நீங்கள் தேடியது "இரங்கல்"

மாஸ்கோ:

பஞ்சாப் மாநிலம் அமிர்தசரஸ் அருகே சவுர பஜார் பகுதியில் நேற்று இரவு தசரா விழா கோலகமால கொண்டாடப்பட்டது. அப்போது ராவணனின் கொடும்பாவியை எரிக்கும் நிகழ்ச்சியின் போது, எதிர்ப்பாராதவிதமாக ஏற்பட்ட ரெயில் விபத்தில் 61 பேர் பரிதாபமாக உயிரிழந்தனர். மேலும், பலர் படுகாயங்களுடன் மருத்துவமனையில் அனுமதிக்கப்பட்டுள்ளதால் உயிரிழப்புகள் அதிகரிக்கக்கூடும் என அஞ்சப்படுகிறது.


இந்நிலையில், பஞ்சாப் மாநிலத்தில் ஏற்பட்ட விபத்துக்கு ரஷ்ய அதிபர் விளாடிமிர் புதின் இரங்கல் தெரிவித்துள்ளார். பஞ்சாப் மாநிலத்தில் ஏற்பட்ட விபத்தில் 61 பேர் உயிரிழந்த சம்பவம் மிகுந்த வருத்தம் அளிப்பதாகவும், இறந்தவர்களின் குடும்பத்தினர் மற்றும் உறவினர்களுக்கு இரங்கலை தெரிவிப்பதாகவும் தெரிவித்துள்ளார்.

மேலும், காயமடைந்தவர்கள் விரைவில் குணமடைய வேண்டும் எனவும் ரஷ்ய அதிபர் விளாடிமிர் புதின் குறிப்பிட்டுள்ளார். #AmritsarTrainAccident

சென்னை:

அ.தி.மு.க. ஒருங்கிணைப்பாளர், துணை முதல்-அமைச்சர் ஓ.பன்னீர்செல்வம், இணை ஒருங்கிணைப்பாளர் முதல்-அமைச்சர் எடப்பாடி பழனிசாமி வெளியிட்டுள்ள இரங்கல் செய்தி வருமாறு:-

வடசென்னை வடக்கு (கிழக்கு) மாவட்ட அவைத் தலைவர் கோயில் பிள்ளை மாரடைப்பால் மரண மடைந்து விட்டார் என்ற செய்தி கேட்டு மிகுந்த வருத்தமுற்றோம்.

ஆரம்ப கால கழக உடன்பிறப்பு கோயில் பிள்ளை கழகத்தின் மீதும், கழகத் தலைமையின் மீதும் மிகுந்த விசுவாசம் கொண்டு பல்வேறு பொறுப்புகளில் பணியாற்றிய சிறப்புக்குரியவர்.

அவரை இழந்து வாடும் குடும்பத்தினருக்கு எங்களது ஆழ்ந்த இரங்கலையும் அனுதாபத்தையும் தெரிவித்துக் கொள்வதுடன், அன்னாரது ஆன்மா இறைவன் திருவடி நிழலில் அமைதி பெற எல்லாம் வல்ல இறைவனைப் பிரார்த்திக்கிறோம்.

இவ்வாறு கூறியுள்ளனர். #ADMK

ஐதராபாத்:

ஆந்திர முன்னாள் முதல்-மந்திரி என்.டி.ராமராவின் மகனும், மாநிலத்தின் முன்னாள் மந்திரியுமான நடிகர் ஹரிகிருஷ்ணா நேற்று அதிகாலையில் நடந்த கார் விபத்தில் மரணமடைந்தார்.

தெலுங்குதேசம் கட்சியின் நிறுவனரும், ஒன்றுபட்ட ஆந்திராவின் முன்னாள் முதல்-மந்திரியுமான என்.டி.ராமராவின் 4-வது மகன் நந்தமுறி ஹரிகிருஷ்ணா (வயது 61). திரைத்துறையிலும், தெலுங்குதேசம் கட்சியிலும் புகழ்பெற்று விளங்கிய இவர் ஆந்திராவின் நெல்லூர் மாவட்டத்தில் நேற்று நடந்த ரசிகர் ஒருவரின் திருமணத்துக்காக சொகுசு காரில் கிளம்பினார்.

