நீங்கள் தேடியது "நாகலாபுரம்"

நாகலாபுரம் வேத நாராயணசுவாமி ஆலயத்தில் ஆண்டுதோறும் நடக்கும் சூரிய பூஜை மிக வித்தியாசமானதாகும்.

பொதுவாக பழமையான ஆலயங்களில் மூலவர் சிலை மீது சூரிய கதிர்கள் படுவதை சூரிய பூஜை என்று நமது முன்னோர்கள் வகுத்து வைத்து உள்ளனர்.

பெரும்பாலும் ஆலயங்களில் ஆண்டுக்கு ஒரு தடவை ஏதாவது ஒருநாள் மட்டுமே மூலவர் மீது சூரிய கதிர்கள் விழும் நிகழ்வு நடைபெறும்.

ஆனால் இந்த தலத்தில் அடுத்தடுத்து மூன்று நாட்களுக்கு சூரிய கதிர்கள் மூலவர் மீது விழும் அதிசயம் நடக்கிறது.

ஒவ்வொரு ஆண்டும் பங்குனி மாதம் இந்த அதிசய சூரிய பூஜை நடந்து வருகிறது.

இத்தகைய மூன்று நாள் சூரிய பூஜை வேறு எந்த தலத்திலும் இல்லை என்பது குறிப்பிடத்தக்கது.

பங்குனி மாதம் மீன் மாதமாக கருதப்படுகிறது.

பெருமாள் மீன் அவதாரம் எடுத்த காரணத்தினால் இந்த மாதத்தில் இத்தகைய மூன்று நாள் சூரிய பூஜை நடந்து வருவதாக புராணங்களில் குறிப்பிடப்பட்டு உள்ளது.

சூரியன் அடுத்தடுத்து 3 நாட்கள் தனது கதிர்களை இந்த தலத்தின் இறைவன் மீது படச் செய்வதால் அதை ஒரு அதிசய நிகழ்வாக கருதுகிறார்கள்.

இதனால் அந்த மூன்று நாட்களும் நாகலாபுரம் ஆலயத்தில் சிறப்பு நிகழ்ச்சிகள், விழாக்கள் ஏற்பாடு செய்யப்படுகின்றன.

நாகலாபுரம் வேதநாராயணன் பெருமாள் ஆலயத்தில் ஏகாதசி நாட்களில் சிறப்பு பூஜைகள் நடத்தப்படுகின்றன.

அன்று மூலவர் மச்ச அவதார பெருமாளுக்கு செய்யப்படும் பூஜைகளை பார்த்து தரிசிக்க நீண்ட தூரத்தில் இருந்து எல்லாம் பக்தர்கள் வருகிறார்கள். அந்த அளவுக்கு இந்த தலத்தின் ஏகாதசி பூஜை சிறப்பு பெற்றுள்ளது.

எனவே ஏகாதசி பற்றி தெரிந்து கொள்ள வேண்டும்.

ஏகாதசியை விட உயர்ந்த விரதம் வேறு ஏதும் இல்லை என்பது ஆன்றோர் வாக்கு. எந்த நிலையிலும் ஏகாதசி விரதத்தை மேற்கொள்ளலாம்.

பதினைந்து நாட்கள் கொண்டது ஒரு பட்சம். ஒவ்வொரு நாளும் ஒவ்வொரு திதிக்கு உரியது.

அமாவாசையில் இருந்து ஆரம்பித்து பவுர்ணமி வரை உள்ள திதிகள் வளர்பிறை திதிகள். இது சுக்ல பட்சம் எனப்படும்.

பவுர்ணமியில் இருந்து ஆரம்பித்து அமாவாசை வரை உள்ள திதிகள் தேய்பிறை திதிகள்.

இது கிருஷ்ண பட்சம் எனப்படும்.

இந்த இரண்டு பட்சங்களில் ஒவ்வொன்றிலும் 11வது நாளில் வரும் திதி ஏகாதசி திதி.

ஏகம்+தசம்= அதாவது 1+10=11 என்பதுதான் ஏகாதசி திதி.

இந்த பதினொன்றாம் திதிக்கு மட்டும் ஏன் இத்தனை சிறப்பு? ஒவ்வொரு திதிக்கும் ஒவ்வொரு தேவதை உண்டு.

அவ்வாறு ஏகாதசி திதிக்கு உரிய தேவதை தர்மம் ஆகும்.

அதனால் இந்த திதியை 'தர்மதிதி' என்றும் கூறுவது உண்டு.

எனவே தர்ம திதியாகிய ஏகாதசி விரதத்தை ஒருவர் தவறாது பின்பற்றினால் தர்மத்திற்கு வளர்ச்சி ஏற்படும்.

