நீங்கள் தேடியது "slug 95081"

சென்னை:

அரசியலில் குதித்த நடிகர் கமல்ஹாசன் மதுரையில் மாநாடு நடத்தி கடந்த பிப்ரவரி மாதம் 21-ந்தேதி மக்கள் நீதி மய்யம் என்ற பெயரில் கட்சி தொடங்கினார்.

கட்சியின் அகில இந்திய பொறுப்பாளராக தங்கேவலு அறிவிக்கப்பட்டார்.

மகேந்திரன், அருணாசலம், பேராசிரியர் கு.ஞானசம்பந்தன், சுகா, தங்கவேலு, பாரதி கிருஷ்ணகுமார், நடிகை ஸ்ரீபிரியா, ராஜ்குமார், கமீலா நாசர், சவுரி ராஜன், ராஜசேகரன், சி.கே. குமாரவேல், மூர்த்தி, மவுரியா, ராஜ நாராயணன், ஆர்.ஆர்.சிவா ஆகியோரை உயர்மட்டக் குழு பொறுப்பாளர்களாக கமல்ஹாசன் அறிவித்தார்.

மக்கள் நீதி மய்யம் கட்சி தேர்தல் கமி‌ஷன் அங்கீகாரத்துக்காக டெல்லியில் பதிவு செய்யப்பட்டது. அதை தேர்தல் கமி‌ஷன் ஏற்றுக் கொண்டு அங்கீகாரம் அளித்தது.

இதையடுத்து முதன் முறையாக மக்கள் நீதி மய்யம் கட்சியின் கொடியேற்று விழா ஆழ்வார்பேட்டையில் உள்ள கட்சி தலைமை அலுவலகத்தில் இன்று காலை நடந்தது.

இதற்காக கட்சி அலுவலகம் முன் சிறிய மேடை அமைக்கப்பட்டு இருந்தது. மேடையைச் சுற்றிலும் ஏராளமான கட்சி தொண்டர்கள் கூடி இருந்தனர். நடிகர் கமல்ஹாசன் காலை 11 மணிக்கு மேடைக்கு வந்தார்.

அங்கு கூடியிருந்தவர்கள் மத்தியில் கமல்ஹாசன் பேசியதாவது:-

மாற்றத்தை நோக்கிய நமது பயணத்தின் மிக முக்கிய மைல் கல்லாக நமது மக்கள் நீதி மய்யம் கட்சி இந்திய தேர்தல் ஆணையத்தால் பதிவு செய்யப்பட்டு அங்கீகாரம் பெற்ற பின்பு நடைபெறும் இந்த கொடியேற்ற பெரு நிகழ்வு நடந்து கொண்டு இருக்கிறது.


பின்னர் மேடையில் இருந்தவாறு அருகில் கம்பத்தில் இருந்த கட்சி கொடியை ஏற்றி வைத்தார். அதன் பிறகு தொடர்ந்து அவர் பேசுகையில், “கட்சியின் உயர்நிலைக்குழு கலைக்கப்பட்டு புதிய செயற்குழு உறுப்பினர்கள் மற்றும் நிர்வாகிகள் நியமிக்கப்பட்டு இருப்பதாகவும் அறிவித்தார்.

மக்கள் நீதி மய்யம் கட்சியின் தலைவராக கமல்ஹாசனும், துணைத் தலைவராக பேராசிரியர் கு.ஞானசம்பந்தனும் நியமிக்கப்பட்டுள்ளனர்.

செயலாளராக அருணாச்சலம், பொருளாளராக சுகா என்ற சுரேஷ், செயற்குழு உறுப்பினர்களாக ஸ்ரீபிரியா, கமீலா நாசர், பாரதி கிருஷ்ண குமார், குமாரவேல், மவுரியா, மூர்த்தி, ஆர்.ரங்கராஜன், சவுரி ராஜன், தங்கவேலு ஆகியோர் நியமிக்கப்பட்டுள்ளதாக கமல்ஹாசன் அறிவித்தார்.

