நீங்கள் தேடியது "திருப்பூர்"

திருப்பூர்:

திருப்பூர் மங்கலத்தை அடுத்த அக்ரஹாரப்புத்தூர் பகுதியை சேர்ந்தவர் முத்துக்குமார் (வயது 37). இவர் சொந்தமாக விசைத்தறிக்கூடம் வைத்துள்ளார்.

இவருடைய மனைவி சங்கீதா (33). இவர்களுடைய மகன் ரேவந்த் (3). தொட்டிக்குள் தவறி விழுந்தான்

சம்பவத்தன்று முத்துக்குமார் விசைத்தறி கூடத்திற்கு சென்று விட்டார். சங்கீதா வீட்டில் வேலை செய்து கொண்டிருந்தார். அப்போது வீட்டிற்குள் பந்து வீசி ரேவந்த் விளையாடிக்கொண்டிருந்தான்.

சிறுவன் விளையாடிய பந்து வீட்டின் முற்றத்தில் விழுந்தது. இதையடுத்து வீட்டிற்கு வெளியே சென்று சிறுவன் விளையாடினான்.

சிறிது நேரத்திற்கு பிறகு சிறுவனின் சத்தம் கேட்கவில்லையே என்று வீட்டிற்குள் இருந்து வெளியே வந்த சங்கீதா சிறுவனை தேடியுள்ளார்.

அப்போது வீட்டின் முற்றத்தில் உள்ள சிமெண்ட் தொட்டிக்குள் சிறுவனும், அவன் விளையாடிய பந்தும் கிடந்தது. 2½ அடி உயரம் கொண்ட அந்த சிமெண்ட் தண்ணீர் தொட்டியில் 2 அடி உயரத்திற்கு தண்ணீர் இருந்துள்ளது. தண்ணீர் தொட்டிக்குள் விழுந்த பந்தை சிறுவன் எடுக்க முயன்றபோது அதற்குள் தலைகுப்புற தவறி விழுந்து இருப்பது தெரியவந்துள்ளது.

இதை பார்த்து அதிர்ச்சியடைந்த சங்கீதா கூச்சலிட்டார். உடனே தண்ணீர் தொட்டிக்குள் இருந்து சிறுவனை வெளியே தூக்கினார். பின்னர் அக்கம் பக்கத்தினர் உதவியுடன் சாமளாபுரத்தில் உள்ள தனியார் ஆஸ்பத்திரிக்கு கொண்டு சென்றனர்.

அங்கு அவனுக்கு முதலுதவி சிகிச்சை அளித்தபின்னர் மேல் சிகிச்சைக்காக கோவையில் உள்ள தனியார் ஆஸ்பத்திரிக்கு கொண்டு சென்றனர். அங்கு சிகிச்சை பலனின்றி ரேவந்த் இறந்தான். தண்ணீர் தொட்டிக்குள் விழுந்து சிறுவன் பலியான சம்பவம் அந்த பகுதியில் சோகத்தை ஏற்படுத்தி உள்ளது.

திருப்பூர்:

பனியன் நகரமான திருப்பூர் மற்றும் அதன் சுற்று வட்டார பகுதிகளில் பல்வேறு நாடுகளை சேர்ந்தவர்கள் தங்கி பனியன் ஏற்றுமதியில் ஈடுபட்டு வருகிறார்கள்.

குறிப்பாக நைஜீரிய நாட்டை சேர்ந்தவர்கள் ஏராளமானோர் தங்கி உள்ளனர். இந்த நிலையில் திருப்பூர் ஊத்துக்குளி எஸ். பெரியபாளையம் பெருமாள் கார்டன் பகுதியில் உரிய ஆவணங்கள் இன்றி நைஜீரிய நாட்டை சேர்ந்தவர்கள் தங்கி இருப்பதாக போலீசாருக்கு தகவல் கிடைத்தது.

திருப்பூர் மாவட்ட போலீஸ் சூப்பிரண்டு கயல்விழி உத்தரவின் பேரில் ஊத்துக்குளி இன்ஸ்பெக்டர் சுந்தரபாண்டியன் மற்றும் போலீசார் ஊத்துக்குளி பெருமாள் கார்டன் பகுதியில் அதிரடி சோதனையில் ஈடுபட்டனர்.

