நீங்கள் தேடியது "slug 95411"

சென்னை:

பா.ம.க. நிறுவனர் டாக்டர் ராமதாஸ் வெளியிட்டுள்ள அறிக்கையில் கூறி இருப்பதாவது:-

காவிரிப் பாசன மாவட்டங்களில் கஜா புயலால் பாதிக்கப்பட்ட பகுதிகளில் அரசின் மீட்பு மற்றும் நிவாரணப் பணிகள் மிக மோசமாக நடைபெற்று வருகின்றன. பாதிக்கப்பட்ட மக்களுக்கு உணவு, குடிநீர் உள்ளிட்ட அடிப்படை வசதிகள் கூட செய்து தரப்படாததால், அங்குள்ள மக்களிடையே எழுந்துள்ள கோபமும், அக்கோபம் ஆட்சியாளர்கள் மீது திரும்புவதையும் செய்திகள் மூலம் அறிய முடிகிறது.

கஜா புயலால் காவிரி பாசன மாவட்டங்களில் ஏற்பட்டுள்ள பாதிப்புகளும், சேதங்களும் வரலாறு காணாதவை. அங்குள்ள மக்கள் கடந்த 25 ஆண்டுகளாக சேர்த்த அனைத்தையும் ஒற்றை இரவில் இழந்து விட்டனர்.

கஜா புயல் தாக்குவதற்கு முந்தைய நாள் இரவு வரை கோடீஸ்வரர்களாக இருந்தவர்கள் அடுத்த நாள் காலையில் ஒன்றுமில்லா தவர்களாக மாறி விட்டனர். அவர்கள் வாழ்வாதாரம் முழுவதையும் புயல் வாரிச் சுருட்டி வீசி விட்டது. முதல் நாள் இரவு வரை ஒட்டு மொத்த தமிழகத்துக்கும் உணவு வழங்கியவர்கள் அடுத்த நாள் காலையில் ஒரு வேளை சோற்றுக்கு வழியில்லாதவர்களாகி விட்டனர். இந்த வலி எவ்வளவு கொடுமையானது என்பதை அனுபவிக்கும் மக்களால் மட்டுமே உணர முடியும்.

இந்த அளவுக்கு பாதிக்கப்பட்ட மக்கள் தமிழக அரசிடமிருந்து எதிர்பார்ப்பது ஆதரவையும், ஆறுதலையும் தான். ‘பாதிக்கப்பட்ட உங்களுக்கு உதவ நாங்கள் இருக்கிறோம்’ என்று கூறி அவர்கள் மனதில் நம்பிக்கையை மட்டும் விதைத்து விட்டால், அது கொடுக்கும் தைரியத்தில் இழந்தவற்றை மறு உருவாக்கம் செய்யும் பணிகளில் அவர்கள் முழுவீச்சில் இறங்கியிருப்பார்கள்.

ஆனால், பாதிக்கப்பட்ட மக்களுக்கும் அவர்களின் குழந்தைகளுக்கும் ஒருவேளை உணவு வழங்குவதற்குக் கூட தமிழக அரசு ஏற்பாடுகளை செய்ய வில்லை. புயல் நிவாரணப் பணிகளை மேற்கொள்வதற்காக சென்ற அமைச்சர்கள், சுற்றுலா சென்றதாக கருதிக் கொண்டு மகிழ்ச்சியாக இருந்தார்களே தவிர மக்கள் குறைகளை களையவில்லை.

புயலால் ஏற்படும் பாதிப்புகள் சரி செய்யப்படும் என்று கூறியிருக்க வேண்டிய அமைச்சர்கள், எந்த பாதிப்பும் ஏற்படவில்லை என்று கூறியதால் தான் அவர்கள் மீது மக்களின் கோபம் திரும்பியது. சொந்தத் தொகுதியான வேதாரண்யத்தில் அமைச்சர் ஓ.எஸ்.மணியனை மக்கள் துரத்தியடித்ததற்குக் காரணம் இந்த கோபம் தான். தஞ்சாவூர் மாவட்டத்தில் அமைச்சர்கள் செங்கோட்டையன், துரைக்கண்ணு, கடம்பூர் ராஜு ஆகியோர் முற்றுகையிடப்பட்டதற்கு காரணமும் இதே கோபம் தான்.