ஐதராபாத்தில் இருந்து மேலும் இருவருடன் காரில் புறப்பட்ட ஹரிகிருஷ்ணா, அண்டாங்கி-நார்கெட்பள்ளி தேசிய நெடுஞ்சாலையில் அதிகாலையில் சென்று கொண்டிருந்தார். காரை அவரே ஓட்டினார்.

தெலுங்கானாவின் நல்கொண்டா மாவட்டம் அன்னபார்திக்கு அருகே சென்ற போது, முன்னால் சென்று கொண்டிருந்த ஒரு வாகனத்தை முந்தி செல்ல முயன்றார் ஹரிகிருஷ்ணா. அப்போது திடீரென கார் அவரது கட்டுப்பாட்டை இழந்து தறிகெட்டு ஓடியது.

சாலையின் நடுவில் இருந்த தடுப்புச்சுவரில் மோதி பலமுறை உருண்டு, ரோட்டின் மறுபுறம் போய் விழுந்தது. அப்போது எதிர் திசையில் வந்த ஒரு மாருதி கார் மீது பயங்கரமாக மோதி கவிழ்ந்தது. கண்ணிமைக்கும் நேரத்தில் நடந்த இந்த விபத்தில் கார் அப்பளம் போல நொறுங்கியது.

இதில் காருக்குள் இருந்த ஹரிகிருஷ்ணாவுக்கு தலை உள்ளிட்ட இடங்களில் பலத்த காயம் ஏற்பட்டது. மேலும் காரில் இருந்த மற்ற இருவரும் காயமடைந்தனர்.
உடனே அக்கம்பக்கத்தினர் அங்கு விரைந்து வந்து காருக்குள் இருந்த மூவரையும் மீட்டு நாகர்கெட்பள்ளியில் உள்ள காமினேனி மருத்துவமனையில் சிகிச்சைக்காக சேர்த்தனர். அங்கு அவர்களுக்கு தீவிர சிகிச்சை அளிக்கப்பட்டது. எனினும் சிகிச்சை பலனின்றி ஹரிகிருஷ்ணா, காலை 7.30 மணியளவில் மரணமடைந்தார்.

திருமணத்துக்கு தாமதமாக கிளம்பியதால் விரைவாக செல்ல வேண்டுமென எண்ணி ஹரிகிருஷ்ணா, காரை வேகமாக ஓட்டியதாக தெரிகிறது. அவர் 150 கி.மீ. வேகத்தில் சென்றிருக்கலாம் எனவும், அதுவே விபத்துக்கு காரணம் எனவும் கூறப்படுகிறது.

நடிகர் ஹரிகிருஷ்ணா ஒன்றுபட்ட ஆந்திராவின் நிம்மக்குருவில் 1956-ம் ஆண்டு செப்டம்பர் 2-ந்தேதி பிறந்தவர். சிறுவயதிலேயே சினிமாவில் குழந்தை நட்சத்திரமாக அறிமுகமான இவர், தனது தந்தை என்.டி.ராமராவுடனும் இணைந்து நடித்துள்ளார்.

பின்னர் படிப்படியாக உயர்ந்து தெலுங்கு திரையுலகில் முன்னணி நடிகரானார். ‘டல்லா பெல்லம்மா’, ‘டட்டம்மா கலா’, ‘ராம் ரகீம்’, ‘சீதாராமா ராஜு’, ‘லாகிரி லாகிரி லாகிரிலோ’, ‘சீதய்யா’ உள்ளிட்ட திரைப்படங்கள் அவருக்கு நல்ல பெயரைப் பெற்றுத்தந்தன.

இடையில் தெலுங்குதேசம் கட்சியில் இணைந்து தீவிர அரசியலில் குதித்த இவர், 1996-ல் மாநில போக்குவரத்து மந்திரியானார். 2008-ல் மாநிலங்களவை உறுப்பினராகவும் தேர்ந்தெடுக்கப்பட்டார். பின்னர் ஆந்திர பிரிவினைக்கு எதிர்ப்பு தெரிவித்து 2013-ல் அந்த பதவியை ராஜினாமா செய்தார். தற்போது கட்சியின் பொலிட்பீரோ உறுப்பினராக இருந்து வந்தார்.

