நீங்கள் தேடியது "slug 106327"

மணப்பாறையை அடுத்த ஆண்டவர் கோவிலில் மான்பூண்டி நல்லாண்டவர் கோவில் உள்ளது. பிரசித்தி பெற்ற இந்த கோவிலில் ஒவ்வொரு ஆண்டும் ஆடி மாதம் முதல் நாளன்று பால்குட விழாவும், அதைத்தொடர்ந்து ஆடி மாதம் முழுவதும் பல்வேறு சிறப்பு வழிபாடுகளும் நடைபெறும். ஆடி மாதம் வெள்ளிக்கிழமைகளில் பக்தர்கள் அதிக அளவில் கோவிலுக்கு வந்து செல்வார்கள்.

இந்த ஆண்டுக்கான பால்குட விழா கடந்த 6-ந் தேதி காப்பு கட்டும் நிகழ்ச்சியுடன் தொடங்கியது. இதைத் தொடர்ந்து ஆடி முதல் நாளான நேற்று காலை பால்குட விழா நடைபெற்றது. இதையொட்டி திருச்சி - திண்டுக்கல் தேசிய நெடுஞ்சாலையோரத்தில் ஆண்டவர் கோவில் அருகே உள்ள அகத்தீஸ்வரர் கோவிலில் சிறப்பு வழிபாடு நடைபெற்றது.

பின்னர் கோவிலின் பரம்பரை அறங்காவலரும், பொய்கைப்பட்டி, குமாரவாடி ஜமீன்தாருமான கே.ஆர்.கே.முத்து வீரலெக்கைய நாயக்கர் தாரை, தப்பட்டையுடன் முன்செல்ல அதைத்தொடர்ந்து ஏராளமான பக்தர்கள் பால்குடம் எடுத்து ஊர்வலமாக சென்றனர். அகத்தீஸ்வரர் கோவிலில் இருந்து புறப்பட்ட பால்குட ஊர்வலம் நல்லாண்டவர் கோவிலை வந்தடைந்ததும், அங்கு அனைத்து பால்குடங்களும் இறக்கி வைக்கப்பட்டன.

இதைத்தொடர்ந்து நல்லாண்டவருக்கு முத்துகண்ணன் சிவாச்சாரியார் தலைமையிலான குருக்கள் தேன், தயிர், சந்தனம் உள்ளிட்ட பல்வேறு வகையான அபிஷேக, ஆராதனை செய்தனர்.

தொடர்ந்து பக்தர்கள் எடுத்து வந்த பாலால் நல்லாண்டவருக்கு பாலாபிஷேகம் நடைபெற்றது. பின்னர் சிறப்பு அலங்காரம் செய்து, சிறப்பு பூஜைகள் நடத்தப்பட்டன. இதில் பல்வேறு பகுதிகளில் இருந்து ஏராளமானவர்கள் கலந்து கொண்டனர். விழாவுக்கான ஏற்பாடுகளை கோவில் செயல் அலுவலர் பிரபாகர், கோவிலின் பரம்பரை அறங்காவலரும், ஜமீன்தாருமான கே.ஆர்.கே.முத்துவீரலெக்கைய நாயக்கர், மணியம் சண்முகம் மற்றும் சுற்றுவட்டார கிராமங்களின் ஊர் நாட்டாண்மைகள் செய்திருந்தனர். நிகழ்ச்சியை டாக்டர் கரு.ராசகோபாலன் தொகுத்து வழங்கினார். 

திருப்பதி:

ஆந்திர மாநிலத்தில் அமைந்துள்ள உலக புகழ்பெற்ற திருப்பதி கோவிலில் கும்பாபிஷேக விழா 12 ஆண்டுகளுக்கு ஒருமுறை நடைபெறும். அதன்படி 12 ஆண்டுகள் கழித்து இந்த வருடம் திருப்பதி ஏழுமலையான் கோவில் கும்பாபிஷேகம் வருகிற ஆகஸ்ட் 12-ம் தேதி முதல் 16-ம் தேதி வரை நடைபெற உள்ளது.

இந்நிலையில், திருப்பதியில் ஆகஸ்ட் 9-ம் தேதி முதல் 17-ம் தேதி வரை மாலை 6 மணி முதல் காலை 6 மணி வரை பக்தர்கள் வழிபாட்டுக்கு அனுமதி இல்லை என தெரிவிக்கப்பட்டுள்ளது.