அதனால் விரதம் இருப்பவர்கள் பாவங்கள் நீங்கி மேன்மை அடைவார்கள்.

கர்ம மேந்திரியங்கள் 5, ஞானேந்திரியங்கள் 5, மனம் 1 ஆகிய இந்தப் பதினொன்றாலும் செய்யப்படும் தீவினைகள், இந்த ஏகாதசி விரதம் இருப்பதால் அழியும்.

ஏற்கனவே செய்த தீவினைகள் அழிந்துவிடும்.

பெருமாளை வணங்குகிறோம். இனி தீவினைகள் செய்ய மாட்டோம் என்பதை அவ்வப்போது மறந்துவிடாமல் உறுதியுடன் இருக்க ஏகாதசி விரதம் முக்கியமானதாகும்.

ஓர் ஆண்டிற்கு இருபத்து நான்கு பட்சங்கள். இருபத்து நான்கு பட்சங்களுக்கு ஏகாதசிகள்.

ஆனால் சில ஆண்டுகளில் 24 வருடங்களுக்கு மேலும் சில நாட்கள் வரும்.

எனவே சில ஆண்டுகளில் 25 ஏகாதசிகள் வரும்.

இந்த ஏகாதசிகளின் வரிசை மார்கழி மாதம் தேய்பிறை பகுதியில் ஆரம்பித்து அடுத்து வரும் கார்த்திகை மாத வளர்பிறைப் பகுதியில் முடிவடைகிறது.

பொதுவாக பழமையான ஆலயங்களுக்கு செல்லும் போது கருவறை நுழைவு வாயிலில் இருபுறமும் காணப்படும் கம்பீரமான உருவங்களை பார்த்திருப்பீர்கள்.

அந்த இரு உருவங்களும் கருவறைக்கு காவலாக வீற்றிருக்கும் துவார பாலகர்கள் ஆவார்கள்.

பெரும்பாலும் கருவறை வாசலில் மட்டுமே துவார பாலகர்களை பார்க்க முடியும்.

விதி விலக்காக சில ஆலயங்களில் கருவறைக்கு முன்புள்ள இரண்டு மண்டப நுழைவு வாயிலிலும் துவார பாலகர்களை பிரதிஷ்டை செய்திருப்பார்கள்.

ஆனால் நாகலாபுரம் வேதநாராயண சுவாமி ஆலயத்தில் மிக மிக வித்தியாசமாக கருவறை முன்பு உள்ள 4 மண்டப 4 நுழைவு வாயில்களிலும் துவார பாலகர்கள் காணப்படுகிறார்கள்.

அந்த வகையில் மொத்தம் 8 துவார பாலகர்களை இந்த ஆலயத்தில் தரிசனம் செய்யலாம்.

இந்த ஆலயத்துக்குள் கருவறையை நோக்கி நுழைந்ததும் முதலில் நாகராஜ கணேசன், விஷ்ணு, துர்க்கை ஆகிய இரு துவார பாலகர்களும் காணப்படுகிறார்கள்.

அடுத்து ஜெயா, விஜயா என்ற துவார பாலகர்கள் உள்ளனர்.

3வது வாயலில் விக்னசா, தாபசா என்ற இரு துவார பாலகர்கள் பிரதிஷ்டை செய்யப்பட்டு உள்ளனர்.

4வது நுழைவு வாயிலில் மனிகா மற்றும் சந்தியா என்ற துவார பாலகர்கள் இருக்கிறார்கள்.

மிகவும் வித்தியாசமான இந்த அமைப்பை நாகலாபுரம் ஆலயத்துக்குள் செல்லும் போது கண்டுவர தவறாதீர்கள்.

பெருமாள் வீற்றிருக்கும் வைகுண்டம் 7 வாசல்களை கொண்டது.

அதை சப்த துவாரம் என்று சொல்வார்கள். அதே அமைப்பு நாகலாபுரம் வேதநாராயண சுவாமி ஆலயத்திலும் அமைந்துள்ளது.

இந்த தலத்தின் கருவறைக்கு முன்பு 7 நுழைவாயில்கள் இருக்கின்றன. ஒவ்வொரு வாயிலாக கடந்து சென்று பெருமாளை தரிசித்தால் வைகுண்டத்துக்கு சென்றது போன்ற பலனை பெற முடியும் என்பது ஐதீகம்.

அதுபோன்று இந்த தலம் பஞ்ச பிரகாரங்களை கொண்டது. அதாவது 5 பிரகாரங்கள் இந்த தலத்தில் அமைந்துள்ளன.

கருவறையை சுற்றி முதல் பிரகாரம் அமைந்துள்ளது.

