நீங்கள் தேடியது "slug 96176"

சென்னை:

தமிழகத்தில் நிலவும் ஸ்திரமற்ற அரசியல் சூழ்நிலையில் வருகிற பாராளுமன்ற தேர்தலை சந்திக்க கூட்டணிகள் எவ்வாறு அமையும் என்ற எதிர்பார்ப்பு எல்லோரிடமும் ஏற்பட்டுள்ளது.

தலைவர்கள் மறைவால் அ.தி.மு.க., தி.மு.க. ஆகிய பிரதான கட்சிகளே கூட்டணி விசயத்தில் தவிப்புக்குள்ளாகி இருக்கின்றன. இந்த நிலையில் சிறிய கட்சிகள் யாருடன் கூட்டணி அமைப்பது? என்ன முடிவெடுப்பது? என்ற பெருங் குழப்பத்துக்கு ஆளாகி உள்ளன.

முதல் முறையாக கடந்த முறை தேர்தல்களத்தை சந்தித்த த.மா.கா.வுக்கு அந்த தேர்தல் ஒரு அக்கினி பரீட்சையாகவே அமைந்தது.

கடைசி நேரத்தில் மக்கள் நலக்கூட்டணியில் சேரும் முடிவை ஜி.கே.வாசன் எடுத்தார். அந்த முடிவு மிகப்பெரிய சறுக்கலாகவே அமைந்தது.

எனவே வருகிற தேர்தலில் மிகவும் ஜாக்கிரதையாகவே கூட்டணி தொடர்பான முடிவை எடுப்பார் என்று அந்த கட்சியின் முக்கிய நிர்வாகிகள் கூறுகிறார்கள்.

ரஜினி, கமல் இருவரது அரசியல் பிரவேசமும் அரசியல் கட்சிகளை யோசிக்க வைத்துள்ளது.

ரஜினியுடன் த.மா.கா.வை சேர்க்கும் முயற்சியும் நடப்பதாக கூறப்படுகிறது.

அதேநேரத்தில் தி.மு.க. செயல் தலைவர் மு.க.ஸ்டாலின் ஜி.கே.வாசனுடன் நட்பு வைத்துள்ளார். 26-ந்தேதி நெல்லையில் நடைபெறும் கருணாநிதி புகழ்வணக்க கூட்டத்துக்கு ஜி.கே.வாசனுக்கும் அழைப்பு விடுத்துள்ளார். அவரும் கலந்துகொள்கிறார்.

இந்த நெருக்கம் கூட்டணிக்கும் கைகொடுக்கலாம் என்று கூறப்படுகிறது. ஆனால் தி.மு.க. கூட்டணியில் இருக்கும் காங்கிரஸ் அதற்கு முட்டுக் கட்டையாக இருக்கும் என்றும் கூறப்படுகிறது.

இதுபற்றி ஜி.கே.வாசனிடம் கேட்டபோது அவர் கூறியதாவது:-

இவை எல்லாமே யூகங்களான தகவல்கள் தான். யூகங்கள் மட்டுமே கூட்டணியை உருவாக்கி விடாது.

ரஜினி அரசியலுக்கு வருவதாக செய்திகள்தான் வருகிறது. ஆனால் இன்னும் அவர் அதிகாரப்பூர்வமாக கட்சி தொடங்கவில்லை. பாராளுமன்ற தேர்தலை சந்திக்க போகிறாரா? சட்டமன்ற தேர்தலை சந்திக்க போகிறாரா? என்று எதையும் அறிவிக்கவில்லை. வெளிவரும் தகவல்கள் அனைத்தும் யூகங்கள் தான்.

கூட்டணி என்பது தேர்தல் நேரத்தில் முடிவு செய்யவேண்டியது. அதற்கான நேரம் இன்னும் வரவில்லை. எனவே அதுபற்றிய சிந்தனையும் இல்லை. யோசிக்கவும் இல்லை. சட்டமன்ற தொகுதி வாரியாக சென்று கட்சியை பலப்படுத்தும் பணியைதான் தீவிரமாக மேற்கொண்டுள்ளோம்.

வருகிற தேர்தலில் த.மா.கா. கூட்டணி என்பது எந்த யூகத்தின் அடிப்படையிலும் அமையாது. மக்கள் மனநிலையும், தொண்டர்களின் உணர்வையும் அறிந்து அதற்கேற்ப முடிவு செய்வோம் என்றார்.

மதுரை:

அ.தி.மு.க. இளைஞர் பாசறை சார்பில் மதுரை முனிச்சாலையில் இன்று புதிய உறுப்பினர் சேர்க்கை நிகழ்ச்சி நடந்தது. இதில் அமைச்சர் செல்லூர் ராஜூ தலைமையில் ஏராளமான இளைஞர்கள் புதிய உறுப்பினர்களாக சேர்ந்தனர்.

நிகழ்ச்சி முடிந்ததும் அமைச்சர் செல்லூர் ராஜூ, நிருபர்களிடம் கூறியதாவது:-

இளைஞர்களுக்கு அவர்களது உழைப்புக்கு ஏற்ற அங்கீகாரம் கொடுக்கும் ஒரே இயக்கம் அ.தி.மு.க. தான். இன்றைக்கு புதிய உறுப்பினர்களாக சேரும் இளைஞர்கள் கூட தகுதியும், திறமையும் இருந்தால் வருகிற உள்ளாட்சி தேர்தலில் அவர்களுக்கு உரிய அங்கீகாரம் வழங்கப்படும்.

அதற்காக கட்சியின் தலைமையிடத்தில் மதுரை மாநகர் மாவட்ட அ.தி.மு.க. சார்பில் பரிந்துரை செய்யப்படும்.

தமிழகம் முழுவதும் ரேசன் கடை ஊழியர்கள் தங்களது கோரிக்கைகளுக்காக நாளை வேலை நிறுத்தத்தில் ஈடுபடப்போவதாக அறிவித்துள்ளனர். அதிகாரிகள் உரிய பேச்சு வார்த்தை நடத்தியும் போராட்டத்தை வாபஸ் பெறவில்லை.

ஊழியர்களின் போராட்டத்தால் நாளை ரேசன் கடை பொருட்கள் வினியோகத்தில் எந்த பாதிப்பும் இருக்காது. வேலை நிறுத்தத்தில் ஈடுபடும் ஊழியர்கள் ரேசன் கடைகளில் பொதுமக்களுக்கு இடையூறு ஏற்படுத்தினால் அவர்கள் மீது உரிய நடவடிக்கை எடுக்கப்படும்.

திருப்பரங்குன்றம் தொகுதி என்றைக்கும் அ.தி. மு.க.வின் கோட்டை ஆகும். அங்கு எப்போது தேர்தல் நடந்தாலும் அ.தி.மு.க. வெற்றிபெறும்.

அ.தி.மு.க.வில் தலைவராக ரஜினிக்கு இடமில்லை. யாராக இருந்தாலும் அ.தி.மு.க.வில் தொண்டர்களாகி படிப்படியாகத்தான் முன்னேற முடியும்.

இவ்வாறு அவர் கூறினார்.

இந்த நிகழ்ச்சியில் மாவட்ட நிர்வாகிகள் துரைப் பாண்டியன், வில்லாபுரம் ராஜா, எம்.எஸ்.பாண்டியன், திரவியம், கலைச்செல்வம், முனிச்சாலை சரவணன் உள்ளிட்ட பலர் கலந்து கொண்டனர். #ministersellurraju #Rajini