திருப்பதியிலிருந்து திருமலைக்கு வாகனம், மலைப்பாதை வழியாக பக்தர்கள் நடந்து செல்லவும் அனுமதி ரத்து செய்யப்பட்டு உள்ளது. பக்தர்கள் மற்றும் பயணிகளுக்கு மாற்று பாதைக்கான ஏற்பாடுகள் செய்யப்படும் எனவும், ஆகஸ்ட் 17-ம் தேதி அதிகாலையில் பக்தர்கள் அனுமதிக்கப்படுவார்கள் எனவும் தெரிவிக்கப்பட்டுள்ளது. #TirupatiTemple

முருகப்பெருமானின் 3-ம் படைவீடாக பழனி விளங்குகிறது. இங்கு தைப்பூசம், பங்குனி உத்திரம் உள்ளிட்ட திருவிழாக்கள் வெகு விமரிசையாக கொண்டாடப்படும். திருவிழா காலங்கள் என்றில்லாமல் ஆண்டு முழுவதும் மலைக்கோவிலுக்கு பக்தர்கள் வருகை இருக்கும். அதிலும் விடுமுறை தினங்களில் வழக்கத்தைவிட இருமடங்கு பக்தர்கள் பழனிக்கு வருகை தருவார்கள்.

அந்த வகையில் விடுமுறை தினமான நேற்று பழனி மலைக்கோவிலில் பக்தர்கள் குவிந்தனர். இதன் காரணமாக படிப்பாதை, யானைப்பாதை, ரோப்கார் நிலையம், மின் இழுவை நிலையம் ஆகியவற்றில் பக்தர்கள் கூட்டமாக காட்சியளித்தது. பக்தர்கள் வருகை அதிகரித்ததால் மலைக்கோவில் வெளிப்பிரகாரம், பொது, கட்டணம், சிறப்பு தரிசன வழிகளிலும் பக்தர்கள் நீண்ட வரிசையில் காத்திருந்தனர். இதன் காரணமாக ஒரு மணி நேரம் காத்திருந்த பின்னரே அவர்கள் சாமி தரிசனம் செய்ய முடிந்தது. 

கடலூரில் மிகவும் பிரசித்தி பெற்ற பாடலீசுவரர் கோவில் உள்ளது. இந்த கோவிலுக்கு வரும் பக்தர்கள் சாமி சன்னதிகளிலும், பிரகாரங்களிலும் விளக்கு ஏற்றி வழிபடுவது வழக்கம். இந்த நிலையில் பாடலீசுவரர் கோவில் பிரகாரங் களிலும், சன்னதிகளிலும் விளக்கு ஏற்ற தடை விதித்து அறநிலையத்துறை உத்தரவிட்டு உள்ளது. இதுபற்றிய அறிவிப்பு பலகை கோவிலில் வைக்கப்பட்டு உள்ளது.

அதில் மதுரை மீனாட்சி அம்மன் கோவிலில் ஏற்பட்ட தீ விபத்தை தொடர்ந்து முன்எச்சரிக்கை நடவடிக்கையாக விளக்கு ஏற்ற தடை விதிக்கப்பட்டு உள்ளது. பக்தர்கள் தாங்கள் கொண்டு வரும் எண்ணெய், நெய் ஆகியவற்றை அதற்கென வைக்கப்பட்டுள்ள பாத்திரங்களில் ஊற்றிச்செல்லலாம் என்று கூறப்பட்டு உள்ளது.

இது பற்றி கோவில் குருக்கள் ஒருவர் கூறியதாவது:-

தீ விபத்து ஏற்படாமல் இருக்க முன்எச்சரிக்கை நடவடிக்கையாக கோவில் பிரகாரங்களிலும், சன்னதிகளிலும் விளக்கு ஏற்ற தடை விதிக்கப்பட்டு உள்ளது. எனவே விளக்கு ஏற்றி வழிபட விரும்பும் பக்தர்கள், பாடலீசுவரர் சன்னதியின் சங்கு மண்டபத்தில் உள்ள சூரிய விளக்கிலோ அல்லது அம்மன் சன்னதியின் கொலு மண்டபத்தில் உள்ள சந்திர விளக்கிலோ, தாங்கள் கொண்டு வரும் எண்ணெய், நெய்யை ஊற்றிச்செல்லலாம். விளக்கில் எண்ணெய் அதிகமாக இருந்தால், அதன் அருகில் பாத்திரங்களை வைத்துள்ளோம். அதில் எண்ணெய், நெய்யை ஊற்றிச்செல்லலாம். இவ்வாறு அவர் கூறினார்.

