நீங்கள் தேடியது "elangovan"

சென்னை:

தமிழக காங்கிரசுக்குள் ஈ.வி.கே.எஸ். இளங்கோவன், கார்த்தி ப.சிதம்பரம் ஆகியோரது கருத்துக்களால் மோதல் வெடித்துள்ளது. இருவருக்கும் ஆதரவு மற்றும் எதிர்ப்பு குரல்கள் எழுந்துள்ளதால் கட்சியில் பரபரப்பு நிலவி வருகிறது.

புதுக்கோட்டையில் நடந்த காங்கிரஸ் ஊழியர்கள் கூட்டத்தில் கார்த்தி ப. சிதம்பரம் எம்.பி. பேசிய போது, கூட்டணியில் இருக்கிறோம் என்பதற்காக எந்த பிரச்சனையையும் கண்டு கொள்ளாமல் இருக்க கூடாது. மக்கள் பிரச்சனைகளை சுட்டிக் காட்ட வேண்டும். தேர்தலுக்காகத் தான் கூட்டணி. நமது பலத்தையும் நாம் நிரூபிக்க வேண்டும் என்றார்.

இதற்கு பதிலடி கொடுத்து முன்னாள் தலைவர் ஈ.வி.கே.எஸ். இளங்கோவன் கூறும்போது, `தி.மு.க. கூட்டணி இல்லாவிட்டால் கார்த்தி ப.சிதம்பரத்தால் டெபாசிட் கூட வாங்கி இருக்க முடியாது.

தேர்தலுக்கு முன்பு தனது கருத்தை சொல்லி இருக்க வேண்டியதுதானே? உள்ளாட்சி தேர்தலில் காங்கிரஸ் தொண்டர்கள் சிலருக்கு பதவி கிடைப்பதை தடுக்க பார்க்கிறார் என்று குற்றம் சாட்டினார்.

இளங்கோவன் கட்சியை அடகு வைக்க பார்க்கிறார் என்றும் கார்த்தி ப. சிதம்பரம் கூட்டணிக்கு வேட்டு வைக்கப் பார்க்கிறார் என்றும் தொண்டர்கள் காரசாரமாக விமர்சிக்கிறார்கள்.

இந்த மோதல் சமூக வலைத்தளங்களில் விசுவ ரூபம் எடுத்து வருகிறது. மாறி மாறி கருத்துக்களை பதிவிட்டு வருகிறார்கள்.

இந்த ஆதரவு மற்றும் எதிர்ப்பு குரல்களால் காங்கிரசில் பரபரப்பு நிலவுகிறது.

இந்த நிலையில் காங்கிரஸ் முன்னாள் தலைவர் கே.எஸ்.அழகிரியின் ஆதரவாளரும், மாநில துணை தலைவருமான பொன். கிருஷ்ணமூர்த்தி கார்த்தி சிதம்பரத்துக்கு எதிராக போர்க்கொடி தூக்கி இருக்கிறார். அவர் கூறியதாவது:-

பாராளுமன்ற தேர்தலில் தி.மு.க. 9 தொகுதிகளை வழங்கியபோது கூடுதலாக தாருங்கள் என கார்த்தி சிதம்பரம் ஏன் கேட்க வில்லை?

நெல்லை மாவட்ட காங்கிரஸ் தலைவர் ஜெயக்குமார் கொலை வழக்கில் குற்றவாளிகளை கண்டு பிடிக்கவில்லை என்று கூறும் கார்த்தி சிதம்பரம் முதல்வரை சந்தித்து வலியுறுத்தி இருக்கலாமே.

ஆளுங்கட்சி கூட்டணியில் இருந்து கொண்டு எதிர்கட்சி தலைவர் அண்ணாமலை கேட்கும் கேள்விகளை கார்த்தி கேட்பதில் லாபம் என்ன? காமராஜர் ஆட்சி அமைப் போம் என ஒரு வார்த்தை பேசிவிட்டு, கூட்டணி கட்சியை விமர்சித்து விட்டு மேடையை விட்டு இறங்கினால் காமராஜர் ஆட்சி அமைந்து விடுமா? காங்கிரஸ்தான் வளர்ந்து விடுமா? தி.மு.க. கூட்டணிக்கு வேட்டு வைக்கும் வகையில் பேசி வரும் கார்த்தி சிதம்பரம் மீது நடவடிக்கை எடுக்க வேண்டும் என்றார்.

இதேபோல் இளங்கோவன் ஆதரவாளரான மயிலை அசோக் கூறும்போது, கூட்டணி என்பதை விட நம் வலிமை என்ன என்பதையும் நாம் உணர வேண்டும். இளங்கோவனை இழிவாக பேசுவதை நிறுத்திக்கொள்ள வேண்டும் என்றார்.