அகழியுடன் காணப்படும் அந்த பிரகாரத்தில் உள்ள ஒவ்வொரு தூண்களிலும் சிற்ப கலையை கண்டு ரசிக்கலாம்.

விஜயநகர பேரரசின் கட்டிடக்கலை நுணுக்கங்களை அங்குள்ள ஒவ்வொரு தூண்களிலும் பக்தர்கள் பார்க்க முடியும்.

முதல் பிரகாரத்தை சுற்றி வரும் போது விஷ்ணு, துர்க்கை, பிரம்மா, விஷ்வசேனா ஆகியோரது உருவங்களை தரிசிக்கலாம்.

கருவறைக்கு நேர் பின்புறம் லட்சுமி வராக சுவாமி, வேணுகோபால சுவாமி, லட்சுமி நாராயண சுவாமி, ஹயக்கிரீவர் சுவாமி ஆகிய 4 பேரின் பிரம்மாண்ட விக்கிரகங்கள் வரிசையாக இருக்கின்றன.

கருவறை பின்புறம் பொதுவாக பெருமாளின் அம்சங்கள் இடம் பெற்றிருக்கும்.

இந்த தலத்தில் லட்சுமி பூவராக சுவாமி இடம் பெற்றுள்ளார்.

கருவறையின் அடுத்த பகுதியில் வீணா தட்சிணாமூர்த்தி, விநாயகர் ஆகியோரது விக்கிரகங்கள் அமைக்கப்பட்டுள்ளன.

2வது பிரகாரம் மிக அகன்ற வகையில் பிரம்மாண்டமாக அமைக்கப்பட்டுள்ளது.

அந்த கருவறையின் ஒரு பகுதியில் பக்த ஆஞ்சநேயரும், மற்றொரு பகுதியில் வேதவல்லி தாயாரும் இருக்கிறார்கள்.

ராமர், லட்சுமணர், வீர ஆஞ்சநேயர் ஆகியோரையும் அந்த பிரகாரத்தில் தரிசிக்கலாம்.

3வது பிரகாரம் நந்தவனம். 4வது பிரகாரம் மாடவீதியாக உள்ளது. 5வது பிரகாரம் கிராமத்தை உள்ளடக்கியது.

1. நாகலாபுரம் வேதநாராயண சுவாமி ஆலயம் ஆந்திர மாநிலம், சித்தூர் மாவட்டத்தில் அமைந்துள்ளது.

2.நாகலாபுரம் வேதநாராயண சுவாமி ஆலயத்துக்கு செல்பவர்களை வரவேற்கும் வகையில் திருப்பதி சாலையில் இருந்து பிரியும் பகுதியில் மிகப்பிரம்மாண்டமான வரவேற்பு வளைவு கட்டி உள்ளனர். அந்த வழியாக சென்றால் மிக எளிதாக ஆலயத்துக்குள் செல்லலாம்.

3. வேதநாராயண சுவாமி ஆலயத்தில் கருவறை சுவர்களில் ஏராளமான கல்வெட்டுகளும், சிற்பங்களும் நிறைந்து உள்ளன.

4. இந்த ஆலயம் பல நூறு ஆண்டுகளுக்கு முன்பு மிகப்பெரிய கோட்டைக்கு மத்தியில் கட்டப்பட்டு இருந்ததாக ஆய்வாளர்கள் கண்டுபிடித்து உள்ளனர். அந்த கோட்டையின் சில பகுதிகள் இப்போதும் நாகலாபுரம் ஊரில் ஆங்காங்கே காணப்படுகின்றன.

5. கருவறையை சுற்றி மிகப்பெரிய அகழி அமைத்து உள்ளனர். அந்த அகழி பகுதியிலும் ஏராளமான அரிய சிற்பங்கள் காணப்படுகின்றன.

6. திருப்பதி ஆலயத்தில் நடப்பது போன்றே இந்த தலத்திலும் அனைத்து வகை பூஜைகளும் பெருமாளுக்கு நடத்தப்படுகின்றன.

7. இந்த தலத்தில் திருப்பதியை போன்றே தினமும் கல்யாண உற்சவம் நடத்தப்படுகிறது. ஆன்லைன் மூலம் முன்பதிவு செய்தால் கல்யாண உற்சவத்தில் பங்கேற்கலாம்.

8. ஆகம விதிகளின் அடிப்படையில் கட்டப்பட்ட இந்த ஆலயத்தில் நவக்கிரகங்களுக்கு உரிய அனைத்து அம்சங்களும் உள்ளன. இதனால் நவக்கிரகங்களில் எந்த கிரகத்தில் தோஷம் இருந்தாலும் இந்த தலத்தில் வழிபாடு செய்தால் பலன் கிடைக்கும் என்பது ஐதீகம் ஆகும்.