அ.தி.மு.க.வின் துணை அமைப்பாளரும், முன்னாள் அமைச்சருமான வைத்தி லிங்கத்தின் சொந்த ஊரிலேயே மீட்புப் பணிகள் மேற்கொள்ளப்படாததால் மக்கள் கோபமடைந்து முற்றுகைப் போராட்டம் நடத்தியிருக்கிறார்கள் என்றால், மற்ற பகுதிகளில் நிலைமை எந்த அளவுக்கு மோசமாக இருந்திருக்கும் என்பதை யூகிக்கலாம்.

மக்கள் கோபத்துடன் போராட்டம் நடத்தும் இடங்களில் அவர்களை சமாதானப்படுத்த வேண்டிய அமைச்சர்கள் தங்களின் அதிகாரத் தோரணையை காட்டியது தான் நிலைமையை மோசமாக்கியுள்ளது.

அதிலும் குறிப்பாக தஞ்சை மாவட்டம் தெலுங்கன் குடிக்காடு என்ற இடத்தில் முற்றுகையிட்ட மக்களை முன்னாள் அமைச்சர் வைத்திலிங்கம் தகாத வார்த்தைகளால் திட்டியதால் அங்கு பதற்றம் ஏற்பட்டுள்ளது.

பாதிக்கப்பட்ட பகுதிகளை இன்று பார்வையிடும் தமக்கும் இத்தகைய வரவேற்பு தான் கிடைக்கக் கூடும் என்பதை உணர்ந்த முதல்-அமைச்சர் எடப்பாடி பழனிசாமி, மக்களின் கோபத்தை தணிக்கும் வகையில் நேற்றிரவு பயிர்களுக்கான இழப்பீடு மற்றும் நிவாரண உதவிகளை அறிவித்திருக்கிறார். இது மக்கள் கோபத்தை தணிக்கவில்லை; மாறாக மக்களின் கோபத்தை அதிகரித்திருக்கிறது என்பது தான் உண்மை.

நெல், கரும்பு, வாழை, காய்கறிகள் உள்ளிட்ட பாசனப் பயிர்களுக்கு ஹெக்டேருக்கு ரூ.13,500, அதாவது ஏக்கருக்கு ரூ.5400 வழங்கப்படும் என்று முதல்- அமைச்சர் அறிவித்துள்ளார். இது சேதமடைந்த பயிர்களை அகற்றி நிலத்தை சீரமைப்பதற்குக் கூட போதாது. ஒரு தென்னை மரத்துக்கு 600 ரூபாய் இழப்பீடு வழங்கப்படும் என்று அறிவிக்கப்பட்டுள்ளது. எட்டுவழிச் சாலைக்கு நிலம் எடுக்கப்படும் போது ஒரு தென்னைக்கு ரூ.50,000 வழங்குவதாக அறிவித்த அரசு, இப்போது அதில் கிட்டத்தட்ட நூற்றில் ஒரு பங்கு மட்டுமே இழப்பீடு வழங்குவது எந்த வகையில் நியாயம்? தென்னை மரங்களில் ஒருமுறை தேங்காய் பறித்தாலே இதைவிட அதிக வருமானம் கிடைக்கும் எனும் நிலையில் தமிழக அரசு அறிவித்துள்ள நிதி உதவி யானைப்பசிக்கு சோளப் பொறியாகவே அமையும். இது போதுமானதல்ல.

சேதமடைந்த குடிசைகள், படகுகள், மீன்வலைகள் உள்ளிட்ட எந்தப் பொருட்களுக்கும் தமிழக அரசு அறிவித்துள்ள இழப்பீடு போதுமானதல்ல. இது மக்களின் கண்ணீரைத் துடைக்காது. துயரங்களைப் போக்காது. கஜா புயலால் பாதிக்கப்பட்ட பகுதிகளை இன்று பார்வையிடும் முதல்-அமைச்சர் மக்களின் பாதிப்புகள் குறித்து அவர்களிடம் கேட்டறிந்து அதனடிப்படையில் இழப்பீடு வழங்கப்பட வேண்டும். மக்களின் உணர்வுகளை மதித்து அதற்கேற்ற வகையில் நிவாரணப் பணிகளை விரைவுபடுத்த வேண்டும்.