அங்கு ஏராளமான நைஜீரியர்கள் தங்கி இருந்தனர். அவர்களிடம் ஆவணங்களை சரி பார்த்த போது 9 பேர் உரிய ஆவணங்கள் இன்றி சட்ட விரோதமாக தங்கி இருப்பது தெரிய வந்தது. அவர்களை போலீசார் கைது செய்தனர்.

பிளஸ்சிங்கு (30), பிஸ்வா (45), சினேடு (30), இகோ பிகுவோ (32), டேய் (37), மற்றொரு சினேடு (34), விண்சென்ட் (28) தீபன் (35), ஜூகுமேகா (40). ஆவார்கள்.

அவர்களிடம் தொடர்ந்து விசாரணை நடைபெற்று வருகிறது.

திருப்பூரில் கடந்த பிப்ரவரி மாதம் எந்த வித ஆவணங்களும் இன்றி தங்கி இருந்த நைஜீரியாவை சேர்ந்த நுவான்க்பே(32), நிக்கோலஸ் உச்சேனா (38), ஓனாஜிட் (31), நெல்சன் மேக்போ (32), நுவோனு ஒக்வுதி (34) டாய் நெபின்சி (35) ஆகிய 6 பேர் கைது செய்யப்பட்டனர்.

இந்த வழக்கு விசாரணை திருப்பூர் முதலாவது கூடுதல் மாவட்ட கோர்ட்டில் நடந்து வந்தது. பின்னர் அவர்கள் சென்னை புழல் சிறையில் அடைக்கப்பட்டனர்.

சிறையில் அடைக்கப்பட்டிருந்த நைஜீரியர்கள் 6 பேரையும் தண்டனை காலம் முடிந்ததால் சிறை நிர்வாகம் விடுதலை செய்தது.

வெளியே வந்த அவர்கள் தலைமறைவாகி விட்டனர். உரிய ஆவணங்கள் இன்றி கைதான வெளிநாட்டினர் சிறையில் இருந்து விடுவிக்கப்பட்ட பின் திருச்சியில் உள்ள முகாமில் அடைக்கப்பட வேண்டும்.

பின்னர் உள்துறை அமைச்சகம் அனுமதி பெற்று அவர்களின் சொந்த நாட்டுக்கு அனுப்பி வைக்க வேண்டும் என்பது நடைமுறை. ஆனால் நைஜீரியர்கள் விவகாரத்தில் போலீசார் முன்னெச்சரிக்கையாக இல்லாததால் அவர்கள் தலைமறைவாகி விட்டனர்.

அவர்களை பிடிக்க போலீசார் தீவிர முயற்சியில் ஈடுபட்டு உள்ளனர்.

திருப்பூர்:

திருப்பூர் செவாந்தம் பாளையம் சாமந்த தோட்டத்தில் உரிய ஆவணங்கள் இன்றி தங்கி இருந்த வங்க தேசத்தை சேர்ந்த 8 பேரை போலீசார் கைது செய்தனர்.

அவர்களிடம் விசாரித்த போது தங்களுக்கு ஆதார் உள்ளிட்ட ஆவணங்களை அவினாசி ரங்கா நகரில் தங்கி இருந்த பீகார் வாலிபர் ராம்சிஷ் வர்மா (34) என்பவர் அச்சடித்து கொடுத்தார் என கூறி இருந்தனர்.

அவரை போலீசார் தேடி வந்தனர். அவர் கொல்கத்தாவில் பதுங்கி இருப்பது போலீசாருக்கு தெரிய வந்தது. இதனை தொடர்ந்து கொல்கத்தா சென்ற தனிப்படை போலீசார் ராம்சிஷ் வர்மாவை கைது செய்தனர்.

அவரிடம் இருந்து லேப்-டாப், கருவிழி மற்றும் கைரேகை பதிவு செய்ய கூடிய கருவி ஆகியவற்றை பறிமுதல் செய்தனர்.

அவருக்கு உதவியாக இருந்த அவினாசி ரங்கா நகரை சேர்ந்த சவரிமுத்து (54) என்பவரும் கைது செய்யப்பட்டார்.

அவர்கள் இருவரிடமும விசாரணை நடத்திய போது திருப்பூர் சங்கேரி பாளையத்தில் வசித்து வரும் பீகாரை சேர்ந்த ரவிசங்கர் சிங் (28) என்பவர் தான் தங்களுக்கு போலி ஆதார் கார்டு தொடர்பாக ஆட்களை அனுப்பி வைத்ததாக தெரிவித்தனர்.

