நீங்கள் தேடியது "slug 100878"

புதுடெல்லி:

பாராளுமன்ற தேர்தலில் காங்கிரசுக்கு மோசமான தோல்வி ஏற்பட்டது.

ராஜஸ்தான், மத்திய பிரதேசம், சத்தீஸ்கர் ஆகிய 3 மாநில சட்டசபை தேர்தலில் பெற்ற வெற்றியால் பாராளு மன்ற தேர்தலில் காங்கிரஸ் அதிகமான இடங்களில் வெல்லும் என்று எதிர்பார்க்கப்பட்டது. ஆனால் ஏமாற்றம் தான் மிஞ்சியது.

காங்கிரஸ் தலைமையிலான ஐக்கியமுற்போக்கு கூட்டணி 91 இடங்களை மட்டுமே கைப்பற்றியது. இதில் காங்கிரசுக்கு வெறும் 52 தொகுதிகள் மட்டுமே கிடைத்தது.

இதனால் பாராளுமன்றத்தில் காங்கிரஸ் எதிர்க்கட்சி அந்தஸ்தை பெற முடியாத சூழ்நிலை ஏற்பட்டு உள்ளது. எதிர்க்கட்சி அந்தஸ்தை பெற குறைந்தபட்சம் 55 எம்.பி.க்களை பெற்றிருக்க வேண்டும்.

எதிர்க்கட்சி அந்தஸ்தை பெற காங்கிரஸ் கட்சி புதிய முயற்சியில் இறங்கி உள்ளது.

சரத்பவாரின் தேசியவாத காங்கிரஸ் கட்சியை தங்களுடன் இணைத்தால் எதிர்க்கட்சி அந்தஸ்தை பெற முடியும் என்று காங்கிரஸ் கருதுகிறது.

இதுதொடர்பாக காங்கிரஸ் நிர்வாகி ஒருவர் கூறியதாவது:-

ராகுல்காந்தி ராஜினாமா செய்வதில் அடம்பிடிப்பதால் காந்தி குடும்பத்தில் இல்லாத ஒருவர் தலைவர் பதவிக்கு தேடப்பட்டு வருகிறார். இதற்கு ஏற்றவாறு சரத் பவாரின் கட்சியை காங்கிரசுடன் இணைத்து விட்டால் அவர் கட்சியின் தலைவராவதுடன் பாராளு மன்றத்திலும் எதிர்க்கட்சி அந்தஸ்து கிடைக்கும் என்ற யோசனை தீவிரமாக ஆலோசிக்கப்பட்டு வருகிறது’.

இவ்வாறு அவர் கூறினார்.

மராட்டியத்தில் காங்கிரசுடன் கூட்டணி அமைத்து போட்டியிட்ட சரத்பவாருக்கு 4 எம்.பி.க்கள் உள்ளனர். காங்கிரஸ் கட்சி ஒரே ஒரு தொகுதியில் மட்டுமே வெற்றிபெற்றது.

தேசியவாத காங்கிரஸ் கட்சி எம்.பி.க்கள் இணைந்தால் காங்கிரசின் எண்ணிக்கை பாராளுமன்றத்தில் 57 ஆக அதிகரித்து எதிர்க் கட்சி அந்தஸ்து கிடைக்கும்.

அத்துடன் சரத்பவாருக்கு காங்கிரசின் தலைவராகும் வாய்ப்பு கிடைக்கும் என கருதப்படுகிறது.

காங்கிரசின் இந்த யோசனையை சரத்பவார் ஒப்புக்கொள்ள மாட்டார் என்றே கருதப்படுகிறது.

இது தொடர்பாக தேசியவாத காங்கிரஸ் கட்சியின் நிர்வாகிகள் கூறும்போது, ‘மராட்டியத்தில் சரத்பவார் தேசியவாத காங்கிரஸ் கட்சியை நன்கு வளர்த்துள்ளார். இதனால் அவர் காங்கிரசுடன் தனது கட்சியை இணைப்பது கடினம்’ என்றனர்.

