லக்னோ:
உ.பி.யில் பாராளுமன்றத் தேர்தலில் சமாஜ்வாடி-பகுஜன் சமாஜ் கூட்டணியில் நிஷாத் கட்சியும் இணைந்தது. இந்த அறிவிப்பு வெளியான இரண்டு நாட்களில் கூட்டணி உடைந்தது. கூட்டணி கட்சிகள் தங்களை மதிக்கவில்லை என்று கூறிய நிஷாத் கட்சி, நேற்று கூட்டணியில் இருந்து வெளியேறியது.
பின்னர், அக்கட்சியின் தலைவர் சஞ்சய் நிஷாத், நேற்று உ.பி. முதல்வர் யோகி ஆதித்யநாத்தை சந்தித்து பேசினார். யோகி ஆதித்யநாத்தின் கோரக்பூர் தொகுதியில் வெற்றிபெற்றுள்ள நிஷாத் கட்சி வெளியேறியிருப்பது, சமாஜ்வாடி கட்சிக்கு பின்னடைவாக கருதப்படுகிறது.
கோரக்பூர் தொகுதியில் வெற்றிப் பெற்ற யோகி ஆதித்யநாத், 2017ல் எம்பி பதவியை ராஜினாமா செய்து விட்டு முதல்வராக பதவியேற்றார். பின்னர் இந்த தொகுதியில் நடைபெற்ற இடைத்தேர்தலில் நிஷாத் கட்சியின் தலைவர் சஞ்சய் நிஷாத்தின் மகன் பிரவீன் நிஷாத் வெற்றி பெற்றார்.
தற்போது நிஷாத் கட்சி வெளியேறியதற்கு, பதிலடி கொடுக்கும் வகையில் சமாஜ்வாடி கட்சி, இன்று காலை கோரக்பூர் மற்றும் கான்பூர் தொகுதிகளின் வேட்பாளர்களை அறிவித்துள்ளது. இந்த 2 வேட்பாளர்களும் நிஷாத் சமுதாயத்தைச் சேர்ந்தவர்களாவர். கோரக்பூர் தொகுதியில் ராம் பவுல் நிஷாத், கான்பூர் தொகுதியில் ராம் குமார் நிஷாத் ஆகியோரை வேட்பாளர்களாக நிறுத்தி உள்ளது.
சமாஜ்வாடி அறிவித்த இரண்டு வேட்பாளர்களில், ராம் பால் நிஷாத், பல்வேறு குற்ற வழக்குகளில் தொடர்புடையவர். சமீபத்தில் பாஜகவில் இருந்து சமாஜ்வாடியில் இணைந்தவர் ஆவார். மற்றொரு வேட்பாளர் ராம் குமார் நிஷாத்துக்கு இதுதான் முதல் தேர்தல் என்பது குறிப்பிடத்தக்கது.
இதற்கிடையே பாஜக கூட்டணியில் நிஷாத் கட்சி இன்று இணையலாம் என எதிர்பார்க்கப்படுகிறது. #LokSabhaElections2019 #NishadParty