9. இந்த ஆலயத்தில் பல தடவை அகழாய்வு செய்த போது அரிய சிலைகள் கிடைத்து உள்ளன. எனவே இந்த ஆலயம் அமைந்துள்ள பகுதியில் ஏற்கனவே சிற்ப வேலைபாடுகளுடன் கூடிய மிக பழமையான ஆலயம் இருந்திருக்கலாம் என்ற கருத்தும் உள்ளது.

10. வேதநாராயண சுவாமி ஆலயத்துக்கு சொந்தமாக ஏராளமான நிலம் இருந்தது. தற்போது ஆக்கிரமிப்புகள் காரணமாக பல நிலங்கள் கை நழுவி விட்டன.

11. 1967ம் ஆண்டு இந்த ஆலயத்தை அரசு கையகப்படுத்தி நடத்தி வருகிறது.

12. இந்த ஆலயத்தின் தூண்களில் காணப்படும் கல்வெட்டுகளில் 99 சதவீதம் கல்வெட்டுகள் தமிழ் கல்வெட்டுகளாக அமைந்துள்ளன.

13. வைகுண்ட ஏகாதசி, தை மாத பிறப்பு, ரதசப்தமி ஆகியவை இந்த தலத்தில் நடைபெறும் முக்கிய திருவிழாக்களாகும். சமீப காலமாக தெலுங்கு வருடப்பிறப்பும் சிறப்பாக கொண்டாடப்படுகிறது.

14. திருப்பதி ஆலயத்தின் நேரடி கட்டுப்பாட்டில் நாகலாபுரம் வேதநாராயண சுவாமி ஆலயம் இயங்கி வருகிறது.

15. சென்னையில் இருந்து 80 கி.மீ. தொலைவிலும், சுருட்டப்பள்ளியில் இருந்து 15 கி.மீ. தொலைவிலும் இந்த ஆலயம் அமைந்துள்ளது.

16. சென்னையில் இருந்து செல்பவர்கள் இந்த ஆலயத்தை தரிசித்து விட்டு திரும்பும் போது சுருட்டப்பள்ளி, பெரியபாளையம், சிறுவாபுரி, ஆண்டார்குப்பம் ஆகிய ஆலயங்களில் தரிசித்துவிட்டு வரலாம்.

17. பித்ரு தோஷம், சர்ப்ப தோஷங்களுக்கு இந்த தலம் மிகவும் சிறந்த பரிகார தலமாகும்.

18. 12 ராசிக்காரர்களில் மீனம் ராசிக்காரர்களுக்கு இந்த தலம் மிக உகந்த தலமாக கருதப்படுகிறது.

19. இந்த ஆலயத்து பெருமாளுக்கு மத்ஸ்ய நாராயண பெருமாள் என்றும் ஒரு பெயர் உண்டு.

20. நாகலாபுரத்தில் இருந்து திருப்பதி சுமார் 70 கி.மீ. தொலைவில் அமைந்துள்ளது. சென்னையில் இருந்து செல்பவர்கள் அதற்கேற்ப திட்டமிட்டு கொண்டால் இரு ஆலயங்களிலும் தரிசனம் செய்து விட்டு வரலாம்.

21. நாகலாபுரத்தில் நீர்வீழ்ச்சி ஒன்றும் உள்ளது. நேரமிருப்பவர்கள் அங்கும் சென்று வரும் வகையில் யாத்திரையை அமைத்துக்கொள்ளலாம்.

22. இந்த தலத்தில் சித்திரை மாதம் பிரம்மோற்சவம் நடத்தப்படுகிறது. சித்ரா பவுர்ணமியை மையமாக கொண்டு நடக்கும் இந்த திருவிழா 9 நாட்கள் நடத்தப்படும்.

23. மீன் அவதாரம் எடுத்ததால் இந்த தலத்தில் மச்ச ஜெயந்தி மிக உற்சாகமாக கொண்டாடப்படுகிறது. ஏப்ரல் மாதத்தில் இந்த திருவிழா நடைபெறும்.

24. வைகாசி மாதம் இந்த தலத்தில் நடக்கும் புஷ்ப யாகம் மிக பிரச்சித்தி பெற்றது. ஏராளமான பக்தர்கள் இந்த புஷ்ப யாகத்தில் கலந்து கொண்டு பலன் பெறுகிறார்கள்.

25. கார்த்திகை மாதம் இந்த தலத்தில் பவித்ர உற்சவம் நடைபெறும்.

இருமுடி என்றதும் நமக்கு சபரிமலை அய்யப்பன் ஆலயத்துக்கு செல்லும் பக்தர்கள்தான் நினைவுக்கு வருவார்கள்.

