நீங்கள் தேடியது "slug 95580"

மலைக்கோட்டை:

திருச்சி மலைக்கோட்டை சறுக்குப்பாறையை சேர்ந்தவர் சண்முகம். இவரது மகன் தினேஷ் (வயது 31). இவர் லிப்ட் அமைக்கும் தனியார் நிறுவனத்தில் காண்டிராக்ட் பணி எடுத்து செய்து வந்தார். இவருக்கும் மலைக்கோட்டை தாயுமானவர் தெருவை சேர்ந்த இளம்பெண் ஒருவருக்கும் திருமணம் நிச்சயிக்கப்பட்டது. அவர்களது திருமணம் இன்று சத்திரம் பேருந்து நிலையம் அருகில் உள்ள திருமண மண்டபத்தில் நடைபெற இருந்தது. இதையொட்டி அதற்கான ஏற்பாடுகளை இருவீட்டாரும் செய்து வந்தனர்.

முன்னதாக நேற்று மாலை திருமண வரவேற்பு நிகழ்ச்சி நடைபெற்றது. இதில் இரு வீட்டாரின் உறவினர்கள், நண்பர்கள் பங்கேற்று மணமக்களை வாழ்த்தினர். வரவேற்பு நிகழ்ச்சி முடிந்ததும் தினேஷ் மற்றும் அவரது குடும்பத்தினர் அவர்களது வீட்டிற்கு சென்று விட்டனர். மணமகள் வீட்டார் அவர்களுடைய வீட்டிற்கு சென்று விட்டனர்.

இந்த நிலையில் தினேஷ் அவரது வீட்டின் மாடிக்கு சென்று அங்குள்ள அறையில் படுத்து தூங்கினார். இன்று காலை மாப்பிள்ளை அழைப்பு நடைபெற இருந்ததால் அவரது தாய் மாடிக்கு சென்று தினேஷ் தூங்கி கொண்டிருந்த அறையின் கதவை தட்டி அழைத்தார். ஆனால் நீண்ட நேரமாகியும் உள்ளே இருந்து எந்தவித சத்தமும் வரவில்லை.

இதைத்தொடர்ந்து உறவினர்கள் சென்று கதவை தட்டி அழைத்தனர். அப்படியும் அவர் வர வில்லை. இதையடுத்து கதவை உடைத்து உள்ளே சென்று பார்த்த போது, அறையில் உள்ள மின்விசிறியில் கயிற்றால் தூக்குப்போட்ட நிலையில் தினேஷ் தொங்கினார். அதிர்ச்சியடைந்த உறவினர்கள் உடனே அவரை மீட்டு ஆஸ்பத்திரிக்கு கொண்டு சென்றனர். அங்கு டாக்டர்கள் பரிசோதித்த போது தினேஷ் ஏற்கனவே இறந்து விட்டதாக தெரிவித்தனர்.

இன்று திருமணம் நடைபெற இருந்த நிலையில் தினேஷ் தற்கொலை செய்து கொண்டது உறவினர்களிடையே பெரும் சோகத்தை ஏற்படுத்தியது. இந்த சம்பவம் குறித்த தகவல் அறிந்ததும் கோட்டை போலீஸ் இன்ஸ்பெக்டர் சண்முகவேல், சப்-இன்ஸ்பெக்டர் அம்சவள்ளி ஆகியோர் சம்பவ இடத்திற்கு சென்று விசாரணை நடத்தினர்.

திருமணம் பிடிக்காததால் தினேஷ்தற்கொலை செய்தாரா? அல்லது வேறு ஏதேனும் காரணமா? என்று விசாரணை நடத்தப்பட்டு வருகிறது. தினேஷ் 10ம்வகுப்பு வரை மட்டுமே படித்துள்ளார். அவருக்கு நிச்சயம் செய்யப்பட்டிருந்த மணமகள் பட்டப்படிப்பு படித்துள்ளார். தன்னை விட அவர் அதிகம் படித்திருந்ததால் தினேஷ் ஒரு வித தயக்கத்துடன் இருந்துள்ளார். நேற்று வரவேற்பு நிகழ்ச்சியின் போதும் யாரிடமும் சரியாக முகம் காட்டி பேசாமல் இருந்துள்ளார். இரவு வீட்டிற்கு வந்ததும் தூங்க செல்வதற்கு முன்பு அவரது தாயிடம் நீண்ட நேரம் பேசியுள்ளார். அதன்பிறகு மாடிக்கு சென்ற அவர் தூக்குப்போட்டு தற்கொலை செய்துள்ளார். மணமகள் தன்னை விட அதிகம் படித்திருந்ததால் தாழ்வு மனப்பான்மை காரணமாக தினேஷ் தற்கொலை செய்திருக்கலாம் என போலீசார் கருதுகின்றனர். மேலும் இது தொடர்பாக விசாரணை நடத்தி வருகின்றனர்.

