வாக்கு எண்ணும் மையங்களுக்குள் செல்போன்-லேப்டாப் கொண்டு செல்ல தடை

கோவை:

பாராளுமன்ற தேர்தல் வாக்கு எண்ணிக்கை தொடர்பான முன்னேற்பாடு பணிகள் குறித்த ஆய்வுக்கூட்டம் கோவை மாவட்ட கலெக்டர் அலுவலகத்தில் தேர்தல் அதிகாரியும், மாவட்ட கலெக்டருமான கிராந்தி குமார் பாடி தலைமையில் நடந்தது.

கூட்டத்தில் மாநகராட்சி ஆணையாளர் சிவகுரு பிரபாகரன், பொள்ளாச்சி தேர்தல் நடத்தும் அலுவலர், மாவட்ட வருவாய் அலுவலர் ஷர்மிளா, பொள்ளாச்சி சப்-கலெக்டர் கேத்ரின் சரண்யா, மாநகர காவல் துணை ஆணையர் (வடக்கு ) ஸ்டாலின், மாநகராட்சி துணை ஆணையாளர்கள் செல்வசுரபி, சிவக்குமார், உதவி ஆணையர், நகர்ப்புற நிலவரி மற்றும் நகர்ப்புற நில உச்சவரம்பு இளவரசி, தனித்துணை கலெக்டர், சமூக பாதுகாப்பு திட்டம் சுரேஷ், கலெக்டரின் நேர் முக உதவியாளர் (தேர்தல்) செந்தில்வடிவு, வருவாய் கோட்டாட்சியர் கோவிந்தன், வட்டாட்சியர் (தேர்தல்),தணிகைவேல் மற்றும் பலர் கலந்து கொண்டனர்.

பாராளுமன்ற பொதுத் தேர்தல் கடந்த ஏப்ரல் 19-ந் தேதி நடைபெற்றது. அதனைத் தொடர்ந்து கோவை மாவட்டத்தில் தேர்தலின் போது பயன்படுத்தப்பட்ட வாக்குப்பதிவு எந்திரங்கள், கோவை பாராளுமன்ற தொகுதிக்கு அரசினர் பொறியியல் கல்லூரியிலும், பொள்ளாச்சி பாராளுமன்ற தொகுதிக்கு பொள்ளாச்சி மகாலிங்கம் பொறியியல் மற்றும் தொழில்நுட்ப கல்லூரியிலும், பாதுகாப்பாக வைக்கப்பட்டுள்ளன.மேலும் வருகிற 4-ந் தேதி அன்று வாக்கு எண்ணிக்கை மையத்தில் மேற்காள்ள வேண்டிய வழிமுறைகள் தொடர்பான ஆலோசனைக் கூட்டம் நடைபெற்றது.

கோவை பாராளுமன்ற தொகுதிக்குட்பட்ட தபால் வாக்குகள் எண்ணுவதற்கு 7 மேஜைகளும், கோவை தெற்கு, கோவை வடக்கு, சிங்காநல்லூர், சூலூர் 4 தொகுதிகளுக்கான மின்னணு வாக்குப்பதிவு எந்திரங்கள் எண்ணுவதற்கு தலா 14 மேஜைகள் வீதமும், பல்லடம் சட்டமன்ற தொகுதிக்கு 18 மேஜைகளும் என மொத்தம் 101 வாக்கு எண்ணிக்கை மேஜைகளும் அமைக்க எற்பாடு செய்யப்பட்டுள்ளது. வாக்கு எண்ணிக்கையின்போது ஒதுக்கீடு செய்யப்பட்ட சட்டமன்ற தொகுதியினை தவிர வேறுசட்டமன்ற தொகுதி வாக்கு எண்ணிக்கை மையத்திற்கு முகவர்கள் சென்று பார்வையிட முடியாது. ஒவ்வொரு மேஜைக்கும் ஒரு வேட்பாளருக்கு ஒரு முகவர் என்ற விகிதத்தில் வாக்கு எண்ணுகை முகவர்கள் வேட்பாளர்களால் நியமிக்கப்பட வேண்டும். தங்களுக்கு ஒதுக்கீடு செய்யப்பட்ட இருக்கையிலிருந்து வாக்கு எண்ணிக்கையினை பார்வையிடலாம்.

வாக்குகள் எண்ணப்படுவதற்கு குறைந்தது ஒரு மணி நேரத்திற்கு முன்னதாக எண்ணுகை இட முகவர்கள், அவர்களின் நியமன கடிதங்கள், ஆளரி அடையாள அட்டை,தேர்தல் நடத்தும் அலுவலரால் வழங்கப்பட்ட அடையாள அட்டைகளையும் கொண்டு வர வேண்டும். எண்ணுகை இட முகவர்கள் செல்போன், ஐ பேட், மடிக்கணினி அல்லது ஒலி அல்லது ஒளியைப் பதிவு செய்யத்தக்க அத்தகைய எந்ததொரு மின்னணு கருவியையும் எண்ணுகை மையத்துக்கு எடுத்துச் செல்ல அனுமதிக்கப்பட மாட்டார்கள்.

வாக்கு எண்ணிக்கை மையம் அறையினுள் வேட்பாளர்களின் முகவர்கள் ஏதேனும் ஒழுங்கீன செயல்களில் ஈடுபட்டால் இந்திய தேர்தல் ஆணையத்தின் அறிவுரைகளை பின்பற்றி நடவடிக்கைகள் மேற்கொள்ளப்படும்.

இவ்வாறு அவர் கூறினார்.