காங்கிரஸ் பொது செயலாளர்களில் ஒருவரான விஜய இளஞ்செழியன் கூறியதாவது:-

எங்கள் கூட்டணியில் தி.மு.க.தான் பெரிய கட்சி என்பதில் மாற்றுக் கருத்து கிடையாது. அவர்கள் துணையோடுதான் வெற்றியும் பெற்றோம் என்பது உண்மை என்பதை சுட்டிக் காட்டிய கார்த்தி சிதம்பரம் அதே நேரம் இந்த வெற்றிக்கு காங்கிரசின் பங்களிப்பும் முக்கியம் என்பதை மறந்து விடக்கூடாது.

பா.ஜ.க.வுக்கு எதிராக சிறுபான்மையினரின் வாக்குகளை திரட்டிக் கொடுத்தது காங்கிரஸ் என்பதை மறுக்க முடியுமா? என்பதைதான் காங்கிரஸ் தொண்டர்கள் மத்தியில் கார்த்தி சிதம்பரம் பேசினார். அவர் பொதுக் கூட்டத்தில் பேசவில்லை. இந்த கருத்துக்களை ஊழியர்கள் கூட்டத்தில் பேசாமல் எங்கு பேசுவது? இந்த யதார்த்த நிலவரங்களை சொன்னால்தானே தொண்டர்கள் உற்சாகம் அடைவார்கள்.

தி.மு.க.வினர் காங்கிரசாரை மதிப்பதில்லை என்ற ஆதங்கம் எப்போதுமே இருப்பதுதான். 2021 சட்ட மன்ற தேர்தலில் தொகுதி பங்கீடு தொடர்பாக பேசச் சென்ற கே.எஸ். அழகிரி அறிவாலய வாசலிலேயே கண் கலங்கியது மறந்து விட்டதா?

தி.மு.க.வினர் மதிக்கவில்லை என்று தொண்டர்கள் மத்தியிலும் கண்கலங்கினாரே. அவ்வளவு ஏன், இதே இளங்கோவன் பொறுப்பில் இருந்தபோது நாங்கள் சந்தைமடமா நடத்துகிறோம். ஆட்சியில் பங்கு கேட்க எங்களுக்கு உரிமை இல்லையா என்று கேட்டவர்தானே.

இப்போது கார்த்தி சிதம்பரம் என்ன சொல்கிறார்? நாங்கள் எம்.பி., எம்.எல்.ஏ. ஆகிவிட்டோம். உள்ளாட்சி தேர்தலில் காங்கிரசை கை விட்டு விடக்கூடாது. கூடுதல் இடங்கள் கேட்டு வாங்க வேண்டும். தொண்டர்கள் நிறைய பேருக்கு வாய்ப்பு கிடைக்க வேண்டும். அதற்கு நாம் ஒற்றுமையாக உழைக்க வேண்டும். நமது பலத்தை கூட்ட வேண்டும் என்று தானே கூறுகிறார். இதில் என்ன தவறு இருக்கிறது?

காங்கிரசை வளர்க்கவும் கூடாது. உரிமைகளை கேட் கவும் கூடாது என்று நினைக்கும் இளங்கோவனை போன்றவர்களால்தான் தருவதை பெறும் நிலையில் காங்கிரஸ் இருக்கிறது என்றார்.

காங்கிரஸ் துணைத் தலைவர் இமயா கக்கன் கூறியதாவது:-

டெபாசிட் வாங்க முடியாது என்றால் என்ன காரணம்? கட்சி பலமில்லை என்பது தானே. எனவே கட்சியை பலப்படுத்த வேண்டும் என்ற கார்த்தியின் கருத்திலும் தப்பில்லை.

கூட்டணியை கலந்துதான் பல செயல்கள் செய்ய வேண்டி இருப்பதால் கட்சியை வளர்ப்பதில் தொய்வு ஏற்படுகிறது. தேர்தல் நேரத்தில் கூட்டணிக்கு கை கொடுப்போம். அது லட்சியத்தை அடைய உதவும். மற்ற நேரங்களில் காங்கிரசை வளர்க்க வேண்டும். பலப்படுத்த வேண்டும்.

2014 தேர்தலில் தனித்து நின்ற தி.மு.க.வும் வெற்றி பெற முடியவில்லை. காங்கிரசும் வெற்றி பெற முடியவில்லை. இதுதான் கட்சிகளின் நிலை என்பதை மறந்து விடக்கூடாது.