கார்த்திகை மாதம் மாலை அணிந்து, விரதம் இருந்து இருமுடி கட்டி செல்லும் அந்த யாத்திரை மிக வித்தியாசமானது.

ஒரு மண்டலம் விரதமிருந்து சபரிமலை செல்வது தமிழக ஆன்மிக அன்பர்களுக்கு வரப்பிரசாதமாக அமைந்துள்ளது.

அதேபோன்று ஆந்திராவில் பல்வேறு ஆலயங்களில் இருமுடி கட்டி யாத்திரை செல்லும் வழக்கம் இருக்கிறது.

அங்குள்ள காணிப்பாக்கம் வினாயகர் ஆலயத்துக்கு கூட பக்தர்கள் இருமுடி கட்டி வருகிறார்கள்.

ஆந்திராவில் சில சக்தி தலங்களுக்கும் இருமுடி கட்டி செல்கிறார்கள்.

அந்த வகையில் நாகலாபுரம் வேதநாராயண சுவாமி ஆலயத்துக்கு பக்தர்கள் இருமுடி கட்டி வருகிறார்கள்.

அப்படி வரும் பக்தர்களில் 90 சதவீதம் பேர் மீனவர்கள் என்பது குறிப்பிடத்தக்கது.

நெல்லூர், ஓங்கோல், காவாலி, துர்க்கை பட்டிணம் ஆகிய நகரங்களில் வாழும் மீனவர்கள் ஆண்டுதோறும் இந்த தலத்துக்கு இருமுடி கட்டி வருகிறார்கள்.

அதற்கு முன்னதாக இந்த மீனவர்கள் ஒரு மண்டலம் அதாவது 48 நாட்கள் மாலை அணிந்து தீவிரமாக விரதம் இருப்பது உண்டு.

அய்யப்ப பக்தர்கள் விரதம் இருந்து கடைப்பிடிக்கும் அத்தனை நெறிமுறைகளையும் இந்த பக்தர்களும் கடைப்பிடிக்கிறார்கள்.

ஏப்ரல் மாதம் மச்ச ஜெயந்தி தினத்துக்கு முன்பு அவர்கள் தங்கள் ஊர்களில் இருந்து யாத்திரை புறப்படுவார்கள்.

மிகச்சரியாக மச்ச ஜெயந்தி தினத்துக்கு ஒரு நாளைக்கு முன்பு நாகலாபுரம் வந்து சேர்வார்கள்.

அவர்கள் தங்கள் இருமுடிகளில் ஹோமத்துக்கு தேவையான பொருட்களை சுமந்து கொண்டு வந்திருப்பார்கள்.

மச்ச ஜெயந்தி தினத்தன்று அதிகாலையில் நாகலாபுரம் ஆலயத்தில் மிகப் பிரமாண்டமான ஹோமம் நடத்தப்படும்.

அதில் இருமுடி கட்டி வரும் பக்தர்கள் பங்கேற்பார்கள்.

தங்கள் வீட்டில் இருந்து இரு முடிக்குள் கட்டி கொண்டு வந்த ஹோம பொருட்களை ஹோமத்தில் சமர்ப்பிப்பார்கள்.

பிறகு ஆலயத்தில் வழிபாடு செய்து தங்களது இருமுடி யாத்திரையை நிறைவு செய்வார்கள்.

இப்படி இருமுடி சுமந்து வந்து வழிபடுவதன் மூலம் தங்களுக்கு பல்வேறு நன்மைகள் கிடைப்பதாக மீனவர்கள் தெரிவித்தனர்.

குறிப்பாக கடலுக்குள் மீன் பிடிக்க செல்லும் போது நிறைய மீன்கள் கிடைக்க மீன் அவதாரம் எடுத்த வேதநாராயண சுவாமி அருள் புரிவதாக நம்புகிறார்கள்.

அதுமட்டுமின்றி கடலில் மீன்பிடிக்க செல்லும் போது உரிய பாதுகாப்பு கிடைப்பதற்கும் வேதநாராயணர் துணை இருப்பதாக சொல்கிறார்கள்.

ஆண்டுக்கு ஆண்டு இந்த தலத்துக்கு இருமுடி கட்டி வரும் மீனவர்களின் எண்ணிக்கை அதிகரித்தப்படி உள்ளது.

தமிழகத்தில் இருந்தும் இந்த ஆலயத்துக்கு இரு முடி கட்டி செல்லும் பக்தர்கள் இருக்கிறார்கள்.

பொன்னேரி, ஊத்துக்கோட்டை ஆகிய ஊர்களில் இருந்து ஏராளமானோர் இருமுடி கட்டி மச்ச ஜெயந்தி தினத்தன்று இந்த ஆலயத்துக்கு சென்று வருகிறார்கள்.