உயிரிழந்த ஹரிகிருஷ்ணாவுக்கு முதல் மனைவி லட்சுமி மூலம் ஜானகிராம், கல்யாண் ராம் என்ற 2 மகன்களும், சுகாசினி என்ற மகளும் இருந்தனர். 2-வது மனைவி ஷாலினி மூலம் தாரகா ராம் என்ற மகன் உள்ளார். ஜூனியர் என்.டி.ஆர். என அழைக்கப்படும் இவரும், கல்யாண் ராமும் தற்போது தெலுங்கு திரையுலகில் முன்னணி நடிகர்களாக உள்ளனர்.

ஹரிகிருஷ்ணாவின் மற்றொரு மகனான ஜானகி ராம், கடந்த 2014-ம் ஆண்டு நடந்த சாலை விபத்து ஒன்றில் உயிரிழந்தது குறிப்பிடத்தக்கது.

கார் விபத்தில் நடிகர் ஹரிகிருஷ்ணா உயிரிழந்த தகவல் அறிந்ததும் அவரது சகோதரரும், நடிகருமான பாலகிருஷ்ணா, மகன்கள் ஜூனியர் என்.டி.ஆர்., கல்யாண் ராம் ஆகியோர் மருத்துவமனைக்கு விரைந்தனர். அவர்கள் ஹரிகிருஷ்ணாவின் உடலை ஐதராபாத்தின் மெகதிபட்டணத்தில் உள்ள அவரது இல்லத்துக்கு கொண்டு சென்றனர்.

அங்கு முருதுசகுடாவில் உள்ள நந்தமுறி குடும்ப பண்ணை தோட்டத்தில் இன்று (வியாழக்கிழமை) இறுதிச்சடங்கு நடக்கிறது. ஹரிகிருஷ்ணாவின் உடலுக்கு அரசு மரியாதையுடன் இறுதிச்சடங்கு நடைபெறும் என தெலுங்கானா முதல்-மந்திரி சந்திரசேகர் ராவ் கூறியுள்ளார்.

ஹரிகிருஷ்ணாவின் மறைவு ஆந்திர அரசியல் மற்றும் திரைத்துறையில் பெருத்த சோகத்தை ஏற்படுத்தி உள்ளது. அவரது மைத்துனரும், ஆந்திர முதல்-மந்திரியுமான சந்திரபாபு நாயுடு தனது மகன் லோகேசுடன் வந்து ஹரிகிருஷ்ணாவின் உடலுக்கு கண்ணீர் மல்க அஞ்சலி செலுத்தினார். இதைப்போல பல்வேறு அரசியல், திரையுலக பிரபலங்கள் கண்ணீர் அஞ்சலி செலுத்தி வருகின்றனர்.

நடிகர் ஹரிகிருஷ்ணாவின் மறைவுக்கு துணை ஜனாதிபதி வெங்கையா நாயுடு, தெலுங்கானா முதல்-மந்திரி சந்திரசேகர் ராவ், ஒய்.எஸ்.ஆர். காங்கிரஸ் தலைவர் ஜெகன்மோகன் ரெட்டி உள்ளிட்ட தலைவர்கள் இரங்கல் தெரிவித்து உள்ளனர்.  #NandamuriHarikrishna #NTR

இஸ்லாமாபாத்:

பா.ஜ.க கட்சியின் பிதாமகனும், இந்தியாவின் மிக மூத்த அரசியல் தலைவருமான அடல் பிகாரி வாஜ்பாய் தனது 93-வது வயதில் இன்று டெல்லி எய்ம்ஸ் மருத்துவமனையில் காலமானார். மிகச்சிறந்த பேச்சாளரும், கவிஞரும், மாபெரும் அரசியல் ஞானம் பெற்ற தலைவருமான இவரது மறைவுக்கு இந்திய நாடு முழுவதும் துக்கம் அனுசரிக்கப்பட்டுள்ளது.

இவரது மறைவுக்கு மரியாதை செலுத்தும் வகையில் பல்வேறு மாவட்டங்களில் பொதுவிடுமுறை அறிவிக்கப்பட்டதுடன், 7 நாட்களுக்கு துக்கம் அனுசரிக்கப்படும் என மத்திய அரசு அறிவித்துள்ளது. நாளை முன்னாள் பிரதமருக்கு உரிய மரியாதைகளுடன் இறுதி சடங்கு நடத்தப்படும் எனவும் தெரிவிக்கப்பட்டுள்ளது.

