நீங்கள் தேடியது "வீடியோ கால்"

இமாச்சலபிரதேம் மாநிலம் மண்டியில் விடுமுறை கிடைக்காததால் வீடியோ கால் மூலம் மணமக்கள் திருமணம் செய்து கொண்டனர்.

துருக்கியில் பணிபுரியும் மணமகனுக்கு விடுமுறை அளிக்க முதலாளி மறுப்பு தெரிவித்துள்ளார். இதனிடையே மணமகளின் நோய்வாய்ப்பட்ட தாத்தா அவளுக்கு விரைவில் திருமணம் செய்து வைக்க வேண்டும் என்று வலியுறுத்தி உள்ளார். இதனால் மணமகன் மற்றும் மணமகளின் குடும்பத்தினர் மெய்நிகர் 'நிக்கா'வுக்கு ஒப்புக்கொண்டனர்.

இதனால் அதிநவீன தொழில்நுட்பத்தால் வீடியோ கால் மூலம் மணமகன் துருக்கியில் இருந்தும், மணமகள் பிலாஸ்பூரிலிருந்தும் திருமணம் செய்து கொண்டனர்.

கடந்த ஆண்டு ஜூலை மாதம், சிம்லாவில் உள்ள கோட்கரைச் சேர்ந்த ஆஷிஷ் சிங்கும், குலுவில் உள்ள பூந்தரைச் சேர்ந்த ஷிவானி தாக்குரும், நிலச்சரிவு மற்றும் திடீர் வெள்ளம் காரணமாக வீடியோ கான்பரன்சிங் மூலம் திருமணம் செய்து கொண்டனர் என்பது குறிப்பிடத்தக்கது. 

திருவனந்தபுரம்:

ஒரு தனிப்பட்ட நபருக்கு சமூக வலைதளங்கள் உள்ளிட்ட பல்வேறு வழிகளில் ஆசையை தூண்டி, அவரை பற்றிய ரகசியங்களை அறிந்தும், அது தொடர்பான விவரங்களை கூறியும் மிரட்டி பணம் பறிப்பு உள்ளிட்ட மோசடிகளில் ஈடுபடுவதே "ஹனி டிராப்" மோசடி ஆகும்.

செல்போன் மற்றும் சமூக வலைதளங்கள் பயன்பாடு அதிகமுள்ள தற்போதைய காலக் கட்டத்தில், "ஹனி டிராப்" மோசடியும் அதிகமாக நடந்து வருகிறது. இந்த மோசடி கும்பலிடம் வாலிபர்கள், முதியவர்கள் என வயது வித்தியாசமின்றி அனைத்து தரப்பு வயதினரும் சிக்கிவிடுகிறார்கள்.

இதுபோன்ற மோசடி கும்பலிடம் வியாபாரிகள், தொழிலதிபர்கள் என அனைத்து தரப்பினரும் சிக்கி பணத்தை இழக்கிறார்கள். சம்பந்தப்பட்டவர்கள் தங்களைப் பற்றிய தனிப்பட்ட விஷயங்கள் வெளியாகி அவமானமாகி விடும் என்று அச்சப்படுகின்றனர்.

அவர்களது அந்த மனநிலையை பயன்படுத்தி தங்களிடம் சிக்கும் நபர்களை மோசடி கும்பல் தைரியமாக மிரட்டி பணம் பறிக்கிறது. "ஹனி டிராப்" மோசடியில் சிக்கி பணத்தை இழக்கும் நபர்கள் பற்றிய தகவல்கள் தொடர்ந்து வெளியாகி வந்த போதிலும், மோசடி கும்பலிடம் பலர் சிக்குவது தொடர் கதையாக நடந்து வருகிறது.

சர்வதேச சுற்றுலா தலங்கள் நிறைந்த கேரள மாநிலத்தில் "ஹனி டிராப்" மோசடி சம்பவங்கள் அதிகளவில் நடந்துவருகிறது. இந்நிலையில் அங்கு மேலும் ஒரு "ஹனி டிராப்" மோசடி நடந்திருக்கிறது. திருச்சூர் பூங்குன்றம் பகுதியை சேர்ந்த முதியவரான தொழிலதிபர் ஒருவருக்கு, சமூக வலைதளங்களின் மூலமாக கொல்லம் அஞ்சலம்மூடு பகுதியை சேர்ந்த ஷெமி (வயது38) என்ற இளம்பெண் கடந்த 2 ஆண்டுகளுக்கு முன்பு அறிமுகமாகியிருக்கிறார்.

