நீங்கள் தேடியது "டெல்லி"

புதுடெல்லி:

டெல்லியை அடுத்த நொய்டாவில் உள்ள ஒரு வீட்டில் இருந்து 1,818 கிலோ சியுடோபெட்ரின் போதைப்பொருள் சமீபத்தில் கைப்பற்றப்பட்டது. இந்தியாவில் எப்போதும் இல்லாத அளவுக்கு மிக அதிக அளவில் சிக்கியிருக்கும் இந்த போதைப்பொருள் பறிமுதல் சம்பவம் குறித்து போதைப்பொருள் தடுப்பு பிரிவு அதிகாரிகள் சில தகவல்களை நேற்று வெளியிட்டனர். அதன்படி, தென்னாப்பிரிக்காவின் ஜோகன்னஸ்பர்க் நகருக்கு செல்ல இருந்த விமானத்தில் ஏறுவதற்காக டெல்லி விமான நிலையத்துக்கு கடந்த 9-ந்தேதி அந்த நாட்டை சேர்ந்த நொம்சா லுடாலோ (வயது 31) என்ற பெண் வந்துள்ளார்.

அவரை சோதனையிட்டபோது அவரிடம் 24.7 கிலோ சியுடோபெட்ரின் போதைப்பொருள் இருந்தது. அதை பறிமுதல் செய்ததுடன், அந்த பெண்ணையும் கைது செய்து அதிகாரிகள் விசாரணை நடத்தினர். அப்போது அந்த பெண்ணிடம் அந்த போதைப்பொருளை கொடுத்தது நைஜீரியாவை சேர்ந்த ஹென்றி இடியோபர் (35) என்ற வாலிபரும், சிமாண்டோ ஒகோரா (30) என்ற பெண்ணும் என தெரியவந்தது.

அதன்படி நொய்டாவில் அவர்கள் வசித்து வந்த வீட்டில் போதைப்பொருள் தடுப்பு பிரிவினர் சோதனையிட்டனர். அப்போது ஏராளமான கேன்கள் மற்றும் பெட்டிகளில் 1,818 கிலோ போதைப்பொருள் இருந்தது தெரியவந்தது. இதைத்தொடர்ந்து அவற்றை பறிமுதல் செய்த அதிகாரிகள், அந்த 2 பேரையும் கைது செய்தனர். பறிமுதல் செய்யப்பட்ட போதைப்பொருளின் மதிப்பு சுமார் ரூ.1000 கோடி என தெரிகிறது.

இந்த சம்பவம் தொடர்பாக மேலும் விசாரணை நடந்து வருகிறது.

புதுடெல்லி:

‘நீட்’ தேர்வில் தோல்வி அடைந்ததால் அரியலூரை சேர்ந்த மாணவி அனிதா தற்கொலை செய்து கொண்டார். இந்த சோக வடு, மாணவ-மாணவிகளின் மனதைவிட்டு இன்னும் அகலவில்லை. இந்த நிலையில் நீட் தேர்வுக்கு பயிற்சி அளிக்கும் வகையில் புதிய ‘செல்போன் செயலி’ ஒன்றை டெல்லியில் பிளஸ்-2 படிக்கும் தமிழக மாணவி ஒருவர் கண்டுபிடித்துள்ளார்.

அந்த மாணவியின் பெயர் இனியாள். கணினி மீது கொண்ட ஆர்வம் காரணமாக கணினி அறிவியல் படித்து வருகிறார். விருதுநகரை சேர்ந்த இவர் டெல்லியில் போலீஸ் பயிற்சி கல்லூரியில் இணை கமிஷனராக பணியாற்றி வரும் ஜெகதீசன் கண்ணன் என்பவரது மகள்.

இதுபற்றி மாணவி இனியாள் கூறுகையில், அனிதா போன்ற கிராமப்புற ஏழை மாணவர்கள் கட்டணம் செலுத்தி ‘நீட்’ தேர்வுக்கு பயிற்சி பெற முடியாது. அப்படிப்பட்ட மாணவ- மாணவிகளுக்கு இந்த செயலி பேருதவியாக இருக்கும். இதை ‘கூகுள் பிளே ஸ்டோரில்’ ‘ aNEETa ’ என ‘டைப்’ செய்து இலவசமாக பதிவிறக்கம் செய்து கொள்ளலாம். நீட் தேர்வுக்கு தயாராகும் வகையில் கேள்வி மற்றும் பதில்கள் உள்ளன என்றார்.

மாணவி இனியாள் மேற்கொண்ட இந்த முயற்சியை பல தரப்பினரும் பாராட்டி வருகின்றனர். 

புதுடெல்லி:

பா.ஜனதா கட்சியின் தேசிய செயற்குழு கூட்டம் கடந்த 18, 19-ந் தேதிகளில் நடைபெற இருந்தது. ஆனால் முன்னாள் பிரதமர் வாஜ்பாய் 16-ந் தேதி மரணம் அடைந்ததால் செயற்குழு கூட்டம் தேதி குறிப்பிடப்படாமல் ஒத்திவைக்கப்பட்டது.

இந்நிலையில் பா.ஜனதா தேசிய செயற்குழு கூட்டம் டெல்லியில் உள்ள டாக்டர் அம்பேத்கர் சர்வதேச மையத்தில் அடுத்த மாதம் (செப்டம்பர்) 8, 9-ந் தேதிகளில் நடைபெற உள்ளது. இந்த கூட்டத்தில் முதலில் வாஜ்பாய் மறைவுக்கு இரங்கல் தெரிவிக்கப்பட உள்ளது.

இரு நாட்கள் நடைபெறும் இக்கூட்டத்தில், பா.ஜனதா கட்சி ஆளும் மாநிலங்களான மத்திய பிரதேசம், ராஜஸ்தான், சத்தீஷ்கார் மாநிலங்களில் இந்த ஆண்டு இறுதியில் நடைபெற உள்ள சட்டமன்ற பொதுத்தேர்தல் குறித்தும், அடுத்த ஆண்டு நடைபெற இருக்கும் நாடாளுமன்ற பொதுத்தேர்தல் குறித்தும் விவாதிக்கப்பட உள்ளது.

கூட்டத்தில் பிரதமர் நரேந்திர மோடி மற்றும் தேசிய செயற்குழு உறுப்பினர்கள், மாநில தலைவர்கள், மாநில பொதுச் செயலாளர்கள், மாநில பொறுப்பாளர்கள் உள்ளிட்டோர் பங்கேற்க இருக்கின்றனர் என அக்கட்சியின் தேசிய செயலாளர் தருண் சக் செய்தியாளர்களிடம் நேற்று தெரிவித்தார்.

இதற்கு முன்பு பா.ஜனதா தேசிய செயற்குழு கூட்டம் கடந்த ஆண்டு செப்டம்பர் மாதம் நடைபெற்றது என்பது குறிப்பிடத்தக்கது.  #BJP #ExecutiveMeet