நீங்கள் தேடியது "ஓட்டுக்கு பணம்"

சென்னை:

சென்னை ஐகோர்ட்டில், வக்கீல் சூரியபிரகாசம் என்பவர் தாக்கல் செய்துள்ள மனுவில் கூறி இருப்பதாவது:-

பூந்தமல்லியில் தேர்தல் பிரசாரத்தில் ஈடுபட்ட தமிழக முதல்-அமைச்சர், தமிழக அரசு அறிவித்த ரூ. 2 ஆயிரம் தேர்தலுக்கு பின்பு வழங்கப்படும்’ என்று கூறியுள்ளார். இது மறைமுகமாக தங்களுக்கு வாக்களிக்க வேண்டும் என வாக்காளர்களை மிரட்டுவதற்கு சமமாகும்.

தேர்தலில் போட்டியிடும் கட்சிகள் மற்றும் வேட்பாளர்கள் வாக்குகளை பெற வாக்காளர்களுக்கு சட்ட விரோதமாக பணம் வழங்குவது தேர்தல் நடைமுறையை கேலிக்கூத்தாக்கி விடும்.

தமிழகம் முழுவதும் வாக்கு சேகரிக்க செல்லும் வேட்பாளர்கள் தங்களுக்கு ஆரத்தி எடுக்கும் வாக்காளர்களுக்கு ஒவ்வொரு முறையும் ரூ.500 பணமாக வழங்குவதாகவும், இது தேர்தல் ஆணையத்துக்கு தெரிந்தே நடைபெறுகிறது.

ஓட்டுக்கு பணம் கொடுப்பதும், பெறுவதும் தண்டனைக்குரிய குற்றம் என அனைத்து வாக்கு சாவடிகளிலும் விளம்பர பலகைகள் வைக்க இந்திய தேர்தல் ஆணையத்திற்கு உத்தரவிட வேண்டும்.

இவ்வாறு அவர் கூறியிருந்தார்.

இந்த வழக்கை நீதிபதிகள் மணிக்குமார், சுப்பிரமணியம் பிரசாத் ஆகியோர் விசாரித்தனர்.

இதேபோன்ற கோரிக்கைகளுடன் வக்கீல் ரமேஷ் என்பவரும் வழக்கு தொடர்ந்தார். அப்போது, தேர்தல் ஆணையம் சார்பில் ஆஜரான வக்கீல், பணப்பட்டுவாடாவை தடுப்பதற்கும், பணப்பட்டுவாடா குறித்த புகார்களில் தேர்தல் அதிகாரிகள் உரிய நடவடிக்கை எடுப்பது குறித்தும் அறிவுறுத்தல்கள் வழங்கியிருப்பதாக இந்திய தேர்தல் ஆணையம் தரப்பில் தெரிவிக்கப்பட்டது.

மேலும் பொதுமக்களிடம் விழிப்புணர்வை ஏற்படுத்தும் வகையில் தொடர் நிகழ்ச்சிகளை நடத்தி வருவதாகவும், துண்டறிக்கைகள் வழங்கி வருவதாகவும் கூறினார்.

இந்த விளக்கத்தை ஏற்றுக்கொண்ட நீதிபதிகள், சூரியபிரகாசம் தாக்கல் செய்த மனுவை தள்ளுபடி செய்து உத்தரவிட்டனர். #LoksabhaElections2019 #HighCourt

சென்னை:

தலைமைச் செயலகத்தில் நிருபர்களுக்கு சத்யபிரத சாகு அளித்த பேட்டி வருமாறு:-

தமிழகத்தில் பாராளுமன்ற தேர்தலுக்காக மொத்தம் 1,601 வேட்புமனுக்கள் தாக்கல் செய்யப்பட்டுள்ளன. கடந்த 2014-ம் ஆண்டு நடந்த பாராளுமன்ற தேர்தலில் 1,255 வேட்புமனுக்கள் தாக்கல் செய்யப்பட்டு இருந்தன. 18 சட்டமன்ற தொகுதி இடைத்தேர்தலுக்காக 519 வேட்புமனுக்கள் தாக்கல் செய்யப்பட்டுள்ளன.

