நீங்கள் தேடியது "கோளாறு"

புதுடெல்லி:

ஆந்திராவில் கடந்த 11-ம் தேதி மக்களவைத் தேர்தலுடன் சட்டமன்றத் தேர்தலும் நடத்தப்பட்டது. இதில், சுமார் 400 வாக்குச்சாவடிகளில் உள்ள வாக்குப்பதிவு இயந்திரங்களில் கோளாறு ஏற்பட்டதால் வாக்குப்பதிவு தாமதம் ஆனது. இதனால் சில பகுதிகளில் நள்ளிரவு வரை வாக்குப்பதிவு நீடித்தது. இதேபோல் தெலுங்குதேசம் மற்றும் ஒய்எஸ்ஆர் காங்கிரஸ் கட்சியினரிடையே பல்வேறு இடங்களில் மோதல் ஏற்பட்டது. இதன் காரணமாகவும் சில பூத்களில் வாக்குப்பதிவு பாதிக்கப்பட்டது.


இந்நிலையில், ஆந்திர முதல்வர் சந்திரபாபு நாயுடு இன்று டெல்லி சென்று தலைமை தேர்தல் ஆணையரை சந்தித்து, புகார் மனு கொடுத்தார். அதில், ஆந்திராவில் வாக்குப்பதிவு இயந்திரங்கள் சரிவர இயங்காதது பற்றி நடவடிக்கை எடுக்க வேண்டும் என்று கோரிக்கை விடுத்துள்ளார். மேலும், தேர்தலின்போது பிரச்சினை செய்த ஒய்எஸ்ஆர் காங்கிரஸ் நிர்வாகிகள் மீது நடவடிக்கை எடுக்க வேண்டும் என்றும் கூறியுள்ளார். #ChandrababuNaidu

புதுடெல்லி:

மணிக்கு 180 கிலோமீட்டர் வேகம் வரை செல்லக்கூடிய அதிவேக மின்சார ரெயிலை சென்னை ஐ.சி.எப். இணைப்புப் பெட்டி தொழிற்சாலை சமீபத்தில் தயாரித்தது.

டெல்லி-வாரணாசி வழித்தடத்தில் ஓடும் இந்த அதிநவீன ரெயிலுக்கு ‘வந்தே பாரத் எக்ஸ்பிரஸ்’ என பெயரிடப்பட்டுள்ளது. இந்த ரெயிலின் சேவையை பிரதமர் மோடி நேற்று தொடங்கி வைத்தார். டெல்லியில் இருந்து நேற்று காலை வாரணாசி நோக்கி புறப்பட்டு சென்ற ரெயில் நேற்றிரவு 10.30 மணியளவில் வாரணாசியில் இருந்து டெல்லி நோக்கி புறப்பட்டது.

இன்று காலை 6.30 மணியளவில் உத்தரப்பிரதேசம் மாநிலத்தில் உள்ள துன்ட்லா சந்திப்பு வழியாக வந்தபோது ‘பிரேக்’ சரியாக பிடிக்காமல் சக்கரங்கள் வழுக்கிச் செல்வதை உணர்ந்த ரெயிலின் டிரைவர் வேகத்தை குறைத்து ரெயிலை அங்கே நிறுத்தினார். பின்னர் சுமார் ஒருமணி நேரம் பழுது பார்க்கும் பணி முடிந்து அங்கிருந்து ரெயில் புறப்பட்டது.

இந்த ரெயிலின் முதல் வெள்ளோட்டத்தை ரசிப்பதற்காக ஏராளமான பத்திரிகை நிருபர்களும், செய்தியாளர்களும் அதில் பயணித்தனர். சரியாக பிரேக் பிடிக்காதபோது அந்த ரெயிலின் முதல் மற்றும் கடைசி பெட்டிகளில் இருந்து அதிர்வதைப்போன்ற சப்தம் கேட்டதாக அவர்கள் குறிப்பிட்டனர்.

கடைசி 4 பெட்டிகளில் சிறிய புகையுடன் ஏதோ தீய்ந்ததுபோல் வாசனை வந்ததாகவும், மின்சாரம் தடைபட்டதாகவும் கூறப்படுகிறது.

பின்னர் 8.15 மணியளவில் ரெயில் அங்கிருந்து புறப்பட்டது. பிரேக் சரியாக இயங்காததால் ஆரம்பத்தில் மணிக்கு 10 கிலோமீட்டர் வேகத்திலும், பின்னர் படிப்படியாக அதிகரித்து சுமார் 40 கிலோமீட்டர் வேகத்திலும் ரெயில் செல்ல தொடங்கியது.


