நீங்கள் தேடியது "விழுப்புரம்"

விழுப்புரம்:

தமிழகத்தில் பாராளுமன்ற தேர்தல் மற்றும் 18 சட்டமன்ற தொகுதிகளுக்கான இடைத்தேர்தல் வருகின்ற ஏப்ரல் 18ம் தேதி நடைபெற உள்ளது. தேர்தல் பணிகளில் அரசியல் கட்சிகள் தீவிரமாக ஈடுபட்டுள்ளன.

இந்நிலையில் திமுக தலைவர் மு.க.ஸ்டாலின் இன்று விழுப்புரத்தில்  நடைபெற்ற பிரசாரப்பொதுக்கூட்டத்தில் கலந்துக் கொண்டு,  பாராளுமன்ற தேர்தலில் போட்டியிடும் விடுதலை சிறுத்தைகள் கட்சி வேட்பாளர் ரவிக்குமாரை ஆதரித்து  பேசியதாவது:


எடப்பாடியின் உதவாக்கரை ஆட்சியையும், மோடியின் சர்வாதிகார ஆட்சியையும் நீங்கள் கவிழ்க்க தயாராகி விட்டீர்கள். வரும் 18ம் தேதி முக்கிய பங்கு ஆற்றவிருக்கும் நீங்கள், மறக்காமல் செய்து விடுங்கள். இந்த விழுப்புரத்திலே தான்  முதன்முறையாக கழகத்தின் சார்பாக பொன்முடி நடத்திய மண்டல மாநாட்டினை தலைமையேற்று நடத்தினேன்.

அன்றைக்கு கழக தொண்டர்கள் கணித்தது போல் இன்று திராவிட முன்னேற்ற கழகத்தின் தலைவராகியுள்ளேன். இந்த தொகுதியில் நிற்கும் விடுதலை சிறுத்தைகள் கட்சி  வேட்பாளர் ரவிக்குமார்,  நல்ல எழுத்தாளர், பேச்சாளர்  மற்றும் சிறந்த வழக்கறிஞர் ஆவார்.  சட்டமன்றத்திலே ஏற்கனவே என்னுடன் சேர்ந்து பணியாற்றி இருக்கிறார். இவரது உரையை கலைஞர் அவர்களே பாராட்டி பேசியுள்ளார்.

இந்த தொகுதிக்கும், திமுகவிற்கும் நெருங்கிய தொடர்பு உள்ளது. விழுப்புரத்தில் பள்ளிகள், பொறியியல் கல்லூரிகள் ஆகியவை கழக ஆட்சியில் தான் திறக்கப்பட்டுள்ளன என்பதை உணர்ந்து, சிந்தித்து வாக்களியுங்கள்.

இவ்வாறு அவர் பேசினார். #MKStalin #DMK #LoksabhaElections2019 

விழுப்புரம்:

விழுப்புரம் அருகே உள்ள அய்யூர்அகரம் பகுதியை சேர்ந்தவர்கள் சண்முகம் (வயது 46), வேலு (45), ரகோத்தமன். இவர்கள் 3 பேரும் விழுப்புரத்தில் ஆட்டோ ஓட்டி வந்தனர்.

இந்த நிலையில் வழக்கம்போல் விழுப்புரத்தில் நேற்று ஆட்டோ சவாரியை முடித்துவிட்டு சண்முகத்தின் ஆட்டோவில் 3 பேரும் வீட்டுக்கு புறப்பட்டனர். ஆட்டோவை சண்முகம் ஓட்டினார்.

விழுப்புரம்-சென்னை புறவழி சாலையில் உள்ள முத்தாம்பாளையம் என்ற இடத்தில் ஆட்டோ வந்து கொண்டிருந்தது. அப்போது அந்த பகுதியில் உள்ள சாலையை ஆட்டோவில் கடக்க முயன்றனர். அப்போது அந்த வழியாக ஆம்னிபஸ் ஒன்று அதிவேகமாக வந்தது. அந்த பஸ் கண் இமைக்கும் நேரத்தில் சண்முகம் ஓட்டிவந்த ஆட்டோ மீது பயங்கரமாக மோதியது. இதில் தூக்கி வீசப்பட்ட ஆட்டோ அப்பளம்போல் நொறுங்கியது.

ஆட்டோவை ஓட்டிவந்த சண்முகம் உடல் நசுங்கி சம்பவ இடத்திலேயே பரிதாபமாக இறந்தார். வேலுவும், ரகோத்தமனும் படுகாயம் அடைந்தனர். உயிருக்கு போராடிக் கொண்டிருந்த அவர்கள் 2 பேரையும் அக்கம் பக்கத்தினர் மீட்டு சிகிச்சைக்காக முண்டியம்பாக்கம் மருத்துவ கல்லூரி மருத்துவமனைக்கு அனுப்பிவைத்தனர்.

ஆனால் கொண்டு செல்லும் வழியிலேயே வேலு பரிதாபமாக இறந்தார். விபத்தில் படுகாயம் அடைந்த ரகோத்தமனுக்கு ஆஸ்பத்திரியில் தீவிர சிகிச்சை அளிக்கப்படுகிறது.