தனக்கு திருமணமாகவில்லை என்று கூறி அறிமுகமான ஷெமி, அந்த தொழிலதிபருக்கு செல்போனில் வீடியோ காலில் வந்து தனது நிர்வாண உடலை காண்பிப்பது உள்ளிட்ட செயலில் ஈடுபட்டு அவருடன் தொடர்பில் இருந்து வந்திருக்கிறார்.

அவ்வாறு வீடியோ காலில் நிர்வாண போஸ் காண்பித்து தொழிலதிபரிடமிருந்து பணமும் பெற்றபடி இருந்துள்ளார். அது மட்டுமுன்றி நகைகள் மற்றும் பல விலையுயர்ந்த பொருட்களையும் வாங்கிக் கொண்டார். இவ்வாறாக அந்த தொழிலதிபரிடம் ரூ.2.5கோடி வரை பணத்தை பறித்துக் கொண்டார்.

இருந்தபோதிலும் தொழிலதிபரை ஷெமி விடுவதாக இல்லை. தொடர்ந்து மிரட்டி பணம் கேட்டபடி இருந்திருக்கிறார். இதனால் அந்த தொழிலதிபர், ஷெமி மீது திருச்சூர் மேற்கு போலீஸ் நிலையத்தில் புகார் செய்தார். அதன்பேரில் போலீசார் வழக்குப்பதிந்து ஷெமியை கைது செய்தனர்.

மேலும் அவருக்கு உடந்தையாக இருந்ததாக அவரது கணவர் சோஜன்(32) என்பவரும் கைது செய்யப்பட்டார். தொழிலதிபரிடம் இருந்து பறித்த பணத்தை வைத்து தேவையான பொருட்களை வாங்கி பங்களா, சொகுசு கார்கள் என வாங்கி மிகவும் ஆடம்பரமாக வாழ்ந்துள்ளனர். அவர்களிடமிருந்து 60 பவுன் தங்க நகைகள், 3 சொகுசு கார்கள், ஒரு ஜீப் மற்றும் மோட்டார்சைக்கிளை போலீசார் பறிமுதல் செய்திருக்கின்றனர்.

கேரளாவை பொறுத்தவரை தொழிலதிபர்கள், வியாபாரிகள் என வசதி படைத்தவர்களே அதிகளவில் "ஹனி டிராப்" மோசடியில் சிக்கி பணத்தை இழக்கிறார்கள். அவர்களை குறி வைத்தே மோசடி கும்பலும் வலை விரிக்கிறது. அந்த கும்பல் சமூக வலைதளங்களில் கவர்ச்சிகரமான ஆபாசம் கலந்த விளம்பரங்களை வெளியிடுகிறது.

சபலம் காரணமாக அதில் சிலர் சிக்கிவிடுகின்றனர். அவ்வாறு சிக்குபவர்களை மோசடி கும்பல் பிடித்துக் கொள்கிறது. அவர்களுக்கு தகுந்தாற் போல் பேசத் தொடங்கி, பின்பு அவர்களது விருப்பங்களை தெரிந்துகொண்டு தங்களது இடத்துக்கு வரவழைத்துவிடுகிறார்கள்.

தேன் ஒழுக பேசும் மோசடி பெண்களின் வார்த்தைகளை உண்மை என நம்பி அவர்களுடன் பழகுகிறார்கள். அதன் பிறகே மோசடி கும்பல் தனது வேலையை காட்ட தொடங்குகிறது. தங்களது வலையில் சிக்கும் நபர்களின் அந்தரங்க விஷயங்களை வீடியோ அல்லது புகைப்படம் எடுத்து வைத்துக்கொண்டு மிரட்டி பணம் பறிப்பதையே "ஹனி டிராப்" மோசடி கும்பல் இலக்காக வைத்து செயல்படுகிறது.

