தமிழீழ விடுதலை போராட்டத்தில் உயிர்நீத்த வீரர்களை நினைவுகூர்ந்து அஞ்சலி செலுத்தி, பெருமைப்படுத்துவதற்காக ஒவ்வொரு ஆண்டும் நவம்ர் 27 ஆம் தேதி மாவீரர் நாள் அனுசரிக்கப்படுகிறது. ஈழத்தமிழர்கள் மட்டுமின்றி உலகத் தமிழர்கள் பலரும் இந்நாளில் மாவீரர் நினைவிடங்கள் மற்றும் பொது இடங்களில் உயிர்நீத்த வீரர்களுக்கு நினைவேந்தல் மற்றும் அஞ்சலி செலுத்தி வருகின்றனர்.
அந்த வகையில், இன்று (நவம்பர் 27) மாவீரர் நாள் கொண்டாடப்படும் நிலையில் த.வெ.க. தலைவர் விஜய் வாழ்த்து தெரிவித்துள்ளார். இது தொடர்பாக அவர் வெளியிட்டுள்ள எக்ஸ் தள பதிவில், "மாவீரம் போற்றுதும், மாவீரம் போற்றுதும்" என குறிப்பிட்டுள்ளார்.
தமிழ் நாட்டில் தமிழ் தேசிய அமைப்புகள் மற்றும் நாம் தமிழர் கட்சி சார்பில் மாவீரர் நாள் கடைபிடிக்கப்படுவது வழக்கமான ஒன்றுதான். இந்த நிலையில், தமிழகத்தில் புதிதாக உதயமாகி இருக்கும் தமிழக வெற்றிக் கழகம் கட்சி சார்பில் அக்கட்சி தலைவர் விஜய் மாவீரர் நாள் வாழ்த்து தெரிவித்து இருப்பது தமிழக அரசியலில் பேசு பொருளாகி இருக்கிறது.
