நீங்கள் தேடியது "ஐகோர்ட்டு"

சென்னை:

ஐகோர்ட்டில், டிராபிக் ராமசாமி ஒரு பொதுநல மனு தாக்கல் செய்தார். அந்த மனுவில் அவர் கூறியிருப்பதாவது:-

தமிழகம் முழுவதும் அரசியல் கட்சிகள், பொதுமக்களுக்கு இடையூறு ஏற்படுத்தும் விதமாக பேனர்களை வைக்கின்றனர். நடக்கக்கூட முடியாத அளவுக்கு நடைபாதைகளில் பேனர்களை வைக்கின்றனர்.

இவர்கள் மீது அதிகாரிகள் நடவடிக்கை எடுப்பது இல்லை. கூட்டு சேர்ந்து அதிகாரிகள் செயல்படுகின்றனர். எனவே, அனுமதிப் பெற்று பேனர் வைத்தாலும், அந்த அனுமதியை யார் வழங்கியது? எத்தனை நாட்களுக்கு அந்த பேனர் வைத்துக் கொள்ளலாம்? என்பது உள்ளிட்ட விவரங்கள் அந்த பேனரில் அச்சிட வேண்டும் என்று அரசுக்கு உத்தரவிட வேண்டும். இதுதொடர்பாக சட்டத்திருத்தம் கொண்டு வர உத்தரவிட வேண்டும்.

இவ்வாறு அதில் கூறப்பட்டிருந்தது.

இந்த வழக்கை தலைமை நீதிபதி இந்திரா பானர்ஜி, நீதிபதி பி.டி. ஆஷா ஆகியோர் இன்று விசாரித்தனர். பின்னர், ‘பொதுஇடங்களில் பேனர்கள் வைப்பதற்கு முன்பு சென்னை மாவட்டத்துக்கு, மாவட்ட கலெக்டர் அனுமதி வழங்கினார். இப்போது மாநகராட்சி அனுமதி வழங்குகிறது. எனவே, அந்த பேனரில், எந்த அதிகாரி பேனர் வைப்பதற்கு அனுமதி வழங்கினார்? எத்தனை நாட்கள் பேனர் வைக்கலாம்? அந்த பேனரில் அளவு எவ்வளவு? என்பது உள்ளிட்ட அனைத்து விவரங்களும், அந்த பேனரின் கீழ் பகுதியில் அச்சிட்டிருக்க வேண்டும். இதற்காக, சென்னை நகர நகராட்சி மற்றும் மாநகராட்சி சட்டத்தில் திருத்தம் கொண்டு வரவேண்டும். இந்த சட்டத்திருத்தத்தை 6 மாதத்துக்குள் கொண்டு வர வேண்டும்’ என்று உத்தரவிட்டனர். #Highcourt

சென்னை:

காஞ்சீபுரம் மாவட்டம், மதுராந்தகத்தை சேர்ந்த கே.ஜி.எத்திராஜ். தனது 9 சென்ட் நிலத்துக்கு பட்டா கேட்டு மதுராந்தகம் தாசில் தாரிடம் விண்ணப்பம் செய்தார்.

அவரது கோரிக்கை பரிசீலிக்கப்படாததால், ஐகோர்ட்டில் வழக்கு தொடர்ந்தார். இவரது கோரிக்கையை பரிசீலித்து பட்டா வழங்க ஐகோர்ட்டு 2013-ம் ஆண்டு உத்தரவிட்டது.

இதனடிப்படையில் தாசில்தார் ஏழரை சென்ட் நிலத்துக்கு மட்டுமே பட்டா வழங்கினார்.

இதையடுத்து மதுராந்தகம் தாசில்தார் மீது கோர்ட்டு அவமதிப்பு சட்டத்தின் கீழ் வழக்கு தொடர்ந்தார். 2013-ம் ஆண்டு முதல் இந்த வழக்கு நிலுவையில் உள்ளது. இந்த வழக்கு நீதிபதிசத்தியநாராயணன் முன்பு இன்று விசாரணைக்கு வந்தது.

அப்போது கோர்ட்டு உத்தரவிட்டு 5 ஆண்டுகள் ஆகியும் இதுவரை நடவடிக்கை எடுக்கவில்லை என்று மனுதாரர் வக்கீல் சத்தியா வாதிட்டார்.

