நீங்கள் தேடியது "Dyeing factories"

திருப்பூர்:

திருப்பூரின் ஒட்டுமொத்த உற்பத்தி திறன் 35 ஆயிரம் கோடி ரூபாய் மதிப்பிலான ஏற்றுமதி என கணக்கிடப்பட்டது. அதன்படி பருத்தி நூலிழை ஆடை உற்பத்தியில் பெரும்பாலும் தன்னிறைவு அடைந்துவிட்டோம். அடுத்தகட்டமாக செயற்கை நூலிழை ஆடைகளுக்கு மாறியாக வேண்டிய நெருக்கடி உருவாகிவிட்டது.

சீனா, வங்கதேசம், வியட்நாம், கம்போடியா போன்ற நாடுகள் செயற்கை நூலிழை ஆடை உற்பத்தியில், இந்தியாவுக்கு சவாலாக இருக்கின்றன. அந்நாடுகளுடனான போட்டியை சமாளிக்க இந்தியாவும், திருப்பூர் பின்னலாடை தொழில்துறையினரும் செயற்கை நூலிழை ஆடை உற்பத்திக்கு மாற வேண்டியது காலத்தின் கட்டாயமாகிவிட்டது.

ஆடை உற்பத்தி நிறுவனங்கள் புதிய மாற்றத்துக்கு தயாராகிவிட்டன. அதற்காக நிட்டிங், சாய ஆலைகள், பிரின்டிங் ஆலைகளும் மாற்றத்துக்கு தயாராக வேண்டும். சில தனியார் சாய ஆலைகளும் புதிய தொழில்நுட்பத்தை சோதனை முறையில் செயல்படுத்த துவங்கிவிட்டன.ஆகமொத்தம் திருப்பூரின் எதிர்காலம் பருத்தி ஆடைகளில் மட்டும் இல்லை.செயற்கைநூலிழை ஆடை உற்பத்தியும் அவசியம் என்று அனைவரும் உணர்ந்துவிட்டனர்.

குறிப்பாக செயற்கை நூலிழை துணிகளுக்கு சாயமிடும் தொழில்நுட்பத்துக்கு மாற சாய ஆலைகள் தயாராகிவிட்டன. உற்பத்தி செலவு திருப்பூரில் அதிகம் என்பதால் வடமாநிலங்களில் இருப்பது போல் குறைந்த செலவில் சாயமிடும் தொழில்நுட்பத்தை கண்டறிய ஆர்வம் செலுத்தி வருகின்றன.அதற்காக வடமாநில சாய ஆலைகளில் கள ஆய்வு நடத்த திட்டமிடப்பட்டுள்ளது.

இது குறித்து திருப்பூர் சாய ஆலை உரிமையாளர் சங்க தலைவர் காந்திராஜன் கூறியதாவது:-

திருப்பூரில் செயற்கை நூலிழை துணிகளுக்கு சாயமிடுவது குறித்து விவாதித்தோம். அப்போது, வடமாநிலங்களில் குறைந்த கட்டணத்துக்கு சாயமிடுவதாகவும், திருப்பூர் தொழில்நுட்பத்தை மேம்படுத்த வேண்டுமெனவும் கருத்து தெரிவிக்கப்பட்டது.

ஜீரோ டிஸ்சார்ஜ் தொழில்நுட்பம் நீங்கலாக எந்த வகையில் உற்பத்தி செலவை குறைக்கலாம் என கண்டறிய வேண்டியது அவசியமாகியுள்ளது. அதற்காக, லூதியானா, சூரத் போன்ற வடமாநில தொழில் நகரங்களுக்கு சென்று நேரடியாக கலந்தாய்வு நடத்த திட்டமிட்டுள்ளோம்.

பொது சுத்திகரிப்பு நிலைய நிர்வாகிகள் அடங்கிய, தொழில்நுட்ப குழு அமைக்கப்பட்டுள்ளது. இக்குழுவினர், மே மாதம் வடமாநிலங்களுக்கு சென்று அங்குள்ள சாய ஆலைகளில் பின்பற்றும் தொழில்நுட்பங்கள் குறித்து கள ஆய்வு நடத்த இருக்கின்றனர். அதற்கான ஏற்பாடுகளை சாய ஆலை உரிமையாளர்கள் சங்கம் செய்து வருகிறது. இவ்வாறு அவர் கூறினார். 

திருப்பூர் :

திருப்பூரில் மாசுகட்டுப்பாடு வாரிய அனுமதி பெறாத, விதிமீறல் சாய ஆலை, பிரின்டிங் நிறுவனங்கள் எண்ணிக்கை நாளுக்குநாள் அதிகரித்து வருகிறது.நகர பகுதிகளில் குடோன், வீடுகளை வாடகைக்கு பெற்று சாய ஆலை, பிரின்டிங் நிறுவனங்களை இயக்குகின்றனர்.சுத்திகரிக்காத சாயக்கழிவுநீரை அருகில் செல்லும் சாக்கடை கால்வாய், நீர் நிலைகளில் திறந்து விடுகின்றனர்.

இதை ஆய்வு செய்ய மாசுகட்டுப்பாடு வாரிய மாவட்ட பொறியாளர் (வடக்கு) சரவணகுமார், பறக்கும்படை பொறியாளர் பழனிசாமி, உதவி சுற்றுச்சூழல் பொறியாளர் பாரதிராஜா உட்பட அதிகாரிகள் குழுவினர், பொதுமக்கள் அளித்த புகாரின் பேரில் விதிமீறல் நிறுவனங்கள் குறித்து ஆய்வு நடத்தினர். இதில் சாமுண்டிபுரத்தில் அருகருகே இயங்கிய இரண்டு பிரின்டிங் நிறுவனங்கள் சிக்கின. டேபிள் பிரின்டிங் எந்திரங்களை நிறுவியுள்ள இந்நிறுவனங்கள் மாசுகட்டுப்பாடு வாரியத்தில் அனுமதி பெறவில்லை.சுத்திகரிக்காத பிரின்டிங் கழிவுநீரை அருகில் உள்ள சாக்கடை கால்வாயில் திறந்துவிட்டுள்ளன.அதேபோல் கொங்கு மெயின் ரோடு, திருநீலகண்டபுரத்தில் அனுமதி பெறாமல் இயங்கிய சாய ஆலையும் பிடிபட்டது. எந்த அனுமதியும் பெறாத இந்த ஆலை 5 கிலோ கொள்ளளவுள்ள விஞ்ச் எந்திரத்தை நிறுவி, துணிக்கு சாயமேற்றியதோடு சாயக்கழிவுநீரை விதிமீறி வெளியே திறந்துவிட்டதும் தெரியவந்தது.

அனுமதி பெறாமல் இயங்கி சுற்றுச்சூழலை மாசுபடுத்திய 2 பிரின்டிங், ஒரு சாய ஆலையின் மின் இணைப்பு துண்டிக்க மாசுகட்டுப்பாடு வாரிய அதிகாரிகள் மாவட்ட நிர்வாகத்துக்கு பரிந்துரைத்தனர். ஒருங்கிணைப்புக்குழு தலைவரான கலெக்டர் வினீத் உத்தரவுப்படி, 3 நிறுவனங்களுக்கு வழங்கப்பட்டுள்ள மின் இணைப்பு துண்டிக்கப்பட்டது.