பிஜ்னோர்:
உத்தர பிரதேச மாநிலம் பிஜ்னோர் சட்டமன்ற தொகுதியின் பகுஜன் சமாஜ் கட்சி பொறுப்பாளர் ஹாஜி முகமது அஷன். இவர் ரியல் எஸ்டேட் தொழிலும் செய்து வருகிறார். இன்று பிற்பகல் ஹாஜி முகமது அஷன் நஜிபாபாத் நகரில் உள்ள தனது அலுவலகத்தில் அமர்ந்திருந்தார். உடன் அவரது உறவினர் ஷதாப் மற்றும் ஊழியர்கள் இருந்தனர்.
அப்போது 3 நபர்கள் ஸ்வீட் பாக்சுடன் வந்துள்ளனர். பிஜ்னோர் பாராளுமன்றத் தொகுதியில் பகுஜன் சமாஜ் கட்சி வேட்பாளர் வெற்றி பெற்றதால், இனிப்பு வழங்க வருவதாக அனைவரும் நினைத்துள்ளனர். ஆனால், வந்தவர்கள் ஸ்வீட் பாக்சுக்குள் மறைத்து வைத்திருந்த துப்பாக்கியை எடுத்து கண்ணிமைக்கும் நேரத்தில் ஹாஜி முகமது அஷனை நோக்கி சுட்டனர். அவரை காப்பாற்றுவதற்காக அவரது உறவினர் ஷதாப் குறுக்கே சென்றார். இதனால் இருவரின் உடல்களையும் தோட்டாக்கள் துளைத்தன.
உயிருக்கு போராடிய இருவரும் உடனடியாக மருத்துவமனைக்கு கொண்டு செல்லப்பட்டனர். ஆனால் வழியிலேயே இருவரும் உயிரிழந்தனர்.
இதுபற்றி போலீசார் வழக்குப்பதிவு செய்து, தப்பி ஓடிய கொலையாளிகளைத் தேடி வருகின்றனர். சொத்து பிரச்சினையால் ஏற்பட்ட முன்விரோதம் காரணமாக இந்த கொலை நடந்திருக்கலாம் என முதற்கட்ட விசாரணையில் தெரியவந்துள்ளது.