தேர்தல் நடத்தை விதிமுறை மீறல் தொடர்பாக இதுவரை ரூ.46.29 கோடி கைப்பற்றப்பட்டுள்ளது. மேலும், ரூ.69.03 கோடி மதிப்புள்ள 212.5 கிலோ தங்கம், 327.5 கிலோ வெள்ளி உள்ளிட்ட விலையுயர்ந்த பொருட்கள் கைப்பற்றப்பட்டுள்ளன. ரூ.21.23 லட்சம் மதிப்புள்ள போதைப்பொருட்களும் பிடிபட்டுள்ளன.

கடந்த 2014-ம் ஆண்டு பாராளுமன்ற தேர்தலில் ரூ.25.05 கோடியும், ரூ.51.83 கோடி மதிப்புள்ள தங்கம் உள்ளிட்ட பொருட்களும் கைப்பற்றப்பட்டு இருந்தன. 2016-ம் ஆண்டு நடந்த சட்டமன்ற தேர்தலில் ரூ.113 கோடி கைப்பற்றப்பட்டு இருந்தது. தேர்தல் நடத்தை விதிமுறைகளை அமல்படுத்தும் நோக்கில் ஒவ்வொரு தொகுதியிலும் ஒரு ஷிப்டுக்கு தலா 702 பறக்கும்படை வீதம் மூன்று ஷிப்ட் பணியில் ஈடுபட்டு இருக்கும். அந்தவகையில் நாளொன்றுக்கு 2,106 பறக்கும்படை பணியில் ஈடுபடுகின்றன.

தமிழகத்தில் உரிமம் பெற்றுள்ள 21 ஆயிரத்து 999 துப்பாக்கிகளில் 19 ஆயிரத்து 607 துப்பாக்கிகள் ஒப்படைக்கப்பட்டுள்ளன. தொடர்ச்சியாக பாதுகாப்புக்கு தேவைப்படுவதால் சில துப்பாக்கிகள் ஒப்படைக்கப்படவில்லை.

சி விஜில் செல்போன் செயலி மூலம் 1,106 புகார்கள் பெறப்பட்டன. அவற்றில் உண்மைத்தன்மையுள்ள 357 புகார்கள் மீது நடவடிக்கை எடுக்கப்படுகிறது.

இறுதி வாக்காளர் பட்டியல் தயாராகும் 29-ந் தேதி மாலை 3 மணிக்கு பிறகு தேர்தல் நடத்தும் அதிகாரிகளால் வேட்பாளர்கள் அழைக்கப்பட்டு, சின்னம் வழங்கப்படும். ஒரே சின்னத்தை ஒன்றுக்கும் மேற்பட்ட நபர்கள் கேட்டிருந்தால் குலுக்கல் முறையில் அது ஒதுக்கப்படும்.

அ.ம.மு.க.வுக்கு பொதுவான சின்னம் வழங்குவது பற்றி பரிசீலிக்க வேண்டும் என்று இந்திய தேர்தல் ஆணையத்துக்கு சுப்ரீம் கோர்ட்டு உத்தரவிட்டுள்ளது. எனவே இதுபற்றிய அறிவுரையை இந்திய தேர்தல் ஆணையத்திடம் கேட்டிருந்தோம்.

அதற்கு, தேர்தல் ஆணையத்தின் மறு உத்தரவு வரும் வரை காத்திருங்கள் என்று கூறியிருக்கின்றனர். இந்த தகவலை அனைத்து தேர்தல் நடத்தும் அதிகாரிகளிடமும் தெரிவித்து இருக்கிறோம். எனவே தேர்தல் ஆணையத்தின் மறு உத்தரவு வந்தவுடன் அதை செயல்படுத்தும்படி தேர்தல் நடத்தும் அதிகாரிகளுக்கு அறிவுரை வழங்குவோம்.


ஓட்டுக்காக பணம், பரிசுப்பொருட்கள் கொடுப்பதும் குற்றம், வாங்குவதும் குற்றம். எனவே இரண்டு குற்றமும் வழக்காக பதிவு செய்யப்படும்.