சில ஆண்டுகளுக்கு முன்பு வரை சித்தூர் மாவட்டத்தில் இருந்து மட்டுமே பக்தர்கள் இருமுடி கட்டி வந்தனர்.

சமீப காலமாக இந்த வழிபாடு அதிகரித்தப்படி உள்ளது.

மகா விஷ்ணு ஒவ்வொரு யுகத்திலும் தசாவதாரம் எடுத்திருப்பதை புராணங்களில் படித்து இருப்பீர்கள்.

ஒவ்வொரு அவதாரத்தின் பின்னணியிலும் ஒரு வரலாற்று நிகழ்வு அடங்கி இருக்கும்.

அதை பிரதிபலிக்கும் வகையில் தமிழ்நாடு முழுவதும் எண்ணற்ற வைணவ தலங்கள் உள்ளன.

அந்த வைணவ தலங்களில் மிகச் சிறப்பானவற்றை 108 திவ்ய தேசங்களாக நமது முன்னோர்கள் வகுத்து உள்ளனர்.

இந்த திவ்ய தேசங்கள் ஒவ்வொன்றும் ஒவ்வொரு சிறப்பு கொண்டவை.

அந்த வகையில் தசாவதாரம் நிகழ்ந்த இடங்களாக கருதப்படும் புண்ணிய தலங்கள் உயர்ந்த இறை ஆற்றல் கொண்டவை.

இதில் மகா விஷ்ணுவின் முதல் அவதாரம் நிகழ்ந்த இடம் நாகலாபுரம் ஆகும்.

தமிழ்நாடு ஆந்திரா எல்லையில் ஊத்துக்கோட்டைக்கு மிக அருகில் நாகலாபுரம் உள்ளது.

இந்த ஊரில் வேதவல்லி சமேத வேதநாராயண சாமி அருள் பாலித்து வருகிறார்.

இந்த தலத்தில்தான் தசாவதாரத்தின் முதல் அவதாரமான மச்ச அவதாரம் நிகழ்ந்ததாக கருதப்படுகிறது.

பெருமாள் மீன் வடிவமெடுத்து கடலுக்குள் சென்று வேதங்களை மீட்டு வந்ததன் பின்னணியில் இந்த அவதார கதை அமைந்துள்ளது.

ஆனால் நாகலாபுரம் பகுதியில் கடல் எதுவும் கிடையாது.

அங்கிருந்து பழவேற்காடு சுமார் 30 கி.மீ. தொலைவில் அமைந்துள்ளது.

எனவே இந்த அவதாரம் நிகழ்ந்த போது நாகலாபுரம் பகுதி கடலாக இருந்திருக்கலாம் என்றும்,

நாளடைவில் கடல் பின்வாங்கியதால் ஊர்கள் தோன்றி இருக்கலாம் என்றும் ஆய்வாளர்கள் கருதுகிறார்கள்.

நாகலாபுரத்தில் அமைந்துள்ள வேதநாராயண சுவாமி ஆலயம் முதல் அவதாரம் நிகழ்ந்த தலம் மட்டுமின்றி மேலும் பல்வேறு சிறப்புகளை கொண்டது.

ஆகம அடிப்படையில் இந்த ஆலயம் கட்டப்பட்டுள்ளது.

இதன் காரணமாக ஆலய அமைப்பு பக்தர்களுக்கு புதிய தகவல்களை சொல்லும் வகையில் அமைந்துள்ளது.

சென்னையில் இருந்து இந்த ஆலயத்துக்கு மிக எளிதாக சென்று வரலாம்.

இந்த ஆலயம் பற்றிய கூடுதல் தகவல்களை இந்த தொகுப்பில் காணலாம்.

பொதுவாக ஆலயங்களில் மூலவருக்கு இடது பக்கத்தில் நின்றுதான் அர்ச்சகர்கள் பூஜையை செய்வார்கள்.

இடது பக்கத்தில் நின்று தீபாராதனை காட்டும்போதுதான் பக்தர்கள் வழிபடுவதற்கு மிக எளிதாக இருக்கும்.

ஆனால் நாகலாபுரம் வேதநாராயண சுவாமி ஆலயத்தில் கருவறையில் இடது பக்கத்தில் நின்று அர்ச்சகர்கள் பூஜை செய்வதில்லை.

சுவாமிக்கு இடது பக்கம், அதாவது வலது பக்கத்தில் நின்று அர்ச்சகர்கள் பூஜை செய்கிறார்கள்.

இதன் பின்னணியில் ஒரு புராண கதை கூறப்படுகிறது.