இந்நிலையில், பாரத ரத்னா வாஜ்பாயின் மறைவுக்கு பாகிஸ்தான் அரசு இரங்கல் தெரிவித்துள்ளது. பாகிஸ்தான் அரசு தெரிவித்த இரங்கல் செய்தியில், இந்தியா பாகிஸ்தான் உறவை மேம்படுத்துவதில் இவரது பங்கு மகத்துவமானது என்றும், சார்க் கூட்டமைப்பின் முக்கிய ஆதரவாளர்களில் ஒருவருமான வாஜ்பாயின் மறைவு வருத்தம் அளிப்பதாக தெரிவித்துள்ளது.

மேலும், பாகிஸ்தான் அரசும் மக்களும், வாஜ்பாயை இழந்து தவிக்கும் அவரது குடும்பத்தினருக்கும், இந்திய மக்களுக்கும் தங்களது இரங்கலை தெரிவித்துக் கொள்வதாக அந்த இரங்கல் செய்தியில் குறிப்பிடப்பட்டுள்ளது. #AtalBihariVajpayee #RIPVajpayee #PakistanGovt

புதுடெல்லி:

இந்தியாவின் மிக மூத்த அரசியல் தலைவர்களில் ஒருவரும், முன்னாள் பிரதமருமான வாஜ்பாய் கடந்த 9 வாரங்களாக டெல்லி எய்ம்ஸ் மருத்துவமனையில் சிகிச்சை பெற்று வந்தார். 93 வயதான இவரது உடல்நிலை இன்று காலை மிகவும் மோசமடைந்ததாக வெளியிடப்பட்ட அறிக்கையை தொடர்ந்து மாலை 5 மணியளவில் இயற்கை எய்தினார்.

இவரது மறைவுக்கு காங்கிரஸ் தலைவர் ராகுல் காந்தி, முன்னாள் பிரதமர் மன்மோகன் சிங் ஆகியோர் தங்களது ஆழ்ந்த இரங்கலை தெரிவித்துள்ளனர். வாஜ்பாயின் மறைவு தொடர்பான தனது இரங்கல் செய்தியில், இந்தியா தனது மிகச்சிறந்த மகனை இழந்துவிட்டதாக காங்கிரஸ் தலைவர் ராகுல் காந்தி தெரிவித்துள்ளார்.



அதேபோல், மிகச்சிறந்த சொற்பொழிவாளரும், ஈர்க்கத்தக்க கவிஞரும், தனித்துவமிக்க பொதுநல சேவகரும், முதன்மை பிரதமருமான வாஜ்பாயின் மறைவு ஆழ்ந்த துக்கம் அளிப்பதாக மன்மோகன் சிங் தனது இரங்கல் செய்தியில் குறிப்பிட்டுள்ளார். #AtalBihariVajpayee #RIPVajpayee #RahulGandhi #ManmohanSingh

சென்னை:

பாராளுமன்ற முன்னாள் சபாநாயகர் சோம்நாத் சாட்டர்ஜி மறைவுக்கு தலைவர்கள் இரங்கல் தெரிவித்துள்ளனர்.

தி.மு.க. செயல் தலைவர் மு.க.ஸ்டாலின்:-

தலைவர் கலைஞரின் நெருங்கிய நண்பராக இருந்த சோம்நாத் சாட்டர்ஜி பாராளு மன்ற ஜனநாயகத்தின் மாண்புகளை கட்டி காக்கும் தலைவராகவும், மக்களவையை கட்சி மனமாச்சரியங்களுக்கு அப்பாற்பட்டு நடுநிலை தவறாது நடத்தியவர். தமிழ்நாடு சட்டமன்ற பொன்விழாவில் கலைஞர் அழைப்பினை ஏற்று பங்கேற்று தமிழ் நாட்டிற்கு பெருமை சேர்த்தவர். ஜனநாயக மரபுகளை பாதுகாத்த மிகச் சிறந்த தலைவரின் மறைவு பாராளுமன்ற ஜனநாயகத்திற்கும் நாட்டிற்கும் பேரிழப்பாகும்.

