காமன்மேன் பிரசன்ஸ் பி.கணேஷ் தயாரிப்பில் உருவாகி இருக்கும் படம் ‘ஐங்கரன்’. ‘ஈட்டி’ திரைப்படம் மூலம் இயக்குனராக அறிமுகமான ரவி அரசு இயக்கத்தில் உருவாகி இருக்கும் இப்படத்தில் ஜி.வி.பிரகாஷ் கதாநாயகனாக நடித்துள்ளார். மகிமா நம்பியார் கதாநாயகியாக நடித்துள்ளார். ஜி.வி.பிரகாஷே இப்படத்திற்கு இசையமைத்துள்ளார்.
ஜி.வி.பிரகாஷின் வழக்கமான படங்களிலிருந்து வேறொரு ஸ்டைலில் உருவாகி இருக்கும் இப்படத்தின் டீசரை இயக்குனர் ஏ.ஆர்.முருகதாஸ் சமீபத்தில் வெளியிட்டார். வெளியான சில நேரங்களில் சமூக வலைத்தளத்தில் அதிகமாக பகிரப்பட்டு வைரலானது. ரசிகர்கள், திரை பிரபலங்கள் உள்ளிட்ட பலர் இந்த டீசரை பார்த்து வெகுவாக இயக்குனரை பாராட்டினார்கள்.
தற்போது படத்தின் பணிகள் அனைத்தையும் முடித்து தணிக்கை குழுவினருக்கு அனுப்பியுள்ளனர். படத்தை பார்த்த அதிகாரிகள் ‘யு’ சான்றிதழ் வழங்கி படக்குழுவினரை பாராட்டியுள்ளனர். தணிக்கையில் ‘யு’ சான்றிதழ் பெற்றது படக்குழுவினரை மகிழ்ச்சியில் ஆழ்த்தியுள்ளது.
திரையுலகினரிடையே அதிக எதிர்ப்பார்ப்பை ஏற்படுத்தி இருக்கும் ‘ஐங்கரன்’ திரைப்படத்தை வெகு விரைவில் வெளியிட படக்குழுவினர் முடிவு செய்துள்ளனர்.