இதனை தொடர்ந்து ரவிசங்கர் சிங்கை போலீசார் கைது செய்தனர். அவர் போலீசாரிடம் கூறும் போது, வட மாநில வாலிபர்களை போலி ஆதார் கார்டு மூலம் திருப்பூரில் உள்ள பனியன் நிறுவனத்தில் வேலைக்கு அமர்த்தியதாக தெரிவித்தார்.

ரவிசங்கர் சிங் மூலம் போலி ஆதார் கார்டு பெற்று திருப்பூரில் உள்ள பனியன் நிறுவனத்தில் வேலை பார்த்து வரும் வட மாநில வாலிபர்கள் யார்? என்பது குறித்து போலீசார் தீவிர விசாரணையில் ஈடுபட்டு உள்ளனர். மேலும் வங்கதேச வாலிபர்கள் வேறு யாராவது உரிய ஆவணங்கள் இன்றி தங்கி உள்ளார்களா? என்பது தொடர்பாகவும் விசாரணை நடைபெற்று வருகிறது. #Aadhaarcard

திருப்பூர்:

திருப்பூர் செவந்தாம்பாளையம் சாமந்த தோட்டத்தில் எந்த ஆவணங்களும் இன்றி தங்கியிருந்த வங்க தேசத்தை சேர்ந்த 8 பேரை திருப்பூர் போலீசார் கைது செய்தனர்.

பின்னர் அவர்கள் சென்னை புழல் சிறையில் அடைக்கப்பட்டனர். கைதானவர்களிடம் விசாரித்த போது தங்களுக்கு ஆதார் உள்ளிட்ட ஆவணங்களை அவினாசி ரங்கா நகரில் தங்கி இருந்த பீகார் வாலிபர் ராம்சிஷ் வர்மா (34) அச்சடித்து கொடுத்தார் என கூறி இருந்தனர்.

ஒரு ஆதார் அட்டைக்கு ரூ. 6 ஆயிரம் கொடுத்ததாகவும் கூறி இருந்தனர். இதனை தொடர்ந்து ராம்சிஷ் வர்மாவை பிடிக்க திருப்பூர் போலீசார் அவினாசி சென்றனர். போலீசார் வருவதை அறிந்த ராம்சிஷ் வர்மா தலைமறைவாகி விட்டார்.

அவர் கொல்கத்தாவில் பதுங்கி இருப்பது தெரிய வந்தது. இதனை தொடர்ந்து கொல்கத்தா சென்ற தனிப்படையினர் ராம்சிஷ் வர்மாவை கைது செய்தனர். அவரிடமிருந்து லேப் -டாப், கருவிழி மற்றும் கைரேகை பதிவு செய்ய கூடிய கருவிகளை போலீசார் கைப்பற்றினார்கள்.

ராம்சிஷ் வர்மாவுக்கு வீடுபார்த்து கொடுத்து உதவியாக இருந்த அவினாசி ரங்கா நகரை சேர்ந்த சவரி முத்து (54) என்பவரும் கைது செய்யப்பட்டார்.

ராம்சிஷ் வர்மாவிடம் விசாரித்த போது அவர் பீகாரில் கம்ப்யூட்டர் சென்டர் நடத்தி வந்த போது கொடுத்த ஐ.டி.யில் இருந்து அவினாசியில் போலி ஆதார் அட்டை அச்சடித்து கொடுத்தது தெரிய வந்தது.

அவர் திருப்பூர் மற்றும் பீகாரில் 500-க்கும் மேற்பட்டோருக்கு போலி ஆதார் அட்டைகளை அச்சடித்து வினியோகித்து இருக்கலாம் என தெரிய வந்து உள்ளது.

திருப்பூர் போன்ற தொழில் நகரங்களில் வங்கதேசத்தினர் ஊடுருவல் அதிக அளவில் உள்ளது. கடந்த 2 வருடங்களாக திருப்பூரில் தங்கி இருந்த ராம்சிஷ் வர்மா பலருக்கும் உதவி இருக்கலாம் என போலீசார் கருதுகிறார்கள்.அவருக்கு பின்னணியில் யாரும் உள்ளார்களா? என்பது குறித்தும் போலீசார் விசாரணை நடத்தி வருகிறார்கள்.

