சியோமி நிறுவனம் தனது Mi எல்.இ.டி. டியவிய 4ஏ ப்ரோ 49 இன்ச் மாடலின் விலையை ரூ.1,000 குறைப்பதாக அறிவித்துள்ளது.
இந்தியாவில் ரூ.31,999 விலையில் அறிமுகம் செய்யப்பட்ட இந்த டி.வி.யின் விலை முன்னதாக ஜனவரி மாதத்தில் ரூ.1000 குறைக்கப்பட்டது. அந்த வகையில் இதே டி.வி.யின் விலை தற்சமயம் இரண்டாவது முறையாக குறைக்கப்பட்டிருக்கிறது. Mi டி.வி. மாடல் அறிமுகமான ஆறு மாதங்களுக்குள் இருமுறை விலை குறைக்கப்பட்டுள்ளது.
முன்னதாக சியோமி நிறுவனம் தனது Mi டி.வி. 4 ப்ரோ 55 இன்ச் 4K டி.வி.யின் விலையை ரூ.2000 குறைப்பதாக அறிவித்தது. இரு டி.வி. மாடல்களின் விலைகுறைப்புக்கு சாம்சங் சமீபத்தில் அறிமுகம் செய்த 4K டி.வி.க்கள் தான் காரணம் என கூறப்படுகிறது.
விலை குறைப்பு மூலம் வாடிக்கையாளர்களை கவர சியோமி முடிவு செய்திருக்கிறது. அந்த வகையில் வரும் வாரங்களில் சியோமி இதேபோன்ற விலை குறைப்புக்களை அறிவிக்கலாம் என எதிர்பார்க்கப்படுகிறது.
இந்தியாவில் Mi எல்.இ.டி. டி.வி. 4ஏ ப்ரோ 49 இன்ச் மாடல் தற்சமயம் ரூ.29,999 விலையில் விற்பனை செய்யப்படுகிறது. இதன் விற்பனை ப்ளிப்கார்ட், அமேசான், Mi வலைதளம் மற்றும் Mi ஹோம் ஆஃப்லைன் ஸ்டோர்களில் நடைபெறுகிறது.