பாராளுமன்றத்தில் நடிகை சுமலதா (கர்நாடகம்), நவ்னீத் ரவிரானா (மராட்டியம்), நம்பாகுமார் சரணியா (அசாம்), மோகன் பாய் டெல்கர் (தத்ரா நாகர் ஹவேலி) ஆகியோர் சுயேச்சை எம்.பி.க்களாக உள்ளனர்.

இவர்களது ஆதரவை பெறவும் காங்கிரஸ் முயற்சிப்பதாக கூறப்படுகிறது.

மும்பை:

தேசியவாத காங்கிரஸ் கட்சியின் நிறுவனர் சரத்பவார் தேர்தல் பிரசாரம் செய்ய சதாரா வருகை தந்தார். அங்கு அவர் நிருபர்களுக்கு பேட்டி அளித்தார். அப்போது அவர் கூறியதாவது:-

ஓட்டு எந்திரங்களில் குளறுபடி நடைபெறுவதாக ஏற்பட்ட புகாரை தொடர்ந்து தேர்தலுக்கு முன்பு ஆந்திரா மற்றும் குஜராத்தில் நிபுணர்கள் மூலம் பரிசோதனை நடத்தி காட்டப்பட்டது. அதில் நான் கலந்து கொண்டேன்.

அப்போது ஓட்டுகள் பா.ஜனதா கட்சிக்கு சென்றதை நான் நேரில் பார்த்தேன். எந்திரத்தில் ஓட்டு போடும் பட்டனை நான் அழுத்தினேன். ஆனால் நான் போட்ட ஓட்டு தாமரைக்கு சென்றது. தனிப்பட்ட முறையில் எனக்கு அந்த அனுபவம் கிடைத்தது.

எனவே ஓட்டு எந்திரத்தில் குளறுபடி ஏற்பட வாய்ப்பு உள்ளது. அனைத்து ஓட்டு எந்திரங்களிலும் தவறு நடைபெறும் என சொல்லவில்லை. ஆனால் குளறுபடிகள் மற்றும் தவறுகள் நடைபெற வாய்ப்பு இல்லை என்று கூற முடியாது.

இந்த விவகாரம் குறித்து சில எதிர்க்கட்சிகள் கோர்ட்டில் முறையிட்டன. ஆனால் துரதிர்ஷ்ட வசமாக அவர்களின் முயற்சி வெற்றி பெறவில்லை.

ராஜீவ் காந்திக்கு எதிராக பிரதமர் மோடி கூறிய குற்றச்சாட்டுகள் துரதிர்ஷ்டவசமானது. நிரூபிக்க முடியாது. அவரது குடும்பம் நாட்டுக்காக பெரிய தியாகம் செய்துள்ளது. 2 தியாகிகளை நாட்டுக்கு தந்துள்ளது. எனவே அந்த குடும்பம் பற்றிய கருத்துக்களை மோடி மிக கவனமாக பேச வேண்டும்.

விடுமுறையை கழிக்க இந்திய ராணுவத்துக்கு சொந்தமான போர்க் கப்பலை ராஜீவ் காந்தி தவறான முறையில் பயன்படுத்தினார் என மோடி குற்றம் சாட்டியுள்ளார். இந்திய ராணுவ கப்பலை பயன்படுத்தியதில் ஆட்சே பனை எதுவுமில்லை.

ராணுவ மந்திரியாக இருந்த போது போர்க்கப்பலில் நான் அந்தமான் சென்று இருக்கிறேன். அது கடலில் தான் பயணம் செய்கிறது. பிரதமராக இருப்பவர் அதை பயன்படுத்துவதில் என்ன தவறு இருக்கிறது.

இவ்வாறு சரத்பவார் கூறினார். #SharadPawar #PMModi

அவுரங்காபாத்:

அடுத்த ஆண்டு நடைபெறும் பாராளுமன்ற தேர்தலில் பா.ஜனதாவை வீழ்த்த எதிர்க்கட்சிகளை ஒருங்கிணைக்கும் முயற்சியில் காங்கிரஸ் தலைவர் ராகுல் காந்தி ஈடுபட்டுள்ளார்.

ஒவ்வொரு மாநிலத்திலும் கூட்டணி மற்றும் தொகுதி பங்கீடு தொடர்பாக காங்கிரஸ் தீவிர ஆலோசனை நடத்தி வருகிறது.