கொடியேற்றி வைத்து கமல்ஹாசன் பேசுகையில் கூறியதாவது:-

இன்று நம் அனைவருக்கும் மிக முக்கியமான நாள். மாற்றத்தை நோக்கிய நமது பயணத்தின் மிக முக்கிய மைல் கல்லாக நமது மக்கள் நீதி மய்யம் கட்சி இந்திய தேர்தல் ஆணையத்தால் பதிவு செய்யப்படுவதற்கு முன்பு தற்காலிகமாக அமைக்கப்பட்ட நமது உயர்நிலைக் குழு கலைக்கப்படுகிறது.

அக்குழுவில் சிறப்பாக தன்னலம் பாராமல் பணியாற்றிய மக்கள் நீதி மய்யம் கட்சியின் வளர்ச்சிக்காக உள்ளுவதெல்லாம் உயர்வுள்ளல் என்ற உயர்ந்த எண்ணம் கொண்டு, உள்ளச்சுத்தியுடன் ஓயாமல் உழைத்துக் கொண்டிருக்கும் நமது உயர்நிலைக் குழு உறுப்பினர்களான ஸ்ரீபிரியா, கமீலா நாசர், பாரதி கிருஷ்ணகுமார், சி.கே.குமர வேல், ஏ.ஜி.மவுரியா, எஸ். மூர்த்தி, ஆர்.ரங்கராஜன், சவுரிராஜன், ஆர்.தங்கவேல் ஆகியோர் இனி மக்கள் சேவையை மகத்தாக செய்து முடிப்பதற்கு ஏற்ப மக்கள் நீதி மய்யம் கட்சியின் செயற்குழு உறுப்பினர்களாக இன்று முதல் செயல்படத் தொடங்கி கட்சியினை வழி நடத்துவர் என்பதை மகிழ்ச்சியுடன் தெரிவித்துக் கொள்கிறேன்.

தொண்டர்களும், மற்ற நிர்வாகிகளும் இவர்களுக்கு அனைத்து ஒத்துழைப்பையும் தந்து உதவுமாறு கேட்டுக் கொள்கிறேன்.

இவ்வாறு அவர் பேசினார்.

தமிழ்நாட்டில் மக்கள் நீதி மய்யம் கட்சி 4 மண்டலங்களாக பிரிக்கப்பட்டு உள்ளது. 2 தொகுதிக்கு ஒரு பொறுப்பாளரும், தொகுதி வாரியாக நிர்வாகிகளும் நியமிக்கப்படுவார்கள் என்றும் தெரிவிக்கப்பட்டது.

கொடியேற்று விழாவில் கலந்து கொள்வதற்காக ஏராளமான தொண்டர்கள் கார் வாகனங்களில் வந்ததால் ஆழ்வார்பேட்டை சிக்னலில் கடும் போக்குவத்து நெரிசல் ஏற்பட்டு வாகனங்கள் நீண்ட நேரம் ஸ்தம்பித்து நின்றன. #KamalParty #KamalHoistsFlag #MakkalNeedhiMaiam #MNMFlagHoist
#MNMHeadquaters 

சென்னை:

நடிகர் கமல்ஹாசன் கடந்த பிப்ரவரி மாதம் மதுரையில் “மக்கள் நீதி மய்யம்” எனும் புதிய அரசியல் கட்சியைத் தொடங்கினார்.

கடந்த மாதம் அவர் அந்த கட்சியை டெல்லி தலைமை தேர்தல் அலுவலகத்தில் பதிவு செய்தார். தேர்தல் கமி‌ஷனும் கமல்ஹாசனின் கட்சியை அங்கீகாரம் செய்து ஒப்புதல் அளித்துள்ளது.

இந்த நிலையில் மக்கள் நீதி மய்யம் கட்சிக்கு உறுப்பினர்கள் சேர்க்கையை அதிகரிக்கும் பணிகளில் கமல் நற்பணி மன்ற நிர்வாகிகள் தீவிரமாக ஈடுபட்டுள்ளனர். அதன் அடிப்படையில் புதிய நிர்வாகிகளை நியமனம் செய்வதற்கான ஏற்பாடுகள் நடந்து வருகிறது.