ம.தி.மு.க. பொதுச்செயலாளர் வைகோ:-

இந்திய நாடாளுமன்றத்தில் பத்து முறை மக்களவை உறுப்பினராக இருந்து அனைவரின் பாராட்டையும் பெறும் விதத்தில் அனைத்து விவாதங்களிலும் பங்கேற்று தனது ஆணித்தரமான திறமையால் இந்திய நாடாளுமன்றத்திற்கு பெருமை சேர்த்தவர் சோம்நாத் சாட்டர்ஜி. அவரது மறைவு இந்திய நாட்டின் பொதுவாழ்வுக்கும், நாடாளுமன்ற ஜனநாயகத்திற்கும் ஈடு செய்ய முடியாத இழப்பாகும்.

பா.ம.க. இளைஞர் அணி தலைவர் அன்புமணி ராமதாஸ்:-

சோம்நாத் சாட்டர்ஜி ஏராளமான சிறப்புகளுக்கு சொந்தக்காரர். புகழ்பெற்ற மனித உரிமை போராளி நிர்மல் சந்திர சாட்டர்ஜியின் புதல்வரான சோம்நாத் சாட்டர்ஜி தலைசிறந்த கல்வியாளர். மார்க்சிஸ்டு கம்யூனிஸ்டு கட்சி சார்பில் 10 முறை மக்களவைக்கு தேர்ந்தெடுக்கப்பட்டவர். பொது வாழ்வில் நேர்மையையும், தூய்மையையும் கடை பிடித்தவர். மக்களவைத் தலைவராக பணியாற்றிய போது அரசு மாளிகையில் தங்கியிருந்தபோது தமது சொந்த தேவைகளை சொந்த செலவில் நிறைவேற்றிக் கொண்டார். அவரது மறைவு இடதுசாரி அரசியலுக்கும், நேர்மை அரசியலுக்கும் ஈடு செய்ய முடியாத இழப்பு ஆகும்.

தமிழ் மாநில காங்கிரஸ் தலைவர் ஜி.கே.வாசன்:-

நாடாளுமன்ற மக்களவையின் முன்னாள் சபாநாயகர் சோம்நாத் சாட்டர்ஜியின் மறைவு மிகவும் வேதனைக்குரியது. நாடாளுமன்றத்தில் ஒரு உறுப்பினர் எவ்வாறு செயல்பட்டு தனக்கு வாக்களித்த மக்களுக்கும், நாட்டிற்கும் பயன்தர வேண்டும் என்பதற்கு முன் மாதிரியாக இருந்தவர். அவரது இழப்பு மார்க்சிஸ்ட் கம்யூனிஸ்டு கட்சிக்கும், மேற்கு வங்கத்திற்கும் பேரிழப்பு. அது மட்டுமல்ல அவரது இழப்பு இந்திய நாட்டிற்கே பேரிழப்பு.

அம்மா மக்கள் முன்னேற்றக் கழக துணை பொதுச் செயலாளர் டி.டி. வி.தினகரன்:-

மூத்த கம்யூனிஸ்டு தலைவரும், முன்னாள் லோக்சபா சபாநாயகருமான சோம்நாத் சாட்டர்ஜியின் மறைவு செய்தி கேட்டு வருத்தமுற்றேன். பத்துமுறை நாடாளுமன்ற உறுப்பினராகவும், மிகச் சிறந்த பண்பாளராகவும் திகழ்ந்த சோம்நாத் சாட்டர்ஜியின் மறைவு ஈடு செய்ய முடியாத இழப்பாகும்.

சோம்நாத் சாட்டர்ஜி நாட்டில் உள்ள ஏழைகள், பிற்படுத்தப்பட்டவர்கள், ஒடுக்கப்பட்டவர்கள் ஆகியோர் நலனுக்காக ஓயாமல் குரல் கொடுத்தவர். இந்திய அரசியலில் அனைவருக்கும் மிகச் சிறந்த வழிகாட்டியாக திகழ்ந்தவர். இவரது இழப்பு மார்க்சிஸ்ட் கம்யூனிஸ்டு கட்சிக்கு ஈடு செய்ய முடியாத இழப்பாகும்.

இவ்வாறு அவர்கள் கூறியுள்ளனர். #SomnathChatterjee