நீங்கள் தேடியது "ஊத்துக்கோட்டை"

திருவள்ளூர்:

வங்க கடலில் உருவாகி உள்ள குறைந்த காற்றழுத்தம் காரணமாக நேற்று முன்தினம் மாலை முதல் சென்னை மற்றும் புறநகர் பகுதிகளில் தொடர்ந்து மழை பெய்து வருகிறது.

நேற்று திருவள்ளூர் மாவட்டத்தில் பரவலாக கனமழை கொட்டியது. அதிகபட்சமாக 13 செ.மீ. மழை கொட்டி தீர்த்தது.

இந்த நிலையில் இன்று காலை சென்னை புறநகர் பகுதியான ஆவடி, அம்பத்தூர், புழல் உள்ளிட்ட பகுதிகளில் விட்டு விட்டு கனமழை கொட்டியது.

இதேபோல மீஞ்சூர், பொன்னேரி, பழவேற்காடு, ஊத்துக்கோட்டை பகுதியில் மழை பெய்தது. அதிக பட்சமாக ஊத்துக்கோட்டையில் 12.4 செ.மீட்டர் மழை பதிவாகி உள்ளது.

பெரியபாளையம் அருகே ராஜபாளையம் பகுதியில் சாலை அமைக்கும் பணி நடந்து வருகிறது. கனமழையால் இதன் அருகே உள்ள மாற்றுப்பாதை சேறும் சகதியாக காணப்படுகிறது.

இந்த நிலையில் இன்று காலை ஆவடியில் இருந்து மெய்யூர் நோக்கி வந்த மாநகர பஸ் இந்த சேற்றில் சிக்கிக் கொண்டது.

இதனால் சாலையின் இருபுறமும் ஏராளமான வாகனங்கள் ஸ்தம்பித்து நின்றன. பள்ளி, கல்லூரிக்கு செல்வோரும் வேலைக்கு செல்வோரும் பாதிக்கப்பட்டனர்.

பின்னர் கிராம மக்கள் டிராக்டர் மூலம் பஸ்சை இழுத்து மீட்டனர். இதன் பிறகு அப்பகுதியில் போக்கு வரத்து சீரானது.

பொன்னேரி பகுதியில் கொட்டிய கனமழை காரணமாக தாழ்வான இடங்களில் மழைநீர் குளம்போல தேங்கி கிடக்கிறது.

தடப்பெரும்பாக்கத்தில் விவேகானந்தர் தெரு. ராஜீவ் காந்தி தெரு, அம்பேத்கர் தெருக்களில் சுமார் 50 வீடுகளில் மழைநீர் சூழ்ந்துள்ளது. இதேபோல் பொன்னேரி என்.ஜி.ஓ. காலனி, பள்ளம், வேன்பாக்கம் உள்ளிட்ட இடங்களிலும் மழைநீர் தேங்கி கிடக்கிறது.

சென்னையில் இன்று காலை சில இடங்களில் சாரல் மழை பெய்தது. வானம் மேகமூட்டத்துடன் காணப்பட்டது. #Rain

ஊத்துக்கோட்டை:

ஊத்துக்கோட்டை அருகே உள்ள வெங்கடாபுரம் கிராமம் ஆதி திராவிட காலனி கிருஷ்ணன் கோவில் தெருவை சேர்ந்தவர் மோகன் (வயது 24), கூலித் தொழிலாளி. இவரது மனைவி அமராவதி (21), மகன் கவுதம் (3).

மோகன் மனைவி, மகனுடன் மோட்டார் சைக்கிளில் கட்சூருக்கு புறப்பட்டார். வெங்கடாபுரம் அருகே சென்று கொண்டிருந்தபோது திடீர் என்று கட்டுப்பாடு இழந்த மோட்டார் சைக்கிள் சாலை ஒரமாக உள்ள மின் கம்பத்தில் மோதியது.

இதில் தூக்கி வீசப்பட்ட 3 பேரும் படுகாயம் அடைந்தனர். அக்கம் பக்கத்தில் இருந்தவர்கள் அவர்களை மீட்டு கட்சூரில் உள்ள அரசு ஆரம்ப சுகாதார நிலையில் அனுமத்தித்தனர். பின்னர் மேல் சிகிச்சைக்காக சென்னை அரசு ஆஸ்பத்திரியில் சேர்த்தனர்.

அங்கு சிகிச்சை பலனின்றி மோகன் உயிரிழந்தார். அவரது மனைவி அமராவதி, மகன் கவுதம் ஆகியோருக்கு தீவிர சிகிச்சை அளிக்கப்பட்டு வருகிறது.

இதுகுறித்து பென்னாலூர் பேட்டை இன்ஸ்பெக்டர் பாலு விசாரணை நடத்தி வருகிறார்.

ஊத்துக்கோட்டை:

சென்னை கிண்டியில் உள்ள சாப்ட்வேர் நிறுவனத்தில் என்ஜினீயராக வேலை பார்த்து வந்தவர் கணேஷ் குமார் (வயது 29). இவரது சொந்த ஊர் கமுதி ஆகும்.

