கனமழை காரணமாக திம்பம் மலைப்பாதை அருகே மண் சரிவு- வாகன ஓட்டிகள் அச்சம்

சத்தியமங்கலம்:

தமிழக-கர்நாடகா இடையே மிக முக்கிய போக்குவரத்து பகுதியாக திம்பம் மலைப்பாதை உள்ளது. ஈரோடு மாவட்டம் சத்தியமங்கலம் அடுத்து திம்பம் மலை பாதைக்கு 27 கொண்டை ஊசி வளைவுகளை கடந்து செல்ல வேண்டும். மிகவும் ஆபத்தான திம்பம் மலைப்பாதையில் வாகனம் ஓட்டுவது வாகன ஓட்டிகளுக்கு மிகவும் சவால் ஆனது.

இந்த அடர்ந்த வனப்பகுதியில் யானைகள், புலி, சிறுத்தை நடமாட்டமும் உள்ளது. தமிழக-கர்நாடகா இடையே முக்கிய போக்குவரத்து பகுதியாக திம்பம் மலைப்பகுதி உள்ளதால் இங்கு நாளொன்றுக்கு ஆயிரக்கணக்கான வாகனங்கள் குறிப்பாக சரக்கு வாகனங்கள் போக்குவரத்து அதிக அளவில் நடந்து வருகிறது.

இந்நிலையில் கடந்த சில நாட்களாக திம்பம் மலைப்பகுதியில் பரவலாக மழை பெய்து வருகிறது. இதனால் திம்பம் மலைப்பகுதி பசுமை நிறைந்து காணப்படுகிறது. இந்நிலையில் நேற்று இரவு 27-வது கொண்டை ஊசி வளைவு அருகே மழை காரணமாக சாலையோரம் லேசான மண் சரிவு ஏற்பட்டுள்ளது.

இதனால் போக்குவரத்துக்கு பெரிய அளவில் பாதிப்பு ஏற்படவில்லை என்றாலும் அந்தப் பகுதியை வாகன ஓட்டிகள் கடந்து செல்லும் போது ஒரு வகையான அச்சத்துடனையே கடந்து செல்கின்றனர். வாகனங்கள் மெதுவாக ஊர்ந்து செல்கின்றன. பஸ்கள் லாரிகள் போன்ற கனரக வாகனங்கள் மிகவும் கவனத்துடன் அந்த பகுதியை கடந்து செல்கின்றன.