நீங்கள் தேடியது "slug 94574"

புதுடெல்லி:

தேர்தலில் ஓட்டுப் பதிவு எந்திரத்தில் ஒட்டப்படும் பேப்பரில் கட்சி சின்னம் இருக்கும். கட்சிகளின் பெயர்கள் இருக்காது.

இந்த நிலையில் வாக்குப் பதிவு எந்திரத்தில் பா.ஜனதாவின் சின்னமான தாமரைக்கு கீழே பி.ஜே.பி. என்று ஆங்கிலத்தில் எழுத்து உள்ளது. இது சட்ட விரோதம் ஆகும் என்று எதிர்க்கட்சிகள் குற்றம் சாட்டியுள்ளன. மேற்கு வங்காள மாநிலம் பார்ரக்போர் தொகுதியில் வாக்குப்பதிவு எந்திரத்தில் பி.ஜே.பி. என்ற பெயர் உள்ளது என்று தெரிவித்தனர்.

இதுதொடர்பாக எதிர்க்கட்சிகள் டெல்லியில் உள்ள தலைமை தேர்தல் ஆணையத்தில் புகார் மனு கொடுத்தனர்.

காங்கிரஸ் தலைவர்கள் அபிஷேக் மனு சிங்வி, அகமது பட்டேல், திரிணாமுல் காங்கிரஸ் தலைவர்கள் தினேஷ் திரிவேதி, தீரக் ஆகியோர் தலைமை தேர்தல் ஆணையர் சுனில் அரோராவை சந்தித்து புகார் மனு கொடுத்தனர். அப்போது பி.ஜே.பி. என்ற எழுத்து நீக்கப்பட வேண்டும். அல்லது அனைத்து கட்சிகளின் பெயர்களும் சேர்க்கப்பட வேண்டும் என்று கோரிக்கை விடுத்தனர்.

பின்னர் அசோக் மனு சிங்வி கூறியதாவது:-

வாக்குப்பதிவு எந்திரத்தில் பி.ஜே.பி. என்கிற எழுத்து தெளிவாக தெரிகிறது. எந்த கட்சியும் சின்னம் மற்றும் பெயரை ஒரே இடத்தில் பயன்படுத்தக் கூடாது என்றார்.

இதுகுறித்து தேர்தல் அதிகாரி ஒருவர் கூறும் போது, “கடந்த 2013-ம் ஆண்டு தேர்தல் ஆணையத்தை அணுகிய பா.ஜனதா தாமரை சின்னத்தின் வெளிப்புறம் மிகவும் மெல்லிய கோடால் உள்ளது. அது அடர்த்தியாக இருக்க வேண்டும் என்று கோரிக்கை வைத்தனர். அதன்படி மாற்றம் செய்யப்பட்டது. தாமரை சின்னத்தில் நீரின் பிரதிபலிப்பும் அடர்த்தியாக்கப்பட்டது. அந்த பிரதிபலிப்புதான் எப் மற்றும் பி போன்ற எழுத்துக்கள் போல தெரிகின்றன. அது பி.ஜே.பி. போன்ற எழுத்து போல் தெரியவில்லை” என்றார். #BJP #Loksabhaelections2019

மும்பை:

நாடு முழுவதும் உள்ள 543 பாராளுமன்ற தொகுதிகளுக்கு 7 கட்டங்களாக தேர்தல் நடைபெறுகிறது.

கடந்த 11-ந்தேதி, 18-ந் தேதி, 23-ந்தேதிகளில் 3 கட்டங்களாக 303 தொகுதிகளுக்கு தேர்தல் நடைபெற்றது.

இந்த நிலையில் பிரதமர் மோடி பிரசார பொதுக் கூட்டத்தில் பேசுகையில், “பாராளுமன்ற தேர்தலில் காங்கிரஸ் 50 இடங்களில் கூட வெற்றி பெறாது” என்றார்.

இதற்கு பதிலடி கொடுக்கும் வகையில் முன்னாள் மத்திய மந்திரி ப.சிதம்பரம் மும்பையில் நிருபர்களிடம் கூறியதாவது:-

ஒருவர் கனவு காண்பதை யாராலும் தடுக்க முடியாது. பிரதமர் மோடி தூக்கத்தில் மட்டும் அல்லாது விழித்துக் கொண்டிருக்கும்போது கனவு காண்கிறார். எந்த பிரச்சினை வந்தாலும் பரவாயில்லை. நான் இதை தைரியமாக கூறுகிறேன். நடந்து முடிந்த 3 கட்ட தேர்தலிலும் பா.ஜனதாவை விட காங்கிரஸ் கூட்டணி கட்சிகள் அதிக வாக்கு பெற்றுள்ளன. காங்கிரஸ் கூட்டணிக்கு மக்கள் பெரும் ஆதரவு அளித்துள்ளனர்.

இந்தியாவின் பாதுகாப்பு மற்றும் தேசியவாதம் பற்றி மோடி பேசுகிறார். கடந்த 1947, 1964, 1971 ஆகிய ஆண்டுகளில் நடந்த போர்களில் இந்தியாவே வெற்றி பெற்றுள்ளது. நம்மிடம் உள்ள வலுவான பாதுகாப்பு படையே அதற்கு காரணம். ஒரு தனி மனிதர் அல்ல.

ஜி.எஸ்.டி. மற்றும் பண மதிப்பிழப்பு காரணமாக பா.ஜனதாவுக்கு எதிராக மக்கள் வாக்களித்துள்ளனர். பணக்காரர்களின் கருப்பு பணத்தை மாற்றுவதற்காக பண மதிப்பிழப்பு நடவடிக்கை மேற்கொள்ளப்பட்டது. மக்களுக்காக இல்லை.