இவ்வாறு டாக்டர் ராமதாஸ் கூறியுள்ளர்.  #Ramadoss #Gajastorm

காரியாபட்டி:

காரியாபட்டி ஊராட்சி ஒன்றிய அலுவலகத்தில் முன்னாள் யூனியன் தலைவர் உருவப்படம் திறப்பு விழா கலெக்டர் சிவஞானம் தலைமையில் நடைபெற்றது. ராதாகிருஷ்ணன் எம்பி, சந்திரபிரபா எம்.எல்.ஏ. முன்னிலை வகித்தனர்.

விழாவில் அமைச்சர் கே.டி.ராஜேந்திரபாலாஜி பேசியதாவது:-

காரியாபட்டி ஊராட்சி யில் பல்வேறு பொது சேவைகள் மூலம் பொதுமக்களின் நன் மதிப்பை பெற்ற மறைந்த முன்னாள் யூனியன் தலைவரின் படத்தைதிறந்து வைப்பதில் பெருமை அடைகிறோம்.

அவர் தி.மு.க.வில் நீண்ட காலமாக பணியாற்றி தொடர்ந்து அ.தி.மு.க.வில் இணைந்து பணியாற்றினார். அ.தி.மு.க.வில் அவர் சேர்ந்த போது ஜெயலலிதா மிகவும் சந்தோசம் அடைந்தார். பாரம்பரிய குடும்பத்தை சேர்ந்த அவர், காரியாபட்டி பகுதியில் பல்வேறு வளர்ச்சி திட்ட பணிகளை செய்து நல்ல நிர்வாகத்தை கொடுத்துள்ளார்.

அவர் மறைந்து விட்டாலும் அவரது குடும்பத்திற்கு தேவையான அனைத்து உதவிகளையும் நாங்கள் செய்வோம்.

நான் நல்லவர்களை நல்லவர்கள் என்று கட்டாயம் சொல்வேன். நான் திருத்தங்கல் நகராட் சியில் துணை தலைவராக வெற்றிபெற்ற போது அமைச்சராக தி.மு.க.வை சேர்ந்த தங்கப்பாண்டியன் இருந்தார்.

அன்றைக்கு என் பதவியை பறிக்க வேண்டும் என்று தங்கப் பாண்டியனிடம் சிலர் கூறினர். அதற்கு அவர் மறுப்பு தெரிவித்து எனக்கு ஆதரவாக இருந்தார்.

தங்கப்பாண்டியன் உருவப்படத்தை திருத்தங்கல் நகராட்சியிலும், தற்போது காரியாபட்டி ஊராட்சி ஒன்றிய அலுவலகத்திலும் நான்தான் திறந்து வைத்தேன்.

எந்த இயக்கத்தில் இருப்பது என்பது முக்கியம் அல்ல. எப்படி செயலாற்றினோம் என்றுதான் பார்க்க வேண்டும். அ.தி.மு.க.வை நம்பி வந்தவர்கள் வீழ்ந்தாக என்றைக்கும் சரித்திரம் கிடையாது.

இவ்வாறு அவர் பேசினார். #ministerrajendrabalaji #admk

பொன்னேரி:

திருவள்ளூர் கிழக்கு மாவட்டம் பாட்டாளி மக்கள் கட்சி சார்பில் அரசியல் விழிப்புணர்வு பொதுக் கூட்டம் பொன்னேரியில் நடைபெற்றது. கட்சியின் நிறுவனர் டாக்டர் ராமதாஸ் கலந்து கொண்டு சிறப்புரையாற்றினார். அப்போது அவர் பேசியதாவது:-

வாக்காளர்கள் நேர்மையான பிரதிநிதிகளை தேர்ந்தெடுக்க வேண்டும். வாக்குக்கு பணம் கொடுக்க வரும் வேட்பாளரிடம் இந்த பணம் எப்படி வந்தது? என்று கேள்வி எழுப்ப வேண்டும்.

தற்போது உள்ள தமிழக அமைச்சர்கள் அனைவரும் ஊழல் செய்து சேலம் மலை, திருவண்ணாமலை போன்று மலையளவு பணத்தை குவித்து வைத்துள்ளனர். கும்மிடிப்பூண்டியில் இருந்து கன்னியாகுமரி வரை சாலை வழியே 10 அடி உயரத்திற்கு 2000ரூபாய் நோட்டுக்களை அடுக்கி வைக்கும் அளவிற்கு அமைச்சர்கள் ஊழல் செய்து சொத்து சேர்த்து வைத்துள்ளனர்.

