நீங்கள் தேடியது "slug 95411"

வேதாரண்யம்:

கஜா புயலால் நாகை மாவட்டம் பெரிதும் பாதிக்கப்பட்டது. இங்கு ஒரு மாதமாகியும் மின் இணைப்பு பெறமுடியாமல் பல கிராமங்கள் உள்ளன. புயலில் பல்லாயிரக்கணக்கான மின்கம்பங்கள் சாய்ந்து விட்டதால் அவைகளை சரிசெய்யும் பணி முழுவீச்சில் நடைபெற்று வருகிறது. மின் மாற்றிகளும் சேதமானதால் திருவாரூர் மாவட்ட மின் மாற்றி மூலம் பிராந்தியக்கரை, மூலக்கரை ஆகிய இடங்களுக்கு மின்சாரம் வழங்கப்பட்டு வருகிறது.

இந்த நிலையில் அமைச்சர் ஓ.எஸ்.மணியன் மின் இணைப்பு வழங்குவது தொடர்பாக வேதாரண்யத்தில் இன்று நிருபர்களுக்கு பேட்டி அளித்தார். அப்போது அவர் கூறியதாவது:-

வேதாரண்யம் தாலுகாவில் புயலால் விழுந்த மின்கம்பங்களை சீரமைக்கும் பணியில் 4300 பேர் ஈடுபட்டுள்ளனர். 6 மின் மாற்றிகள் நாளை முதல் செயல்பட தொடங்கும். இதைத்தொடர்ந்து திருவாரூர் மாவட்ட மின் மாற்றியில் இருந்து மின் சாரம் பெறும் பிராந்தியக்கரை, மூலக்கரை பகுதிகளுக்கும் நாகை மாவட்ட மின் மாற்றி மூலம் மின்சாரம் வினியோகிக்கப்படும்.

வருகிற 20-ந் தேதிக்குள் நாகை மாவட்டம் முழுவதும் மின் வினியோகம் வழங்கப்படும். படகு மூலம் வண்டல், அவரிகாடு பகுதிகளுக்கு செல்ல வேண்டி இருப்பதால் அங்கு பூமிக்கடியில் கேபிள் அமைத்து மின்சாரம் வழங்க மின்துறை அமைச்சர் மூலம நடவடிக்கை எடுக்கப்படும். தற்போது உயர் அழுத்த மின் சம்பவங்களுக்கு மின் இணைப்பு வழங்கும் பணி நிறைவடைந்து விட்டது.

இவ்வாறு அவர் கூறினார். #Gajastorm

சென்னை:

சி.பி.எஸ்.இ. 9-ம் வகுப்பு பாடப்புத்தகத்தில் நாடார் பற்றிய தவறான செய்தியை நீக்க கோரியும், மத்திய அரசை கண்டித்தும் நாடார் அமைப்புகள் சார்பில் இன்று வள்ளுவர் கோட்டம் அருகே உண்ணாவிரத போராட்டம் நடைபெற்றது.

நாடார் மக்கள் சக்தி ஒருங்கிணைப்பாளர் தி.நகர் ஹரிநாடார் தலைமை தாங்கினார். நாடார் சங்கங்களின் கூட்டமைப்பு தலைவர் மின்னல் எச்.ஸ்டீபன் நாடார், தமிழ்நாடு நாடார் சங்க தலைவர் முத்துரமேஷ் நாடார் ஆகியோர் முன்னிலை வகித்தனர்.

உண்ணாவிரதத்தை தமிழக காங்கிரஸ் முன்னாள் தலைவர் குமரிஅனந்தன் தொடங்கி வைத்தார்.

இதில் அமைச்சர் மா.பா. பாண்டியராஜன், பா.ம.க. தலைவர் ஜி.கே.மணி, ஏ.கே.மூர்த்தி, பெருந்தலைவர் மக்கள் கட்சித் தலைவர் என்.ஆர்.தனபாலன், நாம் தமிழர் கட்சித் தலைவர் சீமான், தொழில் அதிபர் வி.ஜி.சந்தோசம், மண் பாண்ட சங்க தலைவர் சே.ம. நாராயணன், சென்னை புறநகர் நாடார் பாதுகாப்பு பேரவை தலைவர் கொளத்தூர் ரவி உள்பட பலர் வாழ்த்தி பேசினார்கள்.