இவர் உடன் வேலை பார்க்கும் என்ஜினீயர் விக்னேஷ் என்பவருடன் மோட்டார் சைக்கிளில் ஊத்துக்கோட்டையை அடுத்த கோனே பகுதியில் உள்ள நீர் வீழ்ச்சிக்கு சென்றார். அங்குள்ள அருவியில் இருவரும் குளித்து விட்டு மாலையில் மோட்டார் சைக்கிளில் சென்னை நோக்கி புறப்பட்டனர்.

ஊத்துக்கோட்டை அருகே உள்ள சூளமேனி பகுதியில் வந்து கொண்டிருந்த போது திடீர் என்று மோட்டார் சைக்கிளின் பின்பக்க டயர் வெடித்தது. இதில் நிலை தடுமாறி 2 பேரும் கீழே விழுந்தனர்.

இதில் கணேஷ்குமாருக்கு தலையில் பலத்த காயம் ஏற்பட்டது. அவரை மீட்டு திருவள்ளூர் அரசு ஆஸ்பத்திரிக்கு கொண்டு சென்றனர். ஆனால் போகும் வழியிலேயே கணேஷ்குமார் பரிதாபமாக இறந்தார். விக்னேஷ் லேசான காயத்து டன் உயிர் தப்பினார்.

இது குறித்து ஊத்துக்கோட்டை இன்ஸ்பெக்டர் பாலு வழக்கு பதிவு செய்து விசாரணை நடத்தி வருகிறார்.

ஊத்துக்கோட்டை:

திருவள்ளூரை அடுத்த மெய்யூர் மேட்டு காலனி தெருவை சேர்ந்தவர் தாமோதரன் (58) லாரி டிரைவர்.

இவருடைய மனைவி காளியம்மாள் (50), இவர்களுக்கு தேவன் என்ற மகனும், மருதானி என்ற மகளும் உள்ளனர்.

தேவன் தனியார் கம்பெனியில் வேலை செய்து வருகிறார். சம்பவத்தன்று தேவன் தன் தாய் காளியம்மாள், தங்கை மருதானி ஆகியோரை மோட்டார் சைக்கிளில் ஏற்றி கொண்டு பென்னாலூர் பேட்டையில் உள்ள உறவினர் வீட்டுக்கு புறப்பட்டார்.

வெலமகண்டிகை பகுதியில் சென்ற போது புலிகுன்றம் கிராமத்தை சேர்ந்த சரவணன் என்பவர் ஒட்டி வந்த மோட்டார் சைக்கிள் தேவனின் மோட்டார் சைக்கிள் மீது மோதியது.

இதில் கீழே விழுந்த காளியம்மாள், தேவன், மருதானி ஆகியோர் படுகாயம் அடைந்தனர்.

இவர்களை 108 ஆம்புலன்ஸ் மூலம் திருவள்ளூர் அரசு ஆஸ்பத்திரிக்கு கொண்டு சென்றனர். உயிருக்கு ஆபத்தான நிலையில் காளியம்மாளை மேல் சிகிச்சைக்காக சென்னை அரசு ஆஸ்பத்திரியில் சேர்தனர்.

அங்கு சிகிச்சை பலனின்றி பரிதாபமாக இறந்தார். இது குறித்து பென்னாலூர்பேட்டை இன்ஸ்பெக்டர் பாலு வழக்கு பதிவுசெய்து விசாரணை நடத்தி வருகிறார்.

ஊத்துக்கோட்டை:

ஊத்துக்கோட்டை நகர எல்லையில் ஆரணி ஆறு பாய்கிறது. இந்த ஆறு ஊத்துக்கோட்டை மற்றும் சுற்று வட்டாரத்தில் உள்ள 25-க்கும் மேற்பட்ட கிராமங்களுக்கு குடிநீர் ஆதாரமாக உள்ளது.

இந்த நிலையில் ஆரணி ஆற்றில் கடந்த 1-ந் தேதி அரசு மணல் குவாரி தொடங்கியது. இதற்கு கிராம மக்கள் எதிர்ப்பு தெரிவித்து வந்தனர்.

குவாரியை மூடக் கோரி கடந்த 1-ந் தேதி ஊத்துக்கோட்டையில் அனைத்து கடைகள் மூடப்பட்டன. அனைத்துக்கட்சி மனித சங்கிலி போராட்டமும் 2-ந் தேதி அம்மா மக்கள் முன்னேற்ற கழகம் சார்பில் சாலை மறியலும் நடந்தது. எனினும் மணல் குவாரி தொடர்ந்து நடந்து வந்தது.

இதனை கண்டித்தும், மணல் குவாரியை உடனடியாக மூட வலியுறுத்தியும் ஊத்துக்கோட்டை அண்ணா சிலை அருகில் பெண்கள் திடீரென சாலை மறியலில் ஈடுபட்டனர்.

துணை போலீஸ் சூப்பிரண்டு சந்திரதாசன், இன்ஸ்பெக்டர் பாலு தலைமையில் போலீசார் மறியலில் ஈடுபட்ட 55 பெண்களை கைது செய்னர். அவர்களை ஊத்துக்கோட்டை திருவள்ளூர் சாலையில் உள்ள திருமண மண்டபத்தில் தங்க வைத்தனர்.