சென்னை:

ஈரோடு கிழக்கு தொகுதியில் தி.மு.க. கூட்டணி வேட்பாளராக களம் இறங்கும் காங்கிரஸ் வேட்பாளர் ஈ.வி.கே.எஸ். இளங்கோவனுக்கு மக்கள் நீதி மய்யம் கட்சி தலைவர் கமல்ஹாசன் ஆதரவு தெரிவித்தள்ளார்.

கடந்த 2018-ம் ஆண்டு மக்கள் நீதி மய்யம் கட்சியை தொடங்கிய கமல்ஹாசன், பாராளுமன்ற தேர்தல், சட்டமன்ற தேர்தல், உள்ளாட்சி தேர்தல் என அனைத்து வகையான தேர்தல்களையும் சந்தித்து விட்டார். ஆனால் வெற்றி என்பது எட்டாக்கனியாகவே இருந்து வருகிறது.

கட்சி தொடங்கப்பட்டு 5 ஆண்டுகள் ஆகும் நிலையில் மக்கள் நீதி மய்யம் கட்சி வருகிற பாராளுமன்ற தேர்தலை மனதில் வைத்து காய் நகர்த்தி வருகிறது. காங்கிரஸ் கூட்டணியில் இடம்பெறும் வகையில் அக்கட்சியின் செயல்பாடுகள் அமைந்துள்ளன. தனித்து போட்டியிட்டு மக்கள் மத்தியில் சொல்லிக்கொள்ளும்படி வாக்கு சதவீதத்தை பெற்றிருக்கும் கமல்ஹாசனின் கவனம் கூட்டணி அரசியலை நோக்கி நகர்ந்து உள்ளது.

இதை தொடர்ந்தே ஈரோடு கிழக்கு தொகுதியில் காங்கிரஸ் வேட்பாளர் ஈ.வி.கே.எஸ். இளங்கோவனுக்கு அவர் ஆதரவு தெரிவித்து உள்ளார்.

இது தொடர்பான அறிவிப்பை நேற்று வெளியிட்ட கமல்ஹாசன், ஈரோடு கிழக்கு தொகுதியில் காங்கிரஸ் வேட்பாளர் வெற்றி பெறுவதற்கு தேவையான உதவிகள் மக்கள் நீதி மய்யம் கட்சி நிச்சயம் செய்யும் என்று தெரிவித்தார்.

ஈரோடு கிழக்கு தொகுதி மக்கள் நீதி மய்யம் கட்சி தேர்தல் பொறுப்பாளராக நிர்வாக குழு உறுப்பினரான அருணாசலம் நியமிக்கப்பட்டு உள்ளார். இன்னும் 2 நாட்களில் தேர்தல் பணிக்குழு அமைக்கப்பட உள்ளது. தேர்தல் பொறுப்பாளரான அருணாசலம் தலைமையின் கீழ் இந்த தேர்தல் பணிக்குழு செயல்படும்.

இதை தொடர்ந்து ஈரோடு கிழக்கு தொகுதியில் பிரசார வியூகங்களை பிரம்மாண்டமாக மேற்கொள்ள அருணாசலம் தலைமையிலான குழுவினர் முடுக்கி விட்டுள்ளனர்.

ஈ.வி.கே.எஸ். இளங்கோவனை ஆதரித்து ஈரோடு கிழக்கு தொகுதியில் கமல்ஹாசன் தீவிர பிரசாரத்தில் ஈடுபட உள்ளார். பிப்ரவரி முதல் அல்லது 2-வது வாரத்தில் பிரசாரத்தை தொடங்க கமல் திட்டமிட்டு உள்ளார்.

வீதி, வீதியாக சென்று பிரசாரம் செய்ய உள்ள கமல்ஹாசன் ஈரோட்டில் நடக்கும் பொதுக்கூட்டத்திலும் பங்கேற்கிறார்.

கடந்த சட்டமன்ற தேர்தலில் ஈரோடு கிழக்கு தொகுதியில் போட்டியிட்ட மக்கள் நீதி மய்யம் கட்சி 10 ஆயிரம் வாக்குகளை பெற்றிருந்தது. காங்கிரஸ் வேட்பாளரான திருமகன் ஈ.வே.ரா. சுமார் 9 ஆயிரம் வாக்குகள் வித்தியாசத்திலேயே வெற்றி பெற்றிருந்தார். இந்த முறை கமல் கட்சியின் ஓட்டுகள் ஈ.கே.எஸ். இளங்கோவனுக்கு கிடைக்கும் என்பதால் அவர் கூடுதல் ஓட்டுகள் வித்தியாசத்தில் வெற்றி பெறுவார் என்று மக்கள் நீதி மய்யம் கட்சி நிர்வாகிகள் நம்பிக்கை தெரிவித்து உள்ளனர்.

