நீங்கள் தேடியது "slug 94542"

சென்னை:

தமிழகத்தின் கடலோர மாவட்டங்களை கடந்த வாரம் சூறையாடிய கஜா புயல் பாதிப்பு துயரம் இன்னமும் நீங்கவில்லை.

வேதாரண்யம்- நாகப்பட்டினம் இடையே கடந்த வெள்ளிக்கிழமை அதிகாலை கஜா புயல் கரையை கடந்து சென்ற பிறகு புயலால் ஏற்பட்ட பின்விளைவுகளை தேசிய பேரிடர் மேலாண்மை குழு சமாளித்து விட்டதாக முதலில் கருதப்பட்டது.

ஆனால் மறுநாள் சனிக்கிழமை முதல் கஜா புயல் பாதிப்பு விவரங்கள் மெல்ல மெல்ல தெரிய வந்தன. வேதாரண்யம் மட்டுமே துண்டிக்கப்பட்டதாக தமிழக மக்கள் நினைத்து இருந்த நிலையில் தஞ்சை, திருவாரூர், நாகை, புதுக்கோட்டை ஆகிய 4 மாவட்டங்களிலும் கஜா புயல் நடத்திய கோர தாண்டவம் தெரிய வந்தது.

குறிப்பாக திருத்துறைப்பூண்டி, பேராவூரணி, முத்துப்பேட்டை, பட்டுக்கோட்டை, அதிராம்பட்டினம் உள்பட பல ஊர்கள் கடுமையான சேதத்தை சந்தித்து இருப்பது வெளிஉலகத்துக்கு தெரிய வந்தது. அதன்பிறகுதான் இந்த 4 மாவட்டங்களிலும் குக்கிராம மக்களும் மிக கடுமையான அளவுக்கு பாதிக்கப்பட்டு இருப்பது கண்டுபிடிக்கப்பட்டது.

கிராம மக்களின் வாழ்வதாரங்களை கஜா புயல் அழித்து சென்று இருக்கும் வேதனைகளும் வெளிப்பட்டன. இதன் மூலம் கஜா புயல் சேத விவரம் நாளுக்கு நாள் அதிகரித்த வண்ணம் உள்ளது.

கஜா புயலால் வீடுகள், பயிர்கள், மரங்கள், கால்நடைகள், மின்சார கம்பங்கள் என அனைத்து தரப்பிலும் கடும் இழப்பு ஏற்பட்டுள்ளது. இந்த இழப்புகளை மதிப்பீடு செய்யும் பணி நடந்து வருகிறது. நேற்று வரை நடத்தப்பட்ட கணக்கெடுப்பின்படி 1 லட்சத்து 17 ஆயிரத்து 624 வீடுகள் சேதம் அடைந்து இருப்பது தெரிய வந்துள்ளது.

1 லட்சத்து 70 ஆயிரத்து 54 மரங்கள் வேரோடு சாய்ந்துள்ளன. 735 கால்நடைகள் பலியாகி உள்ளன. 88 ஆயிரம் ஹெக்டேர் பரப்பளவுக்கு பயிர்கள் நாசமாகி உள்ளன.

கஜா புயல் தாக்குவதற்கு முன்பே சுமார் 60 ஆயிரம் பேரை பாதுகாப்பான இடங்களுக்கு தமிழக அரசு இடமாற்றம் செய்து இருந்தது. கஜா புயல் தாக்கிய பிறகு தஞ்சை, திருவாரூர், நாகை, புதுக்கோட்டை ஆகிய 4 மாவட்டங்களிலும் லட்சக்கணக்கானவர்கள் வீடுகள் சேதம் அடைந்து பரிதவித்தனர். இதையடுத்து பாதிக்கப்பட்டவர்களும் முகாம்களில் தங்க வைக்கப்பட்டனர்.

தற்போது சுமார் 500 முகாம்கள் அமைக்கப்பட்டு அங்கு சுமார் 2½ லட்சம் பேர் தங்க வைக்கப்பட்டுள்ளனர். அவர்களுக்கு தேவையான உணவு, குடிநீர், பாய் உள்ளிட்ட அத்தியாவசிய பொருட்கள் வழங்கப்பட்டுள்ளது. மேலும்ஒரு குடும்பத்துக்கு 10 கிலோ அரிசி, ஒரு வேட்டி, ஒரு சேலை, ஒரு லிட்டர் மண்ணெய் வழங்கப்படுகிறது.

இதற்கிடையே பாதிக்கப்பட்ட பகுதிகளில் மீட்பு பணிகளையும், நிவாரணப் பணிகளையும் பல்வேறு துறையைச் சேர்ந்த அதிகாரிகள் ஒருங்கிணைந்து தீவிரமாக செய்து வருகிறார்கள். இந்த நிவாரணப் பணிகளை விரைந்து முடிப்பதற்காக கூடுதலாக 11 அமைச்சர்களை முதல்-அமைச்சர் எடப்பாடி பழனிசாமி நியமித்துள்ளார்.