இது போன்ற மோசடி கும்பலிடம் சிக்காமல் இருக்க விழிப்புடன் செயல்பட வேண்டும் என்று கேரள காவல்துறை கேட்டுக்கொண்டுள்ளது. 

அரசின் தொலைத்தொடர்பு சேவை நிறுவனமான பி.எஸ்.என்.எல் நிறுவனம் விரைவில் 5 ஜி மற்றும் விரிவுபடுத்தப்பட் 4 ஜி சேவைகளை சேவைகளை அறிமுகப்படுத்த உள்ளது. தற்போது 5 ஜி திட்டம் சோதனை கட்டத்தில் உள்ள நிலையில் மத்திய தொலைத்தொடர்புத் துறை அமைச்சர் ஜோதிராதித்ய சிந்தியா[Jyotiraditya Scindia] பி.எஸ்.என்.எல் 5 ஜியை பயன்படுத்தி வீடியோ கால் சேவையை முதல் முறையாக பரிசோதித்து பார்த்தார். டெல்லியில் உள்ள c-dot  கேம்பஸில் இந்த நிகழ்வு நடந்துள்ளது.

அந்த வீடியோ காலில் பெண் ஒருவருடன் 5 ஜி சேவையின் செயல்திறன் குறித்து பேசினார். இதன்மூலம் பி.எஸ்.என்.எல் 5 ஜி தொழில்நுட்பத்தின் செயல் திறன் உறுதியாகியுள்ளது என்று ஜோதிராதித்ய சிந்தியாவின் அதிகாரப்பூர்வ எக்ஸ் பக்கத்தில் தெரிவிக்கப்பட்டுள்ளது. மேலும் அதில் பகிரப்பட்ட அமைச்சரின் வீடியோ கால் காணொளியும் தற்போது இணையத்தில் வைரலாகி வருகிறது.

முன்னதாக இந்த வருடத்திற்கான பட்ஜெட்டில் பி.எஸ்.என்.எல் நிறுவனத்துக்கு மீண்டும் புத்துயிர் கொடுக்க ரூ.82,000 கோடி ஒதுக்கப்பட்டது. தனியார் தொலைத்தொடர்பு சேவை நிறுவனங்கள் தங்களின் கட்டணங்களை அதிகரித்து வரும் நிலையில் அனைவரின் பார்வையும் பி.எஸ்.என்.எல் பக்கம் திரும்பியுள்ளது குறிப்பிடத்தக்கது. 

மும்பை:

காட்கோபரில் வசிக்கும் பவேஷ் சேத், பால் பேரிங்ஸ் வியாபாரம் செய்து வந்தார். இவர்நேற்று மாலை 3.15 மணியளவில் பாந்த்ரா-ஒர்லியை இணைக்கும் கடல் பாலத்தில் இருந்து குதித்து தற்கொலை செய்து கொண்டார்.

அவரது மகன் கொடுத்த தகவலின் பேரில் அங்கு சென்ற பாந்த்ரா போலீசார் சேத் உடலைக் கைப்பற்றினர். இதுகுறித்து விசாரணை நடத்தினர். இதுதொடர்பாக பாந்த்ரா போலீசார் கூறியதாவது:

இறந்தவரின் மகன் மாலை 4:30 மணியளவில் எங்களை அணுகினார். வாட்ஸ்அப் வீடியோ காலில் தந்தை அழைத்ததையும், கடலில் குதித்ததையும் தெரிவித்தார்.

தகவலறிந்து சென்ற தீயணைப்புப் படை அதிகாரிகள் மற்றும் மீட்புக் குழுவினர் நடத்திய 3 மணி நேர தேடுதலுக்குப் பிறகு அவரது உடல் கண்டெடுக்கப்பட்டது.

ஒரு வாகன ஓட்டியிடம் லிப்ட் கேட்டு பாந்த்ரா-ஒர்லி பாலத்தின் தென் பகுதியில் இறங்கிய அவர், மகனுக்கு வீடியோ கால் செய்து பாலத்தில் இருந்து குதிக்கப் போவதாகவும், குடும்பத்தை பார்த்துக் கொள்ளும்படியும் தெரிவித்துள்ளார். தொழிலில் ஏற்பட்ட கோடிக்கணக்கான நஷ்டம் காரணமாகவே தற்கொலை செய்து கொண்டார் என தெரிவித்தனர்.