ஆண்டிப்பட்டி:

தேனி பாராளுமன்ற தொகுதி காங்கிரஸ் வேட்பாளர் இ.வி.கே.எஸ்.இளங்கோவன் இன்று ஆண்டிப்பட்டியில் நிருபர்களுக்கு பேட்டி அளித்தார். அப்போது அவர் கூறியதாவது:-

தேனி பாராளுமன்ற தொகுதிக்கான தேர்தல் பலவித சர்ச்சைகளுக்கு பிறகு முடிவடைந்தது. ஆனால் யாரும் எதிர்பார்க்காத வகையில் 2 வாக்குச்சாவடி மையத்திற்கு மறுவாக்குப்பதிவு நடத்த தேர்தல் ஆணையம் உத்தரவிட்டுள்ளது.

இதனை எந்த கட்சிகளும் விரும்ப வில்லை. துணை முதல்வர் ஓ.பன்னீர்செல்வம் வாரணாசி சென்று பிரதமர் மோடியிடம் கோரிக்கை வைத்துள்ளார். தனது மகனை எப்படியாவது டெபாசிட் தொகையாவது வாங்கச் செய்ய வைக்க வேண்டும் என தெரிவித்துள்ளார். அவரது கோரிக்கையை ஏற்றே தற்போது இங்கு மறுதேர்தல் நடத்தப்படுகிறது.

இறுதிகட்ட தேர்தல் நடந்து வரும் நிலையில் மோடி 20 மணி நேரத்துக்கு மேலாக குகையில் அமர்ந்து தியானம் செய்து வருகிறார். அவர் குகையிலேயே இருப்பதுதான் இனி நாட்டு மக்களுக்கு நல்லது.

வருகிற 23-ந் தேதி வாக்கு எண்ணிக்கைக்கு பிறகு நல்ல தீர்ப்பு கிடைக்கும். இந்தியாவில் ராகுல்காந்தி அடுத்த பிரதமராக பதவி ஏற்பார். தமிழகத்தில் மு.க.ஸ்டாலின் முதல்-அமைச்சராக பதவி ஏற்பார். இந்த மாற்றத்தை எதிர்பார்த்துதான் தமிழகத்திலும் இந்தியாவிலும் மக்கள் வாக்களித்து வருகின்றனர்.

இவ்வாறு அவர் கூறினார்.

சென்னை:

தமிழகத்தில் 13 வாக்குச் சாவடிகளில் மறுவாக்குப்பதிவு நடைபெறும் என்று தேர்தல் ஆணையம் அறிவித்துள்ளது. இதில் தேனி பாராளுமன்ற தொகுதிக்கு உட்பட்ட 2 வாக்குச்சாவடிகளும் அடங்கும். இந்த தொகுதியில் கங்கிரஸ் சார்பில் போட்டியிடும் ஈ.வி.கே.எஸ். இளங்கோவன் மாவட்ட தேர்தல் அதிகாரியான கலெக்டரை சந்தித்து ஒரு மனு கொடுத்துள்ளார்.

அதில் வாக்கு எண்ணிக்கைக்கு இன்னும் சில நாட்களே உள்ள நிலையில் தேனி தொகுதியில் எந்த வாக்குச்சாவடியிலும் மறுவாக்குப் பதிவு தேவையில்லை என்று குறிப்பிட்டுள்ளார்.

தேர்தல் ஆணைய வழிகாட்டுதலில் குறிப்பிட்டுள்ள விதிமுறைகளின் படி பயன்படுத்தப்பட்ட அல்லது பயன்படுத்தப்படாத எந்த வாக்குப்பதிவு இயந்திரத்தையும் ஒரு இடத்தில் இருந்து மற்றொரு இடத்திற்கு இடமாற்றம் செய்ய வேண்டுமானால் போட்டியிடும் வேட்பாளர்கள் அல்லது தலைமை தேர்தல் முகவர்களுக்கு கண்டிப்பாக தகவல் அளிக்க வேண்டும்.

தகவல் அளிக்கவில்லை என்றால் அது சட்ட விரோதம் என தெளிவாக குறிப்பிடப்பட்டுள்ளது. இதை ஏன் மாவட்ட தேர்தல் நிர்வாகம் கடைபிடிக்க வில்லை. தேர்தலில் போட்டியிட்ட யாரும் மறு வாக்குப்பதிவு கோரிக்கை வைக்காத நிலையில் தன்னிச்சையாக மறு வாக்குப்பதிவு நடத்த தேர்தல் ஆணையம் முயற்சிப்பது யாருடைய நிர்பந்தத்தால் என்ற கேள்வி எழுகிறது.