இதில் பேசிய தலைவர்கள் சி.பி.எஸ்.இ. பாடப்புத்தகத்தில் நாடார் பற்றிய அவதூறு செய்திகளை முழுமையாக நீக்க மத்திய அரசு நடவடிக்கை எடுக்க வேண்டும் என்று வலியுறுத்தினார்கள்.

உண்ணாவிரதத்தில் த.மா.கா. பொருளாளர் கோவை தங்கம், தலைமை நிலைய செயலாளர் ஜி.கே.வெங்கடேஷ், ஆர்.எஸ்.முத்து, கொட்டிவாக்கம் முருகன், மனோகரன், சென்னை நாடார் சங்க தலைவர் கரண்சிங் நாடார், அம்பத்தூர் விஜயகுமார், புழல் தர்மராஜ், கே.சி.ராஜா, ராகம் சவுந்தரபாண்டியன், மயூரா, டாக்டர் ஜெமிலா, சிலம்பு சுரேஷ், சாத்தான் குளம் முன்னாள் சேர்மன் ஆனந்தராஜ், சத்ரிய பெருமாள், மால் மருகன் உள்பட பலர் கலந்து கொண்டனர்.

உண்ணாவிரத போராட்டத்தில் நிறைவேற்றப்பட்ட தீர்மானங்கள் வருமாறு:-

சி.பி.எஸ்.சி. பாடத்தில் நாடார் பற்றிய பொய் செய்திகளை வரும் கல்வி ஆண்டில் மத்திய அரசு நீக்க வேண்டும்.

ஆன்மிகம், கல்வி, விளையாட்டு, இதழியல் துறையில் பல சாதனைகள் படைத்த பத்மஸ்ரீ டாக்டர் சிவந்தி ஆதித்தனாரின் சேவையை போற்றும் வகையில் பாரத ரத்னா விருது வழங்க வேண்டும்.

சென்னையில் இருந்து திருச்செந்தூர் பகுதிக்கு குலசை எக்ஸ்பிரஸ் எனும் புதிய ரெயிலை இயக்க நடவடிக்கை எடுக்க வேண்டும்.

தாது மணல் தொழிற் சாலைகளை மத்திய- மாநில அரசுகள் உடனடியாக திறந்திட நடவடிக்கை எடுக்க வேண்டும். பாதிக்கப்பட்ட தொழிலாளர்களுக்கு மாதம் ரூ.10 ஆயிரம் உதவித் தொகை வழங்கிட வேண்டும் உள்பட பல தீர்மானங்கள் நிறைவேற்றப்பட்டது.

சென்னை:

தமிழ்நாட்டில் குட்கா, பான் மசாலா மற்றும் பாக்கு வடிவிலான போதைப் பொருட்களை தயாரிக்கவும், விற்பனை செய்யவும் தடை செய்து கடந்த 2013-ம் ஆண்டு அறிவிக்கப்பட்டது.

உணவு பாதுகாப்பு மற்றும் தரப்படுத்துதல் சட்டத்தின் கீழ் வெளியிடப்பட்ட இந்த உத்தரவு சரியாக அமல் படுத்தப்படவில்லை. தமிழகம் முழுவதும் ரகசியமாக குட்கா உள்ளிட்ட போதைப் பொருட்கள் விற்பனை செய்யப்பட்டு வருகின்றன.