மின் விநியோகத்தை சீரமைப்பது, பாதிக்கப்பட்ட மக்களுக்கு சுத்தமான குடிநீர் வழங்குவது, தேவைக்கு ஏற்ப உணவு மற்றும் உணவு பொருட்களை வினியோகம் செய்வது, சுகாதாரத்துக்காக மருந்து, மாத்திரைகளை வழங்குவது ஆகியவற்றுக்கு முன்னுரிமை கொடுத்து நிவாரணப் பணிகள் நடந்து வருகின்றன.

இதனால் பாதிக்கப்பட்ட 4 மாவட்டங்களிலும் முழு வீச்சில் அரசு அதிகாரிகளின் பணிகள் நடந்து வருகிறது.

4 மாவட்டங்களிலும் சுமார் 5 ஆயிரம் மின் கம்பங்கள் சரிந்து விழுந்துள்ளன. 3,559 கிலோ மீட்டர் தூரத்துக்கு மின் வயர்கள் அறுந்து விழுந்து நாசமாகி விட்டன. அந்த பகுதிகளில் புதிய மின் கம்பங்களை நட்டு மின் வயர்களை இணைக்கும் பணிகளில் சுமார் 13 ஆயிரம் மின் வாரிய ஊழியர்கள் ஈடுபட்டுள்ளனர்.

இன்று வரை சுமார் 50 சதவீத மின் வினியோக சீரமைப்பு பணிகள் முடிந்துள்ளன. திருவாரூர் நகரில் 90 சதவீத இடங்களுக்கு மின் இணைப்பு கொடுக்கப்பட்டு விட்டது. கிராமங்களுக்கு மின் உபகரணங்களை கொண்டு செல்லும் பணி முடுக்கி விடப்பட்டுள்ளது.

மின் வினியோகம் மற்றும் சுகாதாரத்துக்காக வெளி மாவட்டங்கள் மற்றும் அண்டை மாநிலங்களில் இருந்தும் கூடுதல் பணியாட்களை வரவழைக்க ஏற்பாடு செய்யப்பட்டுள்ளது. அதன்படி ஆந்திராவில் இருந்து 1000 பேர் வந்துள்ளனர். இவர்கள் ஒத்துழைப்புடன் இன்னும் 2 நாட்களில் மின் வினியோகம் முழுமையாக சீரடைந்து விடும் என்று எதிர்பார்க்கப்படுகிறது.

கிராமப் பகுதிகளில் அதிகளவு மின் கம்பங்கள் சாய்ந்துள்ளதால் தற்காலிகமாக ஜெனரேட்டர் மூலம் சில கிராமங்களுக்கு மின் வினியோகம் செய்து வருகிறார்கள். மின் கம்பிகளை கிராமத்துக்குள் இழுத்து செல்வதில் இடையூறு நிலவுவதால் கிராமங்களில் மின் வினியோகம் சீராக கூடுதலாக சில நாட்கள் தேவைப்படும் என்று தெரிகிறது.

மின்சாரம் இல்லாத நிலையில் மக்களின் அன்றாட வாழ்க்கையில் கடும் பாதிப்பு நிலவுகிறது. கடந்த 2 நாட்களாக கைவசம் இருந்த பொருட்களை வைத்து பொதுமக்கள் சமாளித்து விட்டனர். இன்று பல கிராமங்களில் சுத்தமான குடிநீர், உணவு கிடைப்பதில் சவாலான நிலை காணப்படுகிறது.

இதை கருத்தில் கொண்டு கிராமங்களுக்கு உணவு பொருட்களை வினியோகம் செய்யும் பணியை அதிகாரிகள் தீவிரப்படுத்தி உள்ளனர். இன்னும் ஓரிரு நாட்களில் குடிநீர் பிரச்சினைக்கு தீர்வு காணப்பட்டு விடும் என்று அதிகாரிகள் உறுதி அளித்துள்ளனர்.

கஜா புயல் காரணமாக தஞ்சை, நாகை, திருவாரூர் மாவட்டங்களில் 150 கிராமங்கள் துண்டிக்கப்பட்டுள்ளன. இந்த கிராமங்களுக்கு செல்லும் பகுதிகளில் மரங்கள் அகற்றப்படாததாலும், மின் கம்பங்களை சீரமைக்காததாலும், நிவாரண பணிகளுக்கு அதிகாரிகளால் செல்ல முடியவில்லை.

அங்குள்ள மக்கள் உணவு கிடைக்காமலும், குடிநீர் இல்லாமலும் அவதிக்குள்ளாகி வருகிறார்கள்.