பெருமாள் மச்ச அவதாரம் எடுத்து அசுரனிடம் இருந்து வேதங்களை மீட்டு வந்ததாக புராணங்களில் கூறப்பட்டுள்ளது.

அப்படி அவர் அசுரனை வதம் செய்ய தனது சக்கரத்தை பிரயோகம் செய்தார்.

அந்த சக்கரத்தை வீசும் நிலையிலேயே கருவறையில் வேதநாராயண சுவாமியின் சிலை பிரதிஷ்டை செய்யப்பட்டுள்ளது.

வேதநாராயணசுவாமி சக்கர பிரயோக கோலத்தில் காட்சி அளிப்பதால் அதன் அருகில் அர்ச்சகர்கள் நிற்பதில்லை.

இதன் காரணமாகவே சுவாமியின் இடது பக்கத்துக்கு சென்று பூஜைகளை செய்கிறார்கள்.

இந்த ஆலயத்தின் கருவறை முன் பகுதி மண்படத்தின் இடது பக்கத்தில் உற்சவர் சிலையை மிகவும் பாதுகாப்பாக வைத்துள்ளனர்.

அந்த சிலை அருகிலேயே ஆழ்வார்கள் சிலையும் வரிசையாக வைக்கப்பட்டுள்ளது.

நம்மாழ்வார், திருமங்கையாழ்வாரின் உற்சவ மேனிகள் அங்கு உள்ளன.

கருடாழ்வார், ராமானுஜர், மணவாள மாமுனிகள், தொண்டர்பொடியாழ்வார் ஆகியோரது சிலைகளும் அங்கு இருக்கின்றன.

முக்கிய திருவிழா நாட்களில் மட்டும் இந்த சிலைகளை அந்த அறையில் இருந்து வெளியே கொண்டு வந்து பயன்படுத்துகிறார்கள்.

மற்ற நாட்களில் அந்த சிலைகள் தனி அறையில் பூட்டப்பட்ட நிலையில் வைக்கப்படுகின்றன.

இந்த ஆலயத்தில் ஆகம விதிப்படி அனைத்து கடவுள்களும் பிரதிஷ்டை செய்யப்பட்டுள்ளதன் அடிப்படையில் தாயார் சன்னதி நிருதி திசையில் அமைக்கப்பட்டுள்ளது.

இந்த திசையில் அமையும் தாயார் சன்னதிக்கு சக்தி அதிகம் என்று ஆகம நூலில் வரையறுக்கப்பட்டுள்ளது.

இதனால் இந்த தலத்தில் வேதவல்லி தாயாரிடம் என்ன வேண்டுகோள் விடுத்தாலும் நினைத்தது நடக்கும் என்பது ஐதீகமாக உள்ளது.

இதை கருத்தில் கொண்டுதான் தாயாருக்கு வெள்ளிக்கிழமைதோறும் சிறப்பு பூஜைகள் செய்யப்படுகின்றன.

திருமண வரம் தரும் தாயாராக இவர் கருதப்படுகிறார்.

நாகலாபுரம் ஆலயத்தை கிருஷ்ணதேவராயர் கட்டுவதற்கு முன்பு அந்த ஊரின் பெயர் அரிகண்டாபுரம் என்று அழைக்கப்பட்டு வந்தது.

அந்த ஊரில் ஆட்சி செய்து வந்த அரிகண்ட பெருமாள் நாயக்கர் என்பவர் பெயரை கொண்டு அந்த ஊர் அழைக்கப்பட்டு வந்தது.

கிருஷ்ணதேவராயர் நிறைய திருப்பணிகள் செய்து முடித்ததும் அந்த ஊருக்கு தனது தாயார் பெயரான நாகம்மாள் என்ற பெயரை சூட்டினார்.

அந்த பெயர் கால ஓட்டத்தில் மருவி நாகலாபுரம் என்று மாறிவிட்டது.

நாகலாபுரம் வேதநாராயணசுவாமி ஆலயம் மிக அழகான ஆலயமாகும். பக்தியோடு சிற்பங்களையும், பிரம்மாண்டமான பிரகாரங்களையும் ரசித்து பார்ப்பவர்களுக்கு இந்த ஆலயத்தில் மிகப்பெரிய விருந்து காத்திருக்கிறது.

15, 16ம் நூற்றாண்டில் இந்த ஆலயம் கிருஷ்ணதேவராயர் ஆட்சி காலத்தில் கட்டப்பட்டதாக தெரிய வந்துள்ளது.

ஆனால் அதற்கு முன்பே இந்த பகுதியில் வேத நாராயணசுவாமி மிகச்சிறிய கருங்கல் கருவறையுடன் இருந்ததாக பழமையான நூல்களில் குறிப்புகள் உள்ளன.