இந்த விபத்து குறித்து விழுப்புரம் தாலுகா போலீசில் புகார் செய்யப்பட்டது. அதன்பேரில் போலீசார் வழக்கு பதிவு செய்து விசாரணை நடத்தி வருகின்றனர்.

விழுப்புரம்:

தமிழ்நாடு அரசு போக்குவரத்துக்கழகம் சார்பில் பொதுமக்களின் போக்குவரத்து தேவைகளை பூர்த்தி செய்யும் வகையில் விழுப்புரம் கோட்ட அரசு போக்குவரத்துக்கழகத்திற்கு 82 பஸ்கள் உள்பட 555 புதிய பஸ்களை கடந்த சில நாட்களுக்கு முன்பு முதல்- அமைச்சர் எடப்பாடி பழனிசாமி கொடியசைத்து தொடங்கி வைத்தார்.

இதில் விழுப்புரம் மண்டலத்திற்கு 29 பஸ்கள் ஒதுக்கீடு செய்யப்பட்டதில் 4 பஸ்கள் சென்னையில் இருந்து முதல்-அமைச்சரால் தொடங்கி வைக்கப்பட் டது. இதன் தொடர்ச்சியாக 11 புதிய பஸ்களை தொடங்கி வைக்கும் நிகழ்ச்சி நேற்று மாலை விழுப்புரம் புதிய பஸ் நிலையத்தில் நடைபெற்றது.

நிகழ்ச்சியில் சட்டத்துறை அமைச்சர் சி.வி.சண்முகம் கலந்துகொண்டு விழுப்புரம் மண்டலம் சார்பில் சென்னை- சேலம், கள்ளக்குறிச்சி- சென்னை, சேலம்- சென்னை, திருவண்ணாமலை- சென்னை, புதுச்சேரி- சென்னை ஆகிய வழித்தடங்களில் 11 பஸ்களை கொடியசைத்து தொடங்கி வைத்தார்.

இதில் கலெக்டர் சுப்பிர மணியன், ஏழுமலை எம்.பி., குமரகுரு எம்.எல்.ஏ., அரசு போக்குவரத்துக்கழக நிர்வாக இயக்குனர் கணேசன், கிளை மேலாளர்கள் ராஜசேகரன், முருகதாஸ், சுந்தர்ராஜன், கோட்ட மேலாளர் துரைசாமி, ஆவின் தலைவர் பேட்டை முருகன், கோலியனூர் ஒன்றிய அ.தி.மு.க. முன்னாள் செயலாளர் சுரேஷ்பாபு, மாவட்ட எம்.ஜி.ஆர். இளைஞரணி துணைத்தலைவர் வண்டிமேடு ராமதாஸ், நகர கூட்டுறவு வங்கி இயக்குனர் வக்கீல் செந்தில், கூட்டுறவு அச்சக துணைத்தலைவர் குமரன், நகர ஜெயலலிதா பேரவை செயலாளர் கோல்டுசேகர், வளவனூர் நகர செயலாளர் சங்கரலிங்கம், ஆனாங்கூர் தொடக்க வேளாண்மை கூட்டுறவு சங்க தலைவர் என்ஜினீயர் ரமேஷ், முன்னாள் மாவட்ட பேரவை இணை செயலாளர் அசோக்குமார், முன்னாள் நகரமன்ற கவுன்சிலர்கள் புஷ்பலதா கோதண்டராமன், ரகுபதி உள்பட பலர் கலந்துகொண்டனர்.

விழுப்புரம்:

தமிழகத்தை மிரட்டி கொண்டிருந்த ‘கஜா’ புயல் நேற்று அதிகாலை நாகப்பட்டினம் மாவட்டம் வேதாரண்யம் அருகே கரையை கடந்தது. இந்த புயலின் தாக்கத்தினால் தமிழகத்தின் கடலோர மாவட்டங்களான கடலூர், நாகப்பட்டினம், திருவாரூர், தஞ்சாவூர், புதுக்கோட்டை, ராமநாதபுரம் உள்ளிட்ட மாவட்டங்களிலும், புதுச்சேரி, காரைக்காலிலும் பலத்த காற்றுடனும், இடி-மின்னலுடனும் கூடிய கன மழை பெய்தது. ‘கஜா’ புயலின் தாக்கம் விழுப்புரம் மாவட்டத்திலும் இருந்தது. மாவட்டத்தின் கடலோர பகுதிகளான வானூர், மரக்காணம், கோட்டக்குப்பம், சின்னமுதலியார்சாவடி உள்ளிட்ட பல்வேறு இடங்களிலும் நேற்று முன்தினம் காலை முதல் பலத்த மழை பெய்த நிலையில், மற்ற இடங்களில் சாரல் மழை தூறியது.

புயல் கரையை தொட்ட நிலையில் விழுப்புரம் மாவட்டத்தின் பல்வேறு இடங்களிலும் பலத்த காற்றுடன் மழை பெய்தது. இந்த மழை விடிய, விடிய தூறிக்கொண்டே இருந்தது. இடையிடையே அவ்வப்போது இடி-மின்னலுடன் கனமழையாகவும் கொட்டித்தீர்த்தது. பின்னர் நேற்று அதிகாலை 5 மணியளவில் மழை சற்று ஓய்ந்தது. மீண்டும் 6 மணியளவில் இடி-மின்னலுடன் கூடிய பலத்த மழையாக பெய்ய ஆரம்பித்தது. இந்த மழை இடைவிடாமல் ½ மணி நேரமாக கொட்டித்தீர்த்தது. அதன் பிறகும் காலை 10 மணி வரை விட்டுவிட்டு சாரல் மழையாக தூறிக்கொண்டே இருந்தது.