தேர்தல் வாக்குப்பதிவு நடைபெற்று இத்தனை நாட்களுக்கு பிறகு மறுவாக்குப்பதிவு என்பது இதுவரை இல்லாத நடைமுறை என்பது அனைவரும் அறிந்ததே! மதசார்பற்ற கூட்டணி வேட்பாளர்களின் வெற்றி வாய்ப்பு பிரகாசமாக உள்ள நிலையில் அதிகார மையத்தில் உள்ளவர்களின் கைப்பாவையாக தேர்தல் ஆணையம் செயல்படுகிறதோ என்ற அச்சம் எழுகிறது. ஆக உள்நோக்கத்தோடு செயல்படவில்லை என்பதை நிரூபிக்க வேண்டிய பொறுப்பு தேர்தல் ஆணையத்துக்கு உள்ளது.

இவ்வாறு அவர் கூறினார். #elangovan #congress #electioncommission

பேரையூர்:

தி.மு.க. கூட்டணி சார்பில் தேனி பாராளுமன்ற தொகுதியில் காங்கிரஸ் கட்சி சார்பில் ஈ.வி.கே.எஸ்.இளங்கோவன் போட்டியிடுகிறார்.

இவர் தொகுதிக்குட்பட்ட மதுரை மாவட்டம் உசிலம்பட்டி, சேடப்பட்டி மற்றும் சுற்றுவட்டார கிராமங்களில் பிரசாரம் மேற்கொண்டார்.

அப்போது அவர் பேசியதாவது:-

தேர்தலில் வெற்றி பெற வேண்டும் என ஆளும் கட்சியினர் ரூ.500 கொடுத்து வருகிறார்கள். அதை வாங்காதீர்கள். அதற்கு பதிலாக ஓ.பி.எஸ்.மகனிடம் ரூ.5 ஆயிரம் கொடுங்கள் என கேளுங்கள். அவர்கள் கொடுக்கும் பணம் உங்களை ஏமாற்றி கோடி கோடியாய் கொள்ளையடித்தது தான்.

இத்தனை நாள் உங்களை எப்படி எல்லாம் ஏமாற்றி இருக்கிறார்கள். எனவே ஆளும் கட்சியிடம் பணத்தை வாங்கிக்கொண்டு அவர்களுக்கு நாமம் போடுங்கள்.

பணம் வாங்கி கொண்டு கை சின்னத்தில் வாக்களித்து என்னை வெற்றி பெற செய்யுங்கள். நான் வென்றால் தொகுதியில் அடிப்படை வசதிகள் அனைத்தையும் உடனே செய்து கொடுப்பேன்.

இவ்வாறு அவர் பேசினார். #LokSabhaElections2019 #Elangovan

சென்னை:

காங்கிரஸ் போட்டியிடும் 10 தொகுதிகளுக்கும் விருப்ப மனு கொடுப்பது இன்றுடன் முடிவடைகிறது. கடைசி நாளான இன்று ஏராளமானோர் மனு கொடுத்தனர். தமிழ்நாட்டில் காங்கிரசுக்கு 9 தொகுதிகள் ஒதுக்கப்பட்டுள்ளது. என்றாலும் திருவள்ளூர், கன்னியாகுமரி ஆகிய 2 தொகுதிகளுக்கு மட்டும் தான் போட்டியிட வாய்ப்பு கேட்டு அதிக எண்ணிக்கையில் மனு கொடுத்துள்ளனர்.

கன்னியாகுமரி தொகுதியில் போட்டியிட ராபர்ட் புரூஸ், பொன்ராபட்சிங், ரூபிமனோகரன், வசந்த குமார் எம்.எல்.ஏ., முன்னாள் எம்.பி. ராமசுப்பு, ஊர்வசி அமிர்தராஜ், அசோகன், சாலமன், அனீசா பிரைட் உள்பட 26 பேர் மனு செய்துள்ளனர்.

இதே போல் திருவள்ளூர் தொகுதிக்கும் கடும் போட்டி உள்ளது. இதுமட்டும்தான் தனி தொகுதி என்பதால் இதற்கும் கடும் போட்டி இருக்கிறது. முன்னாள் எம்.பி.க்கள் விஸ்வநாதன், ராணி, முன்னாள் எம்.எல்.ஏ. செல்வப்பெருந்தகை, விக்டரி ஜெயக்குமார், ரஞ்சன் குமார், ஜான்சிராணி, ஜெயக்குமார் உள்பட 10 பேர் மனு கொடுத்துள்ளனர்.

முன்னாள் மாநில தலைவர் இளங்கோவன் ஈரோடு தொகுதியில் போட்டியிடுவார் என்று எதிர் பார்க்கப்பட்டது. ஆனால் அந்த தொகுதி ம.தி.மு.க.வுக்கு ஒதுக்கப்பட்டுள்ளது. அவர் எந்த தொகுதியில் போட்டியிடுவார் என்று தெரிய வில்லை.