இதையடுத்து அரசுக்கு கண்டனம் தெரிவித்த நீதிபதி, 2013-ம் ஆண்டு முதல் மதுராந்தகத்தில் தாசில் தார்களாக இருந்தவர்கள் யார்? அவர்களது பெயர் என்ன? ஏன் அவர்கள் ஐகோர்ட்டு உத்தரவை 5 ஆண்டுகளாக நிறைவேற்ற வில்லை? என்பது உள்ளிட்ட அனைத்து விவரங்களுடன் காஞ்சீபுரம் கலெக்டர் பதில் மனு தாக்கல் செய்ய வேண்டும் என்று உத்தரவிட்டார். #Highcourt

சென்னை:

மீனவர்களை தாழ்த்தப்பட்ட அல்லது பழங்குடியினர் வகுப்பில் சேர்த்து அவர்கள் அதிகம் வசிக்கும் பகுதியை தனி தொகுதியாக வரையறை செய்யவும், மீனவ கிராமங்களை தனி கிராம பஞ்சாயத்தாக அறிவிக்க வேண்டும் என்றும் மண்டல் கமி‌ஷன் கடந்த1980-ம் ஆண்டு பரிந்துரைத்துள்ளது.

தமிழகத்தில் உள்ளாட்சி தேர்தலுக்கு முன் மீனவ கிராமங்களை தனி கிராம பஞ்சாயத்தாக அறிவிக்கக்கோரி சென்னை ஐகோர்ட்டில் மீனவர் பாதுகாப்பு சங்கம் வழக்கு தொடர்ந்துள்ளது.

மண்டல் கமி‌ஷன் பரிந்துரைபடி மீனவ கிராமங்களை கிராம பஞ்சாயத்தாக அறிவிக்க வேண்டும் என கொடுத்த மனு மீது இதுவரை தமிழக அரசு நடவடிக்கை இல்லை என்று மனுவில் கூறப்பட்டு இருந்தது.

மேலும் அந்த மனுவில், தமிழகத்தில் 13 கடலோர மாவட்டங்களில் 608 மீனவ கிராமங்கள் உள்ளன. 9.24 லட்சம் மக்கள் தொகை உள்ளது.

கிராம பஞ்சாயத்துகளுக்கு ஒதுக்கும் நிதி மீனவ கிராமங்களுக்கு சென்றடையவில்லை என்றும் கூறப்பட்டிருந்தது.

இந்த வழக்கை விசாரித்த நீதிபதிகள் சிவஞானம், பவானி சுப்பராயன், தமிழக அரசு, மாநில தேர்தல் ஆணையம் வார்டு மறுவரையரை குழு உள்ளிட்டோர் ஆகஸ்டு 17-ந்தேதிக்குள் பதிலளிக்க வேண்டும் என்று கூறி நோட்டீசு அனுப்ப உத்தரவிட்டனர். #Fishermenvillage

சென்னை:

நாகப்பட்டினம் மாவட்டத்தை சேர்ந்த நர்சிங் கல்லூரி மாணவி தீபிகா. இவர், பாரத ஸ்டேட் வங்கியின் வேதாரண்யம் கிளையில் கல்விக்கடன் கேட்டு விண்ணப்பித்தார்.

இவரது தந்தை கடன் பெற்று அதை முறையாக திருப்பிச் செலுத்தாததால் இவருக்கு கல்விக்கடன் வழங்க முடியாது என்று வங்கி மேலாளர் மறுத்துவிட்டார். இதை எதிர்த்து சென்னை ஐகோர்ட்டில் தீபிகா வழக்கு தொடர்ந்தார்.

இந்த வழக்கை விசாரித்த நீதிபதி எஸ்.வைத்தியநாதன், கடனை கொடுத்து விட்டு, கடனாளி பின்னால் வங்கி அதிகாரிகள் ஓடுவதை விட, கடனை கொடுக்க மறுப்பது சரியே என்று தீர்ப்பு அளித்தார்.

இந்த தீர்ப்பை எதிர்த்து சென்னை ஐகோர்ட்டில் அந்த மாணவி வழக்கு தொடர்ந்தார். அதில், வாங்கிய கடனை திருப்பிச் செலுத்தாதவர் என்று தந்தை மீது பழி சுமத்தியதற்காக வங்கி நிர்வாகம் ரூ.10 லட்சம் இழப்பீடு தரவேண்டும் என்றும் கூறியுள்ளார்.