இந்த மழையின் காரணமாக நகரின் முக்கிய சாலைகளில் தண்ணீர் பெருக்கெடுத்து ஓடியது. தாழ்வான பகுதிகளான சுதாகர் நகர், மணிநகர், கம்பன்நகர், ஆசிரியர் நகர், பாண்டியன் நகர், காந்தி நகர், சித்தேரிக்கரை, கீழ்பெரும்பாக்கம் ரெயில்வே சுரங்கப்பாதை உள்ளிட்ட இடங்களில் தண்ணீர் தேங்கியது.

நேற்று முன்தினம் இரவு முதல் நேற்று காலை வரை தொடர்ந்து மழை தூறிக்கொண்டே இருந்ததால் பொதுமக்கள் வீட்டை விட்டு வெளியே வர முடியாமல் வீட்டிற்குள்ளேயே முடங்கி கிடந்தனர். இதன் காரணமாக சாலைகள் மக்கள் நடமாட்டமின்றி வெறிச்சோடி காணப்பட்டது. இந்த மழையின் காரணமாக மாணவ-மாணவிகளின் நலனை கருத்தில் கொண்டு நேற்று பள்ளி- கல்லூரிகளுக்கு விடுமுறை அறிவித்து மாவட்ட நிர்வாகம் உத்தரவிட்டது.

மேலும் பலத்த காற்று வீசியதன் காரணமாக ஒரு சில கிராமப்புறங்களில் மின்வயர்கள் அறுந்து மின்சார இணைப்பு துண்டிக்கப்பட்டது. இந்திரா நகர், வ.பாளையம், நன்னாடு, தோகைப்பாடி, பெரும்பாக்கம், காணை, வயலாமூர் உள்ளிட்ட இடங்களில் நேற்று முன்தினம் மாலையில் இருந்து மின் இணைப்பு துண்டிக்கப்பட்டது. இதனால் பொதுமக்கள் மிகவும் அவதிப்பட்டனர். மின்சாரம் இல்லாததால் குடிநீர் வினியோகம் செய்வதும் தடைபட்டது. இந்த மழையினால் பாதிக்கப்படும் மக்களை மீட்டு அவர்களை பாதுகாப்பான இடங்களில் தங்க வைப்பதற்காக 12 புயல் பாதுகாப்பு மையங்கள் மட்டுமின்றி பள்ளிகள், கல்லூரிகள், சமுதாய நலக்கூடங்கள், திருமண மண்டபங்கள் என 1,884 நிவாரண முகாம்களை மாவட்ட நிர்வாகம் தயார் நிலையில் வைத்திருந்தது. இருந்தபோதிலும் விழுப்புரம் மாவட்டத்தில் பெரிய அளவில் எந்தவித பாதிப்பும் ஏற்படவில்லை.

வானூர் அருகே பொம்மையார்பாளையத்தில் ஏற்கனவே கடந்த சில ஆண்டுகளுக்கு முன்பு பகுதியளவு சேதமடைந்த 11 வீடுகளின் சுவர்கள் நேற்று அதிகாலை புயல் காரணமாகவும், கடலில் ஏற்பட்ட அலையின் சீற்றம் காரணமாகவும் இடிந்து விழுந்தது. இந்த வீடுகளில் இருந்தவர்களுக்கு ஏற்கனவே சுனாமி குடியிருப்பு வீடுகள் வழங்கப்பட்டதால் சேதமடைந்த வீடுகளில் பொதுமக்கள் யாரும் தங்காமல் காலியாகவே இருந்தது. இதனால் எந்தவித பாதிப்பும் இல்லை.

கல்வராயன்மலை அருகே மொட்டையனூர் மதுரா மலையரசன்பட்டு கிராமத்தில் புளியமரம் சாய்ந்து விழுந்ததில் சின்னாண்டி, இளையராஜா ஆகியோரது வீடுகளின் மேற்கூரைகள் சேதமடைந்தன.

அதுபோல் பொம்மையார்பாளையம் குப்பத்தில் 30 குடும்பத்தினர் ஆபத்தான நிலையில் இருப்பதை அறிந்த மீட்பு குழுக்கள் அங்கு விரைந்து சென்று அவர்களை நிவாரண முகாம்களில் தங்க வைக்க ஏற்பாடு செய்தனர். ஆனால் அவர்கள் விருப்பத்தின்பேரில் அருகில் உள்ள உறவினர்களின் வீடுகளில் தங்கினர்.