மராட்டிய மாநிலத்தில் சரத்பவார் தலைமையிலான தேசியவாத காங்கிரசுடன் தொகுதி பங்கீடு பேச்சு வார்த்தையில் ஈடுபட்டு வருகிறது. அந்த மாநிலத்தில் மொத்தம் 48 தொகுதிகள் இருக்கிறது.

இதில் 40 தொகுதிகளில் காங்கிரஸ் - தேசியவாத காங்கிரஸ் கட்சிகள் இடையே ஒருமித்த கருத்து ஏற்பட்டது. மீதியுள்ள 8 இடங்களில் தொடர்ந்து பேச்சுவார்த்தை நடத்தப்பட்டு வருகிறது. இதை அந்த கட்சியின் தலைவர் சரத்பவார் தெரிவித்துள்ளார்.

மராட்டிய மாநிலத்தில் காங்கிரசுக்கும், தேசியவாத காங்கிரசுக்கும் இடையே எந்தெந்த தொகுதியில் போட்டியிடுவது என்பது பற்றி பேச்சுவார்த்தை நடைபெற்று வருகிறது. இதில் 40 தொகுதிகளில் ஒருமித்த கருத்து ஏற்பட்டுள்ளது. மீதியுள்ள 8 இடங்களில் பேச்சுவார்த்தை நடைபெற்று வருகிறது.

அவுரங்காபாத், புனே இடங்கள் குறித்து இன்னும் முடிவாகவில்லை. இங்கு காங்கிரசுடன் செயல்பாடு சரியில்லாததால் எங்கள் கட்சி நிர்வாகிகள் இந்த தொகுதியில் டிக்கெட் கேட்கிறார்கள்.

மாநிலங்களில் உள்ள எதிர்க்கட்சிகள் அனைத்தும் கூட்டணி அமைத்து ஒருங்கிணைந்து போட்டியிட்டால் மத்தியில் பா.ஜனதாவை வீழ்த்த இயலும். மாநிலங்களில் ஒவ்வொரு கட்சிகளும் வலிமை வாய்ந்தவை.

கூட்டணிக்கு யார்? தலைமை தாங்குவது என்பது குறித்து பாராளுமன்ற தேர்தலுக்கு பிறகே முடிவு செய்யலாம். தமிழகத்தில் தி.மு.க. பலம் பெற்றது. கர்நாடகா, குஜராத்தில் காங்கிரஸ் தலைமை வகிக்கலாம்.

உத்தரபிரதேசத்தில் பகுஜன் சமாஜ்வாடி, பகுஜன் சமாஜ் பலம் வாய்ந்தவை. இதனால் காங்கிரஸ் அதற்கு ஏற்ற வகையில் அனைத்து எதிர்க் கட்சிகளையும் கவனத்துடன் ஒருங்கிணைக்க வேண்டும்.

இவ்வாறு சரத்பவார் கூறியுள்ளார். #SharadPawar #BJP #ParliamentElection

புதுடெல்லி:

ரபேல் ரக போர் விமானங்களை வாங்குவது தொடர்பாக பிரான்சுடன் மத்திய அரசு ஒப்பந்தம் செய்துள்ளது.

இதில் அனில் அம்பானிக்கு சொந்தமான நிறுவனத்துக்கு ஆதாயம் கிடைக்கும் வகையில் விதிமீறல்கள் நடந்துள்ளதாக காங்கிரஸ் தலைவர் ராகுல் காந்தி குற்றம் சாட்டியுள்ளார்.

ரபேல் விவகாரத்தில் ராகுல் காந்தி அடுத்தடுத்து குற்றச்சாட்டு கூறிவரும் நிலையில் காங்கிரஸ் கூட்டணியில் இருக்கும் சரத்பவார் பிரதமருக்கு ஆதரவாக கருத்து தெரிவித்து உள்ளார்.

ரபேல் ஒப்பந்தம் குறித்து நாட்டு மக்கள் பிரதமர் மோடி மீது நம்பிக்கை வைத்து உள்ளதாக தெரிவித்து இருந்தார்.