எனவே இதன் தோற்றத்தை கணக்கிட முடியாதபடி உள்ளது.

கிருஷ்ணதேவராயர் ஆட்சி காலத்தில் அரிகண்ட பெருமாள் நாயக்கர் என்பவர் ஏராளமான திருப்பணிகளை செய்து உள்ளார்.

அதன் பிறகு பல்வேறு காலக்கட்டங்களில் பல்வேறு மன்னர்கள், சிற்றரசர்கள் இந்த ஆலயத்தில் திருப்பணியை செய்து உள்ளனர்.

இதன் காரணமாக இந்த ஆலயம் அனைத்து அம்சங்களையும் கொண்ட ஒருமுழுமையான ஆலயமாக திகழ்கிறது.

இந்த ஆலயம் மொத்தம் 5 பிரகாரங்களை உள்ளடக்கியது. 5வது பிரகாரமாக அந்த ஊரின் தெரு அமைந்துள்ளது.

அங்கு சென்றால் நம்மை 5 நிலை ராஜகோபுரம் வரவேற்கிறது.

அதன் வழியாக ஆலயத்துக்குள் நுழைந்தால் முதலில் அழகான நந்தவனத்தை காண முடியும்.

அதன்பிறகு அடுத்தடுத்த பிரகாரங்களை பார்த்துக்கொண்டே ஆலயத்துக்குள் செல்லலாம்.

கருவறையில் வேதநாராயணசுவாமி நின்ற கோலத்தில் அருள்பாலிக்கிறார்.

வழக்கமாக பெருமாளின் பாதம் அவருக்குரிய பீடத்தில் அமைந்திருக்கும்.

ஆனால் இந்த தலத்தில் வேதங்களை மீட்க பெருமாள் மீன் அவதாரம் எடுத்தவர் என்பதால் அதை பிரதிபலிக்கும் வகையில் வேதநாராயண சுவாமி கால் பகுதி மீன் போன்ற அமைப்பில் காணப்படுகிறது.

அவருக்கு இரு புறமும் ஸ்ரீதேவியும், பூமாதேவியும் நின்ற கோலத்தில் அருள்பாலிக்கிறார்கள்.

கருவறை முன்புள்ள மண்டபத்தில் ஆழ்வார் சிலைகளும், உற்சவர் சிலைகளும் அழகாக அணிவகுத்து காணப்படுகின்றன.

ராமானுஜர், மணவாள மாமுனிகள் ஆகியோரது ஐம்பொன் திருமேனிகளையும் அங்கு காணலாம்.

அதையடுத்த பிரகாரத்தில் மிக பிரமாண்டமான மண்டபம் கட்டப்பட்டு உள்ளது.

அந்த காலத்தில் அந்த மண்டபத்தில் பல்வேறு நிகழ்ச்சிகள் நடத்தப்பட்டிருக்கலாம்.

தற்போது அந்த மண்டபங்கள் வெறுமனே உள்ளன.

ஆனால் மிக சிறப்பாக பராமரிப்பதால் இந்த மண்டபங்கள் அழகாக காட்சி அளிக்கின்றன.

இந்த மண்டப தூண்களில் கல்வெட்டுகளும், ஏராளமான சிற்பங்களும் காணப்படுகின்றன.

சிற்பங்களை ஆய்வு செய்பவர்களுக்கு மிகப்பெரிய தகவல் தரும் சுரங்கமாக இந்த ஆலயம் திகழ்கிறது.

இந்த பிரகாரத்தில் தாயார் வேதவல்லி தனி சன்னதியில் உள்ளார்.

பொதுவாக வைணவ தலங்களில் மூலவர் சன்னதிக்கு அருகிலேயே தாயார் சன்னதி அமைந்திருக்கும்.

இந்த தலத்தில் சற்று தொலைவில் சற்று வித்தியாசமாக பெருமாளை எதிர்திசையில் பார்த்தபடி தாயார் சன்னதி அமைக்கப்பட்டு உள்ளது.

மீன் வடிவமெடுத்து கடலுக்குள் சென்ற பெருமாளை தாயார் தேடி வருவதாக ஐதீகம் என்பதால் இப்படி சன்னதி அமைக்கப்பட்டிருப்பதாக தெரிவித்தனர்.

அதற்கு அடுத்த பிரகாரம் முழுமையான நந்தவனமாக காட்சி அளிக்கிறது.

இந்த ஆலயத்தின் ஒவ்வொரு பகுதியையும் பக்தர்கள் நிதானமாக பார்வையிட்டால் பல புதிய உண்மைகளை தெரிந்து கொண்டு வர முடியும்.