தினேஷ் திருமணத்தையொட்டி அவரது வீடே களை கட்டியிருந்தது. திருமண நிகழ்ச்சிக்கு வருபவர்களுக்காக வித விதமான உணவுகள் தயார் செய்யப்பட்டு வந்தது. அவர் தற்கொலை செய்ததால் களை கட்டியிருந்த திருமண வீடு சோகத்தில் மூழ்கியது.

உத்தமபாளையம்:

தேனி அருகே உத்தமபாளையம் ஆனைமலை யான்பட்டி பள்ளிக்கூடத் தெருவை சேர்ந்த 17 வயது இளம்பெண் தனது தோழி வீட்டிற்கு சென்றபோது மாயமானார்.

இதனால் அதிர்ச்சி அடைந்த அவரது பெற்றோர் இது குறித்து ராயப்பன்பட்டி போலீசில் புகார் அளித்தனர். போலீசார் வழக்குப்பதிவு செய்து மைனர்பெண்ணை தேடி வந்தனர்.

இன்ஸ்பெக்டர் உலகநாதன் தலைமையிலான போலீசார் விசாரணை நடத்தியதில் போடி அருகே உள்ள சிலமலை மணியம்பட்டி இந்திரா காலனியை சேர்ந்த அர்ஜூனன் (வயது24) என்பவர்தான் மைனர் பெண்ணை கடத்தி சென்று திருமணம் செய்தது தெரியவந்தது.

இதனைத் தொடர்ந்து அர்ஜூனனை போலீசார் கைது செய்தனர். சிறுமியை மீட்டு காப்பகத்தில் ஒப்படைத்தனர்.

மரக்காணம்:

விழுப்புரம் மாவட்டம் மரக்காணம் அருகே உள்ள கே.என்.பாளையத்தை சேர்ந்தவர் சுரேஷ் (வயது 29). இவருக்கும் அருகில் உள்ள தேவிகுளத்தை சேர்ந்த மகாலட்சுமி (19) என்பவருக்கும் கடந்த 25.5.2018 அன்று திருமணம் நடைபெற்றது.

மகாலட்சுமி புதுவையில் உள்ள தனியார் நர்சிங் கல்லூரியில் முதலாம் ஆண்டு படித்து வருகிறார். கடந்த 2 நாட்களுக்கு முன்பு மகாலட்சுமி தேவி குளத்தில் உள்ள பெற்றோர் வீட்டுக்கு சென்றிருந்தார். இரவில் வீட்டில் படுத்து தூங்கினார். காலையில் பார்த்தபோது அவரை காணவில்லை.

இதுகுறித்து மரக்காணம் போலீசில் சுரேஷ் புகார் செய்தார். அதன்பேரில் போலீசார் வழக்குபதிவு செய்து மாயமான புதுப்பெண் மகாலட்சுமி எங்கு சென்றார் என விசாரணை நடத்தி, தேடி வருகின்றனர். 

ஈரோடு:

ஈரோடு மாவட்டம் கொடுமுடி அருகே உள்ள ஊஞ்சலூர் கொளத்துப்பாளையம் பகுதியை சேர்ந்தவர் சத்தியமூர்த்தி (வயது 23). திருப்பூர் மாவட்டம் தாராபுரம் நவகோம்பு பகுதியை சேர்ந்தவர் அபிநயா (22).

இருவரும் திருப்பூரில் உள்ள ஒரு பனியன் கம்பெனியில் வேலை பார்த்து வருகிறார்கள். இதையடுத்து இவர்கள் இருவருக்கும் இடையே பழக்கம் ஏற்பட்டது. இது நாளடைவில் காதலாக மாறி காதலித்து வந்தனர்.