இந்த நிலையில் சென்னையில் உள்ள குட்கா தயாரிப்பாளர்கள் வருமான வரி ஏய்ப்பு செய்வதாக மத்திய அரசுக்கு தகவல்கள் கிடைத்தன. அதன் பேரில் கடந்த 2016-ம் ஆண்டு ஜூலை மாதம் எம்.டி.எம். குட்கா தயாரிப்பாளர் மாதவராவின் வீடு மற்றும் செங்குன்றத்தில் உள்ள தயாரிப்பு ஆலைகள், சேமிப்புக் கிடங்குகளில் மத்திய வருமான வரித்துறை அதிகாரிகள் திடீர் சோதனை நடத்தினார்கள். அப்போது ஏராளமான ஆவணங்கள் சிக்கின.

அதோடு ரகசிய டைரி ஒன்றும் சிக்கியது. அந்த டைரியில் தமிழ்நாட்டில் தடையை மீறி குட்கா, பான் மசாலா விற்பனை செய்ய லஞ்சம் கொடுக்கப்பட்ட தகவல்கள் இருந்தன. லஞ்சம் பெற்றவர் பெயர், தொகை ஆகியவை தெளிவாக இருந்தன. தேதி வாரியாக இந்த தகவல்கள் இடம் பெற்று இருந்தது.

வருமான வரித்துறை அதிகாரிகள், அந்த தகவல்களை தீவிரமாக ஆய்வு செய்தபோது தமிழக அமைச்சர்கள் மற்றும் போலீஸ் அதிகாரிகள், மாநகராட்சி ஊழியர்கள் அடிக்கடி குட்கா தயாரிப்பாளர்களிடம் இருந்து லஞ்சம் பெற்றிருப்பது உறுதியானது. அமைச்சர்களும், போலீஸ் அதிகாரிகளும் ரூ.40 கோடி அளவுக்கு லஞ்சம் வாங்கியிருப்பது கண்டுபிடிக்கப்பட்டது. இதையடுத்து அந்த டைரி பக்கத்தை நகல் எடுத்து, தமிழக அரசுக்கு அனுப்பிய வருமான வரித்துறை, லஞ்சம் வாங்கிய அமைச்சர்கள், போலீஸ் அதிகாரிகள் மீது உரிய நடவடிக்கை எடுக்க அறிவுறுத்தியது.

ஆனால் அந்த டைரி பக்கத்தின் அடிப்படையில் எந்தவித நடவடிக்கையும் எடுக்கப்படவில்லை. இதைத் தொடர்ந்து இந்த ஊழல் குறித்து விசாரணை நடத்த உத்தரவிட வேண்டும் என்று சென்னை ஐகோர்ட்டில் தி.மு.க. சார்பில் வழக்கு தொடரப்பட்டது. அதை ஏற்று சி.பி.ஐ. விசாரணைக்கு சென்னை ஐகோர்ட்டு உத்தரவிட்டது.

அதன் பேரில் டெல்லி சி.பி.ஐ. அதிகாரிகள் குட்கா ஊழல் பற்றி விசாரணை நடத்தி வருகிறார்கள். ஏற்கனவே வருமான வரித் துறையினர், தமிழக போலீசார் சேகரித்திருந்த தகவல்களைப் பெற்ற சி.பி.ஐ. அதிகாரிகள் புதிய பிரிவுகளின் கீழ் வழக்குகளை பதிவு செய்தனர். அதோடு சென்னையில் பல்வேறு இடங்களில் மீண்டும் அதிரடி சோதனை நடத்தினார்கள்.

அந்த சோதனையின் பலனாக சி.பி.ஐ. அதிகாரிகளுக்கு பல புதிய தகவல்கள் கிடைத்தன. இதையடுத்து சிலர் கைது செய்யப்பட்டனர். சுமார் 25 பேர் வரவழைக்கப்பட்டு தீவிரமாக விசாரிக்கப்பட்டனர். அவர்கள் சொன்ன பதில்கள் அனைத்தும் வீடியோவில் பதிவு செய்யப்பட்டது.