இந்த வழக்கு நீதிபதிகள் ஹூலுவாடி ஜி.ரமேஷ், எம்.தண்டபாணி ஆகியோர் முன்பு விசாரணைக்கு வந்தது.

அப்போது தீபிகாவின் தந்தை வாங்கிய கடனை திருப்பிச் செலுத்தவில்லை என்று வங்கி நிர்வாகம் தரப்பில் வாதிடப்பட்டது.

இதையடுத்து அவரது தந்தை வாங்கிய கடன் தொடர்பான ஆவணங்களை தாக்கல் செய்யும்படி பாரத ஸ்டேட் வங்கிக்கு நீதிபதிகள் உத்தரவிட்டனர்.

விசாரணையை வருகிற 17-ந்தேதிக்கு தள்ளி வைத்தனர். #Highcourt

சென்னை:

தமிழகத்தில் புராதன மற்றும் பழமையான கோவில்களில் உள்ள சிலைகள் கடத்தப்பட்டது. இவற்றை, சிலைக் கடத்தல் தடுப்பு பிரிவு போலீஸ் அதிகாரிகள் கடத்தி, சர்வதேச கடத்தல் கும்பலிடம் விற்பனை செய்துள்ளது.

இதுகுறித்து தொடரப்பட்ட வழக்கை விசாரித்த சென்னை ஐகோர்ட்டு நீதிபதி மகாதேவன், ஐ.ஜி. பொன்.மாணிக்கவேல் தலைமையில் சிறப்பு படையை உருவாக்கினார். பின்னர் கும்பகோணம் தலைமை மாஜிஸ்திரேட்டு கோர்ட்டை சிறப்பு கோர்ட்டாக அறிவித்தார். தமிழகம் முழுவதும் காணாமல் போன சிலைகள் குறித்து இந்த தனிப்படை விசாரிக்க உத்தரவிட்டார்.

இந்த வழக்கு அவ்வப்போது சென்னை ஐகோர்ட்டு நீதிபதி மகாதேவன் முன்பு விசாரணைக்கு வருகிறது. கடந்த முறை விசாரணைக்கு வந்தபோது, கோவில் சிலைகளை பாதுகாக்க எடுக்கவேண்டிய நடவடிக்கை உள்ளிட்டவை தொடர்பாக ஐகோர்ட்டு ஏற்கனவே பிறப்பித்த உத்தரவை அமல்படுத்த வில்லை என்று நீதிபதி கருத்து கூறியிருந்தார்.

இந்த நிலையில், இந்த வழக்கு நீதிபதி மகாதேவன் முன்பு இன்று விசாரணைக்கு வந்தது.

அப்போது நீதிபதி மகாதேவன், சைவமும், வைணவமும் தழைத்தோங்கும் தமிழகத்தில் சிலைத் திருட்டு என்பது தொடர்ந்து கொண்டிருக்கிறது. இதே நிலை நீடிக்குமானால் சிலை கடத்தல் தொடர்பான வழக்கை சி.பி.ஐ. விசாரணைக்கு மாற்ற வேண்டும். சி.பி.ஐ. விசாரணைக்கு ஏன் மாற்றக்கூடாது? என்று கேள்வி எழுப்பினார்.

ரங்கராஜன் நரசிம்மன் என்பவர் எழுந்து, சிலை கடத்தல் வழக்கை நீதிமன்றம் விசாரித்து கொண்டிருக்கும் பொழுதே அண்ணாமலை யார் பஞ்சலோக சிலை மாயமாகி விட்டது. ஸ்ரீரங்கம் கோவில் சிலைகள் சேதப்படுத்தப்பட்டுள்ளது. இமெயில் மூலம் பல புகார்களை அரசுக்கு அனுப்பியும் எந்த பயனும் இல்லை என்று குற்றம்சாட்டினார்.

இதுகுறித்து இந்து சமய அறநிலையத்துறை சிறப்பு பிளீடர் மகாராஜனிடம் கருத்து கேட்ட நீதிபதி, பின்னர் இதுகுறித்து பதில் மனு தாக்கல் செய்ய உத்தரவிட்டார். விசாரணையை 13-ந்தேதிக்கு தள்ளி வைத்தார்.