மேலும் பலத்த காற்றுக்கு தாக்குப்பிடிக்க முடியாமல் மரக்காணத்தை அடுத்த கீழ்பேட்டை கிராமத்தில் இருந்த காட்டுவாகை மரம் நேற்று அதிகாலை 3 மணியளவில் வேரோடு சாய்ந்து நடுரோட்டில் விழுந்ததால், கிழக்கு கடற்கரை சாலையில் வாகனங்கள் செல்ல முடியாமல் போக்குவரத்து பாதிப்பு ஏற்பட்டது. இதுகுறித்த தகவல் அறிந்ததும் மீட்புக்குழுவினர் விரைந்து சென்று நடுரோட்டில் விழுந்து கிடந்த மரத்தை பொக்லைன் எந்திரம் மூலம் அப்புறப்படுத்தினர். இதையடுத்து அந்த சாலையில் ½ மணி நேரத்திற்கு பிறகு போக்குவரத்து சீரானது. இதுபோல் கள்ளக்குறிச்சி- கூத்தக்குடி சாலையில் வரஞ்சரம் என்ற இடத்தில் புளிய மரமும், கடலூர்- திருக்கோவிலூர் சாலையில் சங்கராபுரத்தில் வேப்ப மரமும் வேரோடு சாய்ந்து விழுந்ததால் சிறிது நேரம் போக்குவரத்து பாதிப்பு ஏற்பட்டது.

கள்ளக்குறிச்சி அருகே உள்ள மலைக்கோட்டாலம் கிராமத்தை சேர்ந்தவர் விவசாயி ராஜா (வயது 60). இவர் நேற்று முன்தினம் இரவு தனது குடும்பத்தினருடன் வீட்டில் படுத்து தூங்கினார். இதையடுத்து ராஜாவின் மனைவி ஜெயக்கொடி, மகன் ராஜ்குமார் ஆகியோர் நேற்று காலை 6 மணிக்கு எழுந்து, வீட்டில் இருந்து வெளியே வந்தனர். அப்போது மழையில் நனைந்திருந்த வீட்டின் ஒருபக்க சுவர் திடீரென இடிந்து தூங்கிக் கொண்டிருந்த ராஜா மீது விழுந்தது. இதை பார்த்து அதிர்ச்சி அடைந்த அவரது குடும்பத்தினர் மற்றும் அக்கம் பக்கத்தினர் இடிபாடுகளுக்குள் சிக்கிய ராஜாவை மீட்டு சிகிச்சைக்காக கள்ளக்குறிச்சி அரசு மருத்துவமனையில் சேர்த்தனர். அங்கு அவருக்கு டாக்டர்கள் சிகிச்சை அளித்து வருகின்றனர்.

கல்வராயன்மலையில் பெய்த கனமழை காரணமாக பெரியார், மேகம், கவியம் உள்ளிட்ட அனைத்து நீர்வீழ்ச்சிகளிலும் தண்ணீர் ஆர்ப்பரித்து கொட்டுகிறது. மேலும் கல்வராயன்மலை அடிவாரத்தில் உள்ள கோமுகி அணைக்கு வனப்பகுதியில் உள்ள நீரோடைகளின் வழியாக வினாடிக்கு ஆயிரம் கனஅடி தண்ணீர் வந்து கொண்டிருக்கிறது. இதனால் நேற்று முன்தினம் 33 அடியாக இருந்த அணையின் நீர்மட்டம் நேற்று மாலை நிலவரப்படி 37 அடியை எட்டியது. உளுந்தூர்பேட்டை பகுதியில் பெய்த பலத்த மழையால், உளுந்தூர்பேட்டை பஸ் நிலையத்தில் கழிவுநீர் தேங்கியது. மழை ஓய்ந்ததும் காலை 9 மணியளவில் பேரூராட்சி ஊழியர்கள் விரைந்து சென்று வடிகால் வாய்க்காலை தூர்வாரி கழிவுநீரை வெளியேற்றினர். இதேபோல் கழிவுநீர் வாய்க்கால்களில் ஏற்பட்ட அடைப்பு காரணமாக செஞ்சி பஸ் நிலைய வளாகத்தையும் மழைநீர் சூழ்ந்தது. இதுபற்றி தகவல் அறிந்த பேரூராட்சி அதிகாரிகள் பணியாளர்கள் மூலம் மழைநீரை அகற்ற நடவடிக்கை எடுத்தனர்.

இதேபோல் திண்டிவனம், மயிலம், கூட்டேரிப்பட்டு, ஒலக்கூர், விக்கிரவாண்டி, மேல்மலையனூர், திருக்கோவிலூர், திருவெண்ணெய்நல்லூர், சங்கராபுரம் உள்பட மாவட்டத்தின் பல்வேறு இடங்களிலும் பரவலாக மழை பெய்தது. இந்த மழையினால் பொதுமக்களின் இயல்பு வாழ்க்கை பாதிக்கப்பட்டது. மாவட்டத்தில் மொத்தம் 843.50 மி.மீ. மழை பதிவாகியுள்ளது. இதில் அதிகபட்சமாக வளவனூரில் 51 மி.மீட்டரும், குறைந்தபட்சமாக திருவெண்ணெய்நல்லூரில் 4 மி.மீட்டரும் மழை பதிவாகியுள்ளது. #GajaCyclone

விழுப்புரம்:

தீபாவளி பண்டிகையையொட்டி விழுப்புரம் மாவட்டத்தில் குற்ற சம்பவங்கள் நடைபெறாமல் தடுக்கும் வகையில் நேற்று முன்தினம் இரவு முழுவதும் போலீசார் ‘ஸ்டார்மிங் ஆபரேஷன்’ என்ற பெயரில் அதிரடி சோதனை நடத்தினார்கள்.