நாகை மாவட்டத்தில் அக்கரைபேட்டை, விழுந்த மாவடி, பண்ணைச்சேரி, வேதாரண்யம், வெள்ளப் பள்ளம், தலைஞாயிறு, ஆறு காட்டுத்துறை, கோடியக்கரை மற்றும் அதை சுற்றியுள்ள 40 கிராமங்களில் மக்கள் உணவுக்காக தவிக்கிறார்கள்.

கீழ்வேளூர் மற்றும் அதனைச் சுற்றியுள்ள 10 கிராமங்களில் உணவு, குடிநீர் கிடைக்காமல் மக்கள் அவதிப்பட்டு வருகிறார்கள்.

தஞ்சை மாவட்டத்தில் பட்டுக்கோட்டை, அதிராம் பட்டிணம், பேராவூரணி, ஒரத்தநாடு, திருவோணம் உள்ளிட்ட 40 கிராமங்களை சேர்ந்த மக்கள் உணவு, குடிநீருக்காக ஏங்கும் நிலை ஏற்பட்டுள்ளது.

திருவாரூர் மாவட்டத்தில் திருவாரூர், மன்னார்குடி, வடுவூர், திருத்துறைப்பூண்டி உள்ளிட்ட 60 கிராம மக்கள் உணவு, குடிநீர் இல்லாமல் பட்டினி கிடக்கிறார்கள்.

இந்த பகுதிகளுக்கு வாகனங்கள் செல்ல முடியாததால் அரசு அதிகாரிகளால் நிவாரணம் வழங்க செல்ல முடியவில்லை. அங்குள்ள மக்கள் நிவாரண முகாம்களை தேடி வர வேண்டும் என்று அதிகாரிகள் வேண்டுகோள் வைத்துள்ளனர். ஆனால் போக்குவரத்து துண்டிக்கப்பட்டுள்ளதால் நிவாரண முகாம்களை தேடி பொது மக்களால் செல்ல முடியவில்லை.

அந்த கிராமங்களில் சில தன்னார்வலர்கள் மட்டும் உணவு மற்றும் குடிநீர் உள்ளிட்ட அத்தியாவசிய பொருட்களை வழங்கும் பணியில் ஈடுபட்டுள்ளனர். ஆனால் பொதுமக்களுக்கு முழுமையான நிவாரண உதவிகளை அவர்களால் வழங்க முடியவில்லை. மின்சப்ளையும் வழங்கப்படாததால் இரவு நேரங்களில் கிராமங்கள் இருளில் மூழ்கி உள்ளன. #Gajastorm #Storm

விருதுநகர்:

தமிழகத்தில் வடகிழக்கு பருவமழை இன்று தொடங்கும் என அறிவிக்கப்பட்ட நிலையில் மாநிலம் முழுவதும் நேற்று முதல் பரவலாக மழை பெய்து வருகிறது.

விருதுநகர் மாவட்டத்தில் நேற்று மாலை முதல் விடிய, விடிய மழை பெய்தது. விருதுநகரில் மழை காரணமாக பல இடங்களில் தண்ணீர் தேங்கியது. போக்குவரத்தும் பாதிக்கப்பட்டது. சில இடங்களில் மின்வெட்டும் ஏற்பட்டது.

மேற்கு தொடர்ச்சி மலையை ஒட்டியுள்ள ராஜபாளையம், ஸ்ரீவில்லி புத்தூர் மற்றும் சுற்று வட்டாரப்பகுதிகளில் பலத்த மழை பெய்தது. இதனால் அந்தப்பகுதிகளில் உள்ள நீர்நிலைகளில் தண்ணீர் வரத்து ஏற்பட்டது.

சிவகாசி, திருச்சுழி, வத்திராயிருப்பு, பிளவக்கல், கோவிலாங்குளம், சாத்தூர், அருப்புக்கோட்டை ஆகிய பகுதிகளிலும் பெய்த மழை காரணமாக விவசாயிகள் மகிழ்ச்சியடைந்தனர்.

விருதுநகர் மாவட்டத்தில் இன்று காலை 8 மணி வரை பெய்த மழை அளவு விவரம் மில்லி மீட்டரில் வருமாறு:-

விருதுநகர்-33

வெம்பக்கோட்டை-22.2

பிளவக்கல்-3.2

மாவட்டத்தில் 296.8 மி.மீட்டர் மழை பதிவாகி உள்ளது.

ராமேசுவரத்தில் நேற்று இரவு முதல் பலத்த காற்று வீசியது. இன்று காலை 5 மணிக்கு பலத்த மழை பெய்தது. 2 மணி நேரத்திற்கும் மேலாக பெய்த மழை காரணமாக கோவில் வீதிகள், பஸ் நிலையம் உள்ளிட்ட பகுதிகளில் மழை நீர் தேங்கியது. அதிகாலையில் பெய்த மழை காரணமாக கோவில் கூட்டம் குறைந்து காணப்பட்டது.