காலை சுமார் 8.55 மணியளவில் மீண்டும் ‘பிரேக்’ பிரச்சனை ஏற்பட்டு சரிபார்ப்பு பணி முடிந்து ‘வந்தே பாரத்’ ஒருவழியாக இன்று பிற்பகல் ஒருமணியளவில் டெல்லி வந்து சேர்ந்தது.

இருட்டில் ரெயில் செல்லும்போது தண்டவாளத்தின் குறுக்கே ஓடும் கால்நடைகள் அடிபட்டு சாவதுண்டு. அப்படி நேற்றிரவு சில கால்நடைகள் அடிபட்டு, அவற்றின் மாமிசம் அல்லது ரத்தம் ரெயில் சக்கரங்களில் ஒட்டியிருந்தால் பிரேக் பிடிக்காமல் சக்கரங்கள் வழுக்கிச்செல்ல வாய்ப்புண்டு என்று ரெயில்வே அதிகாரிகள் கருத்து தெரிவித்தனர்.

இதுதொடர்பான செய்தி வெளியானதும் சமூக வலைத்தளங்களில் பல்வேறு விமர்சனங்கள் பதிவாகியுள்ளது.

மார்க்சிஸ்ட் கம்யூனிஸ்ட் கட்சி பொதுச்செயலாளர் சீதாராம் யெச்சூரி தனது டுவிட்டர் பக்கத்தில் இன்று வெளியிட்டுள்ள பதிவில், ‘மோடி அரசின் செயல்திறனுக்கு இந்த ரெயில் மிகச்சிறந்த உதாரணம்’ என தெரிவித்துள்ளார்.

நாளை (ஞாயிறு) முதல் வர்த்தகரீதியான போக்குவரத்தை தொடங்கும் ‘வந்தே பாரத்’ எக்ஸ்பிரஸ் ரெயிலில் சுமார் ஒருவாரம் வரை முன்பதிவு நிறைவடைந்து ஆயிரக்கணக்கான பயணிகள் உற்சாகமான பயணத்துக்காக காத்திருப்பது குறிப்பிடத்தக்கது. #EnginelessTrain #VandeBharatExpress

சென்னை:

சென்னையில் நேற்று முன்தினம் காலை 11.45 மணியில் இருந்து, ‘101’ என்ற தீயணைப்பு கட்டுப்பாட்டு அறை தொடர்பு எண் திடீரென முடங்கியது. பல முறை ‘101’ எண்ணை தொடர்புகொண்டும் ஊழியர்கள் யாரும் இணைப்பில் பேசவில்லை. இதனால் தீ விபத்து, கால்நடைகள் சாலையில் திரிவது, பாம்பு நடமாட்டம் உள்ளிட்ட பிரச்சினைகளில் உதவி கிடைக்காமல் மக்கள் தவித்து போனார்கள்.

கட்டுப்பாட்டு அறைக்கு வரும் தகவல் தொடர்பு சிக்னலில் ஏற்பட்ட கோளாறு (மின் இயக்கி கருவிகள் பழுது) காரணமாக இந்த பிரச்சினை ஏற்பட்டதாக தெரியவந்தது. இதையடுத்து தொழில்நுட்ப வல்லுனர்கள் குழு நேற்று முன்தினம் இரவு முழுவதும் தீவிர ஆய்வில் ஈடுபட்டனர். நேற்று காலை இந்த கோளாறு சரிசெய்யப்பட்டது.

அதனைத்தொடர்ந்து நேற்று பிற்பகல் 12 மணிக்கு முதல் கட்டமாக வட சென்னை மற்றும் தென்சென்னை பகுதிகளில் ‘101’ எண் செயல்பட தொடங்கியது. பிற்பகல் 2 மணிக்கு மேல் சென்னை நகரம் முழுவதும் வழக்கம்போல ‘101’ எண்ணை தொடர்புகொள்ள முடிந்தது. மேலும் 044-28559031, 28554309, 28294126 உள்ளிட்ட எண்களும் செயல்பட தொடங்கியது.

இதற்கிடையில் நேற்று காலை முதல் பிற்பகல் வரை சென்னையில் உள்ள தீயணைப்பு நிலையங்களுக்கு 200-க்கும் மேற்பட்டோர் நேரில் வந்து புகார் அளித்துள்ளனர் என்பது குறிப்பிடத்தக்கது.