தொழிலில் ஏற்பட்ட நஷ்டத்தால் மகனுக்கு வீடியோ கால் செய்து தந்தை தற்கொலை செய்துகொண்ட சம்பவம் அப்பகுதியில் சோகத்தை ஏற்படுத்தியுள்ளது.

எக்ஸ் தளத்தில் ஆடியோ மற்றும் வீடியோ அழைப்புகளை மேற்கொள்வதற்கான வசதி வழங்கப்படுகிறது. முன்னதாக ஆகஸ்ட் மாத வாக்கில் எக்ஸ் நிறுவன தலைமை செயல் அதிகாரி லிண்டா யாக்கரினோ இந்த அம்சம் வழங்குவது பற்றிய தகவலை வழங்கி இருந்தது குறிப்பிடத்தக்கது. வீடியோ கால் அம்சம் பற்றிய தகவலை லிண்டா தனது எக்ஸ் பதிவில் குறிப்பிட்டுள்ளார்.

அந்நிறுவன வலைதளத்தில் ஆடியோ மற்றும் வீடியோ காலிங் ஆப்ஷனை எப்படி செயல்படுத்த வேண்டும் என்று குறிப்பிடப்பட்டு இருக்கிறது. இத்துடன் யார் யார் தனக்கு அழைப்புகளை மேற்கொள்ள முடியும் என்பதை தேர்வு செய்வதற்கான வசதியும் பயனருக்கு வழங்கப்படுகிறது. இதில் அட்ரஸ் புக்கில் இருப்பவர்கள், யார்யார் ஃபாளோ செய்கிறார்கள் மற்றும் அனைவரும் என மூன்று நிலைகளில் ஒரு ஆப்ஷனை தேர்வு செய்யலாம்.

ஆடியோ, வீடியோ அழைப்புகளை மேற்கொள்வது எப்படி?

அழைப்புகளுக்கான ஆப்ஷனை தேர்வு செய்ய எக்ஸ் செயலியின் செட்டிங்ஸ் -- பிரைவசி & சேஃப்டி -- டைரக்ட் மெசேஜஸ் -- எனேபில் ஆடியோ & வீடியோ காலிங் போன்ற ஆப்ஷன்களை க்ளிக் செய்ய வேண்டும். இதன் பிறகு டைரக்ட் மெசேஜ் ஆப்ஷனில் அழைப்புகளை மேற்கொள்வதற்கான ஐகான் தெரியும். அதனை க்ளிக் செய்து ஆடியோ அல்லது வீடியோ கால் மேற்கொள்ளலாம்.

திருவனந்தபுரம்:

இஸ்ரேலில் நடந்துவரும் போர், அங்கு மட்டுமின்றி அனைத்து நாட்டு மக்களையும் அதிர்ச்சியை ஏற்படுத்தி இருக்கிறது. இஸ்ரேல் ராணுவத்தினர் மற்றும் ஹமாஸ் அமைப்பினர் தொடர்ந்து பதிலுக்கு பதிலாக எதிர் தாக்குதல் நடத்தியபடியே இருக்கின்றனர்.

இந்த தாக்குதலில் ஆயிரத்துக்கும் மேற்பட்டோர் பலியாகியுள்ளனர். பல்லாயிரக்கணக்கானோர் படுகாயம் அடைந்திருக்கின்றனர். இஸ்ரேலில் நடந்துவரும் இந்த போரில், அங்கு தங்கியிருக்கும் இந்தியர்கள் யாரும் பலியாகியதாக இதுவரை உறுதி செய்யப்படவில்லை.

இந்நிலையில் கேரள மாநிலத்தை சேர்ந்த நர்சு ஒருவர், ராக்கெட் தாக்குதலில் படுகாயமடைந்த தகவல் வெளியாகி இருக்கிறது. கேரள மாநிலம் கண்ணூர் ஸ்ரீகண்டாபுரத்தை சேர்ந்த வர் ஆனந்த். இவரது மனைவி ஷீஜா, இஸ்ரேலில் உள்ள அஷ்கெலோன் என்ற பகுதியில் பணிபுரிந்து வருகிறார்.