மாவட்டம் முழுவதும் அனைத்து சோதனைச்சாவடிகள் மற்றும் முக்கிய இடங்களில் போலீஸ் சூப்பிரண்டு ஜெயக்குமார் மேற்பார்வையில் அந்தந்த உட்கோட்ட துணை போலீஸ் சூப்பிரண்டுகள் தலைமையில் ஏராளமான போலீசார் தீவிர வாகன சோதனையில் ஈடுபட்டனர். விக்கிரவாண்டி சுங்கச்சாவடி அருகில் சென்ற வாகனங்களை நிறுத்தி மாவட்ட போலீஸ் சூப்பிரண்டு ஜெயக்குமார் தீவிர சோதனை செய்தார்.

இதேபோல் தங்கும் விடுதிகளில் யாரேனும் சந்தேகப்படும்படியாக தங்கியுள்ளனரா? என போலீசார் தீவிர சோதனை நடத்தினார்கள். அதுமட்டுமின்றி குற்றம் அதிகம் நடைபெறும் இடங்களாக கருதப்படும் இடங்களில் பழைய குற்றவாளிகளின் நடமாட்டம், ரவுடிகளின் நடமாட்டம் குறித்தும் மற்றும் வங்கிகள், நகை கடைகள் இருக்கும் பகுதிகளிலும் போலீசார் தீவிர கண்காணிப்பில் ஈடுபட்டனர்.

நேற்று முன்தினம் இரவு 10 மணிக்கு தொடங்கிய இந்த சோதனை நள்ளிரவையும் கடந்து நேற்று காலை 5 மணி வரை விடிய, விடிய நடைபெற்றது. இந்த சோதனையின்போது குடிபோதையில் வாகனம் ஓட்டுதல், தலைக்கவசம் அணியாமல் இருசக்கர வாகனம் ஓட்டுதல், அதிக பாரம் ஏற்றிச்செல்லுதல், அதிவேகமாக வாகனம் ஓட்டுதல், ஓட்டுனர் உரிமம், ஆர்.சி. புத்தகம் இல்லாமல் வாகனங்களை இயக்குதல் மற்றும் சந்தேகப்படும்படியாக சுற்றித்திரிந்தவர்கள், மணல் கடத்தலில் ஈடுபட்டவர்கள், லாட்டரி சீட்டு விற்றவர்கள், பணம் வைத்து சூதாடியவர்கள் என மொத்தம் 942 வழக்குகள் பதிவு செய்யப்பட்டது.

இதில் முன்எச்சரிக்கை நடவடிக்கையாக 19 பேரையும் மற்றும் பழைய குற்றவாளிகள், லாட்டரி சீட்டு விற்றவர்கள், பணம் வைத்து சூதாடியவர்கள், மணல் கடத்தலில் ஈடுபட்டவர்கள் என 167 பேரையும், நீதிமன்றத்தினால் பிடிவாரண்டு பிறப்பிக்கப்பட்டு தலைமறைவாக இருந்த 5 பேர் என மொத்தம் 191 பேரை போலீசார் கைது செய்தனர்.

விழுப்புரம்:

விழுப்புரம் மாவட்டம் சாலாமேடு பகுதியில் இயங்கி வந்த டாஸ்மாக் கடை, அப்பகுதியைச் சேர்ந்த சில பெண்களின் போராட்டத்தால் மூன்று மாதங்களுக்கு முன்பு மூடப்பட்டது. இதனால் மதுப்பிரியர்கள் 5 கிலோ மீட்டர் தூரம் சென்று மது வாங்க வேண்டிய நிலை ஏற்பட்டது.

இந்நிலையில், தங்கள் கணவன்மார்கள் மது வாங்குவதற்காக வெகுதூரம் சென்று சிரமப்படுவதை பொறுத்துக் கொள்ள முடியவில்லை என்று கூறி மதுப்பிரியர்களின் மனைவிகள், மீண்டும் டாஸ்மாக்கை திறக்க வலியுறுத்தி போராட்டத்தில் ஈடுபட்டனர். இதையடுத்து சம்பவ இடத்துக்கு விரைந்து வந்த காவல்துறையினர் அவர்களை கலைக்கும் முயற்சியில் ஈடுபட்டனர்.

இதனிடையே டாஸ்மாக் கடை மூடுவதற்கு காரணமாக இருந்த பெண்கள் அங்கு வந்து போராட்டத்தில் ஈடுபட்டவர்களுடன் வாக்குவாதத்தில் ஈடுபட்டனர். மீண்டும் டாஸ்மாக் கடை திறந்தால் தீக்குளித்து தற்கொலை செய்துகொள்வோம் என அவர்கள் எச்சரிக்கை விடுத்ததால் அப்பகுதியில் பரபரப்பு ஏற்பட்டது. #Viluppuram #Tasmac

விழுப்புரம்:

விழுப்புரம் நகரில் போக்குவரத்து நெரிசலை குறைக்க போக்குவரத்து போலீசார் பல்வேறு நடவடிக்கைகளை எடுத்து வருகின்றனர். குறிப்பாக ஷேர் ஆட்டோக்கள் விழுப்புரம் கோர்ட்டு முன்புறம், நான்குமுனை சந்திப்பு, பழைய பஸ் நிலையம், காந்தி சிலை, ரெயில் நிலையம் ஆகிய இடங்களில் மட்டுமே நின்று பயணிகளை ஏற்றி, இறக்கி செல்ல வேண்டும் என்று உத்தரவு பிறப்பித்துள்ளனர்.

