புதுடெல்லி:
ஹோன்டா கார்ஸ் நிறுவனத்தின் ஜாஸ் எலெக்ட்ரிக் வேரியன்ட் சர்வதேச சந்தையில் வெளியிட திட்டமிட்டு வருகிறது. இதுகுறித்து வெளியாகி இருக்கும் தகவல்களில் புதிய எலெக்ட்ரிக் வேரியன்ட் 2020-ம் ஆண்டு வாக்கில் அறிமுகம் செய்யப்படலாம் என கூறப்படுகிறது.
புதிய எலெக்ட்ரிக் ஜாஸ் மாடல் முதற்கட்டமாக சீனாவில் வெளியிடப்பட்டு அதன் பின் சர்வதேச சந்தைகளில் 2020-ம் ஆண்டு வாக்கில் வெளியிடப்பட இருப்பதாக தகவல் வெளியாகியுள்ளது.
ஹோன்டா ஜாஸ் எலெக்ட்ரிக் மாடல் ஒருமுறை சார்ஜ் செய்தால் 300 கிலோமீட்டர் வரை செல்லும் திறன் கொண்டிருக்கும் என கூறப்படுகிறது. பானாசோனிக் மற்றும் ஜிஎஸ் யுவாசா நிறுவனங்கள் தயாரிக்கும் பேட்டரிகளை ஹோன்டா பயன்படுத்துகிறது. இரு நிறுவனங்கள் தயாரிக்கும் பேட்டரிகள் ஆம்ப்ரெக்ஸ் தொழில்நுட்பம் சார்ந்து உருவாக்கப்படுகிறது.
புதிய எலெக்ட்ரிக் மாடல் தற்போதைய ஜாஸ் போன்று காட்சியளிக்குமா அல்லது புதிய வடிவமைப்பை கொண்டிருக்குமா என்பது குறித்து எவ்வித தகவலும் இல்லை. சமீபத்தில் ஹோன்டா நிறுவனம் HR-V எஸ்யுவி சார்ந்த புதிய எலெக்ட்ரிக் வாகனத்தை அறிமுகம் செய்திருந்தது. பீஜிங் மோட்டார் விழாவில் அறிமுகம் செய்யப்பட்ட எஸ்யுவி எலெக்ட்ரிக் மாடல் இந்த ஆண்டு சீனாவில் விற்பனைக்கு வருகிறது.
தற்சமயம் ஹோன்டா நிறுவனத்தின் ஒரு எலெக்ட்ரிக் மாடல் மட்டுமே சர்வதேச சந்தையில் விற்பனை செய்யப்படுகிறது. இந்த மாடல் அமெரிக்காவில் மட்டும் விற்பனை செய்யப்படுகிறது. இந்த மாடலில் 25.5kWh பேட்டரி வழங்கப்பட்டுள்ளது, இது 129 பிஹெச்பி பவர் மற்றும் 300 என்எம் டார்கியூ செயல்திறன் கொண்டுள்ளது.
சீனாவில் ஹோன்டா எலெக்ட்ரிக் கார் விலை 24,000 டாலர்கள் (இந்திய மதிப்பில் ரூ.16.36 லட்சம்) வரை நிர்ணயம் செய்யப்படலாம் என எதிர்பார்க்கப்படுகிறது. மேலும் ஒவ்வொரு ஆண்டும் சுமார் 10,000 ஹோன்டா ஜாஸ் எலெக்ட்ரிக் மாடல்களை விற்பனையாகும் என ஹோன்டா எதிர்பார்ப்பதாக கூறப்படுகிறது.