இவர்களின் காதல் இருவரின் வீட்டுக்கு தெரியவந்தது. இவர்கள் வெவ்வேறு சமூகத்தை சேர்ந்தவர்கள் என கூறப்படுகிறது. இதையடுத்து பெண்ணின் வீட்டில் கடும் எதிர்ப்பு தெரிவித்து வந்தனர்.

இந்த நிலையில் காதல் ஜோடி வீட்டை விட்டு வெளியேறினர். அவர்கள் தந்தை பெரியார் திடாவிடர் கழக மாவட்ட செயலாளர் குமரகுருபரன் முன்னிலையில் சாதி மறுப்பு திருமணம் செய்து கொண்டனர்.

இதையடுத்து காதல் ஜோடி ஈரோடு மகளிர் போலீஸ் நிலையத்தில் இன்று பாதுகாப்பு கேட்டு தஞ்சம் அடைந்தனர். இது குறித்து அவர்களின் பெற்றோருக்கு தகவல் தெரிவிக்கப்பட்டு வரவழைக்கப்பட்டனர். அவர்களிடம் தொடர்ந்து பேச்சு வார்த்தை நடந்து வருகிறது. 

காங்கயம்:

காங்கயம் அருகே உள்ள ஊதியூர் தாளக்கரையை சேர்ந்தவர் தனசேகரன்(21). பட்டதாரி. இவர் அதே பகுதியை சேர்ந்த பி.காம். முதலாம் ஆண்டு படித்து வரும் மாணவியை ஒரு தலையாக காதலித்து வந்துள்ளார்.

மாணவியை திருமணம் செய்து கொள்வதாக கூறி உள்ளார். இதற்கு அவர் மறுப்பு தெரிவித்துள்ளார். இந்த நிலையில் தனசேகரனுக்கும் அவரது உறவினர் பெண்ணுக்கும் கடந்த 2 மாதத்திற்கு முன் திருமணம் நடைபெற்றது.

ஆனாலும் அவர் கல்லூரி மாணவியை 2-வதாக திருமணம் செய்து கொள்ளும் நிலையில் இருந்தார். சம்பவத்தன்று இரவு வீடு அருகே நின்று கொண்டு இருந்த மாணவியை தனசேகரன் சந்தித்தார்.

தன்னை திருமணம் செய்து கொள்ளும் படி வற்புறுத்தி உள்ளார். இதற்கு மாணவி மறுப்பு தெரிவித்துள்ளார். இதனால் ஆத்திரம் அடைந்த தனசேகரன் மாணவியை மோட்டார் சைக்கிளில் ஊட்டிக்கு கடத்தி சென்று உள்ளார்.

மாணவியை காணாததால் அவரது தந்தை ஊதியூர் போலீசில் புகார் செய்தார். போலீசார் வழக்குபதிவு செய்து அவரை தேடி வந்தனர். இந்த நிலையில் நேற்று மாலை மாணவியுடன் தனசேகரன் ஊட்டியில் இருந்து ஊருக்கு திரும்பி கொண்டு இருந்தார்.

இந்த தகவல் மாணவியின் உறவினர்களுக்கு தெரிய வந்தது. அவர்கள் பல்லடத்தில் காத்து இருந்தனர். அவர்களை பார்த்ததும் மாணவியை இறக்கி விட்டு விட்டு தனசேகரன் தப்பி சென்று விட்டார்.

அவரை மாணவியின் உறவினர்கள் மடக்கி பிடிக்க முயன்றனர். ஆனால் முடியவில்லை. இது தொடர்பாக ஊதியூர் போலீசாருக்கு தகவல் கொடுத்தனர்.

இந்த நிலையில் நேற்று இரவு தாராபுரம் - பொள்ளாச்சி சாலையில் ரவுண்டானா அருகே தனசேகரன் நிற்பதாக போலீசாருக்கு தகவல் கிடைத்தது. அங்கு விரைந்து சென்ற போலீசார் தனசேகரனை மடக்கி பிடித்து கைது செய்தனர்.

பின்னர் அவர் காங்கயம் மாஜிஸ்திரேட்டு சுப்பிரமணியம் முன் ஆஜர்படுத்தப்பட்டார். தனசேகரனை 15 நாள் காவலில் வைக்க மாஜிஸ்திரேட்டு உத்தரவிட்டார். இதனை தொடர்ந்து அவர் கோவை மத்திய சிறையில் அடைக்கப்பட்டார்.