மேலும் விழுப்புரம் நேருஜி சாலையில் மாதத்தில் 15 நாட்களுக்கு ஒருமுறை சாலையின் வலதுபுறமும், அடுத்த 15 நாட்கள் சாலையின் இடதுபுறமாகவும் சுழற்சி முறையில் இருசக்கர வாகனங்களை போக்குவரத்துக்கு இடையூறு இன்றி நிறுத்த நடவடிக்கை மேற்கொண்டுள்ளனர். இருந்தபோதிலும் சாலையோர ஆக்கிரமிப்புகள் காரணமாக நகரில் போக்குவரத்து நெரிசல் குறைந்தபாடில்லை.

இதையடுத்து மாவட்ட போலீஸ் சூப்பிரண்டு ஜெயக்குமார் உத்தரவின்பேரில் நேற்று காலை விழுப்புரம் எம்.ஜி.சாலை, பாகர்ஷா வீதியில் உள்ள சாலையோர ஆக்கிரமிப்புகளை போக்குவரத்து போலீஸ் இன்ஸ்பெக்டர் அப்பாண்டைராஜ், சப்- இன்ஸ்பெக்டர் வசந்த், சிறப்பு சப்-இன்ஸ்பெக்டர் செல்வக்குமார் மற்றும் போலீசார் அதிரடியாக அகற்றினர்.

அப்போது பொதுமக்களுக்கும், போக்குவரத்துக்கும் இடையூறாக சாலையோரமாக இருந்த பழக்கடைகள், காய்கறி கடைகள், தள்ளுவண்டி கடைகள், கடைகளின் விளம்பர பலகைகள் ஆகியவற்றை அகற்றினர். ஆக்கிரமிப்பு அகற்றப்பட்ட இடங்களில் மீண்டும் யாராவது ஆக்கிரமிப்பு செய்தால் சம்பந்தப்பட்டவர்கள் மீது வழக்குப்பதிவு செய்து நடவடிக்கை எடுக்கப்படும் என்று போலீசார் எச்சரித்தனர். 

விழுப்புரம்:

பெட்ரோல், டீசல் மீது உயர்த்தப்பட்ட கலால் வரியை மத்திய அரசு ரத்து செய்து அவற்றை ஜி.எஸ்.டி.க்குள் கொண்டு வரவேண்டும். பெட்ரோல், டீசல் விலையை 90 நாட்களுக்கு ஒருமுறை நிர்ணயம் செய்ய வேண்டும்.

நாடு முழுவதும் உள்ள சுங்கச்சாவடிகளுக்கான ஒரு ஆண்டு கட்டணத்தை லாரி உரிமையாளர் சங்கம் செலுத்துவதை ஏற்றுக் கொண்டு சுங்கச்சாவடிகளை அகற்ற வேண்டும் என்பது உள்ளிட்ட பல்வேறு கோரிக்கைகளை வலியுறுத்தி அகில இந்திய மோட்டார் டிரான்ஸ்போர்ட் காங்கிரஸ் சார்பில் இன்று நாடு தழுவிய காலவரையற்ற லாரிகள் வேலைநிறுத்தம் நடைபெறும் என்று அறிவிக்கப்பட்டு இருந்தது.

அதன்படி நேற்று நள்ளிரவு முதல் லாரிகள் வேலைநிறுத்தம் தொடங்கியது.

விழுப்புரம் மாவட்டத்தில் இருந்து வெளிமாநிலங்களுக்கும், பிற மாவட்டங்களுக்கும் தினமும் 10 ஆயிரத்துக்கும் மேற்பட்ட லாரிகள் இயக்கப்பட்டு வந்தன.

இந்த நிலையில் நேற்று நள்ளிரவு சரக்குகள் ஏற்றி வந்த லாரிகள் சரக்குகளை இறக்கப்பட்டதும் தொடர்ந்து இயக்கப்படவில்லை. விழுப்புரம் மாவட்ட தேசிய நெடுஞ்சாலையில் இரவு முழுவதும் லாரிகள் வந்த வண்ணம் இருக்கும். ஆனால் லாரிகள் ஸ்டிரைக்கால் சில லாரிகள் மட்டுமே சென்றன.

விழுப்புரம் மாவட்டத்தில் 80 சதவீத லாரிகள் இயக்கப்படவில்லை. லாரிகள் இயக்கப்படாததால் ரூ.20 கோடி வர்த்தகம் பாதிக்கப்பட்டுள்ளது.

கடலூர் மாவட்டத்தில் கடலூர், பண்ருட்டி, சிதம்பரம், விருத்தாசலம், நெய்வேலி, திட்டக்குடி உள்ளிட்ட மாவட்டம் முழுவதிலும் இருந்து பொருட்கள் ஏற்றி செல்லும் 800 சரக்கு லாரிகள் வேலை நிறுத்தத்தில் ஈடுபட்டன.