தேசியவாத காங்கிரஸ் தலைவர் சரத்பவாரின் இந்த கருத்துக்கு அந்த கட்சியின் நிறுவன உறுப்பினர்களில் ஒருவரும், மூத்த தலைவருமான தாரிக் அன்வர் எதிர்ப்பு தெரிவித்தார். கட்சியின் அடிப்படை உறுப்பினர் உள்பட அனைத்து பதவிகளில் இருந்தும் அவர் விலகினார். மேலும் தனது எம்.பி. பதவியையும் ராஜினாமா செய்வதாக தாரிக் அன்வர் அறிவித்துள்ளார்.

இந்த நிலையில் சரத்பவாருக்கு எதிர்ப்பு தெரிவித்து அந்த கட்சியில் இருந்து மேலும் ஒரு நிர்வாகி விலகியுள்ளார். அவரது பெயர் முனாப் ஹக்கீம். இவர் தேசியவாத காங்கிரஸ் கட்சியின் பொதுச் செயலாளராக இருந்தார். ஹக்கீம் கட்சியின் அடிப்படை உறுப்பினர் பதவி உள்பட அனைத்து பொறுப்புகளில் இருந்தும் விலகி உள்ளார்.

இது தொடர்பாக அவர் கூறும் போது “தாரிக் அன்வர் கட்சியின் நிறுவன உறுப்பினர். அவரிடம் ஆலோசனை செய்யாமல் ரபேல் விவகாரம் குறித்து சரத்பவார் பிரதமர் மோடிக்கு ஆதரவாக கருத்து தெரிவித்து உள்ளார். அவரது இந்த கருத்து கட்சியின் நன்மதிப்பை பாதிக்கும்“ என்றார்.

தாரிக் அன்வரை தொடர்ந்து கட்சியின் பொதுச் செயலாளர் முனாப் ஹக்கீம் விலகியதால் தேசியவாத காங்கிரசில் சலசலப்பு ஏற்பட்டுள்ளது. இது கட்சிக்கு பாதிப்பை ஏற்படுத்தும் என்று கருதப்படுகிறது.

இந்த நிலையில் சரத் பவாரின் கருத்தால் அதிர்ச்சி அடைந்த காங்கிரஸ் அவருடன் பேச்சு வார்த்தையில் ஈடுபட்டது.

மூத்த தலைவரும், மராட்டிய மாநில காங்கிரஸ் பொறுப்பாளருமான மல்லி கார்ஜுன கார்கே இது தொடர்பாக சரத்பவாருடன் பேசினார். இதுகுறித்து மல்லிகார்ஜுன கார்கே கூறியதாவது:-

ரபேல் விவகாரத்தில் எந்த சூழ்நிலையிலும் அரசையோ அல்லது பிரதமரையோ தான் ஆதரிக்கவில்லை என்று சரத்பவார் என்னிடம் தெரிவித்தார். பாராளுமன்ற கூட்டு குழு இது குறித்து விசாரிக்க வேண்டும் என்பதே அவரது கோரிக் கையாகும்.

இதனால் எந்த விவகாரத்தில் எந்த சர்ச்சையும் ஏற்படவில்லை. காங்கிரஸ்- தேசியவாத காங்கிரஸ் கூட்டணியில் எந்த பாதிப்பும் இல்லை.

இவ்வாறு அவர் கூறினார்.

பகுஜன்சமாஜ் கட்சி தலைவர் மாயாவதி ஏற்கனவே காங்கிரஸ் கூட்டணியில் இருந்து விலகினார். அவரை தொடர்ந்து சரத்பவாரும் சென்று விடக் கூடாது என்பதில் காங்கிரஸ் உறுதியாக இருக்கிறது. இதனால் பல்வேறு வி‌ஷயங்களில் அவரை சமாதானப்படுத்தும் முயற்சியில் காங்கிரஸ் தீவிரமாக இறங்கியுள்ளது. மோடிக்கு எதிராக எதிர்க் கட்சிகள் அனைத்தையும் ஒன்று இணைப்பதை ராகுல் காந்தி இலக்காக கொண்டுள்ளார். #PMModi #SharadPawar #RafaleDeal