இந்த உத்தரவை தொடர்ந்து பாடலீசுவரர் கோவில் முன்பு உள்ள கடைகளில் அகல் விளக்கு விற்பனையும் நேற்று நிறுத்தப்பட்டது.

மாவட்டத்தில் 1,252 கோவில்களில்...

இந்த தடை உத்தரவு பற்றி இந்து சமய அறநிலையத்துறை உதவி ஆணையர் ரேணுகா தேவி கூறுகையில், மீனாட்சி அம்மன் கோவில் தீ விபத்தை தொடாந்து முன்எச்சரிக்கை நடவடிக்கையாக அறநிலையத்துறை நிர்வாகத்துக்கு உள்பட்ட கோவில்களுக்குள் நெய்விளக்கு, அகல் விளக்கு, எலுமிச்சை விளக்கு, தேங்காய் விளக்கு ஏற்ற தடை விதிக்கப்பட்டு உள்ளது. அதற்கு பதிலாக கோவிலுக்குள் ஒதுக்கப்பட்டுள்ள இடத்தில் உள்ள விளக்கில் எண்ணெய், நெய் ஊற்றி வழிபடலாம் என்றார்.

இந்த உத்தரவு மாவட்டத்தில் அறநிலையத்துறை நிர்வாகத்துக்கு உள்பட்ட 1,252 கோவில்களிலும் நடைமுறைக்கு வந்து உள்ளது.

இதற்கிடையே அறநிலையத்துறையின் உத்தரவுக்கு பக்தர்கள் கடும் எதிர்ப்பு தெரிவித்து உள்ளனர். இது பற்றி பக்தர்கள் கூறியதாவது:-

சாமி சன்னதியில் விளக்கு ஏற்றி வழிபடக்கூடாது என்று பக்தர்களுக்கு தடை விதிப்பது சரியல்ல. நம் முன்னோர்கள் பல நூறு ஆண்டுகளாக கோவில்களில் விளக்கு ஏற்றித்தான் வழிபட்டு வந்திருக்கிறார்கள். அப்பொழுதெல்லாம் தீ விபத்து ஏற்படவா செய்தது? அப்படியே தீவிபத்து ஏற்பட்டிருந்தாலும் விளக்கு ஏற்றி வழிபடக் கூடாது என்று யாரும் சொல்லவில்லையே. எனவே பாரம்பரிய வழக்கத்துக்கு மாறாக அரசு உத்தரவிடக்கூடாது. தீ விபத்து ஏற்படாமல் தடுக்க வேறு எத்தனையோ நடைமுறைகள் உள்ளன. அதனை செய்யாமல் பாரம்பரியத்தை மாற்றும் நடைமுறையை திணிக்க அரசு முயற்சிக்கக்கூடாது. எனவே அறநிலையத்துறையின் உத்தரவை அரசு திரும்ப பெற வேண்டும்.

இவ்வாறு பக்தர்கள் தெரிவித்தனர். 

களக்காடு தேரடி திடலில் களக்காடு வட்டார அய்யாவழி பக்தர்கள் சார்பில் அய்யா வழி 6-வது மாநாடு நேற்று முன் தினம் நடந்தது. காலையில் டாக்டர் சொக்கலிங்கம் கொடி ஏற்றி வைத்தார். சாமிதோப்பு சிவச்சந்திரன் தலைமையில் விவாத அரங்கம், பேராசிரியை டாக்டர் ஸ்ரீமதி தியாகராஜன் தலைமையில் மகளிர் கருத்தரங்கம், உச்சிப்படிப்பு, மாணவ-மாணவிகள் மாநாடு, அகிலத் திரட்டு திருஏடு வாசிப்பு, அன்னதானம் வழங்கல் உள்ளிட்ட நிகழ்ச்சிகள் நடந்தன.

மாலையில் அய்யா நாராயணசுவாமி வாகன பவனியுடன் பக்தர்கள் ஊர்வலம் சென்றனர். இதில் ஏராளமான பக்தர்கள் கலந்து கொண்டனர். அதன் பிறகு மாநாடு துவங்கியது. மாநாட்டுக்குழு உறுப்பினர் பால்சாமி வரவேற்றார். திசையன்விளை லைசாள் எட்வர்டு, தெய்வேந்திரன் மற்றும் பலர் கலந்து கொண்டனர்.

பின்னர் நடந்த சாமிதோப்பு சிவச்சந்திரனின் அருளிசை வழிபாட்டை வள்ளியூர் அய்யா வழி அகிலத்திருக்குடும்ப செயலாளர் தர்மர் தொடங்கி வைத்தார்.