மக்கள் நல்வாழ்வு, சாலை, சுகாதாரம், பாதாள சாக்கடை திட்டம், கல்வி உள்ளிட்டவற்றுக்கு செலவு செய்ய வேண்டிய தொகையில் 75 சதவீதம் கொள்ளையடித்து ஊழல் செய்து விடுகின்றனர்.

கடந்த ஆண்டில் 600 மதுக்கடைகளை திறந்தது இந்த ஆட்சியின் அவலம். இந்தியாவில் உள்ள மாநிலங்களில் ஊழலில் 3-வது இடத்தை பிடித்து தமிழக அரசு சாதனை படைத்துள்ளனர்.

அமைச்சர்கள் மீதான ஊழல்கள் குறித்து பா.ம.க. சார்பில் கவர்னரிடம் ஊழல் பட்டியல் வழங்கப்பட்டும் இதுவரை எந்த நடவடிக்கையும் எடுக்கப்படவில்லை.

காமராஜர் போன்று தமிழகத்திற்கு பெருமை தேடி தந்த முதல்வர்கள் இருந்த நிலைமாறி சி.பி.ஐ. விசாரணைக்கு முதல்வர் ஆளாகியுள்ளது வெட்கக்கேடு. அவர் தனது பதவியை ராஜினாமா செய்ய வேண்டும்.

விவசாயத்திற்கு இடு பொருட்கள் மானிய விலையில் வழங்கப்படுவதில்லை, விதைகள் கிடைப்பதில்லை. ஒழுங்கு முறை விற்பனை கூடங்கள் செயல்படாமல் உள்ளது.

இவ்வாறு அவர் பேசினார்.

கூட்டத்தில் மாநில துணைப்பொதுசெயலாளர் செல்வராஜ், மாவட்ட செயலாளர் குபேந்திரன் மாநில தலைவர் ஜி.கே.மணி. முன்னாள் மத்திய மந்திரி ஏ.கே.மூர்த்தி, நடிகர் ரஞ்சித் உள்பட பலர் கலந்து கொண்டனர். #Ramadoss #Governor

சென்னை:

நந்தனத்தில் இன்று மாலை நடைபெறும் எம்.ஜி.ஆர். நூற்றாண்டு நிறைவு விழாவில் பங்கேற்பதற்காக தமிழகம் முழுவதும் இருந்து அ.தி.மு.க. தொண்டர்கள் குவிந்தனர்.

முன்னாள் முதல்- அமைச்சர் எம்.ஜி.ஆரின் நூற்றாண்டு விழா தமிழகம் முழுவதும் 31 மாவட்டங்களில் கொண்டாடப்பட்டது.

சென்னை நந்தனம் ஒய். எம்.சி.ஏ. மைதானத்தில் இன்று மாலை 3.30மணிக்கு எம்.ஜி.ஆர். நூற்றாண்டு நிறைவு விழா மற்றும் தமிழ் நாடு 50-ம் ஆண்டு பொன் விழா நடைபெறுகிறது.

விழாவுக்கு சபாநாயகர் பி.தனபால் தலைமை வகிக்கிறார். முதல்- அமைச்சர் எடப்பாடி கே.பழனிச்சாமி எம்.ஜி.ஆரின் உருவப் படத்தை திறந்து வைத்து நூற்றாண்டு நிறைவு விழா மலரை வெளியிடுகிறார்.

தமிழ்நாடு பொன்விழா ஆண்டையொட்டி நடை பெற்ற பல்வேறு போட்டிகளில் வெற்றி பெற்றவர்களுக்கு தங்கப் பதக்கம் அணிவித்து காசோலை, பாராட்டு சான்றிதழ், அரசு நலத்திட்ட உதவிகளை வழங்கி முதல்-அமைச்சர் எடப்பாடி பழனிச்சாமி விழா பேருரையாற்றுகிறார்.

விழாவில் முன்னாள் முதல்-அமைச்சர் எம்.ஜி. ஆருடன் சினிமா துறையில் பயணித்த நடிகர்- நடிகைகள், தொழில்நுட்ப கலைஞர்கள் கவுரவிக்கப்பட உள்ளனர்.