இதனால் கடலூர் மாவட்டத்தில் இருந்து வெளிமாநிலம் மற்றும் பிற மாவட்டங்களுக்கு பொருட்கள் ஏற்றி செல்வதில் சிக்கல் ஏற்பட்டது. இதன் காரணமாக சரக்குகள் தேங்கி கிடக்கிறது.

கடலூர் மாவட்டத்தில் லாரிகள் ஓடாததால் ரூ.10 கோடி வர்த்தகம் பாதிக்கப்பட்டுள்ளது. இதனால் விவசாயிகள் தொழிற்சாலைகள், வியாபாரிகள் உள்ளிட்ட பல தரப்பினருக்கு பாதிப்பு ஏற்பட்டுள்ளது.

பண்ருட்டியில் இருந்து தினமும் கேரளா மற்றும் வெளிமாநிலங்களுக்கு 100-க்கணக்கான லாரிகளில் முந்திரி பருப்பு மூட்டைகள் ஏற்றுமதி செய்யப்பட்டு வந்தது.

இன்று லாரிகள் ஓடாததால் முந்திரி பருப்பு ஏற்றுமதி செய்யப்படவில்லை. இதனால் ரூ.100 கோடி வர்த்தகம் பாதிக்கப்பட்டதாக தமிழ்நாடு முந்திரி ஏற்றுமதியாளரும், உற்பத்தியாளர் சங்க தலைவருமான ரமேஷ் தெரிவித்தார். #LorryStrike

விழுப்புரம்:

விழுப்புரம் ரெயில் நிலையத்தில் உள்ள ‘யார்டில்’ (ரெயில்கள் பராமரிக்கும் இடம்) நேற்று தண்டவாள பராமரிப்பு பணிகள் நடைபெற்றது. இதற்காக ‘பேக்கிங் மெஷின், பேலஸ் கிளினீர் மெஷின்’ என்ற ராட்சத எந்திரங்கள் திருச்சியில் இருந்து வரவழைக்கப்பட்டு ரெயில்வே நிலைய யார்டில் பராமரிப்பு பணிகள் நடந்தது.

தண்டவாளத்தை உறுதிப்படுத்தும் வகையில் பழைய ஜல்லிக்கற்கள், மண் ஆகியவை அகற்றப்பட்டு புதிதாக கொட்டப்பட்டது. அதேபோல் பழைய சிலிப்பர் கட்டைகளும் அகற்றப்பட்டு புதிதாக பொருத்தப்பட்டது. காலை 11 மணி முதல் மாலை 6 மணி வரை நடந்த இந்த பணியில் எலக்ட்ரிக்கல், சிக்னல் உள்ளிட்ட பல்வேறு துறையை சேர்ந்த ஊழியர்கள் 20-க்கும் மேற்பட்டோர் ஈடுபட்டனர்.

இந்த பணிகள் காரணமாக நேற்று சென்னை எழும்பூரில் இருந்து புதுச்சேரி செல்லக்கூடிய பயணிகள் ரெயில், திருப்பதியில் இருந்து புதுச்சேரி செல்லக்கூடிய பயணிகள் ரெயில் ஆகிய 2 ரெயில்களும் திண்டிவனம் ரெயில் நிலையம் வரையும், மேல்மருவத்தூர்- விழுப்புரம் பயணிகள் ரெயில் முண்டியம்பாக்கம் வரையும் இயக்கப்பட்டது.

அதேபோல் திருச்சி- சென்னை செல்லும் எக்ஸ்பிரஸ் ரெயில் சென்னை எழும்பூரை 30 நிமிடம் தாமதமாக சென்றடைந்தது. மேலும் சென்னை எழும்பூரில் இருந்து மதியம் 1.40 மணிக்கு மதுரைக்கு புறப்பட வேண்டிய வைகை எக்ஸ்பிரஸ் ரெயில் 1 மணி நேரம் தாமதமாக மதியம் 2.40 மணிக்கும், விழுப்புரத்தில் இருந்து மாலை 4.35 மணிக்கு காட்பாடிக்கு புறப்பட வேண்டிய பயணிகள் ரெயில் 45 நிமிடம் தாமதமாக மாலை 5.20 மணிக்கும் புறப்பட்டன. 

விழுப்புரம்:

விழுப்புரம் சட்டமன்ற தொகுதி எம்.எல்.ஏ.வாக இருப்பவர் அமைச்சர் சி.வி.சண்முகம். இவரது அலுவலகம் விழுப்புரம் கலெக்டர் அலுவலகத்தின் முன்பகுதியில் உள்ளது. இதன் அருகே ஒருங்கிணைந்த நீதிமன்ற வளாகம் அமைந்துள்ளது. இங்கு 24 மணிநேரமும் ஆட்கள் நடமாட்டம் இருக்கும்.

அமைச்சர் சி.வி.சண்முகத்தின் அலுவலகத்தில் அவரது தனி உதவியாளர் தரணிதரன் தினமும் வந்து பொதுமக்கள் அளிக்கும் கோரிக்கை மனுக்களை பெற்று அதனை அமைச்சரிடம் வழங்கி வருவார்.