ராம்சிஷ் வர்மாவிடம் போலி ஆதார் அடையாள அட்டை பெற்றவர்கள் திருப்பூரில் எங்கெங்கு தங்கி உள்ளார்கள் என்பது குறித்து விசாரணை நடத்த தனிப்படை அமைக்கப்பட்டுள்ளது. அவர்கள் தீவிர சோதனையில் ஈடுபட்டு உள்ளனர்.

ராம்சிஷ் வர்மா வினியோகித்துள்ள ஆதார் அட்டைகள் அரசின் சர்வரில் இணைக்கப்பட்டு பெறப்பட்டதா? என்பது குறித்து மத்திய அரசின் மின்னணுவியல் துறை துணை இயக்குனர் அசோக் லெனின் நேற்று 2-வது நாளாக திருப்பூரில் விசாரணை நடத்தினார்.

இது குறித்து திருப்பூர் மாநகர போலீஸ் கமி‌ஷனர் மனோகரன் கூறும் போது, பெங்களூருவில் இருந்து வந்த ஆதார் துணை இயக்குனர் திருப்பூரில் 2 நாட்கள் விசாரணை நடத்தி சென்று உள்ளார்.

கைதான பீகார் வாலிபர் எந்தெந்த குறியீடுகளில் இருந்து ஆதார் பதிவு செய்துள்ளார் என்ற தகவல் திரட்டப்பட்டு வருகிறது. முழுமையான தகவல் கிடைத்தால் மட்டுமே இந்த வி‌ஷயத்தில் முழு எண்ணிக்கை தெரிய வரும் என்றார். #Aadhaarcard

திருப்பூர்:

பனியன் நகரமான திருப்பூரில் வெளி நாடு, வெளி மாநிலம், வெளி மாவட்ட தொழிலாளர்கள் ஏராளமானோர் தங்கி இருந்து பனியன், டையிங் தொழிற்சாலைகளில் வேலை பார்த்து வருகிறார்கள்.

இவர்களில் வெளி நாட்டு வாலிபர்கள் சிலர் முறையான ஆவணம் இன்றி தங்கி இருப்பதாக போலீசாருக்கு புகார் வந்தது. அதன் படி போலீசார் செவந்தாம் பாளையம் சாமந்த தோட்டத்தில் அதிரடி சோதனை நடத்தினார்கள்.

அப்போது அங்கு அனுமதியின்றி தங்கி இருந்த வங்க தேசத்தை சேர்ந்த அலமின், அஸ்ரபுல் இஸ்லாம், பர்கத் உசேன், போலஸ் சந்தரா சொர்க்கர், முகமது ரோணி ஆகியோர் கைது செய்யப்பட்டனர்.

இவர்களுக்கு உதவியதாக முகமது பாபுல் உசேன், மோமின்வார் உசேன், ரோபின் ஆகியோரும் கைது செய்யப்பட்டனர். அவர்களிடம் சோதனை செய்த போது போலி ஆதார் அட்டை இருந்தது கண்டு பிடிக்கப்பட்டது.

இந்த அட்டையை திருப்பூரை சேர்ந்த ஒரு புரோக்கர் மூலம் அவினாசி ரங்கா நகரில் வசித்து வந்த பீகாரை சேர்ந்த ஆசிஷ் வர்மா என்பவர் தயாரித்து கொடுத்ததாக கூறினார்கள். ஒரு ஆதார் கார்டு தயாரிக்க ரூ. 6 ஆயிரம் கொடுத்ததாகவும் கூறி இருந்தனர்.

பின்னர் கைதான 8 பேரும் சென்னை புழல் சிறையில் அடைக்கப்பட்டனர்.

வங்க தேச வாலிபர்களுக்கு போலி ஆதார் கார்டு தயாரிக்க உதவிய புரோக்கர் ஏற்கனவே போலீஸ் பிடியில் சிக்கினார். பீகார் வாலிபர் ஆசிஷ் வர்மாவை தேடி திருப்பூர் போலீசார் அவினாசி சென்றனர்.

ஆனால் அவர் தலைமறைவாகி விட்டார். அவரை பிடிக்க இன்ஸ்பெக்டர் சந்திரமோகன் தலைமையில் தனிப்படை போலீசார் பீகார் சென்றனர்.

அங்குள்ள நோவாலா மாவட்டத்தில் பதுங்கி இருந்த ஆசிஷ் வர்மாவை கைது செய்தனர்.அவரிடம் இருந்து லேப்டாப் பறிமுதல் செய்யப்பட்டது. அவரை திருப்பூர் அழைத்து வந்தனர்.