இந்த நிலையில் அவர் கிருஷ்ணகிரி தொகுதியில் போட்டியிட வலியுறுத்தி அந்த மாவட்டத்தை சேர்ந்த முன்னாள் மாவட்ட தலைவர்கள் 3 பேர் மற்றும் அகில இந்திய காங் கமிட்டி உறுப்பினர் ரகு உள்பட பலர் மனு கொடுத்தனர்.

தேனி தொகுதியில் இளங்கோவன் போட்டியிடுவதற்காக சென்னையை சேர்ந்த சிவராமன், ரங்க பாஷ்யம், நாஞ்சில் பிரசாத் ஆகியோர் மனு கொடுத்தனர். இதுபோல் விருதுநகர், கரூர், திருச்சி ஆகிய தொகுதிகளில் அவர் போட்டியிடவும் மனு கொடுத்துள்ளனர்.

ஆரணி தொகுதியில் போட்டியிட முன்னாள் எம்.எல்.ஏ. அருள் அன்பரசு, கரூர் தொகுதிக்கு ஜோதிமணி, திருச்சிக்கு பட்டுக்கோட்டை ராஜேந்திரன் உள்பட பலர் மனு கொடுத்தனர்.

திருச்சி தொகுதியில் போட்டியிட முன்னாள் காங்கிரஸ் தலைவர் திருநாவுக்கரசர் பெயரில் அவருடைய மகன் ராமசந்திரன், மனு கொடுத்தார். இதே தொகுதியில் போட்டியிட நடிகை குஷ்பு பெயரில் காங்கிரஸ் கலைப்பிரிவு மாநில துணை தலைவர் மயிலை அசோக்குமார் மனு கொடுத்தார். இன்று மாலைவரை மனுக்கள் பெறப்பட்டன.  #kushboo #elangovan #parliamentelection

திருச்செங்கோடு:

நாமக்கல் மாவட்டம் திருச்செங்கோட்டில் தமிழக காங்கிரஸ் கட்சியின் முன்னாள் தலைவர் ஈ.வி.கே.எஸ். இளங்கோவன் நிருபர்களுக்கு பேட்டி அளித்தார். அப்போது அவர் கூறியதாவது:-

அ.தி.மு.க. கூட்டணியில் மோடியும் இருக்கிறார். ஜூனியர் மோடியான ராமதாசும் இருக்கிறார். பல வகையில் மோடியும், ராமதாசும் ஒரே மாதிரியான ஆட்கள் தான். மோடி எப்படி வாக்குறுதிகளை தந்து அதில் ஒன்றைக் கூட நிறைவேற்றவில்லையோ, அதே போல் டாக்டர் ராமதாசும் பல வாக்குறுதிகளை தந்திருக்கிறார். நாங்கள் பதவிக்கு வந்தால் எங்கள் குடும்பத்தை சேர்ந்த யாருக்கும் பதவி தர மாட்டோம், அப்படி செய்தால் என்னை சவுக்கால் அடியுங்கள் என்று சவுக்கை கூட காண்பித்தார். அ.தி.மு.க.வோடு எப்போதும் கூட்டு சேர மாட்டோம், அவர்கள் ஊழல்வாத கட்சி என்று கூறினார்.

இன்று எப்படி மோடி வாக்குறுதிகளை கொடுத்து மக்களை ஏமாற்றினாரோ அதே போல் ராமதாஸ் வாக்குறுதிகளை மறந்து மக்களை ஏமாற்றி அ.தி.மு.க.வுடன் கூட்டணி வைத்துள்ளார். நிச்சயமாக இந்த கூட்டணி நடைபெற உள்ள தேர்தலில் பெரிய அளவில் தோல்வியடையும். அ.தி.மு.க. தனியாக நின்றால் கூட அனேகமாக டெபாசிட்டாவது பெற முடியும். ஆனால் பா.ஜ.க.வோடும், பா.ம.க.வோடும் சேர்ந்த காரணத்தால் அந்த அணி டெபாசிட் கூட வாங்க முடியாது. காங்கிரஸ் கூட்டணி ஏற்கனவே பலமாக உள்ளது. மதசார்பற்ற தன்மையில் நம்பிக்கை உள்ளவர்கள் யார் வந்தாலும் மு.க.ஸ்டாலின் அதை பரிசீலித்து ஏற்றுக்கொள்வார்.