தமிழகத்தில் 3.5 லட்சம் ஊழியர்களுக்கு தேர்தல் பணிக்கான பயிற்சி அளிக்கப்பட்டுள்ளது. இரண்டாம் கட்ட பயிற்சி அளிக்கப்படும் போது அந்த இடங்களில் வாக்குப்பெட்டிகள் வைக்கப்பட்டு இருக்கும். அதில் அவர்கள் தபால் ஓட்டுகளைப் போடுவார்கள். இரண்டாம் கட்ட பயிற்சிக்கான தேதியை அந்தந்த மாவட்ட தேர்தல் அதிகாரி முடிவு செய்வார். மூன்றாம் கட்ட பயிற்சி முடிந்ததும், அவர்கள் தங்களுக்கு பணி ஒதுக்கப்பட்ட வாக்குச்சாவடியின் முகவரியைப் பெற்றுக்கொண்டு அங்கிருந்து புறப்பட்டுச் செல்வார்கள்.

கூட்டுறவு சங்க பணியாளர்களை தேர்தல் பணிகளில் ஈடுபடுத்தக்கூடாது என்று புகார் கொடுக்கப்பட்டுள்ளது. இதுதொடர்பாக கூட்டுறவுத்துறையிடம் இருந்து விளக்கம் கேட்போம்.

இவ்வாறு அவர் கூறினார். #LokSabhaElections2019 #SatyabrataSahoo

சென்னை:

தமிழக தலைமை தேர்தல் அதிகாரியாக நீண்டகாலம் பணியில் இருந்தவர் நரேஷ் குப்தா. நேர்மையான அதிகாரி என பெயர் எடுத்தவர்.

தற்போது பணியில் இருந்து ஓய்வு பெற்றுள்ள அவர் காந்தி போதனைகளை பரப்பும் பணியினை செய்து வருகிறார்.

தேர்தலில் வாக்காளர்களுக்கு பணம் கொடுப்பதை கட்டுப்படுத்த முடியாத நிலை இருப்பது குறித்து அவரிடம் கருத்து கேட்கப்பட்டது. அப்போது அவர் கூறியதாவது:-

தேர்தல் நடைமுறைகள் தொடர்பாக அவ்வப்போது மாற்றங்கள் கொண்டு வரப்படுகின்றன. ஆனால் தேர்தல் காலத்தில் அரசியல்வாதிகள் பண பலத்தை பயன்படுத்துவதை இன்னமும் தடுக்க முடியவில்லை.

வேட்பாளர்கள் செலவை கண்காணிக்க அதிகளவு பார்வையாளர்கள் நியமிக்கப்படுகிறார்கள். பறக்கும் படைகள் சோதனை செய்கின்றனர்.

ஆனால் இதையெல்லாம் மீறி பணத்தை சப்ளை செய்ய அரசியல்வாதிகள் பல புதிய வழிகளை கண்டுபிடித்து விடுகிறார்கள்.

வாக்காளர்களுக்கு மொத்தமாக பணம் கொடுக்காமல் சிறிய அளவிலான பணத்தை அவ்வப்போது கொடுக்கிறார்கள். இதை கட்டுப்படுத்த தேர்தல் ஆணையம் நடவடிக்கை எடுத்து வருகிறது.

ஆனால் இப்போது வேட்பாளர்கள் வாக்காளர்களுக்கு பணம் கொடுப்பதை தாண்டி வாக்காளர்களே ஓட்டு போட தங்களுக்கு பணம் வேண்டும் என்று கேட்கிறார்கள். பணம் அல்லது பரிசு பொருட்களை கேட்டு பெறுகிறார்கள். அப்படி கொடுக்காவிட்டால் கோபம் அடைகிறார்கள்.

அந்த காலத்தில் ஓட்டு போட பணம் கொடுத்தால் வாங்கி கொள்வார்கள். பணம் வேண்டும் என்று வற்புறுத்த மாட்டார்கள். இப்போது பணம்- பரிசு பொருட்களை வாக்காளர்களே வாங்குவதால் அவற்றை அவர்களுக்கு அளிப்பதில் அரசியல் கட்சிகள் இடையே போட்டி நிலவுகிறது.

அதுவும் இடைத்தேர்தல் நேரத்தில் இப்போது பணம் கொடுப்பது அதிகரிக்கிறது. அதை கட்டுப்படுத்துவது தேர்தல் துறைக்கு பெரும் சவாலாக உள்ளது.