மதுரை மாவட்டத்தில் வாடிப்பட்டி, சமயநல்லூர், நாகமலை புதுக்கோட்டை, திருப்பரங்குன்றம் உள்ளிட்ட பகுதிகளில் நேற்று இரவு 1 மணி நேரத்திற்கும் மேலாக இடி, மின்னலுடன் பலத்த மழை பெய்தது. இன்று காலை வானம் மேக மூட்டத்துடன் காணப்பட்டது.

திருவாரூர்:

திருவாரூர் அருகே மாங்குடி, திருநெய்ப்பேர், குன்னியூர், வடகரை ,ஆத்தூர், கூடூர், கல்யாணமகாதேவி, புதுப்பத்தூர் உள்ளிட்ட பல்வேறு கிராமங்களில் ஆயிரக்கணக்கான சம்பா பயிர்கள் தண்ணீரின்றி கருகி வருகிறது. இதனால் விவசாயிகள் பாண்டவையாற்றில் தண்ணீர் விட்டு பயிர்களை காப்பாற்ற பொதுப்பணித்துறை மற்றும் மாவட்ட நிர்வாகத்திடம் முறையிட்டனர். ஆனால் எந்த பயனும் விவசாயிகளுக்கு கிடைக்க வில்லை.

இதனையடுத்து திருவாரூர் அருகே மாங்குடி பாண்டவையாறு பாலத்தின் அருகே அனைத்து கட்சியை சேர்ந்த விவசாயிகள் நேற்று திடீர் சாலை மறியல் போராட்டத்தில் ஈடுபட்டனர். போராட்டத்தின் போது பாண்டவையாற்றில் முறை வைக்காமல் தண்ணீர் விட வேண்டும் என வலியுறுத்தியும், தண்ணீர் முறையாக வழங்காத தமிழக அரசை கண்டித்தும் முழக்கங்களை எழுப்பினர்.

மறியல் போராட்டம் காரணமாக ஒரு மணி நேரத்திற்கு மேலாக திருவாரூர் - திருத்துறைப்பூண்டி சாலையில் போக்குவரத்து பாதிக்கப்பட்டது.

இதுபற்றி தகவல் கிடைத்ததும் பொதுப்பணித்துறையினர் மற்றும் போலீசார் சம்பவ இடத்திற்கு விரைந்து சென்று போராட்டத்தில் ஈடுபட்டவர்களிடம் பேச்சுவார்த்தை நடத்தி உடனடியாக தண்ணீர் வழங்கிட நடவடிக்கை எடுக்கப்படும் என உறுதியளித்தனர் அதன் பேரில் சாலை மறியல் போராட்டம் கைவிடப்பட்டது.

ஆரணி:

ஆரணி அடுத்த சேவூர் ஊராட்சிக்குட்பட்ட இ.பி. நகர் புதுத்தெருவில் மேல் நிலை நீர்த்தேக்க தொட்டியில் இருந்து பைப்லைன் மூலம் மினி டேங்க்கிற்கு இணைப்பு கொடுக்கப்பட்டு குடிநீர் விநியோகிக்கப்படுகிறது.

இந்த நிலையில், கடந்த 15 நாட்களுக்கும் மேலாக குடிநீர் விநியோகிக்கப்படவில்லை. இதுப்பற்றி அதிகாரிகளிடம் கிராம மக்கள் முறையிட்டனர்.

அதிகாரிகள் கண்டு கொள்ளவில்லை. குடிநீர் வழங்கப்படாததால் கடந்த 15 நாட்களாக இ.பி.நகர் புதுத் தெரு மக்கள் கடுமையாக பாதிக்கப்பட்டுள்ளனர். ஆத்திரமடைந்த மக்கள் குடிநீர் வழங்கக்கோரி ஆரணியில் இருந்து ராட்டினமங்கலம் செல்லும் புறவழிச் சாலையில் மறியல் போராட்டம் செய்தனர்.

ஆரணி தாலுகா போலீஸ் இன்ஸ்பெக்டர் சாலமன்ராஜா மற்றும் சப்-இன்ஸ்பெக்டர் சங்கர் ஆகியோர் சம்பவ இடத்திற்கு வந்து பேச்சுவார்த்தை நடத்தி குடிநீர் கிடைக்க வழிவகை செய்வதாக உறுதியளித்தனர்.

இதையடுத்து, கிராம மக்கள் மறியலை கைவிட்டு கலைந்து சென்றனர். இதனால் அங்கு சிறிது நேரம் போக்குவரத்து பாதிக்கப்பட்டது.