நேற்று இரவு அமைச்சர் அலுவலகத்தில் வலதுபுறத்தில் உள்ள கண்ணாடி மீது யாரோ? மர்ம மனிதர்கள் கல்வீசி சென்றுள்ளனர். இதில் கண்ணாடி உடைந்து நொறுங்கி சிதறியது. இன்று காலை அமைச்சரின் தனி உதவியாளர் தரணிதரன் அலுவலகத்தை திறக்க வந்தார். அப்போது கண்ணாடி உடைந்து கிடப்பதை பார்த்து அதிர்ச்சியடைந்தார்.

இதுகுறித்து அவர் விழுப்புரம் தாலுகா போலீசில் புகார் செய்தார். அதன்பேரில் சப்-இன்ஸ்பெக்டர் ஆனந்தன் மற்றும் போலீசார் சம்பவ இடத்துக்கு விரைந்து சென்றனர். அமைச்சர் அலுவலகத்தில் உள்ள கண்ணாடியை உடைத்தவர்கள் யார்? என்று விசாரணை மேற்கொண்டனர். மேலும் அந்த பகுதியில் உள்ள சி.சி.டி.வி.கேமராவில் பதிவான காட்சிகளை வைத்து ஆய்வு மேற்கொண்டு வருகின்றனர்.

விழுப்புரம்:

உலக போதை பொருள் ஒழிப்பு தினமான நேற்று, விழுப்புரத்தில் மாவட்ட போதை பொருள் தடுப்பு நுண்ணறிவு பிரிவு மற்றும் மாவட்ட காவல்துறை ஆகியன இணைந்து போதை பொருள் ஒழிப்பு விழிப்புணர்வு பேரணியை நடத்தியது.

விழுப்புரம் கலெக்டர் அலுவலக பெருந்திட்ட வளாகத்தில் உள்ள காவல்துறை அணிவகுப்பு மைதானம் அருகில் இருந்து புறப்பட்ட இந்த பேரணியை மாவட்ட போலீஸ் சூப்பிரண்டு ஜெயக்குமார், கொடியசைத்து தொடங்கி வைத்தார்.

இந்த பேரணி விழுப்புரம் நகரின் முக்கிய வீதிகள் வழியாக சென்று நான்குமுனை சந்திப்பில் முடிவடைந்தது. இதில் பள்ளி- கல்லூரி மாணவ, மாணவிகள் மற்றும் ஆயுதப்படை போலீசார், பயிற்சி காவலர்கள், ஊர்காவல் படையினர் ஆகியோர் கலந்துகொண்டு போதை பொருள் ஒழிப்பு குறித்து கோஷங்கள் எழுப்பியவாறு பேரணியாக சென்று பொதுமக்களிடம் விழிப்புணர்வு துண்டு பிரசுரங்களை வழங்கினார்கள்.

நிகழ்ச்சியில் ஆயுதப்படை துணை போலீஸ் சூப்பிரண்டு வெள்ளைச்சாமி, ஊர்காவல் படை மண்டல தளபதி ஸ்ரீதரன், தனிப்பிரிவு இன்ஸ்பெக்டர் கிருஷ்ணமூர்த்தி, போதைபொருள் தடுப்பு நுண்ணறிவு பிரிவு இன்ஸ்பெக்டர் மீனாட்சி உள்பட பலர் கலந்துகொண்டனர். 

விழுப்புரம்:

சேலம் மாவட்டம் ஆத்தூரை சேர்ந்தவர் அரசு மகன் கார்த்திக் (வயது 36). இவர் விழுப்புரம் தந்தை பெரியார் நகரில் தனது மனைவி மற்றும் குழந்தைகளுடன் தங்கியிருந்து விழுப்புரம் அருகே உள்ள சின்னதச்சூரில் கிராம நிர்வாக அலுவலராக பணியாற்றி வருகிறார்.

இவர் சம்பவத்தன்று தனது மோட்டார் சைக்கிளில் விழுப்புரம் அரசு மருத்துவமனைக்கு வந்துவிட்டு மீண்டும் அங்கிருந்து வீட்டிற்கு புறப்பட்டார்.

விழுப்புரம் பெரியார் நகர் நுழைவுவாயில் அருகில் திரும்பும்போது எதிரே வந்த வாகனத்தில் மோதாமல் இருப்பதற்காக கார்த்திக் திடீரென ‘பிரேக்’ போட்டார். இதில் நிலைதடுமாறி மோட்டார் சைக்கிளில் இருந்து தவறி கீழே விழுந்ததில் கார்த்திக்கின் தலையில் பலத்த காயம் ஏற்பட்டது.

உடனே அவரை அக்கம், பக்கத்தினர் மீட்டு சிகிச்சைக்காக முண்டியம்பாக்கம் அரசு மருத்துவமனையில் சேர்த்தனர். பின்னர் அங்கிருந்து மேல்சிகிச்சைக்காக புதுச்சேரி ஜிப்மர் மருத்துவமனையில் சேர்க்கப்பட்டார். அங்கு அவருக்கு டாக்டர்கள் தீவிர சிகிச்சை அளித்தும் பலனின்றி நேற்று அதிகாலை இறந்தார்.

இதுகுறித்த புகாரின்பேரில் விழுப்புரம் தாலுகா போலீசார் வழக்குப்பதிவு செய்து விசாரணை நடத்தி வருகின்றனர்.