இந்த இடம் காசா பகுதியின் எல்லையில் இருந்து 13 கிலோமீட்டர் தொலைவில் இருக்கிறது. இந்நிலையில் ஷீஜா இருந்த பகுதியில் ராக்கெட் தாக்குதல் நடத்தப்பட்டது. அதில் ஷீஜா படுகாயமடைந்தார். அவர் முதலில் பார்சிலாய் பகுதியில் உள்ள மருத்துவமனையில் அனுமதிக்கப் ட்டார்.

பின்பு டெல்அவில் பகுதியில் உள்ள மருத்துவமனையில் சேர்க்கப்பட்டு சிகிச்சை பெற்று வருகிறார். மேலும் கணவருடன் செல்போனில் வீடியோ காலில் பேசிக் கொண்டிருந்தபோது தான், ராக்கெட் தாக்குதலில் ஷீஜா சிக்கியிருக்கும் அதிர்ச்சி தகவல் வெளியாகி இருக்கிறது.

இஸ்ரேலில் போர் நடப்பதையறிந்த ஷீஜாவின் கணவர் ஆனந்த், அவருடன் செல்போனில் தொடர்பு கொண்டு வீடியோ காலில் பேசி பத்திரமாக இருக்கிறாயா? என்று கேட்டிருக்கிறார். அவர்கள் பேசிக்கொண்டிருந்த போது தான், ஷீஜா இருந்த பகுதியில் ராக்கெட் தாக்குதல் நடந்திருக்கிறது.

அதில் ஷீஜா சிக்கிக் கொண்டதால், அவரது செல்போன் தொடர்பு துண்டிக்கப்பட்டுவிட்டது. இதனால் பதறிப்போன் ஆனந்த், தனது மனைவியை மீண்டும் தொடர்பு கொண்டிருக்கிறார். ஆனால் அவரது செல்போனைதொடர்பு கொள்ள முடியவில்லை.

இதனால் தனது மனைவிக்கு என்ன ஆனது? என்பது தெரியாமல் ஆனந்த் மற்றும் ஷீஜாவின் குடும்பத்தினர் தவித்தபடி இருந்தனர். இந்நிலையில் ராக்கெட் தாக்குதலில் ஷீஜா காயமடைந்து மருத்துவ மனையில் சிகிச்சையில் இருக்கும் தகவலை, அவரது குடும்பத்தினருக்கு இஸ்ரேலில் இருக்கும் அவரது நண்பர்கள் தெரிவித்தனர்.

அதனைக்கேட்டு அதிர்ச்சியடைந்த ஷீஜாவின் குடும்பத்தினர் கதறினர். ஷீஜாவின் நிலை நன்றாக இருப்பதாக குடும்பத்தினரிடம் நண்பர்கள் தெரிவித்தனர். மேலும் ஆஸ்பத்திரியில் சிகிச்சை பெற்று வந்த ஷீஜாவுடன் வீடியோ காலில் பேச வைத்தனர்.

ஷீஜாவுடன் அவரது தாய் சரோஜினி, சகோதரி ஷஜி ஆகியோர் கண்ணீர்விட்டு அழுதபடியே பேசினர். தனது மகளின் நிலையை கண்டு அவர்கள் வேதனையடைந்தனர். 

X (முன்பு டுவிட்டர்) தளத்தில் மிகப்பெரும் மாற்றங்களை ஏற்படுத்துவதற்கான பணிகள் நடைபெற்று வருகின்றன. எலான் மஸ்க் டுவிட்டர் நிறுவனத்தை வாங்கியதில் இருந்து ஏராளமான மாற்றங்களை தளத்தில் மேற்கொண்டு வருவதை வாடிக்கையாக கொண்டிருக்கிறார். இவ்வாறு செய்வதில் இருந்து தற்போதைக்கு எலான் மஸ்க் பிரேக் எடுக்க மாட்டார் என்றே தெரிகிறது.

