அறந்தாங்கி:
புதுக்கோட்டை மாவட்டம் அறந்தாங்கி அருகே உள்ள திருநாளுர் தெற்கு பகுதியை சேர்ந்தவர் சுந்தர்ராஜன் (வயது 34). தஞ்சாவூர் மாவட்டம் வலப்பிரமன்காட்டை சேர்ந்த அசோகன் மகள் நித்யா (24). இவர் செவிலியராக வேலை பார்த்து வந்தார். இவர்களுக்கு கடந்த 12-ந்தேதி திருநாளுரில் திருமணம் நடைபெற்றது.
இதையடுத்து நேற்று முன்தினம் கணவன், மனைவி இருவரும் மோட்டார் சைக்கிளில் வெளியே சென்று விட்டு வீட்டிற்கு வந்தனர். அப்போது கணவன், மனைவிக்கு இடையே திடீரென வாய்த்தகராறு ஏற்பட்டது. இதுகுறித்து சுந்தர்ராஜனின் உறவினர்கள் நித்யாவின் தந்தைக்கு தகவல் தெரிவித்து உள்ளனர்.
உடனே வலப்பிரமன்காட்டில் இருந்து நித்யாவின் தந்தை அசோகன், தாய், தம்பி ஆகியோர் திருநாளுருக்கு மோட்டார் சைக்கிளில் நேற்று அதிகாலை வந்தனர். அவர்கள் சுந்தர்ராஜன், நித்யா ஆகியோரை சமாதானம் செய்தனர். தொடர்ந்து நித்யாவை தங்களுடன் வலப்பிரமன் காட்டுக்கு அனுப்பி வைக்கும்படி அசோகன், சுந்தர்ராஜனிடம் கூறினார். இதையடுத்து சுந்தர்ராஜன், நித்யா ஒரு மோட்டார் சைக்கிளிலும், நித்யாவின் தந்தை அசோகன், தாய், தம்பி ஆகியோர் மற்றொரு மோட்டார் சைக்கிளிலும் திருநாளுரில் இருந்து வலப்பிரமன்காட்டிற்கு புறப்பட்டு வந்தனர்.
அங்கு மோட்டார் சைக்கிளில் இருந்து இறங்கி தனது வீட்டிற்குள் சென்ற நித்யா சிறிது நேரத்தில் திடீரென வாந்தி எடுத்து மயங்கி விழுந்தார். இதைக்கண்ட அவரது உறவினர்கள் அதிர்ச்சி அடைந்தனர்.
உடனடியாக நித்யாவை சிகிச்சைக்காக பேராவூரணியில் உள்ள அரசு மருத்துவமனைக்கு கொண்டு சென்றனர். அவரை பரிசோதித்த டாக்டர்கள், நித்யா ஏற்கனவே இறந்து விட்டதாக கூறினர். இதையடுத்து நித்யாவின் உடல் திருநாளுரில் உள்ள சுந்தர்ராஜன் வீட்டிற்கு கொண்டு செல்லப்பட்டது.
இதுகுறித்து தகவல் அறிந் ததும் அறந்தாங்கி போலீசார் சம்பவ இடத்திற்கு வந்து விசாரணை நடத்தினர். பின்னர் நித்யாவின் உடலை பிரேத பரிசோதனைக்காக அறந்தாங்கி அரசு மருத்துவ மனைக்கு அனுப்பி வைத்தனர்.
இந்த சம்பவம் குறித்து நித்யாவின் தந்தை அசோகன் அறந்தாங்கி போலீஸ் நிலையத்தில் புகார் செய்தார். அதன் பேரில் போலீசார் வழக்குப்பதிவு செய்து நித்யா மர்மச்சாவு குறித்து விசாரணை நடத்தி வருகின்றனர். மேலும் திருமணமான 6-வது நாளில் புதுப்பெண் மர்மமான முறையில் இறந்ததால் அறந்தாங்கி ஆர்.டி.ஓ. பஞ்சவர்ணமும் விசாரணை நடத்தி வருகிறார்.
கணவர்-மனைவி இடையே ஏற்பட்ட தகராறில் நித்யா விஷம் குடித்து தற்கொலை செய்து கொண்டாரா? அல்லது வேறு காரணமா என போலீசார் விசாரித்து வருகிறார்கள். மேலும் பிரேத பரிசோதனை முடிவுக்கு பின்னர் தான் நித்யா எவ்வாறு இறந்தார் என்பது தெரியவரும். திருமணமான 6 நாளில் புதுப்பெண் இறந்த சம்பவம் அப்பகுதியில் பரபரப்பை ஏற்படுத்தி உள்ளது.