இதற்கான ஏற்பாடுகளை களக்காடு வட்டார அய்யாவழி மாநாட்டு குழு தலைவர் சிவப்பிரசாமி, துணை தலைவர் சங்கரன், சேர்மன்ராஜ், சொர்ணலிங்கம், மணி, பால்சாமி, சுப்பிரமணியன், சண்முகநாதன், கார்த்திக் மற்றும் குழுவினர் செய்திருந்தனர். 

திருவண்ணாமலை அருணாசலேஸ்வரர் கோவிலுக்கு தினமும் ஏராளமான பக்தர்கள் வந்து சாமி தரிசனம் செய்துவிட்டு செல்கின்றனர். கோவிலுக்கு வரும் பக்தர்களில் பெரும்பாலானோர் நகரின் மையப் பகுதியில் உள்ள அண்ணாமலை என்று அழைக்கப்படும் மலையை சுற்றி 14 கிலோ மீட்டர் கிரிவலம் செல்கின்றனர்.

இந்த நிலையில் நேற்று ஞாயிற்றுக்கிழமை விடுமுறை நாள் என்பதாலும், முகூர்த்த நாள் என்பதாலும் அருணாசலேஸ்வரர் கோவிலில் பக்தர்களின் கூட்டம் அலைமோதியது. கோவிலில் கட்டண தரிசன வழி மற்றும் பொது தரிசன வழியாக நீண்ட வரிசையில் பக்தர்கள் காத்திருந்து சாமி தரிசனம் செய்தனர்.

கோவிலுக்கு வரும் பக்தர்களின் வசதிக்காக கோவில் சார்பில் குடிநீர் வசதி செய்யப்பட்டு இருந்தது. போலீசாரும் பாதுகாப்பு பணியில் ஈடுபட்டிருந்தனர்.

மேலும் சிலர் கிரிவலம் சென்று, கிரிவலப் பாதையில் உள்ள அஷ்டலிங்கங்களை வழிபட்டனர். 

திருவண்ணாமலையில் உலக பிரசித்தி பெற்ற அருணாசலேஸ்வரர் கோவில் உள்ளது. இந்த கோவிலுக்கு தினமும் ஆயிரக்கணக்கான பக்தர்கள் வந்து சாமி தரிசனம் செய்து விட்டு செல்கின்றனர். கோவிலுக்கு வரும் பக்தர்களில் பெரும்பாலானோர் மலையை சுற்றி 14 கிலோ மீட்டர் கிரிவலம் செல்கின்றனர். விடுமுறை நாட்களில் கோவிலில் பக்தர்கள் கூட்டம் அதிகமாக காணப்படும். கோடை விடுமுறையில் ஏராளமான மக்கள் தங்கள் குடும்பங்களுடன் திருவண்ணாமலைக்கு வந்து சாமி தரிசனம் செய்து விட்டு சென்றனர்.

இந்த நிலையில் நேற்று ஞாயிற்றுக்கிழமை விடுமுறை நாள் என்பதாலும், முகூர்த்த நாள் என்பதாலும் அருணாசலேஸ்வரர் கோவிலில் பக்தர்களின் கூட்டம் அதிகமாக காணப்பட்டது. கோவிலில் கட்டண தரிசன வழி மற்றும் பொது தரிசன வழியாக நீண்ட வரிசையில் காத்திருந்து பக்தர்கள் சாமி தரிசனம் செய்தனர். கோவிலுக்கு வரும் பக்தர்களின் வசதிக்காக கோவில் சார்பில் குடிநீர் வசதி செய்யப்பட்டு இருந்தது. போலீசாரும் பாதுகாப்பு பணியில் ஈடுபட்டிருந்தனர். 

முருகப்பெருமானின் 3-ம் படைவீடாக பழனி விளங்குகிறது. இங்கு தைப்பூசம், பங்குனி உத்திரம் உள்ளிட்ட திருவிழாக்கள் வெகு விமரிசையாக கொண்டாடப்படும். திருவிழா காலம் என்றில்லாமல், ஆண்டு முழுவதும் பழனி மலைக்கோவிலுக்கு பக்தர்கள் வருகை அதிகமாக இருக்கும்.