அந்த வகையில், X தளத்தில் வீடியோ கால் வசதி விரைவில் வழங்கப்பட இருப்பதாக தகவல் வெளியாகி உள்ளது. டுவிட்டர் தளத்தில் மெசேஜிங் தவிர்த்து, ஹோம் ஃபீட் பிரிவில் தான் அதிக கவனம் செலுத்தி வந்தது. இதன் காரணமாக டுவிட்டர் தளத்தில் மிகவும் அரிதான நடவடிக்கையாக மெசேஜிங் வசதி வழங்கப்பட்டது. தற்போது, X தளத்தில் புதிதாக வீடியோ கால் பேசுவதற்கான வசதி வழங்கப்பட இருக்கிறது.

சமீபத்திய பேட்டி ஒன்றில் X தலைமை செயல் அதிகாரியான லின்டா யாக்கரினோ வீடியோ கால் வசதி பற்றிய தகவலை தெரிவித்தார். "நீண்ட வீடியோ மற்றும் செய்தி கட்டுரைகள் பிரபலமாக மாறி வரும் நிலையில், உங்களுக்கு பிடித்த கிரியேட்டர்களுக்கு சந்தாதாரர் ஆகிடுங்கள், அவர்கள் தற்போது இதில் இருந்து வருவாய் ஈட்டி வருகின்றனர். நீங்கள் வீடியோவை பாருங்கள், விரைவில் உங்களது மொபைல் நம்பரை கொடுக்காமல், வீடியோ கால் மேற்கொள்ள முடியும்," என்று யாக்கரினோ தெரிவித்தார்.

இதே தகவலை X டிசைனர் ஆன்ட்ரியா கான்வே டுவிட் மூலம் உறுதிப்படுத்தினார். இதில் X யு.ஐ.-இல் வீடியோ காலிங் செய்வதற்கான படம் இடம்பெற்று இருக்கிறது. அதில் யு.ஐ. வாட்ஸ்அப் மற்றும் இன்ஸ்டாகிராம் உள்ளிட்ட தளங்களில் காலங்காலமாக இருப்பதை போன்றே காட்சியளிக்கிறது. X தளத்தில் இடம்பெற்று இருக்கும் புதிய கால் ஐகானை க்ளிக் செய்து ஆடியோ அல்லது வீடியோ கால் மேற்கொள்ள முடியும்.

தற்போது X தளத்தில் ஆடியோ காலிங் செய்வதற்கான வசதியும் வழங்கப்படவில்லை என்பது குறிப்பிடத்தக்கது. அந்த வகையில் வீடியோ கால் போன்றே ஆடியோ கால் வசதியும் முதல் முறையாக வழங்கப்பட இருக்கிறது. வீடியோ காலிங் யு.ஐ.-இல் மைக்ரோபோனில் மியூட்/அன்-மியூட், லவுட் ஸ்பீக்கர், டர்ன் ஆஃப் வீடியோ மற்றும் என்ட் தி கால் என நான்கு ஆப்ஷன்கள் இடம்பெற்றுள்ளன. புதிய அம்சம் பற்றி X சார்பில் இதுவரை எவ்வித அதிகாரப்பூர்வ தகவலும் வழங்கப்படவில்லை.

போரூர்:

சென்னை, தலைமை செயலக காலனி போலீஸ் நிலையத்தில் குற்றப்பிரிவில் போலீசாக பணிபுரிந்து வந்தவர் சுகந்தி (வயது25).

இவரது சொந்த ஊர் விழுப்புரம் மாவட்டம் செம்மார் கிராமம் ஆகும். கடந்த 2017-ம்ஆண்டு காவல் துறையில் பணிக்கு சேர்ந்த இவர் கோயம்பேடு சேமாத்தம்மன் நகர் பகுதியில் உள்ள வீட்டில் தனது சகோதரர் சுப்புராயனுடன் தங்கி வேலை பார்த்து வந்தார்.