இவ்வாறு அவர் கூறினார். #Elangovan #Ramadoss

ஆம்பூர்:

வாணியம்பாடியில் திருமண நிகழ்ச்சிக்கு செல்லும் வழியில் ஆம்பூரில் காங்கிரஸ் கட்சி முன்னாள் மாநில தலைவர் ஈ.வி.கே.எஸ்.இளங்கோவன் நிருபர்களுக்கு பேட்டி அளித்தார். அப்போது அவர் கூறியதாவது:-

மக்களுக்கு தந்த வாக்குறுதிகளை நிறைவேற்றாத காரணத்தால் மோடியை தோற்கடிக்க வேண்டும் என்று எதிர்க்கட்சிகள் எல்லாம் ஒன்றாக சேர்ந்து பெரிய முயற்சி எடுத்து இருக்கின்றனர். முயற்சியின் பலனாக கொல்கத்தாவில் மாபெரும் பொதுக்கூட்டம் நடைபெற்றுள்ளது.

அதில் காங்கிரஸ், தி.மு.க. உள்பட அனைத்து எதிர்க்கட்சி தலைவர்களும் பேசியிருக்கின்றனர். இது நல்ல தொடக்கம் என்று நினைக்கிறேன். தேர்தல் வருவதற்குள் இது ஒரு வலிமையான கூட்டணியாக அமையும்.

எப்போது தேர்தல் வந்தாலும் அதனை எதிர்கொள்ள காங்கிரஸ் தயாராகவே இருக்கிறது. தேர்தலில் மோடி தோற்கடிக்கப்படுவார். காங்கிரஸ் கூட்டணி வெற்றி பெறும். காங்கிரஸ் ஆட்சி செய்யும் மாநிலங்களில் பா.ஜ.க. ஆட்சியை பிடிக்க அதிகாரத்தையும், பணபலத்தையும் உபயோகப்படுத்தி குழப்பம் ஏற்படுத்துகிறது. ஆனால் காங்கிரஸ் ஆட்சி கலையாது.

தமிழகத்தில் வரப்போகும் பாராளுமன்ற தேர்தலில் தி.மு.க. கூட்டணியில்தான் காங்கிரஸ் போட்டியிட உள்ளது. இதில் தி.மு.க.- காங்கிரஸ் கூட்டணி அமோக வெற்றி பெறும்.

இவ்வாறு அவர் கூறினார். #elangovan #dmk #congress #parliamentelection

ஈரோடு:

ஈரோடு காங்கிரஸ் முதலாவது மண்டல வாக்குச்சாவடி முகவர்களுக்கான ஆலோசனை கூட்டம் நடந்தது. கூட்டத்துக்கு முதலாவது மண்டல தலைவர் அயுப்அலி தலைமை தாங்கினார்.

அகில இந்திய காங்கிரஸ் கட்சியின் செயலாளர் சஞ்சய்தத் முன்னிலை வகித்தார். முன்னாள் தமிழக காங்கிரஸ் தலைவர் ஈ.வி.கே.எஸ். இளங்கோவன், பொதுச்செயலாளர் அருள் பெத்தையா ஆகியோர் ஆலோசனை வழங்கினர்.

பின்னர் ஈ.வி.கே.எஸ். இளங்கோவன் நிருபர்களிடம் கூறியதாவது:-

எச்.ஐ.வி.தோற்று உள்ள ரத்தம் கர்ப்பிணிப் பெண்ணுக்கு செலுத்தப்பட்டது போல் வேறு சில பெண்களுக்கும் செலுத்தப்பட்டுள்ளதாக தகவல் வெளிவருகின்றன. ஆனால் இந்நாள் வரை சுகாதாரத் துறை அமைச்சர் பாதிக்கப்பட்ட பெண்ணை சந்தித்து பேச வில்லை.

இந்த வி‌ஷயத்தில் அவர் அலட்சியமாக செயல்படுகிறார். எடப்பாடி பழனிசாமி தலைமையிலான அமைச்சர்கள் தங்கள் மீதுள்ள ஊழல் குற்றச்சாட்டுகள் வெளியே தெரிந்து விடக்கூடாது என்பதற்காக மத்திய அரசையும், மத்திய மந்திரிகளையும் நேரில் சந்தித்து பேசி வருகின்றனர்.

கஜா புயல் நிவாரணத்திற்காகவோ, தமிழக மக்கள் நலனுக்காகவோ அவர்கள் சந்திக்கவில்லை. தேசிய அளவில் விவசாயிகள் பல்வேறு பிரச்சினைக்காக போராடி வருகிறார்கள். ஆனால் மத்திய அரசோ மாநில அரசோ அவர்களை கண்டு கொள்ளவில்லை.

தமிழகத்தில் தற்போது உயர் மின் கோபுரங்களுக்கு எதிராக விவசாயிகள் போராட்டம் நடத்தி வருகிறார்கள். போராட்டம் நடத்தி வரும் விவசாயிகளை தமிழக அரசு சார்பில் அதிகாரிகளோ அமைச்சர்களோ நேரில் சந்தித்து இதுவரை பேசவில்லை.