விழாவில் துணை முதல்- அமைச்சர் ஓ.பன்னீர்செல்வம், அமைச்சர் டி.ஜெயக்குமார், பாராளுமன்ற துணை சபாநாயகர் மு.தம்பிதுரை ஆகியோர் பேசுகிறார்கள்.

சென்னை நந்தனம் ஒய். எம்.சி.ஏ. மைதானத்தில் விழாவுக்கான ஏற்பாடுகள் பிரம்மாண்டமான முறையில் செய்யப்பட்டு உள்ளன. தமிழகம் முழுவதும் பல்வேறு மாவட்டங்களில் இருந்து எம்.ஜி.ஆர். ரசிகர்கள், அ.தி.மு.க. தொண்டர்கள் பங்கேற்கிறார்கள்.

இதையொட்டி நந்தனம் ஒய்.எம்.சி.ஏ. மைதானத்தில் 1 லட்சம் பேர் அமரும் வகையில் பிரம்மாண்ட பந்தல், சேர்கள் அமைக்கப்பட்டுள்ளது.

விழாவையொட்டி அண்ணா சாலை முழுவதும் வாழை மரங்கள், தோரணங்கள், அலங்காரங்கள், பேனர்கள் அமைக்கப்பட்டு சென்னை விழாக்கோலம் பூண்டுள்ளது.

தமிழகம் முழுவதும் இருந்து வரும் தொண்டர்கள் கார், வேன், பஸ் உள்ளிட்ட வாகனங்களை நிறுத்துவதற்காக போலீசார் சார்பில் சிறப்பு வசதிகள் ஏற்படுத்தப்பட்டுள்ளது.

வாகன நெரிசல் ஏற்படாமல் இருப்பதற்காக வாகன நிறுத்துமிடங்கள் அமைக்கப்பட்டுள்ளன. சென்னையில் இருந்து வரும் அ.தி.மு.க.வினர் பஸ்கள், வேன்கள், கார்கள் கிண்டி தொழிற் பேட்டை பகுதியிலும், திருவள்ளூர், காஞ்சீபுரம், திருவண்ணாமலை, விழுப்புரம், கடலூர், வேலூர் மாவட்டங்களில் இருந்து வரும் வாகனங்கள் தீவுத் திடல், சுவாமி சிவானந்தா சாலை, கடற்கரை இணைப்பு சாலை ஆகிய இடங்களில் நிறுத்தப்பட வசதி செய்யப்பட்டுள்ளது.

தர்மபுரி, கிருஷ்ணகிரி, நாமக்கல், ஈரோடு, திருப்பூர், சேலம், கோயம்புத்தூர், நீலகிரி ஆகிய மாவட்டங்களில் இருந்து வரும் வாகனங்கள் நந்தம்பாக்கம் வர்த்தக மையம், ஐ.டி.பி.எல். மைதானம் ஆகிய இடங்களில் நிறுத்தப்படுகிறது.

தஞ்சாவூர், நாகப்பட்டினம், புதுக்கோட்டை, கரூர், அரியலூர், பெரம்பலூர், திருச்சி ஆகிய மாவட்டங்களில் இருந்து வரும் வாகனங்கள் ராஜீவ் காந்தி சாலையில் உள்ள வாகன நிறுத்துமிடங்களிலும், சி.பி.டி. வளாகத்திலும் நிறுத்தப்படும்.

விருதுநகர், தேனி, ராமநாதபுரம், சிவகங்கை, திண்டுக்கல், மதுரை, திருநெல்வேலி, தூத்துக்குடி, கன்னியாகுமரி மாவட்டங்களில் இருந்து வரும் வாகனங்கள் ஒய்.எம். சி.ஏ. ராணுவ மைதானம், டாக்டர் எம்.ஜி.ஆர். பல் கலைக்கழக வளாகம் ஆகிய இடங்களில் நிறுத்தலாம்.

எம்.ஜி.ஆர். நூற்றாண்டு விழாவையொட்டி சென்னையில் 17 ஆயிரம் போலீசார் பாதுகாப்பு பணியில் ஈடுபட்டுள்ளனர். #MGRCenturyFestival #ADMK