இந்நிலையில் நேற்று மதியம் பணி முடிந்து வீட்டுக்கு வந்த சுகந்தி திடீரென சமையலறைக்கு சென்று தூக்கு போட்டு தற்கொலை செய்து கொண்டார். தகவல் அறிந்ததும் கோயம்பேடு உதவி கமிஷனர் ரமேஷ்பாபு மற்றும் போலீசார் விரைந்து வந்து சுகந்தியின் உடலைக் கைப்பற்றி பிரேத பரிசோதனைக்காக ராஜீவ்காந்தி அரசு ஆஸ்பத்திரிக்கு அனுப்பி வைத்தனர்.

விசாரணையில் காதலனுடன் சுகந்தி வீடியோ காலில் பேசியபோது ஏற்பட்ட தகராறு காரணமாக அவர் தற்கொலை செய்து இருப்பது தெரியவந்தது. தற்கொலை செய்து கொண்ட சுகந்தி ஏற்கனவே திருப்பூர் ஆயுதப்படையில் பணியாற்றும் போது உடன் பணிபுரிந்து வந்த போலீஸ் காரர் விஷ்ணு என்பவருடன் பழக்கம் ஏற்பட்டது.

ஏற்கனவே திருமணமாகி மனைவியை பிரிந்து வாழ்ந்து வந்த விஷ்ணு தனது மனைவியை விவகாரத்து செய்து விட்டு சுகந்தியை திருமணம் செய்து கொள்வதாக கூறி காதலித்து வந்ததாக கூறப்படுகிறது. தற்போது அவிநாசி போலீஸ் நிலையத்தில் கணினி ஆப்ரேட்டராக பணியாற்றி வரும் விஷ்ணுவுக்கும், சுகந்திக்கும் இடையே அடிக்கடி சிறு சிறு பிரச்சினையால் தகராறு ஏற்பட்டு வந்தது.

அதே போல நேற்றும் அவர்கள் வீடியோ காலில் பேசிக் கொண்டு இருந்தபோது இருவருக்கும் இடையே தகராறு ஏற்பட்டு உள்ளது. இதையடுத்து விஷ்ணு இணைப்பை துண்டித்துவிட்டதாக தெரிகிறது. சுகந்தி பலமுறை தொடர்பு கொண்டும் காதலன் விஷ்ணு அவரது அழைப்பை எடுக்கவில்லை.

இதனால் மன வேதனை அடைந்த சுகந்தி விஷ்ணுவின் நண்பரான மற்றொரு போலீஸ்காரர் ஒருவரை தொடர்பு கொண்டு "நான் தற்கொலை செய்து கொள்ள போகிறேன்" என்று கூறி விட்டு தற்கொலை செய்து இருப்பது விசாரணையில் தெரியவந்து உள்ளது.

சுகந்தி மீது ஏற்கனவே உயர் அதிகாரிகள் மூலம் துறை ரீதியான நடவடிக்கை எடுத்து சென்னைக்கு இட மாற்றம் செய்து இருந்ததாக கூறப்படுகிறது. இந்நிலையில் காதலன் விஷ்ணுவுடன் செல்போனில் பேசியபோது என்ன பிரச்சினை என்பது தொடர்பாக போலீசார் விசாரித்து வருகின்றனர். மேலும் சுகந்தியின் செல்போனை கைப்பற்றி ஆய்வு செய்து வருகிறார்கள்.

இது தொடர்பாக சுகந்தியின் காதலனான போலீஸ்காரர் விஷ்ணு மற்றும் அவரது நண்பர் ஆகிய இருவரையும் நேரில் அழைத்து விசாரணை நடத்த கோயம்பேடு போலீசார் திட்டமிட்டு உள்ளனர். இதன் பின்னரே சுகந்தியின் தற்கொலை முடிவுக்கான காரணம் என்ன என்பது தெரியவரும்.

ஐதராபாத்:

நடப்பு ஐபிஎல் தொடரில் நேற்று நடந்த லீக் ஆட்டத்தில் ஐதராபாத்தை 8 விக்கெட் வித்தியாசத்தில் வீழ்த்தி பெங்களூரு அபார வெற்றிபெற்றது. இப்போட்டியில் பெங்களூரு அணி 8 விக்கெட்டுகள் வித்தியாசத்தில் அபார வெற்றியை பதிவு செய்தது.

