் உள்ளன. இதனால் மூலவர் பெயர் மகாகாளேஸ்வரர் என்று ஆனது. இதுவும் ராகு-கேது பரிகார தலமாகும். இங்கு வழிபட்டாலும் கால சர்ப்ப தோஷம் உடனடியாக விலகும்.

சென்னை திருவொற்றியூரில் உள்ள வடிவுடையம்மன் ஆலயத்தில் ஆதிசேஷன் பூஜைகள் செய்து அருள் பெற்றதாக புராண வரலாறு சொல்கிறது. இங்கு வழிபட்டால் கால சர்ப்ப தோஷங்கள் கண் இமைக்கும் நேரத்தில் விலகும் என்று சொல்வார்கள்.

சிதம்பரம் நடராஜர் ஆலயமும் மிக சிறந்த கால சர்ப்ப தோஷ நிவர்த்தி தலம் ஆகும். இந்த தலத்தில்தான் ஒவ்வொருவரின் தலைவிதியும் எழுதப்படுவதாக புராணங்களில் குறிப்பிடப்பட்டுள்ளது. இங்கு வழிபட்டால் அந்த தலைவிதிகளில் மாற்றங்கள் ஏற்பட்டு கால சர்ப்ப தோஷ வீரியம் அடங்கும் என்ற நம்பிக்கை உள்ளது.

ஆலயங்களுக்கு செல்ல இயலாதவர்கள் பித்ரு வழிபாட்டை உரிய முறைப்படி செய்தே தீர வேண்டும். அமாவாசை நாட்களில் காகத்துக்கு வைத்து விட்டு சாப்பிடுவதை வழக்கத்தில் கொள்ள வேண்டும். பிரதோஷ நாட்களில் வழிபாடு செய்தால் கால சர்ப்ப தோஷத்தின் தாக்கம் கண்டிப்பாக கட்டுப்படும்.

அன்னதானம் செய்வது, ஏழை குழந்தைகளுக்கு கல்வி கற்க உதவி செய்வது, முதியோர் இல்லங்களுக்கு சென்று உடைகள் வழங்குவது போன்றவையும் மிக சிறந்த கால சர்ப்ப தோஷ பரிகாரங்கள் ஆகும். 33 வயது வரைதான் கால சர்ப்ப தோஷம் ஒருவரை ஆட்டி படைக்கும் என்பார்கள். அதன் பிறகு அது அவரை செல்வத்திலும், புகழிலும் மேம்படுத்தும் என்ற அம்சம் உள்ளது.

எனவே கால சர்ப்ப தோஷம் கண்டு பயப்பட வேண்டியது இல்லை.