சென்னை:
தி.மு.க. தலைவர் கருணாநிதியின் 95-வது பிறந்தநாள் விழா நேற்று முன்தினம் கொண்டாடப்பட்டது. அதையொட்டி, பல்வேறு அரசியல் கட்சி தலைவர்கள் நேரில் சென்றும், தொலைபேசி மூலமாகவும், டுவிட்டரிலும் கருணாநிதிக்கு பிறந்தநாள் வாழ்த்து தெரிவித்தனர். அந்த வகையில், மத்திய மந்திரி பொன்.ராதாகிருஷ்ணனும் தொலைபேசி மூலமாக நேற்று முன்தினம் வாழ்த்து தெரிவித்து இருந்தார்.
எனினும், நேற்று இரவு 8.10 மணியளவில் பொன்.ராதாகிருஷ்ணன், சென்னை கோபாலபுரத்தில் உள்ள இல்லத்துக்கு சென்று கருணாநிதியை நேரில் சந்தித்தார். இந்த சந்திப்பின் போது, கருணாநிதியின் மகள் கனிமொழி எம்.பி. உடன் இருந்தார்.
சுமார் 20 நிமிடங்கள் அங்கு இருந்த பொன்.ராதாகிருஷ்ணன் வெளியில் வந்தபோது, நிருபர்களிடம் கூறியதாவது:-
தமிழகம் மட்டுமல்லாமல் இந்திய அளவில் மூத்த அரசியல்வாதி மட்டுல்லாமல் சிறந்த எழுத்தாளர், பேச்சாளர் போன்ற பல்வேறு சிறப்பு அம்சங்களை கொண்டவர் கருணாநிதி. நமது காலத்தில் வாழ்ந்து கொண்டு இருக்கும் மூத்த அரசியல் தலைவரான அவருக்கு நேற்று(நேற்று முன்தினம்) கேக் வெட்டி பிறந்தநாள் விழா கொண்டாடப்பட்டது.
அவருக்கு விரும்பி வாழ்த்து கூற வந்தேன். கடந்த முறையை விட இந்த முறை கருணாநிதியின் உடல் நிலையில் நல்ல முன்னேற்றம் காணப்படுகிறது. அவருடைய சந்தோஷத்தை தனது முகத்தில் காண்பித்தார்.
இவ்வாறு அவர் கூறினார்.