முதலில் பேட்டிங் செய்த ஐதராபாத் அணி கிளாஸனின் அதிரடியான சதம் காரணமாக 186 ரன்கள் சேர்த்தது. இதனையடுத்து களமிறங்கிய பெங்களூரு அணி விராட் கோலியின் சதம் காரணமாக 19.2 ஓவர்களில் வெற்றியை பதிவு செய்தது. சதம் விளாசிய விராட் கோலி ஆட்டநாயகன் விருதை தட்டிச் சென்றார்.

ஆட்டநாயகன் விருது வென்ற விராட் கோலி, தனது மனைவி அனுஷ்கா சர்மாவிடம் வீடியோ காலில் பேசியுள்ளது ரசிகர்களிடையே பாராட்டப்பட்டு வருகிறது. ஒவ்வொரு முறையும் தனது வளர்ச்சிக்கும், மகிழ்ச்சிக்கும் மனைவியே முக்கியக் காரணம் என்று விராட் கோலி கூறுவார்.

அந்த வகையில் மிகமுக்கியமான சதத்தை விளாசிய பின் விராட் கோலி, அனுஷ்கா சர்மாவிடம் வீடியோ காலில் பேசிய புகைப்படம் சமூக வலைதளங்களில் ரசிகர்களால் பகிரப்பட்டு வருகிறது.

பீஜீங்:

சீனாவின் கண்டுபிடிப்புகள் அடிக்கடி சர்ச்சையில் சிக்குவது வழக்கம்.

அந்த வகையில் இப்போது சீனா புதிய ஆப் ஒன்றை கண்டுபிடித்து உள்ளது. இந்த செயலி மூலம் தொலை தூரத்தில் இருப்போருக்கு நிஜத்தில் கொடுப்பது போல் முத்தம் கொடுக்க முடியும்.

இதற்காக செல்போனில் ஆப் ஒன்றை பதிவிறக்கம் செய்ய வேண்டும். அந்த ஆப் மூலம் தொலை தூரத்தில் இருக்கும் காதலி, அல்லது காதலனை தொடர்பு கொள்ள வேண்டும்.

அவரும் இணைப்பில் வந்ததும் இருவரும் நிஜத்தில் முத்தம் கொடுப்பது போல முத்தம் கொடுத்து கொள்ளலாம்.

இந்த செயலிக்கு சமூக ஆர்வலர்கள் சிலர் எதிர்ப்பு தெரிவித்து உள்ளனர். அதே நேரம் இதற்கு இளம்ஜோடிகள் பலரும் ஆதரவும் தெரிவித்து வருகிறார்கள்.

திருவொற்றியூர்:

திருவொற்றியூர், எஸ்.பி கோயில் 1-வது தெருவை சேர்ந்தவர் பரத் (19). ஆர்.கே.நகரில் உள்ள கல்லூரியில் பி. ஏ .படித்து வருகிறார்.

இவருக்கும் பாரிமுனையில் உள்ள கல்லூரியில் 2-ம் ஆண்டு படித்து வரும் திருவொற்றியூர், அம்பேத்கர் நகரை சேர்ந்த மாணவிக்கும் பழக்கம் ஏற்பட்டது. இருவரும் செல்போன் மூலம் அடிக்கடி பேசி வந்தனர்.

இந்த நிலையில் இரவு கல்லூரி மாணவியை வீடியோ கால் மூலம் மாணவன் பரத் தொடர்பு கொண்டு பேசினார். அப்போது அவர் மாணவியிடம் ஆபாசமாக பேசினார்.

இதனால் அதிர்ச்சி அடைந்த மாணவி இதுகுறித்து பெற்றோரிடம் தெரிவித்தார். இதுதொடர்பாக திருவொற்றியூர் போலீசில் புகார் செய்யப்பட்டது.

திருவொற்றியூர் அனைத்து மகளிர் போலீசார் வழக்கு பதிவு செய்து கல்லூரி மாணவியிடம் வீடியோ காலில் ஆபாசமாக பேசியதாக மாணவர் பரத்தை கைது செய்தனர். பின்னர் அவரை கோர்ட்டில் ஆஜர்படுத்தி சிறையில் அடைத்தனர்.