ஆனால் காங்கிரஸ் விவசாயிகள் மீது எப்போதும் அக்கறை கொண்டுள்ளது. சத்தீஸ்கர், மத்தியபிரதேசம், ராஜஸ்தான் ஆகிய 3 மாநிலங்களிலும் காங்கிரஸ் ஆட்சி அமைத்தவுடன் விவசாய பயிர் கடன்களை தள்ளுபடி செய்துள்ளது.

ஆனால் 4½ ஆண்டுகளாக ஆட்சி செய்த பிரதமர் மோடி இதுவரை விவசாயிகளுக்காக செய்தது என்ன? 41 முறை அவர் வெளிநாடுகளுக்கு பயணம் செய்துள்ளார். இதன்மூலம் ரூ. 2,500 கோடி வரை செலவாகியுள்ளது.

வரும் பாராளுமன்ற தேர்தலில் பாரதீய ஜனதா நிச்சயம் அதற்கான விளைவுகளை சந்திக்கும். பாரதீய ஜனதாவையும் பிரதமர் மோடியையும் மக்கள் நிராகரிப்பார்கள் பாரதீய ஜனதா படுதோல்வி அடையும்.

இவ்வாறு அவர் கூறினார். #elangovan #parliamentaryelection #pmmodi

ஈரோடு:

தமிழக காங்கிரஸ் கட்சி யின் முன்னாள் தலைவர் ஈ.வி.கே.எஸ். இளங்கோவனின் பிறந்தநாள் விழா ஈரோட்டில் நடந்தது. பல்வேறு அரசியல் கட்சிகளை சேர்ந்த பிரமுகர்கள் இளங்கோவனை நேரில் சந்தித்து வாழ்த்து தெரிவித்தனர்.

நிகழ்ச்சியில் ஈ.வி.கே.எஸ். இளங்கோவன் பேசியதாவது:-

இன்று எனக்கு மிகவும் விசே‌ஷமான நாள். ஏனென்றால் சமீபத்தில் நடந்து முடிந்த தேர்தலில் காங்கிரஸ் மூன்று மாநிலங்களில் ஆட்சி அமைத்துள்ளது.

இது ராகுல் காந்தியின் தலைமைக்கு கிடைத்த வெற்றி ஆகும். ராகுல் காந்தியைப் பார்த்து பொடிப் பையன் என்று எள்ளி நகையாடுபவர்களுக்கு அவர் மரண அடி கொடுத்து 3 மாநிலங்களில் காங்கிரஸ் ஆட்சி அமைக்க உறுதுணையாக இருந்துள்ளார்.

இதன்மூலம் ராகுல்காந்தி மக்களின் நம்பிக்கையை பெற்றுள்ளார். ஆளும் மத்திய அரசு மீது மக்கள் அதிருப்தியில் உள்ளனர். அவர்கள் கொடுத்த வாக்குறுதியை எப்போதும் நிறைவேற்றியதில்லை .

கடந்த பாராளுமன்ற தேர்தலில் ஒவ்வொருவர் வங்கிக்கணக்கில் ரூ. 15 லட்சம் போடுவதாக வாக்குறுதி அளித்தனர். ஆனால் அந்த வாக்குறுதி என்னவாயிற்று?

எனவே இந்த சூழ்நிலையை நாம் சரியாக பயன்படுத்தி கொள்ள வேண்டும். வரும் பாராளுமன்றத்தேர்தலுக்கு இப்போதே நாம் தயாராக இருக்க வேண்டும் .

நிச்சயமாக தி.மு.க.- காங்கிரஸ் கூட்டணி 100 சதவீதம் வெற்றி பெறும். 

இவ்வாறு இளங்கோவன பேசினார். 

பின்னர் அவர் நிருபர்களிடம் கூறியதாவது:-

வரும் பாராளுமன்ற தேர்தலில் வெற்றி பெற்று மத்தியில் காங்கிரஸ் ஆட்சி அமைப்பது உறுதி. ராகுல் காந்தி பிரதமர் ஆவதை யாராலும் தடுக்க முடியாது.

தமிழகத்தில் தி.மு.க.- காங்கிரஸ் கூட்டணி வெற்றி பெறுவது உறுதியாகிவிட்டது. தொகுதி பங்கீடு, வேட்பாளர் குறித்து கட்சி மேலிடம் முடிவு செய்யும். கட்சி மேலிடம் விரும்பினால் பாராளுமன்ற தேர்தலில் நான் எந்த தொகுதியிலும் போட்டியிட தயாராக இருக்கிறேன்.

இவ்வாறு அவர் கூறினார். #evkselangovan #parliamentelection