பின்னர் அவர் போலி ஆதார் கார்டு அச்சடித்து கொடுத்த அவினாசிக்கு அழைத்து வந்து அங்குள்ள அறையில் சோதனை நடத்தினர்.

அங்கு கம்ப்யூட்டர், ஐ ஸ்கேனர், கைரேகை ஸ்கேனர் இருந்தது. அதனை பறிமுதல் செய்தனர். ஏராளமான போலி ஆதார் அட்டை இருந்தது. அதனையும் போலீசார் கைப்பற்றினார்கள்.

ஆசிஷ் வர்மாவிடம் விசாரித்த போது அவர் பீகாரில் கம்ப்யூட்டர் மையம் நடத்தி வருவது தெரிய வந்தது. அந்த மையத்தின் பாஸ்வேர்டு மூலம் அவினாசி மையத்தில் இருந்து போலி ஆதார் கார்டு அச்சடித்து கொடுத்துள்ளார்.

திருப்பூரில் வேலை பார்த்து வரும் வெளி மாநிலத்தை சேர்ந்த ஏராளமானோருக்கு ஆசிஷ் வர்மா போலியாக ஆதார் கார்டு அச்சடித்து கொடுத்ததாக கூறி உள்ளார்.இவரிடம் போலி ஆதார் கார்டு பெற்றவர்கள் எங்கு தங்கி உள்ளனர் என்பது தொடர்பாக போலீசார் தீவிர சோதனையில் ஈடுபட்டு உள்ளனர். வர்மாவை ரகசிய இடத்தில் வைத்து போலீசார் விசாரணை நடத்தி வருகிறார்கள். #Aadhaarcard

திருப்பூர்:

திருப்பூர் ஈஸ்வரன் கோவில் வீதியில் குலாளர் பிள்ளையார் கோவில் உள்ளது. இக்கோவில் பூசாரியாக மயில் சாமி இருந்து வருகிறார்.

நேற்று இரவு இவர் பூஜை முடித்து கோவிலை பூட்டி சென்றார். இன்று காலை கோவிலை திறக்க வந்தார். அப்போது கோவிலின் முன்பக்க கதவு உடைக்கப்பட்டு இருந்தது. அவர் உள்ளே சென்று பார்த்த போது கோவிலில் வைக்கப்பட்டு இருந்த 2 உண்டியலின் சீல் உடைக்கப்பட்டு தனியாக கிடந்தது.ஆனால் உண்டியலில் இருந்த பணம் எதுவும் திருட்டு போகவில்லை. கோவில் அலுவலக அறைக்கு சென்ற போது அந்த அறை உடைக்கப்பட்டு அங்கிருந்த பீரோ திறந்து கிடந்தது.

அங்கு சாமிக்கு அணிவிக்கப்படும் தங்க தகடு மற்றும் வெள்ளி பொருட்கள் இருந்தது. அவைகள் திருட்டு போய் இருந்தது. ரொக்கபணம் ஆகியவை திருட்டு போனது.இது குறித்து பூசாரி மயில் சாமி கோவில் நிர்வாகிகளுக்கு தகவல் தெரிவித்தார்.

அவர்கள் அங்கு விரைந்து வந்தனர். பின்னர் திருப்பூர் தெற்கு போலீசில் புகார் செய்யப்பட்டது. இன்ஸ்பெக்டர் தென்னரசு மற்றும் போலீசார் அங்கு விரைந்து வந்தனர்.கைரேகை நிபுணர்களும் வரவைழக்கப்பட்டு தடயங்களை சேகரித்தனர். கொள்ளை போன பொருட்களின் மதிப்பு உடனடியாக தெரியவில்லை. அதனை கணக்கெடுக்கும் பணி நடைபெற்று வருகிறது.

கோவிலில் வைக்கப்பட்டு இருந்த சி.சி.டி.வி. கேமிராவை போலீசார் ஆய்வு செய்தனர். அதில் நேற்று நள்ளிரவு 1 மணிக்கு மேல் 2 வாலிபர்கள் கோவிலுக்குள் நுழையும் காட்சி பதிவாகி உள்ளது.

அந்த காட்சியை வைத்து கொள்ளையர்களை அடையாளம்காணும் பணியில் போலீசார் ஈடுபட்டு உள்ளனர்.

இந்த கொள்ளை சம்பவம் திருப்பூரில் பரபரப்பை ஏற்படுத்தி உள்ளது.