இந்த நிலையில் குட்கா ஊழல் தொடர்பாக கைது செய்யப்பட்டவர்களில் ஒருவர் தன்னை ஜாமீனில் விடுதலை செய்யக் கோரி சென்னை ஐகோர்ட்டில் மனு செய்தார். அந்த மனு நீதிபதி இளந்திரையன் முன்னிலையில் விசாரணைக்கு எடுத்துக் கொள்ளப்பட்ட போது, “இது தொடர்பாக சி.பி.ஐ. பதில் தெரிவிக்க” உத்தரவிட்டார். அதை ஏற்று சி.பி.ஐ. தரப்பில் பதில் மனு நேற்று தாக்கல் செய்யப்பட்டது. அதில் சி.பி.ஐ. கூறியிருப்பதாவது:-

குட்கா ஊழல் முறைகேடு தொடர்பாக சி.பி.ஐ. 31 இடங்களில் சோதனை நடத்தியது. குற்றவியல் நடைமுறை சட்டப்பிரிவு 165-ன் கீழ் அதிகாரிகளுக்கு உள்ள அதிகாரத்தின்படி மேலும் 11 இடங்களில் சோதனை நடத்தப்பட்டது. அப்போது பல ஆவணங்கள் கிடைத்தன.

அதன் பேரில் 25-க்கும் மேற்பட்டவர்களிடம் விசாரிக்கப்பட்டது. இதில் குட்கா முறைகேடுகளில் தமிழக அமைச்சர்கள், உயர் போலீஸ் அதிகாரிகளுக்கு முக்கிய தொடர்பு இருப்பது தெரிய வந்துள்ளது.

குட்கா விற்பனை செய்ய லஞ்சம் கொடுக்கப்பட்டதற்கான ஆதாரங்கள் உள்ளன. பலரது வாக்கு மூலங்களும் அதை உறுதிபடுத்துவதாக இருக்கின்றன.

உணவு பாதுகாப்பு, சுங்கத் துறை, வணிக வரித்துறை அதிகாரிகளுக்கும் இந்த முறைகேடுகளில் தொடர்பு இருக்கிறது. சட்ட விரோதமாக குட்கா தயாரிக்கவும், தடையை மீறி குட்காவை விற்பனை செய்யவும் அரசு அதிகாரிகளே உடந்தையாக இருந்துள்ளனர். அவர்கள் ஆவணங்களை அழித்துள்ளனர். குற்றச்சாட்டை உறுதிப்படுத்த தொடர்ந்து விசாரித்து வருகிறோம்.

இவ்வாறு சி.பி.ஐ. கூறி உள்ளது. சி.பி.ஐ.யின் இந்த தகவல் அமைச்சர்கள், போலீஸ் அதிகாரிகள் மீதான பிடியை இறுகச் செய்துள்ளது. #CBI #GutkhaScam

சென்னை:

போக்குவரத்து துறை அமைச்சர் எம்.ஆர்.விஜயபாஸ்கர் வெளியிட்டுள்ள அறிக்கையில் கூறி இருப்பதாவது:-

கடந்த 15-ந்தேதி அன்று ‘‘கஜா’’ புயலால் தமிழகத்தில் தஞ்சாவூர், நாகப்பட்டினம், புதுக்கோட்டை, திருவாரூர், சிவகங்கை ஆகிய கடலோர மாவட்டங்கள் பெரும் பாதிப்புக்குள்ளாகின.

முதல்-அமைச்சரின் ஆணைக்கிணங்க புயலால் பாதிக்கப்பட்ட மாவட்டங்களில் மக்களுக்கு நிவாரணம் வழங்க தேவையான பொருட்களை தொண்டு நிறுவனங்கள், பொது மக்கள் அரசு பேருந்துகளில் இலவசமாக எடுத்துச் செல்ல அனுமதி அளிக்கப்படுகிறது. அரசு போக்குவரத்துக் கழக அதிகாரிகள் நிவாரண பொருட்களை எடுத்துச் செல்ல உரிய உதவிகளை செய்திடுமாறு அன்புடன் கேட்டுக் கொள்கிறேன்.

இவ்வாறு அவர் கூறியுள்ளார். #GajaStorm #Minister