குறிப்பாக விடுமுறை தினங்களில் வழக்கத்தைவிட இருமடங்கு பக்தர்கள் பழனிக்கு வருகை தருவார்கள். அந்த வகையில் விடுமுறை தினம் மற்றும் முகூர்த்த நாளையொட்டி நேற்று மலைக்கோவிலில் ஏராளமான பக்தர்கள் குவிந்தனர். இதன் காரணமாக படிப்பாதை, யானைப்பாதை, ரோப்கார் நிலையம், மின் இழுவை நிலையம் ஆகியவற்றில் பக்தர்கள் கூட்டம் அலைமோதியது.

பக்தர்கள் வருகை அதிகரித்ததால், மலைக்கோவில் வெளிப்பிரகாரம், பொது, கட்டணம், சிறப்பு தரிசன வழிகளிலும் பக்தர்கள் நீண்ட வரிசையில் காத்திருந்தனர். இதன் காரணமாக சுமார் 3 மணி நேரம் காத்திருந்த பின்னரே அவர்களால் சாமி தரிசனம் செய்ய முடிந்தது.

பக்தர்கள் கூட்டம் அதிகமாக இருந்ததால் மின் இழுவை ரெயில் நிலையத்திலும் ஏராளமானோர் காத்திருந்தனர். இதனால் கூட்ட நெரிசலை தவிர்ப்பதற்காக, சாமி தரிசனம் செய்த பிறகு படிப்பாதை வழியாக மலைக்கோவிலில் இருந்து கீழே இறங்கி செல்லும்படி பக்தர்களுக்கு கோவில் நிர்வாகம் சார்பில் அறிவுறுத்தப்பட்டது. இதைத்தொடர்ந்து பக்தர்கள் கூட்டத்தின் ஒரு பகுதியினர் படிப்பாதை வழியாக கீழே இறங்கி சென்றனர்.

திருமலை:

திருப்பதி ஏழுமலையான் கோவிலில் சாமி தரிசனம் செய்ய லட்சக்கணக்கான பக்தர்கள் வருகின்றனர். பக்தர்களில் பலர் நேர்த்தி கடன் செலுத்துவதற்காக தங்களின் தலைமுடியை காணிக்கையாக செலுத்தி வருகின்றனர்.

பக்தர்களின் காணிக்கை தலைமுடி, வாகனங்கள் மூலம் திருப்பதிக்கு கொண்டு சென்று, அங்கு சுத்தம் செய்து, நீளம் மற்றும் நிறத்தின் அடிப்படையில் தரம் பிரித்து, ஒவ்வொரு மாதமும் முதல் வியாழக்கிழமை அன்று ஆன்லைன் மூலமாக ஏலம் விடப்படுகிறது.

அதன்படி நேற்று பக்தர்களின் காணிக்கை தலைமுடி ஏலம் விடப்பட்டது. இதில் 8 ஆயிரத்து 200 கிலோ எடையிலான தலைமுடி விற்பனையானது.

முதல் ரகம் கிலோ ஒன்றுக்கு 22 ஆயிரத்து 495 ரூபாய்க்கும், 2-வது ரக தலைமுடி கிலோ ஒன்றுக்கு 17 ஆயிரத்து 225 ரூபாய்க்கும், 4-வது ரகம் கிலோ ஒன்று 2000 ரூபாய்க்கும், 5-வது ரகம் கிலோ ஒன்றுக்கு 400 ரூபாய்க்கும் என ஆக மொத்தம் 8 ஆயிரத்து 200 கிலோ தலைமுடி ரூ. 10 கோடியே 48 லட்சம் ரூபாய்க்கு விற்பனையானது.

கோடை விடுமுறை முடிந்து பள்ளிகள் திறக்கப்பட்டதால், வைகுண்டம் காத்திருப்பு அறைகளில் காத்திருக்கும் பக்தர்களின் எண்ணிக்கை குறைந்துள்ளது.

300 ரூபாய் விரைவு தரிசனம், தர்ம தரிசனம், நடைபாதை தரிசனம் உள்ளிட்டவற்றில் தரிசன டோக்கன் பெற்ற பக்தர்கள் டோக்கனில் குறிப்பிட்ட நேரத்துக்கு சென்றால் 2 மணி நேரத்துக்குள் ஏழுமலையானைத் தரிசித்து திரும்பலாம்.

செவ்வாய்க்கிழமை மாலை முதல் புதன்கிழமை மாலை வரை ரூ.2.80 கோடி உண்டியல் வசூலானது.

ஏழுமலையானை புதன்கிழமை முழுவதும் 75,498 பக்தர்கள் தரிசனம் செய்தனர். இவர்களில் 41,029 பேர் தலைமுடி காணிக்கை செலுத்தினர். #Tirupati