கட்சித் தொடங்கிய 4 மாதங்கள் ஆகி விட்ட நிலையில் மாநில மற்றும் மாவட்ட அளவில் முக்கிய நிர்வாகிகள் இல்லாததால் கட்சியின் செயல்பாடுகளில் தேக்க நிலை உருவாகி இருப்பதாக அதிருப்தி எழுந்தது. அதோடு கட்சியில் மேல் மட்டத்துக்கும் கீழ் மட்டத்துக்கும் தொடர்பு இல்லாத நிலை இருப்பதாகவும் கூறப்பட்டது.

இதையடுத்து மக்கள் நீதி மய்யம் கட்சியின் மாநில, மாவட்ட நிர்வாகிகளை தேர்வு செய்து அறிவிக்க கமல்ஹாசன் திட்டமிட்டுள்ளார். வருகிற 12-ந்தேதி (வியாழக்கிழமை) அமாவாசை தினத்தன்று அந்த அறிவிப்பு வெளியாகும் என்று தெரியவந்துள்ளது.

இது தொடர்பாக மக்கள் நீதி மய்யம் கட்சியின் செயற்குழு உறுப்பினர் ஒருவர் கூறியதாவது:-

மக்கள் நீதி மய்யம் கட்சிக்கு அடிமட்டம் வரை வலுவான தொண்டர்கள் உள்ளனர். ஆனால் அந்த தொண்டர்களுக்கும் கட்சி தலைமைக்கும் முறையான இணைப்பு இல்லை என்று பேச்சு நிலவுகிறது. ஆனால் அதில் எந்த உண்மையும் இல்லை.

மேலும் கட்சியின் அனைத்து முடிவுகளையும் கமல்ஹாசன் மட்டுமே எடுப்பதாக ஒரு கருத்து நிலவுகிறது. கட்சியில் யாருக்கும் அதிகாரம் வழங்கப்படவில்லை என்றும் கதை கதையாக பேசப்படுகிறது. இந்த கதைகளுக்கு முற்றுப்புள்ளி வைக்கும் வகையில் புதிய நிர்வாகிகள் நியமனம் அமையும்.

கமல்ஹாசனை பொறுத்த வரை மக்கள் நீதி மய்யம் கட்சியை மிக, மிக வலுவான உள்கட்டமைப்புடன் அமைக்க திட்டமிட்டுள்ளார். இதற்காக அவர் தன்னை தனிப்பட்ட முறையில் அதில் ஈடுபடுத்தியுள்ளார். அதோடு ஆலோசனைகள் பெற 3 குழுக்களையும் வைத்துள்ளார்.

சென்னை, பெங்களூரு, அமெரிக்கா ஆகிய மூன்று இடங்களில் அந்த குழுக்கள் செயல்படுகிறது. அந்த குழுவினருடன் கமல்ஹாசன் அடிக்கடி ஆலோசனை செய்து வருகிறார். அதன் அடிப்படையில் முதல் கட்டமாக 12-ந்தேதி நிர்வாகிகள் நியமனம் செய்யப்பட உள்ளனர்.

இந்த நியமனம் கட்சி தொண்டர்கள் மத்தியில் நிச்சயம் மகிழ்ச்சியை ஏற்படுத்தும். அது மட்டுமின்றி கட்சியில் புதிய வேகத்துடன் செயல்பட நிர்வாகிகள் நியமனம் கை கொடுப்பதாக அமையும். எனவே கமலின் அறிவிப்பை தொண்டர்கள் ஆவலோடு எதிர்பார்த்து காத்திருக்கிறார்கள்.

புதிய நிர்வாகிகள் அறிவிப்பு வெளியாகும் 12-ந்தேதி அன்று கட்சி அலுவலகத்தில் தொண்டர்களை சந்தித்து பேசவும் கமல்ஹாசன் முடிவு செய்துள்ளார். அன்று அவர் மக்கள் நீதி மய்யம் கட்சியின் கொடியையும் ஏற்றி வைப்பார். அந்த கட்சி கொடிக்கு தலைமை தேர்தல் கமி‌ஷன் அங்கீகாரம் கொடுத்துள்ளது.

