மாருதி சுசுகி நிறுவனம் தனது பலேனோ ஃபேஸ்லிஃப்ட் மாடல் காரினை இந்தியாவில் ஜனவரி 27 ஆம் தேதி அறிமுகம் செய்ய இருப்பதாக தகவல் வெளியாகியுள்ளது. மேலும் நெக்சா விற்பனையாளர்கள் புதிய பலேனோ காருக்கான முன்பதிவுகளை துவங்கிவிட்டதாக கூறப்படுகிறது.
பலேனோ ஃபேஸ்லிஃப்ட் மாடல் காரை முன்பதிவு செய்ய வாடிக்கையாளர்கள் ரூ.11,000 முதல் ரூ.21,000 வரை செலுத்தலாம் என கூறப்படுகிறது. புதிய பலேனோ காரின் விநியோகம் அடுத்த மாதம் முதல் துவங்கும் என கூறப்படுகிறது. பலேனோ ஃபேஸ்லிஃப்ட் மாடலின் ஸ்பை புகைப்படங்கள் ஏற்கனவே இணையத்தில் வெளியாகி இருக்கின்றன.
அந்த வகையில் புதிய காரின் முன்பக்க பம்ப்பர் முற்றிலும் புதிய வடிவமைப்பு கொண்டிருக்கிறது. காரின் முன்புறம் மற்றும் பின்பக்கம் சில மாற்றங்கள் செய்யப்படும் நிலையில், புதுவித அலாய் வீல்கள் வழங்கப்படும் என எதிர்பார்க்கப்படுகிறது. இத்துடன் ஷார்க் ஃபின் ஆன்டெனா மற்றும் க்ரூஸ் கண்ட்ரோல் சிஸ்டம் உள்ளிட்டவை வழங்கப்படுகிறது.
புதிய பலேனோ காரிலும் 1.2 லிட்டர் பெட்ரோல் மற்றும் 1.3 லிட்டர் டீசல் என்ஜின் ஆப்ஷன்கள் வழங்கப்படுகிறது. டீசல் மோட்டார் 75 பி.எஸ். மற்றும் 190 என்.எம். டார்க் செயல்திறனும் ரெட்ரோல் மோட்டார் 84 பி.எஸ். மற்றும் 115 என்.எம். டார்க் செயல்திறன் வழங்குகிறது. இவற்றுடன் 5-ஸ்பீடு மேனுவல் அல்லது CVT டிரான்ஸ்மிஷன் ஆப்ஷன்கள் வழங்கப்படலாம்.
விலையை பொருத்த வரை புதிய பலேனோ ஃபேஸ்லிஃப்ட் கார் தற்போதைய மாடலை விட ரூ.25,000 முதல் ரூ.30,000 வரை அதிகமாக நிர்ணயம் செய்யப்படலாம். தற்போதைய பலேனோ கார் துவக்க விலை ரூ.5.38 லட்சம் (எக்ஸ்-ஷோரூம், டெல்லி) துவங்கி டாப் எண்ட் மாடல் ரூ.8.50 லட்சம் (எக்ஸ்-ஷோரூம், டெல்லி) என நிர்ணயம் செய்யப்பட்டுள்ளது.