5 ஆண்டுகளில் பாராளுமன்றம், சட்டசபை, உள்ளாட்சி துறை என 3 தேர்தல் வருகின்றன. எனவே தேர்தலை மனதில் வைத்தே அரசியல் கட்சிகளும், அரசும் செயல்படுகின்றன. இதனால் நீண்ட கால வளர்ச்சிக்காக செயல்படாமல் குறுகிய நோக்கத்துடன் செயல்படுகின்றனர். எனவே இலவச திட்டங்களை அறிவிக்கிறார்கள். இந்த நிலை மாற வேண்டும்.

தமிழ்நாட்டில் தேர்தல் அதிகாரியாக பணியாற்றுவது கடினமானது. தேர்தல் ஆணையம் மீது அதிகளவு புகார்களை கூறுவது தமிழகத்தில் வழக்கமாக உள்ளது. மற்ற மாநிலங்களில் இந்தளவு இல்லை. அங்கு தேர்தல் அதிகாரிக்கு அதிக மரியாதை வழங்கப்படுகிறது.

இவ்வாறு அவர் கூறினார். #NareshGupta

புதுடெல்லி:

மத்தியபிரதேசம், ராஜஸ்தான், சத்தீஸ்கர், தெலுங்கானா மற்றும் மிசோரம் ஆகிய 5 மாநிலங்களுக்கு சமீபத்தில் சட்டசபை தேர்தல் நடந்தது.

இந்த தேர்தல்களில் போட்டியிட்ட வேட்பாளர்களின் தேர்தல் செலவுகள் குறித்து சி.எம்.எஸ். எனப்படும் ‘சென்டர் பார் மீடியா’ கல்வியகம் என்ற அமைப்பு ஆய்வு மேற்கொண்டது.

அதில் 5 மாநிலங்களில் நடந்து முடிந்த சட்டசபை தேர்தலில் போட்டியிட்ட வேட்பாளர்கள் ரூ.14 ஆயிரம் கோடி வரை செலவு செய்து இருப்பது தெரியவந்துள்ளது.

இவற்றில் தெலுங்கானா மாநிலத்தில் மட்டும் ரூ.5 ஆயிரம் கோடி செலவிடப்பட்டுள்ளது. இங்கு ஒரு ஓட்டுக்கு குறைந்தது ரூ.500 முதல் வழங்கப்பட்டுள்ளது.

கடந்த 2014-ம் ஆண்டு நடந்த தேர்தலை ஒப்பிடும் போது 50 சதவீதத்துக்கும் மேற்பட்டோர் கட்சி வேட்பாளர்களிடம் இருந்து ஓட்டுக்கு பணம் பெற்றுள்ளனர்.

தற்போது 2018-ம் ஆண்டு நடைபெற்ற தேர்தல்களில் தெலுங்கானா போன்ற மாநிலங்களில் 50 சதவீதம் வாக்காளர்கள் ஓட்டுக்கு பணம் வாங்கியுள்ளனர்.

இந்த தகவலை சி.எம்.எஸ். அமைப்பின் நிறுவன தலைவர் என்.பாஸ்கரராவ் தெரிவித்தார். அவர் மேலும் கூறும்போது, “தற்போது ‘நோட்டுக்கு ஓட்டு’ என்ற கொள்கை வாக்காளர்களிடம் பரவி வருகிறது. தெலுங்கானாவில் மட்டும் தேர்தலுக்கு 3 நாட்களுக்கு முன்பு ரூ.150 கோடி பறிமுதல் செய்யப்பட்டுள்ளது. மது மற்றும் தங்கமும் கைப்பற்றப்பட்டுள்ளது.

அனைத்து ஊழல்களுக்கும் தாயாக தேர்தல் ஊழல் இருக்கிறது. தேர்தலில் வெற்றி பெற வேட்பாளர்கள் பணத்தை தண்ணீராக செலவு செய்கின்றனர். அதுவே ஊழல் மற்றும் முறைகேடுக்கு காரணமாக திகழ்கிறது.

தேர்தல் செலவை குறைக்க அதிக பொதுக்கூட்டங்கள் நடத்த அனுமதி வழங்க கூடாது. தேர்தல் நடைமுறையை 15 நாட்களாக குறைக்க வேண்டும்” என்று தெரிவித்துள்ளார். #Election2018