புதுடெல்லி:
மேற்கு வங்காளம் மாநிலத்தில் நடந்த பாராளுமன்ற தேர்தலில் ஆளும் மம்தா பானர்ஜி தலைமையிலான திரிணாமுல் காங்கிரஸ் மிகப்பெரிய சரிவை சந்தித்தது. யாரும் எதிர்பாராத வகையில் பாஜக அதிக இடங்களை பிடித்துள்ளது.
இந்நிலையில், திரிணாமுல் காங்கிரஸ் கட்சியை சேர்ந்த எம்.எல்.ஏ.க்கள் சுப்ரான்ஷு ராய், துஷார்காந்தி பட்டாச்சார்ஜீ மற்றும் மா.கம்யூனிஸ்ட் கட்சியை சேர்ந்த எம்.எல்.ஏ. தேவேந்திர ராய் என மொத்தம் மூன்று மேற்கு வங்காளம் மாநில சட்டசபை உறுப்பினர்கள் நேற்று பாஜகவில் இணைந்தனர்.
டெல்லியில் உள்ள பாஜக தலைமை அலுவலகத்தில் நடைபெற்ற நிகழ்ச்சியில் மேற்கு வங்காளம் மாநிலத்தில் உள்ள பல்வேறு நகராட்சிகளை சேர்ந்த 50-க்கும் அதிகமான கவுன்சிலர்களும் பாஜகவில் இணைந்தனர்.
இந்த இணைப்பு நிகழ்ச்சியில் பாஜக தேசிய பொதுச்செயலாளர் கைலாஷ் விஜய்வார்கியா, மேற்கு வங்காளத்தை சேர்ந்த அக்கட்சியின் மூத்த தலைவர்களில் ஒருவரான முகுல் ராய் உள்ளிட்டோர் பங்கேற்றனர்.
அப்போது செய்தியாளர்களுக்கு பேட்டியளித்த கைலாஷ் விஜய்வார்கியா, ‘மேற்கு வங்காளத்துக்கு பாராளுமன்ற தேர்தல் 7 கட்டங்களாக நடந்ததுபோல் பாஜகவில் இணையும் விழாக்களும் 7 கட்டங்களாக நடக்கப் போகிறது. இன்று (நேற்று) வெறும் முதல் கட்டம்தான் முடிந்திருக்கிறது’ என்று குறிப்பிட்டிருந்தார்.
அதற்கேற்ப, டெல்லியில் உள்ள பாஜக தலைமை அலுவலகத்தில் திரிணாமுல் காங்கிரஸ் கட்சியை சேர்ந்த மற்றொரு எம்.எல்.ஏ.வான மனிருல் இஸ்லாம் இன்று கைலாஷ் விஜய்வார்கியா இன்று முன்னிலையில் பாஜகவில் இணைந்தார்.
அவருடன் திரிணாமுல் காங்கிரஸ் கட்சியை சேர்ந்த மூத்த நிர்வாகிகள் கடாஹர் ஹசாரா, முஹம்மது ஆசிப் இக்பால், நிமாய் தாஸ் ஆகியோரும் பாஜகவில் தங்களை இணைத்துக் கொண்டனர்.