தேர்தல் கமி‌ஷன் பாரபட்சமாக செயல்படுகிறது. பிரதமர் மோடி செல்லும் ஒவ்வொரு தேர்தல் பிரசார பொதுக்கூட்டத்துக்கும் ரூ.10 கோடிக்கும் மேல் செலவிடப்படுகிறது. இது குறித்து தேர்தல் கமி‌ஷன் கேள்வி எழுப்பவில்லை. மோடிக்கு எதிராக நடவடிக்கை எடுக்க தேர்தல் கமிஷன் தயக்கம் காட்டுகிறது.

இவ்வாறு அவர் கூறினார். #PChidambaram

மெதினிநகர்:

பா.ஜனதா தலைவர் அமித்ஷா ஜார்க்கண்ட் மாநிலம் பல்லாமு மாவட்டம் மெதினிநகரில் இன்று நடந்த தேர்தல் பிரசார கூட்டத்தில் பேசியதாவது:-

காஷ்மீர் மாநிலத்துக்கு சிறப்பு அந்தஸ்து வழங்கும் 370-வது அரசியல் சட்டப் பிரிவு உள்ளது. மோடி மீண்டும் பிரதமராகும் போது அந்த சட்டப் பிரிவை நீக்குவோம்.

இந்தியாவில் இருந்து காஷ்மீரை பிரிக்க பாகிஸ்தான் விரும்புகிறது. ஆனால் நாங்கள் அதை அனுமதிக்க மாட்டோம். துப்பாக்கி குண்டுகளுக்கு அஞ்ச மாட்டோம். அதை தடுப்போம்.

நாட்டின் பாதுகாப்பு வி‌ஷயத்தில் எந்த ஒரு சமரசமும் செய்து கொள்ள மாட்டோம். முந்தைய காங்கிரஸ் ஆட்சியின்போது பாகிஸ்தான் பயங்ரவாத இயக்கத்தை பயன்படுத்தி இந்தியா மீது தொடர்ந்து தாக்குதலில் ஈடுபட்டு வந்தது.

10 ஆண்டுகளில் காங்கிரஸ் தலைமயிலான ஐக்கிய முற்போக்கு கூட்டணி ஆட்சியில் ராணுவ வீரர்களின் தலைகள் துண்டிக்கப்பட்டன. அந்த சம்பவத்தை எப்போதும் மறக்க முடியாது.

காஷ்மீருக்கு தனி பிரதமர் வேண்டும் என்று தேசிய மாநாட்டு கட்சி தலைவர் உமர் அப்துல்லா தெரிவித்து இருக்கிறார். ஒரு நாட்டுக்கு எப்படி 2 பிரதமர் இருக்க முடியும்.

பிரதமர் மோடியால் நாட்டின் பாதுகாப்பு பலம் பெற்று வருகிறது. அவருக்கு பா.ஜனதா எல்லா வகையிலும் உறுதுணையாக இருக்கும்.

இவ்வாறு அமித்ஷா பேசினார். #amitshah #pmmodi #bjp #kashmir370

திருவனந்தபுரம்:

உத்தரபிரதேச மாநிலம் வாரணாசியில் பிரதமர் மோடி நேற்று வேட்பு மனு தாக்கல் செய்தார். வேட்பு மனு தாக்கல் செய்த பின்பு பிரதமர் மோடி நிருபர்களுக்கு பேட்டி அளித்தார். அப்போது கேரளாவில் பாரதீய ஜனதா தொண்டர்களுக்கு பாதுகாப்பு இல்லை. வீட்டை விட்டு வெளியே சென்றால் எந்த தாக்குதலுக்கும் ஆளாகாமல் அவர்கள் வீடு திரும்புவார்களா? என்ற நம்பிக்கை இல்லை.

ஆனால் உத்தரபிரதேசத்தில் அப்படிப்பட்ட நிலை இல்லை என்று கூறி இருந்தார்.

பிரதமர் மோடியின் பேச்சு வெளியான சில மணி நேரங்களில் கேரள முதல்-மந்திரியும், மார்க்சிஸ்ட் கம்யூனிஸ்டு கட்சியின் மூத்த தலைவர்களில் ஒருவருமான பினராயி விஜயன், பிரதமர் மோடியின் பேச்சுக்கு பதில் கொடுத்தார்.

இது தொடர்பாக அவர், பேஸ்புக்கில் பதிவிட்டுள்ள கருத்து வருமாறு:-

கேரளாவில் பாரதீய ஜனதா தொண்டர்களுக்கு பாதுகாப்பு இல்லை என்பதை பிரதமர் மோடி எந்த அடிப்படையில் கூறினார் என்பதை தெரிவிக்க வேண்டும். பிரதமரிடம் இருந்து இத்தகைய கருத்தை எதிர்பார்க்கவில்லை.

கேரளாவை பற்றி அவருக்கு தெரியாமல் இருந்தால் மத்திய அரசின் குற்ற ஆவண காப்பக பதிவேடுகளை பார்வையிட்டு உண்மையை தெரிந்து கொள்ளலாம். மத்திய அரசின் ஏஜென்சிகள் வெளியிட்ட தகவல்களில் கேரளம் பாதுகாப்பான பகுதி என்றும், சட்டம்-ஒழுங்கை பராமரிப்பதில் சிறப்பாக செயல்படுவதாகவும் கூறப்பட்டுள்ளது. இந்த உண்மை தெரியாமல் பிரதமர் பேசுகிறார்.

சங்பரிவார் அமைப்புகள் சில மாநிலங்களை ஆள்வது போல நினைக்கிறார். கேரளாவில் சட்டம் அனைவருக்கும் பொதுவாகவே உள்ளது.

இவ்வாறு அவர் கூறி உள்ளார்.  #pmmodi #bjp #pinarayivijayan