மக்கள் நீதி மய்யம் மேல் மட்டத்தில் மட்டும் இயங்குவதாக ஒரு கருத்து பரவி உள்ளது. 12-ந்தேதி அதற்கு விடை கிடைக்கும். கடை கோடியில் உள்ள தொண்டனிடமும் கமல்ஹாசன் காது கொடுத்து கேட்டு கருத்துக்களை பகிர்ந்து வருவார் என்பது தெரியவரும்.

நிர்வாகிகள் நியமனம் செய்யப்பட்ட பிறகு கட்சி புதிய எழுச்சி பெறும்.

இவ்வாறு அந்த செயற்குழு உறுப்பினர் கூறினார். #MakkalNeedhiMaiam

சென்னை:

பட்டினப்பாக்கத்தில் கடல் அலையால் வீடுகள் இழந்தவர்களை மக்கள் நீதி மய்யத்தின் தலைவர் கமல்ஹாசன் சந்தித்து ஆறுதல் கூறினார். ‘மீனவர்களை இடம் மாற சொல்வது சரியல்ல’ என அவர் தெரிவித்தார்.

சென்னை பட்டினப்பாக்கம் சீனிவாசபுரம் கடற்கரையோர பகுதிகளில் கடல் அலை சீற்றம் ஏற்பட்டு மண் அரிப்பால் வீடுகள் சேதம் அடைந்தன. நேற்று வரை 50-க்கும் மேற்பட்ட வீடுகள் கடல் அலை சீற்றத்தில் சிக்கி கடலுக்குள் இழுத்து செல்லப்பட்டன.

கடல் அலை சீற்றத்தால் ஏற்பட்ட பாதிப்புகளையும், பாதிக்கப்பட்ட மக்களையும் பார்வையிட்டு ஆறுதல் சொல்ல மக்கள் நீதி மய்யம் கட்சியின் தலைவர் கமல்ஹாசன் நேற்று பட்டினப்பாக்கம் சீனிவாசபுரம் கடற்கரை பகுதிக்கு வந்தார். பாதிக்கப்பட்ட பகுதிகளை பார்வையிட்ட அவர் வீடுகளை இழந்த மக்களுக்கு ஆறுதல் கூறினார்.

பின்னர் கமல்ஹாசன் நிருபர்களிடம் கூறியதாவது:-

மய்யம் விசில் செயலியில் இதுதொடர்பான செய்தியை தாமதமாகவே தெரிவித்து இருக்கிறார்கள். அதனால் தான் நாங்கள் வருவதற்கு தாமதம் ஆகிவிட்டது. நான் ஒரு நடிகனாக ஸ்டூடியோ அருகில் இருக்க ஆசைப்படுவேன்.

விவசாயி, வயல்வெளி அருகில் வசிக்க ஆசைப்படுவார். மீனவர்கள், கடற்கரை அருகில் இருக்க தான் ஆசைப்படுவார்கள். அவர்களுக்கு மாற்று இடம் காஞ்சீபுரத்தில் கொடுத்தால், அவர்கள் எப்படி மீன்பிடிக்க இங்கு வருவார்கள்?.

கடலுக்கு அருகில் இருந்தால் தான் அவர்களுக்கு வசதியாக இருக்கும். அவர்களை இடம் மாற்றுவது, தொழிலை மாற்றுவதற்கு சமம். மண் அரிப்பை தடுக்க நடவடிக்கை எடுக்காமல், இடம் மாற சொல்வது சரியல்ல. இதற்கென தனித்துறை இருக்கிறது. அந்த துறை இதற்கு நல்ல தீர்வு சொல்ல வேண்டும்.

இவ்வாறு அவர் கூறினார்.  #KamalHaasan #MakkalNeethiMaiyam  #Tamilnews